Mukulumpi Wawamashidika Namwekeshi Chikuhwelelu Chasweja

Yesu nayi kumusumba waKaperinamu hanyima yakuhana Mpanji yindi yahaMpidi. Kweniku akulumpi jawaYudeya anamuwani. Anayitemeshi kudi iyala wukweti nkulilu yambuka, mukulumpi wawamashidika awaRoma, kapitawu.

Ñamba yamushidika akeñayi nakati chikupu nawa wudi kwakwihi nakufwa. Iwu mukulumpi wawamashidika nakukeña nindi Yesu amukwashi, hela chakwila himukamatuña. AYudeya anamuleji Yesu nawu ñamba yaniwu iyala “nakaami mwitala muloña wakata kalepa nawa nakukabakana chikupu.” (Matewu 8:6) Akulumpi jawaYudeya anamuleji Yesu nawu iwu muntu watela kumukwasha, analumbululi nawu: “Wakeña muza wetu nawa diyi watuñili nisinagogi yetu.”—Luka 7:4, 5.

Hanashimbuli wanyi, Yesu niakulumpi anayi kwitala damukulumpi wawamashidika. Chinashikiwu kwakwihi, iwu mushidika natemeshi amabwambu jindi nakuhosha nawu: “Mukulumpi, bayi wudikabishaku, muloña ami hinnateleli kukutambwila mwitala damiku. Dichaletesha nibuli kwinza kudi eyi.” (Luka 7:6, 7) Muntu wahanaña nshimbi wamwekesheli kudizoza! Nawa chinamwekeshi chaambu chidi hakachi kaniwu iyala nawaRoma asweja kukabisha añamba jawu.—Matewu 8:9.

Chakadi nikujina, iwu mukulumpi wawamashidika weluka nindi aYudeya akeña wanyi kudikunda nawantu abula kwikala Yudeya. (Yilwilu 10:28) Hadaha muloña wachumichi, dichinamuleteshi kuleja amabwambu jindi kulembelela Yesu nawu: “Kuminaku dakuhosha izu nawa lekaku ñamba yami akoli.”—Luka 7:7.

Yesu natiyi kuwaha nachumichi, nawa nahoshi nindi: “Inakuyileja nami, nimuIsarela mwamweni kanda niwaneñahu dehi muntu wudi nachikuhwelelu cheneni neyi ichiku.” (Luka 7:9) Chinakufuntawu kwitala damukulumpi wawamashidika, anawani nawu ñamba yindi wakata chikupu nakoli dehi.

Mpinji yimu Yesu wokilihu muntu chamuchidiwu, nazatishi iyi mpinji hakuhosha nindi antu abula kwikala aYudeya adi nachikuhwelelu akayikiswila, nahoshi nindi: “Antu amavulu akenza kufuma kumusela nikumujika nawa akashakama kaheña kumesa hamu naAbarahama, Isaka niYakoba muWanta wamumawulu.” Indi aYudeya abula chikuhwelelu? Yesu nahoshi nindi “akayinatila hanji mumwidima. Mwenomu dimu mwakadililañawu nikudisumona kumazewu.”—Matewu 8:11, 12.

Dichi, aYudeya aweni akabula kwiteja kukooleka kwakwikala muWanta hamu naKristu akayikaana. Ilaña aKamatuña akayiteja kushakama kaheña kumesa, munjila yikwawu “muWanta wamumawulu.”