Hakwila Mumwimbujoli Yesu Ikalenu. . .
NAWUSHONA
Chineli wadiña wawanina, Yesu hamweni kukala nikwakama kwamweniwu antu amakwawuku. Hela chochu, wayakameneni chikupu antu. Wayikwashileña, nikwila yuma yamweniyi nindi yatelela. Wushona wamuletesheli kukwasha antu amakwawu. Toñojokenu yakutalilahu yidi muTupetulu 32, 37, 57, 99.
ASWAYI KUSOLOMOKA
Antu akweti yaaka yashiyashana, atwansi niakulumpi, adiña akasunuka kwinza kudi Yesu muloña wadiña wakasika wanyi nawa wadiña wadizoza. Antu chamweneñawu nawu wayakameneneña, atiyileña kuwaha kwikala nindi. Hakwila mumoni chumichi, talenu Tupetulu 25, 27, 95.
AKAKULOMBA MPINJI YEJIMA
Mpinji yejima Yesu walombeleña kudi Tata yindi chakufuma hamuchima, kwankawindi nimpinji yadiñayi nawakakudifukula alala. Walombeleña kakavulu, bayi hakuda hohuku. Walombeleña nakumusakilila Tata yindi, kumuhameka nikulomba kulonda amukwashi henohu kanda afuukuli yuma yalema. Talenu yakutalilahu yidi muTupetulu 24, 34, 91, 122, 123.
ABULA KUDIKEÑA
Mpinji yikwawu chatela anooki nakudizañalesha, Yesu watwamijileñaku yuma yakeñeleña akwawu. Wadiña wanyi nachilwilu chakwila nawu chiña ami hohu. Cheliliyi chumichi, twatela kwimbujola chikupu. Dizenu ichi chuma cheliliyi chachishimunawu muTupetulu 19, 41, 52.
NAMUCHIMA WAKWANAKENA
Yesu hakuminini hohu dakutañisha hakwanakenaku, ilaña wayanakeneneña atumbanji twindi niantu. Toñojokenu chikupu hayakutalilahu yidi muTupetulu 26, 40, 64, 85, 131.
ADIKITA CHIKUPU
Ashimwineñahu dehi nawu aYudeya amavulu akamukaana Mesiya nawa ayilumbu jindi akamujaha. Dichi Yesu wadi kuyilila yuma yayivulu wanyi. Ilaña, wadikitili chikupu kutiyakesha kudifukula kwalala. Welili chuma chatela kwimbujolawu atumbanji twindi ejima anakukabishawu hela anakumona ikañesha. Talenu Tupetulu 16, 72, 103.
ADIZOZA
Yesu wadiña wayibadika antu abula kuwanina munjila jajivulu, chidi neyi mumaana nimukwiluka. Chakadi nikujina chineli wadiña wawanina, yuma yelileñayi niyatoñojokeleñayi yabadikili antu adiñayi nawu. Ilaña wadizozeli nakukalakela akwawu. Munateli kuwana iyi nsañu muTupetulu 10, 62, 66, 94, 116.
ADIWUNJIKA
Yesu watwalekelihu kudiwunjika nawapostolu indi niantu amakwawu hampinji yakañenyiwu kumwimbujola hela kuzatisha yuma yahosheliyi. Wadiwunjikili nakufuntishahu nsañu yoyimu kulonda aswini kwakwihi naYehova. Toñojokenu hayakutalilahu yaYesu yakudiwunjika muTupetulu 74, 98, 118, 135.