Kwosi Wunateli Kutemuka Kufwaku
FWIKIJENU munakutala vidiyo yinakumwekesha muntu waya mpuhu, hadaha hiñimbi imwakeña hama. Iyi vidiyo yinatachikili hadiñayi kansi, hiyamudizishileñawu kwimba, nawa nichatwalekeliyi kudiza kwimba. Kuhiñahu himukumumona nakwimba kumaluña kudi antu amavulu, nakwenda mumatuña amavulu nawa nekali muntu waya mpuhu mukaayi kejima. Chakadi nikushimbula, hiyikumwekesha nyevulu nashinakaji dehi nawa kumujimba wakola wanyi, nkumininaku chinakumana vidiyo, iwu muntu yafwa nikufwa.
Bayi neyi iyi vidiyo yakulumbishaku, ilaña yinakumwekesha chuma chamwekeni. Hela chakwila twadi kuhosha hadi ñimbi, sayantisiti, mukwakutemuka lufuchi indi kwiji muntu mukwawu elukawu chikupu, niyena chuma chochimu chadikumumwekena. Hadaha iwu muntu welili yuma yayivulu, ilaña toñojokenu yuma yadi kwilayi neyi wabulili kushinakaja nikufwa.
Neyi tutoñojoka hakufwa twaneñaña, ilaña dichuma chikatumwekena wejima wetu. (Mukwakutañisha 9:5) Hela chakwila tukuzata chamuchidinyi hitunateli kutemuka kushinakaja nikufwaku. Tunateli kufwa muloña wamaposu amwekanaña mukukasumwisha hela chikatu chafwana. Kwesekeja nachahosha Bayibolu, twekala neyi mbundu yantetemena “yamwekanaña hakapinji kantesha kuhiñahu yihita.”—Yakoba 4:14.
Chineli antu eluka nawu anateli kufwa kala mpinji, ekalaña nayitoñojoka yakwila nawu “tudenu nikunwa, muloña kumadiki twakafwa.” (1 Akorinda 15:32) Antu ekalaña naniyi yitoñojoka muloña eluka nawu anateli kufwa mpinji yidi yejima nawa hiyakweti kuchiñejaku. Neyi munakuhita mukukala kwasweja, munateli kudihula nenu, ‘Komana iwu diwumi wekalaku hohu?’ Kudihi kumunateli kuwana ñakwilu?
Antu amavulu atoñojokaña nawu asayantisiti anateli kuyileja ñakwilu. Kuyilaku hambidi mujasayansi niyitumbu kunakwashi antu amakwawu kushakama yaaka yayivulu. Nawa asayantisiti amakwawu anakuzatila hayuma yinateli kukwasha muntu kushakama yaaka yayivulu nankashi. Hichikweti muloña nayuma yinateli kuwanawuku, munateli kudihula cheñi nenu: Muloñadi chitwashinakajilaña nikufwa? Komana chilumbu chetu kufwa akamushinda? Yibaaba yinalondelihu yikuhosha haniyi nsañu nikwakula lwihu lwakwila nawu, Komana iwu diwumi wekalaku hohu?