Kuhituluka Mushikola Yamudimu Wateokalatiki
Awa malwihu adi heshina akayihituluka hakupompa kwaShikola yaMudimu waTeokalatiki mumulungu wakutachika October 30, 2006. Nkoñi washikola wakalombola kuhitulukamu kwajiminiti 30 kushindamena hansañu yadiziluwu mujimpanji jamulungu waSeptember 4 kushika haOctober 30, 2006. [Ilukenu nenu: Malwihu anabuli nyikanda yakutalishaku, mwatela kudisandujolela enu aweni kulonda muwani ñakwilu.—Talenu Nonkelenimo, mafu. 36-7.]
MWAKUHOSHELA
1. Muloñadi kuwunda chikwalemena hakuhosha, nawa tunateli kukeheshaku ñahi kuzaala? [be-CW ifu 135 para. 5–ifu 137 para. 2, niyikasha]
2. Neyi atwihula hayuma yitwakuhwelelamu, muloñadi wutwatelela kufwila kuzatisha Bayibolu hakwakula? [be-CW ifu 143 mapara. 1-3]
3. Tunateli kwikala ñahi akuluka yitembi hakuzatisha Bayibolu? [be-CW ifu 144, nichikasha]
4. Muloñadi chichalemena kuzatisha Bayibolu kakavulu neyi tunakutañisha mumudimu wakushimwina, nawa tunateli kuyizatisha ñahi hakupompa kwachipompelu? [be-CW mafu 145-6, niyikasha]
5. Nkeñelwinyi yiyedi yitwatela kwikala nayu hakutena nsona? [be-CW ifu 147 para. 2]
MPANJI NA. 1
6. Nsañwinyi yashikila nawa yakukwasha yekala mumukanda waMasamu? [si-CW ifu 104 para. 23]
7. Indi mukanda waYishimu awusonekeli nikuwubomba hamu mwakanyi? [si-CW ifu 107 para. 5]
8. Indi chishimu hichumanyi, nawa muloñadi nkumbu yachiHeberu yaniwu mukanda chiyinekalili yashikila? [si-CW ifu 107 para. 6]
9. Kwesekeja naYishimu 2:1-5, indi mazu akukolesha akutwaleka kukeñakeña kwiluka, kutiyishisha, nikashinshi ‘neyi siliva, nawa neyi yuma yalema yaswekawu’ alumbulukadi? [be-CW ifu 38 para. 4]
10. Indi mukanda waYishimu waweni washimunaña ñahi nkeñelu yawu yakuhetesha? [si-CW ifu 109 para. 19]
KUTAÑA BAYIBOLU KWAMULUNGU NIMULUNGU
11. Indi Davidi ‘wamwenesheli ñahi nikuwundisha zo-o muchima windi neyi mwana wasumuka dehi kudi mama yindi,’ nawa twatela kumwimbujola ñahi? (Mas. 131:1-3)
12. Kukundejanyi kwekala mumazu onenawu amuMasamu 139:7-12?
13. Yakutalilahwinyi yikwawu yakutoha kwaYehova yatenawu haMasamu 145 yitwatela kumuhamekelahu mukulomba kwetu nimumudimu wakushimwina? (Mas. 145:3)
14. Munjilanyi kwakama Yehova chikunekalili ‘ntachikilu yakwiluka’ ‘nikutachika kwamaana’? (Yish. 1:7; 9:10)
15. Kwesekeja naYishimu 7:1, 2, chumanyi chiyanabombelumu mumazu akwila nawu “kuleja kwami” ‘ninshimbi jami’?