Wanta Wanyi wumuKutondahu?
1. Muloñadi akwaKristu chiyashimwinaña?
1 Hakwila nawu yakwashi antu afuukuluhu chachiwahi kutalisha hachiyulu, Yesu walejeli atumbanji twindi kushimwina ‘nsañu yayiwahi yawanta’ henohu kukumisha kwakaayi kamakonu kanda kwinzi.—Mat. 24:14.
2. Muloñadi wutukuhoshela netu hakwimenaku Wanta waNzambi, akwaKristu hiyadiwulaña nfulumendi jawantuku?
2 Hakwimenaku Wanta waNzambi, aYinsahu jaYehova hiyadiñijaña munsañu jamatuña nachiyulu hela kusañumuna kudikaña nanfulumendi jamatuñaku. (Tit. 3:1) Ilaña, twafwilaña kukwasha antu adi nanyichima yayiwahi kulonda atachiki kulemesha nshimbi jajiwahi jamuBayibolu. Sweje-e, twafwilaña kuyileja chiyatela kulondela nshimbi jamuBayibolu nikushindamena haWanta waNzambi neyi diwu hohu wukamanisha makabi anakumonawu antu.
3. Muloñadi kwimenaku Wanta waNzambi chikwawahila?
3 Nkisu Yikatambwila Antu Akayulewa naWanta: Yesu mpinji yejima wazatileña yuma kwesekeja nankeñelu yaNzambi. Dichi, chatela yafuukuluhu kulondela njila yindi nikweseka kukwasha hela kuwahisha kaayi kuhitila munsañu jamatuña nachiyulu, wazatili nañovu kulonda kutwala Wanta waNzambi hambidi, muloña diwu hohu wamba kamanisha makabi amukaayi. Hamuloña wakashinshi kindi amwinkeli itanda dawanta dalema mwiwulu. O wuloku kuwaha wamusomwenenuwu hamuloña wakumwovwahila Nzambi!—Dan. 7:13, 14.
4. Indi Wanta waNzambi wakaleta ñahi yuma yalala yakeñaña antu?
4 Makonu yihita yawantu anakwimbujola Yesu kuhitila mukusambila kukeña Wanta waNzambi nikwovwahila nkeñelu yaNzambi niwena anakutambwila wuloku wawuwahi, kukooleka kwakuyulewa naWanta waNzambi hamaseki. (Mat. 6:33) Muchiyulu chachiwahi chaniwu wanta, akayibalumuna kwikala antu awanina, nakuchiñeja kwawumi wahaya nyaka. (Chim. 21:3, 4) Mukanda wa 1 Yowanu 2:17 wahosha nawu: “Mpata yamunu mwishina yikuhita, nikufwila kwayu kwatama, hakwinza muntu welaña muchima waNzambi washakamaña haya nyaka.” Satana niantu jindi chakayifumishahu, niiseki chakadibalumunawu kwikala paradisa mwakabula chaambu chanyuza, majikakanwa mujakulanda nakulandulula, nikudifukula kwakutwamba, o muzañalu wutukatiya hakushakama mumpata yamunu mwishina haya nyaka!—Mas. 37:29; 72:16.
5. Muloñadi nsañu yitwashimwina chayitenenañawu nawu “nsañu yayiwahi”?
5 Eñañi, Wanta waNzambi diwu hohu wukaleta ituña mukekala muzañalu chikupu, ninsañu yinakutiyakesha iwu wanta ayitenaña nawu nsañu yayiwahi.