Chikasha Chalwihu

◼ Komana chachiwahi yipompelu hela antu amuchipompelu kuzatisha chinjikijilu chejina chazatishañawu aYinsahu jaYehova chakuyilukilaku kudi nfulumendi?

Chinjikijilu chejina hiijina hela chinjikijilu chaleñelaña kwiluka chuma swayi-swayi. Chinjikijilu chejina chakwila nawu Watch Tower chemenañaku Watch Tower Bible and Tract Society of Pennsylvania nimazanvu amakwawu etejawu kunfulumendi azatishañawu mukuloñesha. Christian Congregation of Jehovah’s Witnesses azatishaña chinjikijilu chaBayibolu yakubakula hamutu wamukanda. Mazanvu amakwawu etejawu kunfulumendi azatishañawu kudi aYinsahu jaYehova akweti yinjikijilu yamajina ashiyashana.

Yipompelu hela antu amuchipompelu hiyatela kuzatisha yinjikijilu yamajina hela majina akuloñesha amazanvu etejawu kunfulumendi, hela majina adifwana, haMatala aWanta, yinjikijilu, hamutu wamukanda, hayuma yawu niyuma yikwawuku. Kuzatisha yinjikijilu yamajina akuloñesha kunateli kuluwañesha akwanfulumendi, akwakushimwina, niantu amakwawu kutalisha hakunuñañana kwachipompelu namazanvu akuloñesha etejawu kunfulumendi. Nawa cheñi, nyikanda yinasonekuwu atela kuyimona neyi ayiteja hela yinafumi kuchishina chamukaayi kejima hela kukasanji kamutayi.

Chinjikijilu chejina chakwila nawu Watch Tower, hela yinjikijilu yamajina yikwawu hiyatela kuyizatisha kumbidi hanyidimu yakutuña Matala aWantaku, hela chakwila Itala daWanta didi mumakasa ezanvu detejawu kunfulumendi daWatch Tower. Yipompelu yikweti Matala aWanta adi nachinjikijilu chejina chamuchidiwu hiyatela kuhimpa swayi-swayuku, muloña kuhimpa kwamuchidiwu kwakeñekaña kuhimpa yuma yayivulu, mpinji yeneni, kuzata nañovu nimali. Hela chochu, mwatela kutoñojokahu chiwahi neyi kudi kuhimpa chuma chanyanya bayi hanakukeñeka mudimu wenenuku. Neyi hikuhimpa kweneni anateli kukwihimpa hampinji yakuloñesha itala hela chinjikijilu.