Chitwatela Kushika Hanyichima Yawantu Itwadizishaña
1. Ntañishilu yaYesu yayikwashili ñahi antiyilili jindi?
1 Yesu Kristu wayishikileña antiyilili jindi hanyichima. Mpinji yimu, atumbanji twindi atiyili ‘nyichima yawu mumavumu busu’ chelili nayilumbulwili dehi chiwahi jiNsona. (Luka 24:32) Chineli muchima diwatukwashaña kumwovwahila Nzambi, tunateli kusañumuna ñahi antu itwadizishaña kulonda anyakali kuhimpa chihandilu chawu?—Rom. 6:17.
2. Kashinshi nikubabala kwatukwashaña ñahi kushika hamuchima wamuntu?
2 Ikalenu Ababala Nawa Akashinshi: Antu amavulu neyi muyileja hohu yuma yayiwahi niyatama, hiyahimpañaku. Cheñi neyi mukulukukaña yuma yakukuhwelela kuhitila mukuyipopa jinsona jajivulu, munakuyihaña. Hakwila tumusañumuni, twatela kwiluka muloña waletesha yakuhweleli yumiyi nichayililañayi. Neyi mwikala ababala munzatishilu yamalwihu, chikumukwasha yayiloñolweli yuma yejima chiwahi. (Yish. 20:5) Chitwela mwenimu tukusakula nsañu yaMwizu daNzambi yinateli kumushika hamuchima. Dichi, twatela kwikala nampwila yakukwasha antu nikudiwunjika. (Yish. 25:15) Mwatela kwiluka nenu antu apamaña kuspiritu munjila yashiyashana. Hatela kuhita mpinji kulonda spiritu yajila yaYehova yiyikwashi kutoñojoka nikufuukula.—Maku 4:26-29.
3. Tunateli kukwasha ñahi antu itwadizishaña kwikala nayililu yayiwahi?
3 Yikwashenu Ekali naYililu Yayiwahi: Nsañu yamuBayibolu yamwekeshaña kuwaha nikukeña kwaYehova yinateli kuyikwasha antu itwadizishaña kwikala nayililu yayiwahi. Twatela kuzatisha nyikanda yidi neyi Musamu 139:1-4 hela Luka 12:6, 7 kulonda tumuleji netu Nzambi watukeña. Neyi antu ekala namuchima wakwiluka kuwunda kwaYehova, akusweja kumukeña nikumwakama Nzambi. (Rom. 5:6-8; 1 Yow 4:19) Cheñi neyi eluka nawu yililu yawu yinateli kumuneñesha Yehova, akufwila kwila yuma yayiwahi yinateli kumuzañalesha nikumulemesha Yehova.—Mas. 78:40, 41; Yish. 23:15.
4. Neyi tunakushimwina, tunateli kulemesha ñahi wuswa wawantu wakudifukwila?
4 Yehova hakanjikijaña muntu wejima kovwahila nshimbi jinduku. Ilaña, wayilejaña antu nindi alondeleña maana indi nikufumba kwindi. (Isa. 48:17, 18) Twamwimbujolaña Yehova neyi tukwasha antu itwadizishaña kudifuukwila aweni. Neyi antu adifuukula aweni nawu atela kuhimpa chihandilu chawu, mwafumaña yuma yayiwahi. (Rom. 12:2) Cheñi akundamaña kwakwihi naYehova ‘mukwakushinshika munyichima yawantu.’—Yish. 17:3.