Zatishenuña ‘Chawaana chakuSpiritu’ Chimukweti

Wejima wetu twatiyaña kuwaha kudikolesha nawamanakwetu niahela akaKristu hampinji yitunapompi hamu. Ilaña hakwila tudikoleshi chiwahi kudi yuma yikwawu yitwatela kwila kubadika kupompa hohu hamu. Bayibolu yatenaña wuswa wutukweti wakudikolesha wumu namukwawu nawu ‘hichawaana chakuspiritu.’ (Rom. 1:​11, 12) Tunateli kuzatisha ñahi chiwahi ichi chawaana?

Hanenu chawaana chamazu akutonda chachiwahi. Chakutalilahu, tunateli kuhana ñakwilu hakupompa kwetu bayi yinakuhosha hohu hadi etu aweniku, ilaña hadi Yehova, Izu dindi nihadi antu jindi. Hampinji yitunakuhanjeka nawakwetu akakwitiya, tunateli kutondahu kuhanjeka hansañu yakukolesha.

Koleshenu akwenu nayuma yimwafuukulaña niyimwelaña. Chakutalilahu, amanakwetu niahela amakwawu afuukulahu kutwalekahu mumudimu wampinji yejima hela chakwila anakumona kukala. Amakwawu ajiñaña wanyi kukupompa kwamukachi kamulungu, hela chakwila akatakataña indi kwiji mudimu wawu wakumujimba wayizeyeshaña hanyima yakukomboka.

Komana mwayikoleshaña amanakwenu niahela nayuma yimwahoshaña niyimwelaña? Ninenu komana mwasakililaña neyi amanakwenu niahela ahosha hela ela yuma yakuyikolesha?