Munakwanuka?
Komana mwatañili nakanañachima yibaaba yachinu chaaka yaKaposhi Kakutalila? Esekenu kwakula awa malwihu:
Yumanyi Yatusañumunaña Kumwinka Yehova Kalemesha?
Twelaña mwenimu muloña twamulemesha Yehova chikupu nawa twamukeña nankashi. Twamulemeshaña cheñi muloña twakeñaña antu amwiluki.—w25.01, ifu 3.
Neyi muntu atuneñesha, tunateli kwikala ñahi namuchima wakwanakena chikupu?
Hitwadiwulaña chitunakutiyaku; hela chochu, neyi tubula kutwalekahu kuhila nikuhemba nkunyi, tukutondolwela kusukwila ndulu hadi antu acheñi.—w25.02, mafu 15-16.
Muloñadi amanakwetu atwansi chatela kwimbujolelawu yuma yayiwahi yeliliyi Maku?
Maku wetejeli chakufuma hamuchima kukalakala mudimu wamwinkeliwu. Hela chakwila chuma chamwekeni chamukatili kumuchima nikumuneñesha, Maku walekeli wanyi kuzata mudimu windi. Wekalili nawubwambu wakola naPawulu niamanakwindi amakwawu apama.—w25.04, ifu 27.
Yesu watalishili mudihi chalombeliyi nindi: “Ami nakojeji ijina deyi adiluki”? (Yow. 17:26)
Atumbanji twindi adiña eluka dehi ijina daNzambi. Ilaña Yesu wakojejeli ijina daYehova adiluki chachiwahi, mwabombela nkeñelu yindi, nyidimu yindi niyilwilu yindi.—w25.05, mafu 20-21.
Neyi twadikehesha, chumanyi chitweluka?
Tweluka netu hitweluka yuma yejimaku. Chakutalilahu, tuneluki wanyi mpinji yakenza kukuma hela chakelayi Yehova hayina mpinji. Nawa tuneluki wanyi yuma yakamwekana kumadiki hela kwiluka chikupu Yehova chatwilukayi.—w25.06, mafu 15-18.
Yumanyi yitunateli kwila hakwila chibaaba hela mpanji yawantu amavulu yitukwashi?
Tunateli kudihula etu aweni netu: ‘Yikumanyi yinazatishiwu yinateli kukwasha antiyilili kukuhwelela ichi chalala chamuBayibolu? Kudihu chakutalilahu chachiwahi chinatela kuzatisha hakudizisha muntu chalala? Hinyi wunateli kutiya kuwaha kutiyilila kuniyi nsañu, nawa mpinjinyi yinatela kumuleja ichi chalala?’—w25.07, ifu 19.
Yumanyi yitunateli kudizila kunochu Nzambi chamwanakeneniyi Davidi?
Hela chakwila Davidi wakoñeli nshidi jamaneni, chabalumukiliyi mumuchima chikupu, Yehova wamwanakeneni. (1 Anya. 9:4, 5) Neyi Nzambi yanakena, hatwalekañahu kwanuka chiluwa chakoñeliyi mukanshidi hela kuchizatisha cheñi kumwinkelahu muloña kumbidiku.—w25.08, ifu 17.
Neyi kudi chikuma chinakumukalila kadizi waBayibolu kutiyisha, chumanyi chimwatela kwila?
Neyi kudi chikuma chinakumukalila kutiyisha nihanyima yakumulumbulwila chiwahi kuzatisha Bayibolu, shiyenu ochu chikuma nawa loñeshenu kulonda mwakahanjekihu mpinji yikwawu.—w25.09, ifu 24.
Bayibolu yahosha nawu nshidi yekala “nañovu yakudimbana.” (Heb. 3:13) Munjilanyi?
Nshidi yinateli kutukokola kulonda tukoñi yuma yatama. Yinateli cheñi kutudimba kulonda tutwalekihu kujinoka neyi chakwila mwamweni Nzambi watukeña.—w25.10, ifu 16.
Yumanyi yisatu yitwatela kwila yinateli kutukwasha kuwahishaku kulomba kwetu?
(1) Twatela kutoñojokaña hayilwilu yaYehova. (2) Twatela kutoñojokaña hakukala kutunakuhitamu nikukutena mukulomba, chidi neyi kwikala namuchima wakwanakena akwetu. (3) Twatela kuleheshañaku kulomba kwetu. Chumichi chinateli kutukwasha chikupu kushimuna yuma yejima yidi kumuchima mukulomba.—w25.10, mafu 19-20.
Tunateli kukwasha ñahi antu akula dehi?
Tunateli kuyihempula hela kuyitemeshela mafoni. Tunateli cheñi kuyitwalaku neyi anakuya nakudimona nandotolu. Hela tunateli kuzatila hamu nawu mumudimu wakushimwina kuzatisha njila jashiyashana.—w25.11, mafu 6-7.
Yumanyi yalema yinateli kuletesha chawija chawulu chawakaKristu kwikala chakalemesha?
Mwatela kwovwahila nshimbi janfulumendi jahosha hawulu. Zatenu nañovu kulonda mwakamwekeshi nyikaabu yaspiritu yaNzambi hachawija nikurisepishoni. Mwatela kuvwala yakuvwala yakalemesha nikuzata nañovu kutondolwela tushidikilu twabula kwikala twamuNsona. Hanjekenuña chiwahi hampinji yimunakuloñesha chawija chenu.—w25.12, mafu 21-24.