MPANJI 63
Solomoni Mwanta waMaana
SOLOMONI wuchidi mukwenzi hampinji yanekaliyi mwanta. Hakumukeña Yehova, nawa hakulondela kufumba kwakuwahi kwamufumbiliwu kudi tata yindi Davidi. Yehova hakumutiya Solomoni kuwaha, dichi ifuku dimu nawufuku hakumwila muchilota nindi: ‘Solomoni wunakukeña nukwinki chumanyi?’
Solomoni hakwakula nindi: ‘Yehova Nzambi yami, ami nichidi kansi chikupu, nawa hineluki mwakuyulilaku. Dichi dinu nyinki maana kulonda niyuli antu jeyi munjila yaloña.’
Yehova hakutiya kuwaha hachuma chinalombiyi Solomoni. Hakuhosha nindi: ‘Muloña wunanlombi maana bayi kuhanda mafuku amavulu hela mahetaku, nukukwinka maana chikupu kubadika muntu wudi wejima wahandahu dehi. Ilaña nukukwinka cheñi nichiwabula kulomba, maheta nikulema.’
Mwahitili hohu mpinji yantesha ambanda ayedi hiyakwinza kudi Solomoni namuloña wakala. Mumbanda wumu hakulumbulula nindi, ‘Ami naniwu mumbanda twashakamaña itala dimu. Navweli mwana weyala, chimunahiti mafuku ayedi niyena hakuvwala mwana weyala. Dichi ifuku dimu nawufuku mwanindi hakufwa. Hampinji yinadiña mutulu, hakwinza nakusha mwanindi hakadidi kami nakusendaku mwanami. Chinahindukili hinikutala hadi mwana wafwa, hinukwiluka nami himwanamiku.’
Mumbanda mukwawu hakuhosha nindi: ‘Nehi! Mwana wamumi wamami, wafwa dimwanindi!’ Mumbanda watachi hakuhosha nindi: ‘Inehi! Mwana wafwa dimwaneyi, hakwila wamumi diwamami!’ Ambanda hiyakuditadikisha chenichi. Indi Solomoni wukwila ñahi?
Hakulomba mpoku yakabali, chanaletiwu hakuhosha nindi: ‘Balulenu mwana wamumi hakachi, mwinki mumbanda wumu mutamba mukwawu niyena mutamba.’
Yomweni mwana hakudila nindi: ‘Inehi. Mwani bayi mumujaha mwanaku. Mwinkenu mwanindi!’ Ilaña mumbanda mukwawu hakuhosha nindi: ‘Bayi wutwinka wejima wetuku, mubaluli hayedi.’
Nkumininaku Solomoni hakuhosha nindi: ‘Bayi mumujaha mwanaku! Mwinkiyi mumbanda watachi. Diyomweni mwana.’ Solomoni neluki chikupu muloña mama yindi wamukeña mwanindi chakwila neteji kumuhana kudi mumbanda wacheñi, hakwila abuli kumujaha. Chanatiyiwu antu chanaketuliyi Solomoni muloña, hiyakutiya muzañalu hakwikala namwanta wamaana chochichi.
Mumpinji yakuyula kwaSolomoni, Nzambi hakuyikiswila antu kuhitila mukwilisha iseki kwidisha tidiku nibali, nivinyu, ninkuyu niyakudya yikwawu yayivulu. Antu anakuvwala yikovwelu yayiwahi nakushakama mumatala amawahi. Antu ejima adi nayuma yayivulu yayiwahi nankashi.