MPANJI 109
Petulu Namuhempuli Konelisu
ONA diyi kapostolu Petulu wunemani hana, nawa ana adi kunyima yindi hiyamabwambu jindi. Dichi muloñadi iwu iyala chinakumufukaminayi Petulu? Komana watela kwila ñana? Wunamwiluki?
Iwu iyala diyi Konelisu. Diyi mukulumpi wamashidika awaRoma. Konelisu hamwiluka Petuluku, ilaña amulejeli nawu amutambiki kwitala dindi. Tutalenu ntahi chichadiña.
Atumbanji twaYesu akusambila adiña aYudeya, ilaña Konelisu hikaYudeyaku. Ilaña wamukeña Nzambi, walombaña kudi Nzambi, nawa welilaña antu yuma yayiwahi. Ifuku dimu nampinji yamwaana kañelu hakumwekana kudi yena nakumuleja nawu: ‘Nzambi nakutiyi kuwaha nawa wukwakula kulomba kweyi. Temeshaku amayala akatambiki muntu wejina daPetulu. Nakushakama muYopa kwitala daShimona, washakamaña kwakwihi nakaluñalwiji.’
Hohenohu Konelisu hakutemesha amayala nakumukeña Petulu. Kwifuku dekwawu, chineli amayala hiyakushika kwakwihi naYopa, Petulu wudi hewulu detala daShimona. Henahana Nzambi hakumwilisha Petulu kutoñojoka neyi nakumona ihina deneni dinakuzelumuka kufuma mwiwulu. Mwihina mudi anyama anyitundu yejima. Kwesekeja nanshimbi yaNzambi, awa anyama adiña amajilu kuyidya, hela chochu izu hidikuhosha nawu: ‘Nyamukaku, Petulu. Jahaku wudyi.’
Petulu hakwakula nindi, ‘Inehi! Kanda nidyeñahu dehi chuma chajilikawuku.’ Ilaña izu hidikumuleja Petulu nawu: ‘Lekaku kutena chuma chinatokeshiyi Nzambi neyi chamajilu.’ Hichikumwekana mapampa kasatu. Henohu Petulu wuchidi kujiñoka muchinayili, amayala atemesheliwu kudi Konelisu hiyakushika kwitala nakumukeña Petulu.
Petulu hakusuluka heshina nakuhosha nindi: ‘Yami iyala munakukeña. Munenjilidi?’ Chineli amayala alumbululi nawu kañelu walejeli Konelisu kumutambika Petulu kwitala dindi, Petulu hakwiteja kuya nawu. Kwifuku dekwawu Petulu nawamabwambu jindi hiyakuya nakumuhempula Konelisu kuKesareya.
Konelisu napompeshi hamu antaña jindi niamabwambu jindi adikundayi nawu. Chanashikiyi Petulu, Konelisu hakumuhumañana. Hakudinata hamaseki nakufukama kunyendu yaPetulu neyi chiwunamoni ahanu. Ilaña Petulu hakuhosha nindi: ‘Imanaku, ami nimuntu hohu.’ Eña, Bayibolu yamwekeshaña nawu chaluwa kufukama nakudifukula kudi muntu. Twatela kudifukula hohu kudi Yehova.
Petulu hakushimwina kudi ana apompeli. Petulu hakuhosha nindi: ‘Neluki dehi nami Nzambi wetejaña antu ejima anakukeña kumukalakela.’ Henohu wuchidi kuhosha, Nzambi hakutemesha spiritu yindi yajila, dichi antu hiyakutachika kuhosha mumadimi ashiyashana. Ichi hichikuyihayamisha atumbanji eniYudeya ana enjili naPetulu, muloña atoñojokeleña nawu Nzambi wetejaña hohu aYudeya. Ichi hichikuyidizisha nawu, Nzambi hamonaña antu amuchidi wumu neyi amawahi hela alema kudi Yena kubadika antu akumuchidi wacheñiku. Ichi komana hichuma chachiwahi chitwatela kwanukaña wejima wetuku?
Yililu 10:1-48; 11:1-18; Chimwekeshu 19:10.