Kapetulu 9
Yisaka yawaNvwali Ajiki Yinateli Kutwesha!
1-3. Chumanyi chinaleñeli yisaka yawanvwali ajiki kuvulilaku, nawa kukalanyi kwamonaña yisaka yeniyi?
YISAKA yikweti nvwali wumu yinakuvulilaku chikupu mukaayi kejima. Naambala yawantu anakudiseña, nikudihayika, nikwambuka, nianyana amuyiputa yinakuleta kukala kweneni chikupu kudi anvwali nianyana amavulu.
2 Mama yawantu mujiki wasonekeli nindi, “Nidi nayaaka 28 nawa nidi ntuluwa, nikweti anyana ayedi. Nidi nachineñi cheneni chikupu muloña hinakukeña kukulisha anyanami chakadi tata yawuku. Kwosi nimuntu wanñakamenaña. Kakavulu anyanami amonaña inakudila, nawa ichi chayineñeshaña.” Hela chakwila anvwali ajiki ekalaña nandulu, chineñi, niwuudi, anvwali ajiki amavulu amonaña kukala kwakuyaña kunyidimu nikuzata nyidimu yahetala. Kwikala nvwali mujiki hichuma chakala. Hanyima yakudikita nyidimu yayivulu mukwiluka chakuyizata. Ilaña chimwayiluka, mukukasumuka kunenzi nyidimu yikwawu.
3 Kakavulu atwansi ekala muyisaka yawanvwali ajiki niwena amonaña kukala. Anateli kuneña chikupu neyi nvwali yafuma hetala mukukasumwisha hela yafwa. Anyana amavulu ekalaña mukukala chikupu neyi nvwali hadi mwiluñaku.
4. Tweluka ñahi netu Yehova wakamenaña yisaka yawanvwali ajiki?
4 Yisaka yawanvwali ajiki yadiña kwoku nikunyaka. Kakavulu Nsona jahosha hadi “mwana wanshona” nihadi ‘antuluwa.’ (Kwidika 22:22; Kuhituluka 24:19-21; Yoba 31:16-22) Yehova Nzambi hadiwili kukala kwawuku. Ñimbi yamasamu wamuteneni Nzambi nindi “diyi tata yawanshona, diyi mukwakuyisompela antuluwa.” (Masamu 68:5) Mwalala, nimakonu Yehova wakamenaña yisaka yawanvwali ajiki! Eñañi, Mwizu dindi mwekala nshimbi yatela kuyikwasha kuhemba yisaka yawu.
KWILUKA NYIDIMU YAHETALA
5. Indi anvwali ajiki amonaña kukala kwamuchidinyi hakutachika?
5 Shinshikenu hamudimu wekala mukuzata nyidimu yahetala. Mumbanda wumu aseñawu wahosheli nindi: “Kakavulu naditoñeshaña nami mutenowu nfumwami wadiña hohu. Chidi neyi itala denu dinafwi chikupu nawa munakañanyi nihakutachikila.” Cheñi amayala anaseñuwu hela anekali antuluwa niwena aluwankanaña nanyidimu yayivulu yatela kuzatawu hetala. Yuma hetala chiyaluwankana, yaleñelaña anyana kwikala nawoma nikubula kushakama mukuwunda.
6, 7. (a) Chakutalilahwinyi chachiwahi chemikili mumbanda “washinshika” watenawu muYishimu? (b) Indi kuzata nañovu nyidimu yahetala kwakwashaña ñahi yisaka yawanvwali ajiki?
6 Chumanyi chatela kuyikwasha? Talenu chakutalilahu chemikayi “mumbanda washinshika” walumbululawu haYishimu 31:10-31. Nyidimu yakoñañayi yakuhayamisha, yidi neyi kulanda, kulandulula, kuchima, kuteleka, kuswekeja mali muyuma yamaneni, kudima nikutala mudimu wakulanda nakulandulula. Wadiña nakajindilwinyi? Wadiña wadikita, wahumishileña itañwa nakuzata nawa wahindukileña nantetemena yayeni nakuzata nyidimu yindi. Nawa wazatileña nyidimu yindi chachiwahi, nikwinka amakwawu nyidimu nawa wakwashileña amakwawu. Dichamuhamekelawu chikupu!
7 Neyi wudi nvwali mujiki, shaku maana kunyidimu yahetala. Mwatela kuzañalala nanyidimu yimwakalakalaña hetala, muloña yazañaleshaña anyanenu. Hela chochu, kufuukula chachiwahi nikuloñesha kwalema chikupu. Bayibolu yahosha nawu: “Yitoñojoka yamukwakudikita yatwala kwamukuvulisha hohu.” (Yishimu 21:5) Tata yawantu mujiki wahosheli nindi: “Hinatoñojokaña hayakudyaku, sampu nitiya nzala.” Ilaña yakudya yakuloñeshela mumesu awunda yawahaña chikupu kubadika yakuloñesha mulufuchi. Cheñi munateli kwiluka jinjila jajiha jakuzatilamu nyidimu yahetala. Kuhitila mukwihula amabwambu jawu hela antu amakwawu, mama yawantu mujiki nateli kudiza chakutuña yifufu, hela kutadika yimuna.
8. Nyidimwinyi yahetala yatela kuzatawu anyana akweti anvwali ajiki?
8 Komana chachiwahi kuleja anyana kuyikwashaku nyidimu? Mama yawantu mujiki wahosheli nindi: “Neyi wunakukeña anyana azateñaku nyidimu yazatileña nvwali wunabuli mwiluña watela kuyinkaña nyidimu yapela.” Dimu, hadaha mwana hakwitejaña mpinji yejimaku. Kunyaka atwansi amwakamineña Nzambi ayinkeleña nyidimu yahetela yashikila. (Kutachika 37:2; Kamina 1:6) Dichi, hela chakwila mwatañaku maana kulonda kubula kuyinka nyidimu yayivulu, chikuwaha neyi mukuyinka nyidimu yidi neyi kukosa yeña nikukomba mwakamañawu. Komana kwila muzatila hamu nyidimu yikwawu nehi? Neyi mwila mwenimu mukudiluñishaña chikupu.
KUKALA KWAKUWANA MWAKUHANDILA
9. Muloñadi anvwali ajiki kakavulu chamwenañawu kukala kwamali?
9 Anvwali ajiki amavulu chayikalilaña kuwana mali, niamama jawantu achidi atwansi nawa ajiki niwena chayikalilaña chikupu.a Mumatuña mwakwashaña nfulumendi antu anakankili, anateli kwiteja iwu wukwashu kushika nimpinji yakawanawu mudimu. Bayibolu yeteja akwaKristu kutambula wukwashu weniwu neyi chinatwesheki. (Aroma 13:1, 6) Antuluwa niaseñawu amonaña kukala kwokumu. Amavulu chayileñelaña kutachika kukeña cheñi nyidimu hanyima yakuzata nyidimu yahetala hadi yaaka yayivulu, kakavulu eñilaña nyidimu kwayinkañawu nfwetu yantesha. Amakwawu awahishaña chihandilu chawu kuhitila mukutachika maprogiramu akudiza nyidimu iku anakuzata hela kudiza shikola yakampinji kantesha.
10. Indi mama yawantu mujiki nateli kuyileja ñahi anyanindi muloña wunakukeñelayi kuzata mudimu?
10 Hampinji yimunakukeña nyidimu bayi muhayama hela kwakama neyi anyanenu anakumwekana kuneñaku. Ilaña, yilumbulwilenu kulonda eluki muloña wumunakukeñela kuzata, nawa yikwashenu eluki nawu Yehova wakeñaña nindi muyakameneña munjila yayiwahi. (1 Timotewu 5:8) Mukuhita kwamafuku, anyana amavulu enjililaña. Hela chochu, mwatela kwikalaña nawu mpinji yeneni hela chakwila mukweti nyidimu yayivulu. Kwakamenaña muniyi njila kwakeheshaña kwakamena kwatela kumona chisaka hansañu yamali.—Yishimu 15:16, 17.
HINYI WATELA KUHEMBA AKWAWU?
11, 12. Yumanyi yatela kutondolwelawu anvwali ajiki, nawa anateli kwila ñahi mwenimu?
11 Neyi chichekala anvwali ajiki adikundaña chikupu nawanyanawu, ilaña atela kwiluka mwakukumina kulonda abuli kumotoka mudimu wayinka Nzambi anvwali nianyana. Chakutalilahu, kukala kweneni kunateli kumwekana neyi nvwali mujiki nakukuhwelela mwanindi weyala kuzataña nyidimu neyi mutu wetala hela yamumonaña mwanindi wamumbanda neyi ibwambu dindi chikupu, nakumulumbikilaña kukala kwejima kukwetiyi. Kwila mwenimu chaluwa, nawa kwazeyeshaña, hadaha nikuluwañesha mwana.
12 Yilejenu anyanenu nenu, hakwikala anvwali mukuyakamenaña bayi neyi wena diwu akuyakamenañaku. (Esekejenu 2 Akorinda 12:14.) Mpinji jikwawu munateli kwihula mwakwilili hela kukeña wukwashu. Mwatela kwihula aeluda akwaKristu hela kudi akulumpi awambanda akwaKristu, bayi anyanenu anyanyaku.—Titusa 2:3.
TWALEKENUHU KUFUMBA
13. Kukalanyi kutalisha hakufumba mwana kunateli kumonayi mama yawantu mujiki?
13 Muntu weyala anateli kumutiyilila chikupu neyi nakufumba anyana, ilaña wamumbanda hiyanateli kumutiyilila nankashuku. Mama yawantu mujiki wahosheli nindi: “Mwanami weyala wamwekanaña neyi himukulumpi. Mpinji jikwawu chakalaña kuyifumba hamuloña wakwila namwekanaña kukeha.” Kubombelahu, hadaha muchidi kudila mwinikwenu wafwa, hela muchidi nandulu nikuhilashana hamuloña wakudiseña. Neyi mwatiyañeni nenu mwakahembelaña anyana hamu, munateli kutiya woma nenu hadaha mwanenu wukukeña kushakamaña nawadiña mwini kwenu. Nshakaminu yamuchidiwu yinateli kuyikañesha kufumba mwana chachiwahi.
14. Indi anvwali ajiki anateli kwikala ñahi nayitoñojoka yayiwahi kutalisha hakufumba?
14 Bayibolu yahosha nawu “Ilaña mwana wakuleka tuhu chochina watiyishaña mama yindi nsonyi.” (Yishimu 29:15) Yehova Nzambi wukuyikwasha hakutuña nshimbi yamuchisaka, dichi bayi mwaakamaña, nikutiya chineñi hela womaku. (Yishimu 1:8) Bayi mudiwula nshimbi jamuBayiboluku. (Yishimu 13:24) Mwatela kwikala nakashinshi, nikutwalekahu kufumba, nikwikala akola. Mukuhita kwampinji anyana amavulu atachikaña kutiyilila. Hela chochu, mwatela kutoñojokelaku anyanenu. Tata yawantu mujiki wahosheli nindi: “Nahimpili njila yakuyifumbilamu anyana, muloña achidiña nachineñi chakufwa kwamama yawu. Nahoshaña nawu mpinji yejima. Hampinji yakuloñesha kudya kwamelela, twahanjekaña hayuma yamuchisaka. Dihu hatachikañawu kunlejawu yuma yidi kunyichima yawu.”
15. Yumanyi yatela kutondolwela nvwali aseñawu neyi nakuhosha hadi wadiña mwini kwindi?
15 Neyi ayiseña, bayi musawulaña wadiña mwini kwenuku. Kubobola kwaneñeshaña anyana nawa anyana akuleka kuyilemesha wejima wenu. Dichi, mwatela kutondolwela kuzatisha mazu atama adi neyi: “Wudi nayililu yatama neyi yatata yeyi!” Hela chakwila wadiña mwini kwenu wayineñesheli, wuchidi nvwali yamwanenu, dichi wejima wenu mwatela kumukeña, kumwakamena, nikumufumba mwana.b
16. Maprogiramwinyi akuspiritu mwatela anvwali ajiki kufumbilañawu anyana mpinji yejima?
16 Neyi chashimunawu mutupetulu tunafumuhu, kufumba kwabombelamu kudizisha, nikuleja bayi neyi kubabesha hohuku. Maprogiramu amawahi akufumba kuspiritu anateli kukañeshaku kukala. (Afwilipi 3:16) Kuwanikaña kukupompa kwawakwaKristu kwalema chikupu. (Aheberu 10:24, 25) Kudiza kwachisaka mulungu nimulungu nikwena kwalema. Eñañi, hichekala chapela kulombolaña iku kudiza mpinji yejimaku. Mama yawantu wumu wukweti kashinshi wahosheli nindi, “Chiwafuma kunyidimu wukukeña neyi wunooki. Ilaña nelukilaña chadimu nami twatela kudiza namwanami wamumbanda, muloña dichuma chitwatela kwila. Mwanami wadiluñishaña chikupu kudiza kwachisaka!”
17. Chumanyi chitwatela kudizila kunjila yayiwahi yamukulishililuwu Timotewu ibwambu daPawulu?
17 Timotewu, ibwambu dakapostolu Pawulu, amudizishili nshimbi yamuBayibolu kudi mama yindi ninkaaka yindi, ilaña hiyamudizishili kudi tata yinduku. Ilaña, Timotewu wakulili nakwikala mukwaKristu! (Yililu 16:1, 2; 2 Timotewu 1:5; 3:14, 15) Ninenu mwatela kukuhwelela yuma yayiwahi chimunakufwila kukulisha anyanenu “nakuyibabesha nikuyikonkomwena mudi Mwanta.”—Aefwesesa 6:4.
CHAKUMANISHA WUUDI
18, 19. (a) Indi nvwali mujiki nateli kutachika ñahi kutiya wuudi? (b) Kufumbanyi kunahanuwu kunateli kukwasha kutondolwela kufwila kwakumujimba?
18 Nvwali wumu mujiki wahosheli nindi: “Chinafunta kwitala nawa nanuka nami nindi nkawami, sweje-e neyi anyana anakami dehi, natiyaña wuudi chikupu.” Mwalala, kakavulu wuudi dikukala kweneni kwamonañawu anvwali ajiki. Muntu wejima wakeñaña kwikala nawubwambu wawuwahi chikupu mumaluwi. Komana muntu nateli kumanisha iku kukala hela chakwila hakweti mukwawu wamumaluwuku? Mumpinji yaPawulu anfwila achidiña ansanda ‘alekeli kukeña Kristu, nakufwila kusumbuka cheñi.’ (1 Timotewu 5:11, 12) Kwiteja kufwila kwakumujimba kukañeshi yuma yakuspiritu kwafwana.—1 Timotewu 5:6.
19 MukwaKristu wumu weyala wahosheli nindi: “Hela chakwila muntu nateli kutiya wuvumbi chikupu, ilaña nateli kudiyula. Neyi wutachika kutoñojoka hawuvumbi, bayi wutwalekahu kutoñojokahuku. Watela kuyifumisha muyitoñojoka yeyi. Cheñi chikuyikwashaku kutoñojokaña hadi mwanenu.” Izu daNzambi datufumbaña nawu: ‘Dichi jahenu yidi yenu yidi neyi kufwila kwila wuvumbi.’ (Akolose 3:5) Kutondolwela kwila wuvumbi, chinakulumbulula kutondolwela nyevulu yanzekesi hela kudikunda nawantu ahoshaña hohu hansañu jawuvumbi.
20. (a) Wubanjinyi wekalaña mudi antu akeñaña kwiñila mumaluwi namuntu wabula kwitiya? (b) Indi ajiki muyaaka nkulakaji yakusambila nimakonu ashinda ñahi wuudi?
20 AkwaKristu amakwawu atachikaña kudikunda namuntu anakukeñawu kudisumbula nindi wabula kwitiya. (1 Akorinda 7:39) Komana kwila mwenimu kwamanishaña kukala kukwetuwu? Inehi. Mumbanda wumu mukwaKristu aseñeluwu wasoñamishili nindi: “Kusumbuka namuntu wabula kushikilamu kwatama chikupu kubadika nikushakama wujiki!” AkwaKristu antuluwa amuyaaka nkulakaji yakusambila adiña nakutiya wuudi chikupu, ilaña ashinshika akalakeleña chikupu nyidimu yidi neyi ‘kwakamena enyi, kuwelesha nyendu yawakwakujila, nikukwasha amweneña kukala.’ (1 Timotewu 5:10) Makonu, akwaKristu ashinshika anashakami yaaka yayivulu kulonda kukeña mukwawu wamumaluwi wakamaña Nzambi niwena akalakalaña chikupu. MukwaKristu ntuluwa wayaaka 68, wahempwileña akwawu antuluwa chatiyayi wuudi. Wahosheli nindi: “Kuhitila mukuhempula akwetu antuluwa, kuzata nyidimu yahetala, nikwakamena wuspiritu wami chaleñelaña kubula kutiya wuudi.” Kudizisha antu haWanta waNzambi diwu mudimu wabadika kuwaha.—Matewu 28:19, 20.
21. Indi kulomba nikudikunda kwakuwahi kunateli kukwasha ñahi muntu kukañesha wuudi?
21 Mwalala, kwosi chuma chinateli kumanisha wuudi mukunyakashana. Ilaña munateli kumika nawuudi kuhitila muñovu jaYehova. Ñovu jeniji jenzaña neyi mukwaKristu ‘yakakelaña mukulembelela nakulomba nimwaana niwufuku.’ (1 Timotewu 5:5) Kulembelela hikulomba kwakweni, kwakulembelela wukwashu, hadaha nikudila chikupu. (Esekejenu Aheberu 5:7.) Kumulejamu Yehova kukala kumukweti ‘mwaana niwufuku’ kwakwashaña chikupu. Cheñi, kudikunda nawantu amawahi kunateli kumanisha wuudi. Kuhitila mukudikunda kwakuwahi, muntu nateli kukoleshewa ‘nezu dadiwahi’ dalumbululawu haYishimu 12:25.
22. Yumanyi yinateli kuyikwasha neyi mwavulaña kutiya wuudi?
22 Neyi kakavulu mwatiyaña wuudi, ilukenu nenu kwosi muntu washakamaña hohu chiwahi chakadi makabuku. Mwalala, “ana kwenu adi mumpata yamunu mwishina niwena enda awanisha makabi wowamu.” (1 Petulu 5:9) Tondolwelenu kutoñojoka hayuma yahita dehi. (Mukwakutaŋisha 7:10) Toñojokenuña hayuma yayiwahi yimwadiluñishaña. Sweje-e dinu, fwilenu kuhemba kashinshi kenu nikumutiyisha Yehova kuwaha.—Yishimu 27:11.
NJILA YATELA KUYIKWASHILAMU AMAKWAWU
23. Mudimwinyi wukwetuwu akwaKristu kutalisha kudi anvwali ajiki muchipompelu?
23 Wukwashu wafumaña kudi akwetu akwaKristu walema. Yakoba 1:27 yahosha nawu: “Yijila yamonañayi Nzambi Tata yetu nindi yalala yayiwahi, yoyakuhempula anshona abula atata jawu, niambanda anfwila hamonañawu lukadi.” Eñañi, akwaKristu akweti mudimu wakukwasha yisaka yawanvwali ajiki. Njilanyi yayiwahi mutunateli kuyikwashila?
24. Indi yisaka yawanvwali ajiki anateli kuyikwasha ñahi?
24 Munateli kuyinka yuma yakumujimba. Bayibolu yahosha nawu: “Muntu wukweti yuma yampata yamunu mwishina, wukumona mana kwindi nayibuli, hakumuumina muchima windi mwivumu, kukeña kwaNzambi kukutwesha kushakama mudi yena ñahi?” (1 Yowanu 3:17) Izu dachiGriki dakwila nawu “wukumona” bayi neyi datalisha kukukewukila hohuku, ilaña datalisha mukumona chikupu. Ichi chinakumwekesha nawu mukwaKristu wukweti luwi watela kusambila kwiluka chidi nshakaminu yachisaka niyuma yinakankiluwu. Hadaha anakukeña mali. Amakwawu anateli kukeña kuyiloñeshelaku yuma mwitala. Anateli kutiya kuwaha kuyitambika kulonda kudya nawu kudya kwamelela hela kuhanjeka nawu.
25. Indi anakwetu akwaKristu anateli kumwekesha ñahi luwi kudi anvwali ajiki?
25 Kubombelahu, 1 Petulu 3:8: yahosha nawu: “Toñojokenu wejima wenu mwomumu, nakutiyila akwenu wushona, nakukeñañana neyi chamwivumu denu, nakwikala nanyichima yaluwi, nayitoñojoka yakudizoza.” Nvwali mujiki wudi nanyana 6 wahosheli nindi: “Chankalilaña chikupu nawa mpinji yikwawu chaneñeshaña hama. Hela chochu, mpinji jikwawu amana kwetu hela ahela añilaña nawu ‘muhela Joan wunakuzata mudimu weneni. Yuma yakafumamu yayiwahi hama.’ Kwiluka nami amakwawu atoñojokaña hadami nawa añakamenaña chakwashaña chikupu.” Ambanda akwaKristu akulumpi atela kukwasha chikupu anvwali ajiki achidi atwansi, kutiya munakuhoshawu neyi akweti kukala kunateli kukañanyawu kuhosha namuntu weyala.
26. Indi amayala akwaKristu anateli kukwasha ñahi anyana anshona?
26 Amayala akwaKristu niwena anateli kukwashana munjila jikwawu. Yoba, muntu waloña wahosheli nindi: ‘Napulwishaña . . . nianshona abulaña wakuyikwasha.’ (Yoba 29:12) Makonu, amayala akwaKristu niwena amwekeshaña chikupu kukeña kudi anyana abula atata jawu nikumwekesha “kukeña kwakufuma mumuchima” bayi kwahakanwaku. (1 Timotewu 1:5) Chakadi kudiwula yisaka yawu, mpinji jikwawu anateli kuyileja atwansi wenawa kuzata nawu mumudimu wawakwaKristu nikuyitambika kuwanewa kukudiza kwachisaka hela kuya nakuhema nawu. Kumwekesha luwi muniyi njila kunateli kukiña mwana wanshona kubula kudiñija munjila yatama.
27. Wukwashu wamuchidinyi watela kutambwilawu anvwali ajiki?
27 Dichi, anvwali ajiki atela ‘kudisendela yiteli yawu iwu nachindi, iwu nachindi.’ (Aŋalija 6:5) Hela chochu, anateli kuyikeña kudi amana kwawu niahela akwaKristu nikudi Yehova Nzambi. Bayibolu yahosha hadi Yehova Nzambi nawu: “Wayikwataña chachiwahi nianshona nianfwila.” (Masamu 146:9) Kuhitila muwukwashu Windi wawuwahi, anvwali ajiki anateli kuhemba yisaka yawu!
[Tumazu twaheshina]
a Neyi mukwaKristu wakansi yemita hamuloña wakujikwa, chipompelu chawakwaKristu hichetejaña yililu yamuchidiwuku. Ilaña neyi yabalumuka mumuchima, aeluda niantu amakwawu muchipompelu anateli kumukwasha.
b Hitunakuhosha hansañu yakukiña mwana kudi nvwali walukambuku. Cheñi, neyi wadiña mwini kwenu nakukeña kukañesha wuswa wumukweti hadi anyanenu, hadaha nakukeña anyana afumi kudenu, chikuwaha neyi mukuyilejamu amabwambu jenu apama, chidi neyi aeluda muchipompelu chawakwaKristu, kulonda ayileji mwakwilila.
INDI IJI NSHIMBI JAMUBAYIBOLU JINATELI KUKWASHA . . . ÑAHI ANVWALI NIANYANA KUMANISHA KUKALA KWAMONAÑA YISAKA YAWANVWALI AJIKI?
Yehova Nzambi diyi “tata yawanshona, diyi mukwakuyisompela antuluwa.”—Masamu 68:5.
Kufuukula kwakuwahi kwaleñelaña kutwesha.—Yishimu 21:5.
Yehova wakwashaña anvwali kwikala nawuswa wakufumba anyana chachiwahi.—Yishimu 1:8.
AkwaKristu anfwila ashinshika azataña nañovu nyidimu yayiwahi nawa akakelaña mukulomba.—1 Timotewu 5:5, 10.
Kukeña chikupu “anshona abula atata jawu, niambanda anfwila” hinyikabu yakudifukula kwalala.—Yakoba 1:27.
[Chikasha chidi hefu 112]
YUMA YATELA KWILAWU ANYANA
Komana amama yenu hela atata yenu hiyanvwali ajiki? Neyi hiyajiki, chumanyi chiwatela kwila kulonda kuyikwasha? Chatachi, mwatela kwikala ovwahila. Bayi neyi kukeha kwamujimba hela kwikala iyala hela mumbanda hikunateli kuleñela mwana ‘kuleka nshimbi jamama yinduku.’ (Yishimu 1:8) Yehova wayileja enu anyana kwikala ovwahila, nkumininaku mukekala amuzañalu.—Yishimu 23:22; Aefwesesa 6:1-3.
Ditachikilenuhu kuzata nyidimu yikwawu nawa ikalenu akwakuhameka. Tony wahosheli nindi: “Mama wazataña kuchipatela, nawa yakuvwala yazatilañamu yakeñekaña kuyikiisa. Dichi nayikiisaña. Kwila mwenimu chamukwashañaku maama.” Mama yawantu mujiki wahosheli nindi: “Kakavulu neyi natiyi kumuchima kutama hela neyi kudi chuma chahilisha kumudimu, didi ifuku dafukulañayi mwanami wamumbanda kuloñesha yakudya yamelela.”
Ilukenu nenu kuzatila hamu nawanvwali kwalema. Hanyima yakujikumwina mwana kumudimu chinateli kuyikalila anwvali jenu kulombola kudiza Bayibolu kwachisaka. Neyi mubula kuzatila hamu nawanvwali jenu mukuleñela kukala kuswejelaku. Diloñeshenu neyi mpinji yakudiza kwachisaka yinashiki dehi. Loñeshelenu chadimu yuma yimukudiza. Neyi mwikala ovwahila, akwakuhameka, nikuzatila hamu, mukuzañalesha anvwali jenu, nawa chabadika nankashi mukumuzañalesha Nzambi.
[Mwevulu wudi hefu 107]
Mwatela kwikalaña nawanyanenu hadi mpinji yeneni
[Mwevulu wudi hefu 109]
Anyana mwatela kunuñañana nawanvwali jenu ajiki
[Mwevulu wudi hefu 110]
Chipompelu hichadiwulaña ‘anshona nianfwilaku’