Kudiza 7
Kuswila Kwakwihi naNzambi muKulomba
Mulon̂adi chichekalila chalema kulomba mpinji yejima? (1)
Kudinyi kutwatela kulomba, nawa mujilanyi? (2, 3)
Yumanyi yashikila kulombela? (4)
Mpinjinyi watela kulomba? (5, 6)
Komana Nzambi watiyan̂a ku kulomba kwejima? (7)
1. Kulomba hikuhosha kwa kudizoza kudi Nzambi. Watela kulomban̂a kudi Nzambi mpinji yejima. Dihu dinu watela kwikala kwakwihi nindi neyi ibwamba deyi waken̂a. Yehova himukwabadika nawa wukweti n̂ovu, hela chochu watiyililan̂a kukulomba kwetu! Komana walomban̂a kudi Nzambi mpinji yejima?—Masamu 65:2; 1 Atesalonika 5:17.
2. Kulomba himbadi yakwitiya kwetu. Komana twatela kulomba hohu kudi Nzambi, Yehova. Hadin̂ayi Yesu hanu hamaseki, mpinji yejima walombelan̂a hohu kudi Tata yindi bayi kudi wachen̂uku. Netu nawa twatela kwila momumu. (Matewu 4:10; 6:9) Helachochu, kulomba kwetu kwejima kwatela kuhitila mwijina da Yesu. Ichi chamwekeshan̂a nawu tunakulemesha chifulu cha Yesu nawa tukweti chikuhwelelu mumulambu windi wakukula nachu.—Yowanu 14:6; 1 Yowanu 2:1, 2.
3. Chitukulomba kudi Nzambi, twatela tuhoshen̂a kufuma kumuchima. Bayi kuhembelan̂a mazu itukulomba kumutu hela kutan̂a mazu akutan̂a kufuma mu mukandaku. (Matewu 6:7, 8) Twatesha kulomba mukavumbi, hampinji yidi yejima nawa kwilun̂a didi dejima. Nzambi watiyan̂a ni kulomba kwa wushinshi kwa kuhoshela munyichima yetu. (1 Samweli 1:12, 13) Chekala chachiwahi kuya kwilun̂a kwamwena nzo-o kwakubula antu nakulombelaku.—Maku 1:35.
4. Yumanyi yuwunatweshi kulombelela? Chuma chidi chejima chinatweshi kusambukila wubwambu weyi na yena. (Afilipi 4:6, 7) Kulomba kwa kumwenahu kwatulejan̂a nawu twatela kulombela ijina da Yehova ni kufukula kwindi. Twatesha kwihula nawa kutwinka yuma yakumujimba, kutwanakena nshidi yetu, ni kutukwasha kufuma mu kweseka. (Matewu 6:9-13) Kulomba kwetu bayi kwikala kwalwisuku. Twatela kulomba hohu yuma yesekana nakuken̂a kwa Nzambi.—1 Yowanu 5:14.
5. Watela tuhu kulomba mpinji oyu yiwukuken̂a kumusakilila hela kuhameka Nzambi na muchima weyi. (1 Kushindulula 29:10-13) Watela kulomba mpinji wudi nakukala ni chikuhwelelu cheyi chidi mukweseka. (Masamu 55:22; 120:1) Chekala chatelela kulomba henohu kanda wudyi yakudya yeyi. (Matewu 14:19) Nzambi nakututambika nindi tulomban̂a “mafuku ejima.”—Aefwesesa 6:18.
6. Swejee dinu twatela kulomba neyi tunavulumuni nshidi jamaneni. Mumpinji yamuchidi owu twatela kulombela luwi lwa Yehova ni kwanakena. Neyi tukusolola nshidi jetu kudi yena na kudishaku kubula kufuntila munshidi oyu, Nzambi ‘wamuwahi waanakenan̂a.’—Masamu 86:5; Yishimu 28:13.
7. Yehova watiyililan̂a hohu kulomba kwa wantu alon̂a. Hakwila nawu kulomba kweyi akutiyi kudi Nzambi, watela kudishaku nakanshi kuhemba nshimbi jindi. (Yishimu 15:29; 28:9) Watela kwikala wadizoza mpinji yiwunakulomba. (Luka 18:9-14) Watela kuzatila hanochu chiwunakulombela. Dihu wukudimwekesha dinu neyi wukweti chikuhwelelu nawa wunakuhosha mwalala. Ohu dinu Yehova dihamba kakulayi kulomba kweyi.—Aheberu 11:6.