KUDIZA 10
Chakuwana Kwitiya Kwalala
Neyi wunakukeña kwikala ibwambu daNzambi, watela kwikala mukwitiya kwetezhayi Nzambi. Yesu wahosheli nindi “akwakudifukula alala” akadifukula kudi Nzambi hamu mu “chalala.” (Yowanu 4:23, 24) Kudi nzhila yimu hohu yoloka yakudifukwilamu kudi Nzambi. (Aefwesesa 4:4-6) Kwitiya kwalala kwalombolaña kuwumi wahaya nyaka, hakwila kwitiya kwakutwamba kwalombolaña kukuzhilumuka.—Matewu 7:13, 14.
Wunatweshi kwiluka kwitiya kwalala kuhitila mukushinshika yililu yawantu ekalamu. Yehova himuwahi, ninowu akudifukula kudi yena atela kwikala antu amawahi. Neyi chochekala mutondu wawuwahi wamalalanji wasoñaña malalanji amawahi, nikwitiya kwalala kwamwekeshaña antu amawahi.—Matewu 7:15-20.
Amabwambu zhaYehova alemesha Bayibolu chikupu. Eluka nawu Bayibolu yafuma kudi Nzambi. Etezhaña muyahoshaña kulonda yiyilomboli munshakaminu yawu, kumanisha makabawu, nawa yayikwashañaku hakumwiluka Nzambi. (2 Timotewu 3:16) Esekaña kwila yuma yashimunañawu.
Amabwambu zhaYehova amwekeshaña kukeña kudi wumu namukwawu. Yesu wamwekesheli kukeña kudi antu kuhitila mukuyitañisha hadi Nzambi, nimukuuka akata. Antu ekala mukwitiya kwalala ni wena amwekeshaña kukeña kudi antu acheñi. Kufwaana Yesu, hiyadiwulaña atuzweñi hela antu amuchidi wacheñiku. Yesu wahosheli nindi antu akayilukila atumbanzhi twindi kuhitila mukukeña kuyamwekeshañawu kudi wumu namukwawu.—Yowanu 13:35.
Amabwambu zhaNzambi alemeshaña izhina dindi, Yehova. Neyi muntu yakana kuzatisha izhina deyi, ona muntu natweshi kwikala ibwambu deyi wamuchima? Inehi! Neyi tudi nebwambu detu, twatela kuzatisha izhina dindi nawa twatela kumuhameka kumesu awantu. Owu akukeña kwikala amabwambu zhaNzambi atela kuzatishaña izhina dindi nakudishimuna kudi antu nawa. Yehova nakukeña etu kwila mwenimu.—Matewu 6:6; Aroma 10:13, 14.
Kufwana Yesu, amabwambu zhaNzambi atañishaña antu Wanta waNzambi. Wanta waNzambi hinfulumendi yamwiwulu oyu yamba kaleta paradisa hanu heseki. Amabwambu zhaNzambi ashimwinaña iyi nsañu yayiwahi yaWanta waNzambi kudi antu acheñi.—Matewu 24:14.
Ayinsahu zhaYehova esekaña kwikala amabwambu zhaNzambi. Alemesha Bayibolu nawa amwekeshaña kukeña mukachi kawu. Alemeshaña cheñi izhina daNzambi hakudizatisha nihakulezha antu haWanta Windi. Lelu dinu Ayinsahu zhaYehova diwu anekali mukwitiya kwalala hanu heseki.