Nsañu yaWanta No. 37

Nsañu Yakaayi Kejima

Kukuma Kwansakililu Yakutwamba Kudi Mukamwihi!

▪ Indi nsakililu yakutwamba hichumanyi?

▪ Yikakuma ñahi?

▪ Indi eyi chikakukuma ñahi?

Indi nsakililu yakutwamba hichumanyi?

Komana waneñaña hawubanji wakoñelañawu mwijina dansakililu? Komana njita, wubanji nimajika kanwa akoñaña antu aditenaña nawu amukalakelaña Nzambi yaneñeshaña yitoñojoka yeyi yayuma yaloña? Muloñadi nsakililu chiyinekalili nsulu yakukala kwakuvulu ñana? Nsakililu yejima hiyikweti muloñaku, ilaña nsakililu yakutwamba hohu diyu yaletaña kukala kwejimiku. Yesu Kristu, muntu walemeshawu chikupu wemenañaku nsakililu, wamwekesheli nindi nsakililu yakutwamba yaleteshaña antu kukoña yililu yatama, neyi chochidi “mutondu watama wasoñaña nyikabu yatama.” (Matewu 7:15-17) Nyikabwinyi yasoñaña nsakililu yakutwamba?

Nsakililu Yakutwamba . . .

◼ YADIÑIJAÑA MUNJITA NIMUJAMATUÑA NACHIYULU: Chipapilu chansañu chaAsiaweek chahosheli nawu, “MuAsia nimumaluña amakwawu, anyuli alwishaña kwikala nañovu yabadika ayulaña chatama yitoñojoka yansakililu yawantu kulonda kuditiyisha kuwaha nayuma yakeñañawu.” Chuma chafuminimu, chipapilu chansañu chasoñamishili nawu: “Ituña dinakumwekana neyi keña dizaluki.” Mukulumpi wansakililu waya mpuhu muUnited States wahosheli nindi: “Mwatela kujaha ambanji kulonda kuyikañesha kujahana.” Njila yindi yakumanishilamu kukala yidi ñahi? “Jahenu ambanji ejima mwijina daNzambi.” Kwambukaku, Bayibolu yahosha nawu: “Muntu wukwila nindi, Ami nakeña Nzambi; iku saña ahelelayi mana kwindi, hintwambi.” (1 Yowanu 4:20) Yesu wahosheli cheñi nindi: ‘Twalekenuhu kukeña ayilumbu jenu.’ (Matewu 5:44) Wunateli kuchinda nsakililu yiñahi yikweti antu jawu adiñijaña munjita?

◼ YATAÑISHAÑA NTAÑISHILU YAKUTWAMBA: Nsakililu yayivulu yatañishaña nawu wumi hela spiritu hiyuma yabulaña kumwekana yapulukaña kufwa kwamujimba. Kuhitila muniyi ntañishilu, nsakililu yayivulu yadilaña antu amuyipompelu yawu hanyitu, nakuyifwetesha mali kulonda alombeleleña mawumi awantu afwa dehi. Ilaña Bayibolu yatañishaña ntañishilu yacheñi. ‘Muloña amomi eluka dehi nawu, akafwa; hakwila afu hiyeluka chumaku.’ (Mukwakutaŋisha 9:5) Yesu watañishili nindi afu akayisañula—kusañuka kwadi kwikala kwamukunkulwayi neyi antu adiña nawumi wabulaña kufwa. (Yowanu 11:11-25) Komana nsakililu yenu yatañishaña nawu wumi hiwafwañaku?

◼ YETEJAÑA WUVUMBI: Mumatuña amavulu mazanvu ansakililu etejaña amayala aditamishaña nawamayala niambanda aditamishaña nawambanda kwikala akulumpi jansakililu nawa alejaña nfulumendi kwiteja maluwi amuntu weyala neyala niwamumbanda namumbanda. Hela yipompelu yakanisha wuvumbi yeteja akulumpi jansakililu atamishahu dehi anyana kuhitila muwuvumbi. Hanu dinu, chumanyi chatañishaña Bayibolu? Yahosha hatooka to-o nawu: ‘Bayi ayidimbaku; hela ayivumbi, hela akwakupesha, hela akwawusenji, hela amayala adilisha neyi ambanda, hela aditamishaña nawakwawu amayala, . . . hiyamba kaswana wanta waNzambuku.’ (1 Akorinda 6:9, 10) Welukahu nsakililu yeteja wuvumbi?

Mbidinyi yikweti nsakililu yasoñaña nyikabu yatoka? Yesu wasoñamishili nindi: “Nyitondu yejima yabulaña kusoña nyikabu yayiwahi ayitemaña, ayinatilaña mukesi.” (Matewu 7:19) Eña, nsakililu yakutwamba akayitema nakuyikisañana! Indi ichi, chikamwekana ñahi nawa mpinjinyi? Ñakwilu yidi muchimwenu chawuprofwetu chasonekawu mumukanda waBayibolu waChimwekeshu tupetulu 17 ni 18.

Indi nsakililu yakutwamba yikakuma ñahi?

Esekejenu nenu, chivumbi nashakami hanyima yakanyama wunakutiyisha woma. Kanyama wudi nanyitu yitanu nayiyedi ninseñu ikumi. (Chimwekeshu 17:1-4) Indi chivumbi wemenañakwinyi? Wukweti ñovu hadi “anyanta ankanu aheseki.” Wavwala jawusombu, wazatishaña insensi nawa waheta chikupu. Kubombelahu, ‘nadimbi nyunza yejima,’ muloña wakupanda kwindi. (Chimwekeshu 17:18; 18:12, 13, 23) Bayibolu yatukwashaña kwiluka netu iwu chivumbi hiizaza dansakililu yamukaayi kejima. Hemenañaku nsakililu yimu hohuku, ilaña wemenañaku nsakililu yejima yasoñaña nyikabu yatoka.

Kanyama wendelañayi chivumbi wemenañaku wanta wamatuña nachiyulu wamukaayi. (Chimwekeshu 17:10-13) Nsakililu yakutwamba yendelaña hanyima yaniwu kanyama wansañu yamatuña nachiyulu, nakweseka kuyula kufuukula kwindi nikulombola nshimbi jindi.

Hela chochu, chuma chekomwesha keña chimwekani. “Nseñu ikumi jiwamona, ninaka kanyama, akamuhela chivumbi, akamubalumuna kwikala chihembi hohu, akamuleka nzekesi, akadya mujimba windi, akamushita nakesi bwi.” (Chimwekeshu 17:16) Munzatilu yakukasumwisha nawa yakuhayamisha, anyanta akaayi amatuña nachiyulu akamulukuka nsakililu yakutwamba nakumukisañana chikupu! Chumanyi chikaletesha iyi nzatilu? Mukanda wamuBayibolu waChimwekeshu wakulaña nawu: ‘Nzambi nashi munyichima yawu jakwila mwafuukulayi.’ (Chimwekeshu 17:17) Eña, nsakililu yakutwamba yamba kalumbulula kudi Nzambi hayililu yatama yejima yinakoñiyi mwijina dindi. Kuhitila mukuzatisha wuñanji waloña, Nzambi wukazatisha antu akeñawu kudi nsakililu yakutwamba ansañu yamatuña nachiyulu neyi chitwa chakumukisañana nachu.

Chumanyi chiwatela kwila neyi hiwunakukeña kudibomba muchuma chikamumwekena nsakililu yakutwambaku? Kañanda kaNzambi wakonkomwena nindi: “Enu antu ami, fumenu muñandoyu.” (Chimwekeshu 18:4) Chalala ayinu diyi mpinji yakutemuka munsakililu yakutwamba! Dichi dinu wukutemukila kudihi? Bayi neyi kudi akwakusekeshaku, muloña hiyakweti mbiduku. (2 Atesalonika 1:6-9) Chiswamu chacheni chidi hohu munsakililu yalala. Wunateli kwiluka ñahi nsakililu yalala?

Chakwiluka nsakililu yalala

Nyikabwinyi yayiwahi yatela kusoña nsakililu yalala?—Matewu 7:17.

Nsakililu Yalala . . .

◼ AYILUKILAÑA KUKUKEÑA: Akwakudifukula alala “hiyampata yamunu mwishinaku,” hiyadambulaña muloña wekowa hela chisemwaku, nawa amwekeshaña ‘kukeña mukachi kawu.’ (Yowanu 13:35; 17:16; Yililu 10:34, 35) Hiyadijahaña mukachi kawuku, ilaña adikeñelaña awenawu kufwa hanyijimba yawakwawu.—1 Yowanu 3:16.

◼ YAKUHWELELA IZU DANZAMBI: Nsakililu yalala hiyatañishaña ‘chisemwa ninshimbi yawantu neyi diyi ntañishiluku,’ ilaña ntañishilu yawu yashindamena Mwizu daNzambi, Bayibolu. (Matewu 15:6-9) Muloñadi? Muloña “Nyikanda yajila yejima ayonena dehi kudi Nzambi; yawaha kuleja nachu, nikutanyisha nachu, nikwolola nachu, nikufumba nachu mwaloña.”—2 Timotewu 3:16.

◼ YAKOLESHAÑA YISAKA NAWA YEKALA NAYILILU YAYIWAHI:

Nsakililu yalala yadizishaña amayala ‘kukeña añodi jawu neyi chakeñawu nyijimba yawu,’ yakwashaña ambanda kwikala ‘nakalemesha kakeni hadi anfumu jawu,’ nawa yatañishaña anyana ‘kwovwahila anvwali jawu.’ (Aefwesesa 5:28, 33; 6:1) Cheñi nawa, ana enkawu yifulu yanyidimu atela kwikala nayililu yayiwahi.—1 Timotewu 3:1-10.

Komana nsakililu yejima yashikijaña iyi yipimu? Mukanda waHolocaust Politics, wasonekeliwu mu 2001 wahosha nawu: “Neyi antu amavulu akoñeleña yuma yatañishañawu nawa yiyakoñaña aYinsahu jaYehova, Kujahañana kwadi kwikala kwosi nawa hikwadi kwikala kujilumuna muchidi wawantu kwaletaña makabi mukaayi kejimaku.”

Eña, mumatuña 235 aYinsahu jaYehova hiyashimwinaña hohu nshimbi yayililu yamuBayiboluku—ilaña ayizatishaña. Tunayikoleshi kwihula aYinsahu jaYehova kulonda ayikwashiku kudiza chuma chakeñañayi Nzambi kudenu kulonda mutweshi kudifukula kudi yena munjila yetejayi. Yinu diyi mpinji yimwatela kwila mwenimu. Bayi mulabaku. Kukuma kwansakililu yakutwamba kudi mukamwihi!—Zefwaniya 2:2, 3.

Neyi mukukeña nsañu yayivulu kutalisha hamazu ashindamena haBayibolu ashimwinañawu aYinsahu jaYehova, bayi mujinoka kuyisonekela kuzatisha keyala yidi heshinaku.

□ Chakubula kunfwetesha, nakulomba buloshuwa yaKeep on the Watch!

□ Mwani nkeñenu kutalisha hakudiza Bayibolu kwahetala chawaana.

[Mazu ekoku adi hefu 3]

Nsakililu yakutwamba yikweti ñovu hadi “anyanta ankanu aheseki”

[Mazu ekoku adi hefu 3]

“Enu antu ami, fumenu muñandoyu”