Yesu Nakoñi Yuma Yayiwahi Mukaperinamu

Yesu natambiki atumbanji awana, Petulu, Anderi, Yakoba niYowanu kwikala yibinda yawantu. HaSabata wejima wawu anayi musinagogi yamuKaperinamu. Yesu nakutañisha musinagogi nawa antu anahayami cheñi chinakutañishayi. Nakutañisha neyi muntu wukweti wuswa bayi neyi ansonekiku.

Hanidi ifuku daSabata hadi nimuntu wudi nandemoni. Mwomwenimu musinagogi iwu muntu nabidiki nezu datiyakana nindi: “Chumanyi chiwunakukeña kudi etu eyi Yesu wakuNazareta? Wunenzi nakutujilumuna tahindi? Nakwiluki chiwahi, yeyi Wajila waNzambi!” Yesu namuzuwili ndemoni wunakumuyuula iwu iyala nindi: “Mwena, fumaku mudi iwu muntu!”—Maku 1:24, 25.

Hayoyeniyi mpinji, spiritu watama namunati iwu iyala heseki nikafulolu mukanwa nawa nakubideka nezu dahewulu. Ilaña ndemoni namufumi “chakadi kumukatisha.” (Luka 4:35) Antu adi mukamwihi musinagogi anahayami chikupu. Anakudihula nawu: “Chumanyi chenichi? Wukweti ñovu yakuleja aspiritu azonda nawa niwena anakumwovwahila.” (Maku 1:27) Chinafumimu, iyi nsañu yamuzañalu yinatandi yinatiyakani muÑaliliya yejima.

Chinafumiwu musinagogi, Yesu niatumbanji twindi anayi kwitala daShimona, hela Petulu. Kweniku muku waPetulu nakati nankashi mashika. Anamulembeleli Yesu nawu amuuki. Naswini kwakwihi nakudiyi, namukwati kuchikasa nawa namunyamuni. Nakoli hohenohu, nawa natachiki kumuhembelela Yesu niatumbanji twindi, hadaha nakuyiloñeshela niyakuda.

Itena keña dihumi, antu anakwinza kwitala daPetulu nawantu akata kufuma kumaluña ejima. Hanashimbuli wanyi chinamwekani neyi musumba wejima wunapompi hachisu chindi. Muloñadi? Anakukeña kuyuuka. Kafwampi, ‘antu ejima adi nawantu akata yikatu yeñi-nayeñi anayileti kudi yena. Nawa nayinañiki makasa nakuyuuka wejima wawu.’ (Luka 4:40) Eñañi, hichikweti muloña nayikatu yikwetiwuku, Yesu nayuuki neyi chashimwineñahu dehi. (Isaya 53:4) Nafumishi niandemoni. Aspiritu atama chiyanafumiwu, anatachiki kubidika nawu: “Eyi wudi Mwana kaNzambi.” (Luka 4:41) Ilaña Yesu nayizuwili nawa hanayiteji kuhosha cheñiku. Aneluki nawu Yesu diyi Kristu nawa hanakukeña wena amwekani neyi anakumukalakela Nzambi walalaku.