Kudiisha Makombakaji Makendi Antesha Ninshi

Apostolu 12 anadiña nakushimwina muÑaliliya yejima nawa anamuleji Yesu ‘yuma yejima yadiña nakwilawu niyuma yatañishañawu.’ Chakadi nikujina, anazeyi hama. Hela chochu, hiyakweti mpinji yakudaku muloña antu amavulu anakwinza nikuya. Dichi Yesu nahoshi nindi: “Tuyenu kwakankawetu kulonda tunookihu chanti.”—Maku 6:30, 31.

Anakandami muwatu, hadaha kwakwihi naKaperinamu, nawa anakuya kwiluña didi kumusela waKaloña Yodani kupandakana Betisayida. Hela chochu, antu amavulu anayimoni chinakuyawu nawa amakwawu aneluki kunakuyawu. Wejima wawu anakakumuki lufuchi nakuya kuchikumu nawa dikwadiwu chinakwinza watu.

Chinakufumawu muwatu, Yesu namoni izaza nawa naditiyili luwi, muloña didi tuhu neyi nyikoku yakadi kabiña. Dichi natachiki “kuyitañisha yuma yayivulu” haWanta. (Maku 6:34) Nawa nooki cheñi “antu ejima akeñeleña kuyuuka.” (Luka 9:11) Chimunahiti mpinji, atumbanji anamwili nawu: “Adinu iluña hikwashakamaña antuku nawa hikukwiyila; lejaku mazaza awantu ayi munyikala nakulanda yakuda yawu.”—Matewu 14:15.

Yesu nayili nindi: “Hiyatela kuyaku; yowenenu yinkenu yakuda.” (Matewu 14:16) Hela chakwila Yesu neluki chuma chinakukeña kwilayi, namweseki Fwilipu nanilu lwihu nindi: “Kudihi kutukulanda mankendi akudiisha awa antu ejima?” Namwihuli Fwilipu muloña wafuma kwakwihi naBetisayida. Hela chochu, akushikila wanyi. Hadi amayala akushika kwakwihi na 5,000. Nawa hadaha neyi kubombelaku, ambanda nianyana, anateli kubadikahu! Fwilipu nakuli nindi: “Mankendi akulanda namadenari 200 awa antu hiyakutwesha kuwaninaku, hela neyi adanzañena kanti-kanti.”—Yowanu 6:5-7.

Anderi niyena nahoshihu nakumwekesha nindi chikutwesheka wanyi kudiisha antu ejima: “Kudi iwu kansi weyala wudi namankendi atanu abali niinshi janyanya jiyedi. Iyi yakuda diyi yikuwanina antu amavulu ñana?”—Yowanu 6:9.

Himpinji yanyilemba, henohu Chipandakenu chamu 32 C.E. kanda, nawa matahu anameni kumpidi yejima. Yesu nayileji atumbanji twindi kuleja antu ashakami mumazanvu mazanvu awa 50 awa 100. Natambuli mankendi atanu niinshi jiyedi nawa namusakilili Nzambi. Nkumininaku nahumuni mankendi nikwanzañana inshi. Yesu nayinki atumbanji twindi kulonda ayinki antu. Chakuhayamisha, antu ejima anadii nawa anekuti!

Chimunahiti mpinji, Yesu naleji atumbanji twindi nindi: “Nonenu yakuda yinashalihu kulonda yibuli kukisika.” (Yowanu 6:12) Anenzeshi yimpaya 12 nayakuda yinashalihu!