Yesu Nashimuni Kwafumaña Muzañalu

Yesu nafumi tuhu nakushimuna hachatela kulombawu, ilaña iwu hidiwu mutu wahoshañayi nankashi mumudimu wakushimwina hohuku. Mpinji yakoñeleñayi yihayamisha muÑaliliya, Yesu amutwambilili nawu wazatishaña ñovu yanyuuli yawandemoni. MuYudeya mudiyi anatachiki kumutwika cheñi muloña.

Izaza dinahayami Yesu chinafumishiyi ndemoni wamukañeshaña kuhosha mudi iwu iyala. Hela chochu, bayi akakumudimbululaku. Anatachiki cheñi kumutwambila chochimu nawu: “Wafumishaña andemoni nañovu yaBelezebubi, nyuuli wawandemoni.” (Luka 11:15) Antu amakwawu anakukeña kumwiluka neyi chakwila hiMesiya, anakumulomba chinjikijilu kufuma mwiwulu.

Chinelukiyi nindi anakukeña hohu kumweseka, Yesu nayakuli neyi chayakwiliyi cheñi antu amakwawu awaniniyi muÑaliliya. Nahoshi nindi wanta wejima wukudaambula waweni wakisikaña, nahoshi nindi: “Neyi Satana niyena adaambula yomweni, indi wanta windi wukukola ñahi?” Dichi Yesu nayileji chakadi kuhita mumbadi nindi: “Neyi nafumishaña andemoni namunu waNzambi, dikwila nawu Wanta waNzambi chalala wunayishintakeshi.”—Luka 11:18-20.

Yesu chinateniyi nindi “namunu waNzambi” chatela chinayanukishi antu anakumutiyilila chuma chamwekeni kunyima. Antu adiña mulubanza lwaFwaro amweni Mosi nakukoña yihayamisha ahosheli nawu: “Himunu waNzambi!” Wadiña cheñi “munu waNzambi” wasonekeli Nshimbi 10 hamalola awubasa ayedi. (Kwidika 8:19; 31:18) Munjila yoyimu, ‘munu waNzambi dikwila nawu spiritu yindi yajila hela ñovu yindi yazatikaña, diyi yinakumukwasha Yesu kufumisha andemoni nikuuka antu akata. Dichi, Wanta waNzambi wunayibadiki awa akakudimbulula, muloña Mwanta enkawu Wanta, Yesu, wudi hohu nakuzata iyi nyidimu.

Ñovu yikweti Yesu yakufumisha ndemoni yinakumwekesha nawu wamubadika Satana, neyi chichekala kudi iyala wasweja ñovu wunakushinda iyala wunadimanyeki nakukiña chipañu. Yesu nafuntishihu cheñi chakutalilahu chindi chaspiritu watama wunafumi mudi muntu. Neyi iwu iyala abula kusha yuma yayiwahi mudi yena, iwu spiritu wukufunta cheñi nawaspiritu 7 nawa chihandilu chindi chikutama nankashi kubadika chatachi. (Matewu 12:22, 25-29, 43-45) Dichidi nimuza waIsarela.

Mumbanda wunakumutiyilila Yesu nabidiki nindi: “Wudi namuzañalu yowu mumbanda wakusendeli mwivumu dindi nawa wakwamwishili kumayeli indi!” Mumbanda kaYudeya wafwilileña kwikala mama yakaprofwetu, sweje-e kwikala mama yaMesiya. Dichi iwu mumbanda hadaha nakutoñojoka nindi Mariya wudi namuzañalu chineli diyi mama yaniwu ntañishi. Hela chochu, Yesu namuleji iwu mumbanda kwafumaña muzañalu walala, nindi: “Inehi, adi namuzañalu wowu antu atiyaña izu daNzambi nikudihemba!” (Luka 11:27, 28) Yesu kanda ahosheñahu dehi nindi Mariya atela kumulemesha nankashi. Ilaña, muzañalu walala wekalaña namuntu, wenzaña muloña wakwikala kambuña aNzambi washinshika, bayi muwusoku hela yuma yineliyi muntuku.

Neyi Yesu cheliliyi muÑaliliya, nazuwili antu anakumulomba nawu ayilili chinjikijilu kufuma mwiwulu. Nahoshi nindi kwosi chinjikijilu chikuyimwekeshelawu chiña “chinjikijilu chaYona hohu.” Yona wadiña chinjikijilu chashakamini mafuku asatu mwivumu danshi nichashimwininiyi nakuhamuka, chaletesheli aNiniva kubalumuka. Yesu nahoshi nindi: “Ilaña tiyenu! muntu wabadika Yona wudi hanu.” (Luka 11:29-32) Yesu wamubadika cheñi Solomoni wadiña namaana aletesheli mwanta wamumbanda wakuSheba enzi nakutiya.

Yesu nabombelihu nindi: “Muntu neyi nabutuli inoñu, haditentekaña mwiluña mwaswamanyika hela mwibañuku, ilaña waditentekaña hatentekañawu inoñu kulonda antu anakwiñila amoni chejeji.” (Luka 11:33) Hadaha natalishi mukwila nindi kutañisha nikukoña yihayamisha hamesu anawa antu chidi tuhu neyi kubuta chejeji chenoñu. Muloña mesu awu anakumona wanyi, aneluki wanyi nyidimu yinakuzatayi.

Yesu nafumi tuhu hakufumisha ndemoni nawa naleteshi muntu wadiña kamama kutachika kuhosha. Chumichi chatela kuyiletesha antu kumushimeka Nzamba nikuleja akwawu yuma yinakwilayi Yehova. Dichi Yesu nayikandi antu anakumudimbulula nindi: “Babalaku kulonda chejeji chidi mudi eyi chibuli kwikala mwidima. Muloña, neyi mujimba weyi wejima wukutoñekaña chakadi nihamu hadi mwidima, dikwila nawu mujimba weyi wukutoñekaña to-o neyi inoñu chidayitoñekelaña chejeji.”—Luka 11:35, 36.