Komana Kwila Muzata Nañovu Kulonda Musoñamishuku Antu Amakwawu Nehi?
Kukutachika kwayaaka yamu 1900, antu adiluñishili kutala fwilimu yayiwahi yakadi mazu yakwila nawu A Trip Down Market Street. Iyi fwilimu yamwekesheleña chihandilu chadiña muyaaka yakunyima muSan Francisco, U.S.A. Akwakukwata mafwilimu akasilili kamela kumotoka yadiña nakwendela hamonji nawa yadiña nakukopa yuma yejima yamwekeneña mumukwakwa mwadiña antu amavulu. Iyi fwilimu yamwekeshaña atuwalu anakukoka makalu, nyotoka yadiñaku hayina mpinji kushilahu niantu adiña nakulanda nikulandulula niakwenzi asonekeleña nsañu.
Chuma chaneñeshaña nankashi neyi tutala iyi fwilimu lelu chidi chakwila nawu iyi fwilimu ayikwatili muApril 1906 henohu mutentanshi weneni nikesi kanda jimwekani haApril 18 jajilumwini makombakaji awantu nawa jakisañeni chibalu chaniwu musumba. Antu amakwawu iyamwekesheluwu muniyi fwilimu hadaha ashalili hohu namafuku antesha akuhanda. Scott Miles, ntaña yamuntu wumu wadiña hakachi kawantu akwatili iyi fwilimu wahosheli nindi: “Namonaña antu adi muniyi fwilimu nawa hiyaneluki chikukeña kuyimwekenaku. Nawa kwosi mwakuyikwashila ilaña wukuyitiyila hohu kwawushona.”
Neyi twesekeja yuma yamwekeni kunyima nayuma yinakumwekana makonu, chatuleñelaña tutoñojokeñahu chikupu. Anetu hitukweti mwakukwashila atuñinetuku ilaña twayitiyilaña hohu wushona. Anakutwalekahu nachihandilu chawu chamafuku ejima nawa hiyaneluki kukala kukukeña kuyimwekenaku, dikwila nawu, kujilumuka kwakanu kaayi katama nichihandilu chawu. Hela chochu, iku kujilumuka kunakwinza kunambuki namutentanshi wunateli kumwekana chakadi kusoñamisha antu. Tukweti mpinji yantesha yakusoñamisha antuñinetu hefuku daYehova dakusompesha. Hadaha mulungu nimulungu mwekalaña nampinji yakushimwina kwitala nikwitala, hela chochu, komana kwila muzata nañovu kulonda musoñamishuku antu amakwawu nehi?
YESU WADIÑA WADILOÑESHA KUSHIMWINA HADI MPINJI YIDI YEJIMA
Twatela kwimbujola chakutalilahu chaYesu muloña mpinji yejima wadiña wadiloñesha kushimwina. Washimwinineña kudi antu ejima awanineñayi, chili kudi nsokeshi wahitileña mumukwakwa hela kudi mumbanda wadibulakeniyi nindi heshima nampinji yamwana. (Luka 19:1-5; Yow. 4:5-10, 21-24) Hela hampinji yanookeleñayi, Yesu walekeli namuchima wumu yuma yakeñeleña kwilayi kulonda yatañishi antu amakwawu. Wushona watiyilileñayi antuñinindi wamuleñeleli kushimwina wunsahu chikupu. (Maku 6:30-34) Indi akwakushimwina makonu anakwimbujola ñahi chakutalilahu chaYesu chakwikala adiloñesha kushimwina nsañu yinakukeñeka kuyishimwina mukunyakashana?
AZATISHAÑA MPINJ YEJIMA YIKWETUWU
Melika washakamaña mwitala dakiñewa chikupu nawa mwakala kwiñila. Antuñinindi amavulu hiyatudizi afuma kumatuña ashiyashana nawa azatishaña jinshiña jikweti manaambala abula kusonekawu munyikanda. Watiyaña kuwaha hakwikala nakukooleka kwakuhanjeka hayuma yakuspiritu nawantu ashakamaña munidi itala mukapeka mwakushikena nimuchikwepi. Wahosheli nindi, “Idi iluña nadimonaña nami hiiluña dami mwakushimwina.” Melika wasendaña nyikanda yamumadimi ashiyashana, nawa antuñinindi amavulu atambwilaña matilakiti nimagazini. Walejaña cheñi antu chiyatela kuwana nsañu haWebusayiti yetu, ya jw.org. Watachika kudiza Bayibolu nawantu amavulu.
Sonia niyena wekala wadiloñesha kushimwina kudi muntu wudi wejima wunateli kushimwinayi. Wazatilaña hachipatela chawandotolu nawa wemika chikonkwanyi chakushimwina chikupu kudi antu ejima azatañayi nawu. Chatachi, wasambilili kwiluka kukankila niyuma yakeñaña muntu wudi wejima. Kuhiñahu, wazatishileña mpinji yahachayili nakuyikeñakeña hamuntu hamuntu kulonda ahanjeki nsañu yamuBayibolu. Chafuminumu, Sonia watwesheli kutachika kudiza Bayibolu nawantu ayedi. Nakufwila cheñi kuzatisha mpinji yindi yakunooka mwitala dakushikena muchipatela kulonda yahanjekeña nawantu anakuhembelela kudimona nandotolu.
ZATISHENUÑA MPINJI YIMUKWETI
Muntu wumu wapulukili kumutentanshi wahitili mu 1906 wateneni iwu mutentanshi nindi “hiwubanji wahamesu bwi-i waholokeleli muniyi mbaka hela musumba.” Hela chochu, wubanji wejima wamwekanaña hitunateli kuwesekeja nefuku dakutenda didi kwakwihi nakwinza hadi antu ejima “abula kwiluka Nzambi.” (2 Tesa. 1:8) Yehova wakeñaña nindi antu ahimpi yitoñojoka ninyichima yawu kulonda atiyilili nsañu yakusoñamisha yinakushimwinawu kudi aYinsahu jindi.—2 Pet. 3:9, Chim. 14:6, 7.
Mukweti kukooleka kwakutonesha mesu awantu kulonda eluki mpinji yakala yitunashikumu nikuyikwasha afumi kuyuma yalwisu nakumukeñakeña Yehova. (Zef. 2:2, 3) Komana kwila muzatishaku mpinji yejima yimukwikalaña nayu kulonda mushimwineña kudi antu imwazataña nawu, antuñinenu, niantu imwawanaña hampinji yimwazataña nyidimu yenu yefuku niifuku nehi? Komana mukuzata nañovu kulonda musoñamishuku antu amakwawu?
[Mwevulu wudi hefu 31]
Chakadi kusoñamisha, mutentanshi nikesi jamwekeni mu 1906 jakisañeni chibalu chamusumba waSan Francisco
[Mazu aKusakilila]
U.S. National Archives photo
[Mwevulu wudi hefu 32]
Komana kwila muzatishaña mpinji yejima yimukwikalaña nayu kulonda mushimwineña hampinji yimukuzataña nyidimu yenu yefuku niifuku nehi?