Kwashenu Kadizi Wenu waBayibolu Kutiyishisha niKusakilila haYililu Yayiwahi yaYehova
1 Mumudimu wetu wakushimwina nikwilisha atumbanji, twazatañamu yuma yayivulu kubadika hakuleja hohu antu hakulema kwachalala chaBayibolu. Twayikwashaña antu kumwiluka Yehova neyi himuntu nikwikala nakusakilila hamuloña wayililu yindi yayiwahi. Neyi antu ashinshika adiza chalala hadi Nzambi, chayishikaña chikupu hanyichima, nikuyiletesha kuhimpa nshakaminu yawu ‘kulonda endi nakumutelela Yehova, nakumutiyisha kuwaha kwakweni.’—Kol. 1:9, 10; 3:9, 10.
2 Mukanda Wetu Wawuha Wakuzatisha Hakudizisha: Kufuma tuhu hamatachikilu, mukanda waChatañishaña Bayibolu wahoshaña hayililu yaYehova. Kapetulu katachi kanakuli malwihu anakwila nawu: Komana Nzambi chalala wakuta maana?, Indi Nzambi wekala ñahi?, nawa Komana chidi chaswayi kukundama kwakwihi naNzambi? Aka kapetulu kakonkomwenaña cheñi hakujila kwaYehova (para. 10), wuñaji windi niluwi (para. 11), kukeña kwindi (para. 13), ñovu jindi (para. 16), niwushona windi, nawa watoñaña, wanakenaña mukudikeñela, wawunda, nawa washinshika (para. 19). Parakalafu 20 yinakunkululi nsañu nawu: “Chiwadiza hadi Yehova, dihu hiwukumwiluka chikupu nawa wukwikala nahakushindamena nakumukeña, nawa wukuditiya wakundama kudi yena.”
3 Munjilanyi mutunateli kuzatishila mukanda waChatañishaña Bayibolu hakukwashaku atudizi aBayibolu kuswila kwakwihi naYehova? Neyi munahoshi dehi haparakalafu yinakuhosha hachililu chimu chahayililu yaNzambi, twatela kumwihula kadizi netu, “Indi chumichi chinakuleja nawu Yehova wekala ñahi hamu neyi muntu?” hela “Indi chumichi chinamwekeshi ñahi nawu Nzambi wakukeña halweyi?” Kuhitila mukuzatisha malwihu amuchidiwu kakavulu hampinji yakudiza, dikwila nawu tunakuleja atudizi etu kutoñojoka hayuma yinakudizawu nikuyikwashaku kuswejesha kusakilila kwawu hayililu yayiwahi yaYehova.
4 Zatishenu Chikasha Chakuhitulukamu: Hakukumisha kapetulu kadi kejima, ihulenu kadizi yahoshi mumazwindi hachikuma chejima chidi muchikasha cha “Yuma Yatañishaña Bayibolu.” Mulejenu kusha kashinshi kunyikanda yinateniwu. Hakukolesha kadizi kuhosha yuma yidi mumuchima windi, mpinji jikwawu mwatela kwihula nenu, “Wunatoñojoki ñahi hachuma chatañishaña Bayibolu kutalisha hanichi chikuma?” Kwila mwenimu, bayi neyi mukukonkomwenaña hayikuma yamaneni yamukapetulu hohuku, ilaña mukwiluka chikupu yuma yakuhwelelayi kadizi. Chumichi chikumukwashaku kadizi kutachika wubwambu naYehova.