Kwashenu Atuzweñi Ekali naKuchiñeja
1 Yesu washili maana chikupu kudi atuzweñi. Mpinji yikwawu wakoñeleña yihayamisha hakuyikwasha lwakumujimba nikuuka akata, ilaña washindameneni hakushimwina “nsañu yayiwahi” kudi atuzweñi. (Mat. 11:5) Mudimu wawiniKristu makonu wunakutwalekahu kukwasha atuzweñi niamakwawu.—Mat. 24:14; 28:19, 20.
2 Kuchiñeja Kwalala: Akulumpi amuKristendomu kakavulu akanaña atuzweñi nawu akaheta neyi ahanaña chikupu kuchipompelu. Ilaña, Bayibolu yatulejaña nawu Wanta waNzambi hohu diwukamanisha wuzweñi nikufumishahu kukala kwejima kunakumona antu. (Mas. 9:18; 145:16; Isa. 65:21-23) Kuhitila mukuyileja atuzweñi chuma chacheni chatañishaña Bayibolu, dikwila nawu tunakuyileja ekali nakuchiñeja nikuyikwasha amwiluki Nzambi nawa adifukuleña kudi yena.—Mat. 5:3.
3 Afwarisi amumafuku aYesu adiwileña atuzweñi, ayiteneneña ijina dakasawuntu nawu, “am-ha·’aʹrets,” hela “antu amukunkulwayi.” Hela chochu, Yesu wamweneña “mashi awu” hela wumi wawu nindi ‘walema.’ (Mas. 72:13, 14) Tunateli kumwimbojola Yesu nikutiyila atuzweñi luwi kuhitila mukwikala nawushona nikuyakamena. (Yish. 14:31) Bayi tuyihosholaña antu ashakamaña mumaluña asawuka hela tujinookaña hakuyishimwinaku. Antu amavulu anakwiteja nsañu yaWanta hiyatuzweñi.
4 Yikwashenu Atuzweñi Yoyinu Mpinji: Kuyileja atuzweñi amwiluña detu nshimbi yamuBayibolu kukuyikwasha cheñi kukeheshaku yuma yaleteshaña wuzweñi makonu. Chakutalilahu, Bayibolu yahisha kusheta, yisela yakudibecha, kukatala, kunwa makanya, niyuma yikwawu yaleteshaña wuzweñi. (Yish. 6:10, 11; 23:21; 2 Kor. 7:1; Efwes. 5:5) Nyikanda yatwikoleshaña kwikala nakashinshi nikukalakala “namuchima wumu hohu” yililu yakeñekaña kudi antu anyidimu. (Kol. 3:22, 23; Heb. 13:18) Kwesekeja nakusandujola kumu, akwakwiñija nyidimu amavulu ahosheli nawu hakwiñija nyidimu akeñaña antu alala nawa ashinshika.
5 Yehova wakamenaña atuzweñi anakukabakana. Katataka Yesu Kristu yapulwishi ‘atuzweñi anakukeña wakuyikwasha.’ (Mas. 72:12) Chayinu mpinji tukweti kukooleka kwakukundeja amakwawu, kubombelahu niatuzweñi, namazu amuBayibolu akuchiñeja, nichakashika iyi mpinji.