Munateli Kwakula Nenudi?
1. Muloñadi chitwatela kwimbujolila chakutalilahu chaYesu neyi atwihula lwihu?
1 Nikulelu antu ahayamaña chakwileñayi Yesu chachiwahi malwihu ehwileñawu antu. Neyi atwihula malwihu ambokamboka hampinji yitunayi nakushimwina, chikuwaha neyi tukumwimbujola Yesu chakwileñayi antu.—1 Pet. 2:21.
2. Chumanyi chatela kutukwasha kwakula lwihu chachiwahi?
2 Sambilenu Kutiyilila: Yesu watoñojokeleña chuma chaletesheleña muntu yehuli lwihu. Mpinji jikwawu ichi chakeñekaña kwihula malwihu kulonda twiluki chinakutoñojokayi muntu. Muntu wehulaña nindi, “Komana mwamukuhwelela Yesu?” wukuhayama chimwabulilaña kwanakana Krisimansi. Neyi mwiluka jinakutoñojokayi muntu wunakwihula lwihu, munateli kuhanjeka nindi munjila yayiwahi.—Luka 10:25-37.
3. Yumanyi yitukweti yatela kutukwasha kuwana ñakwilu yamuNsona yakumanisha mpwila?
3 Zatishenu Izu daNzambi Hakwakula: Chachiwahi kuzatisha Bayibolu yenu hakwakula malwihu. (2 Tim. 3:16, 17; Heb. 4:12) Mukanda waUkupelulula ‘niNyitu yaNsañu yamuBayibolu Yakuhanjekahu’ muBayibolu yaNew World Translation of the Holy Scriptures yatukwashaña nankashi kwakula chachiwahi. Hela chakwila muntu wunakwihula lwihu heteja yuma yamuBayiboluku, munateli kuhanjeka nindi chatañishaña Nsona munjila yakubabala. Mukoleshenu muntu kutoñojokahu chikupu hamaana alala ekala muBayibolu. Kuhitila mukumwimbujola Yesu, ñakwilu yenu yikwikala “neyi mabula awuru analoñejuwu mumabañu asiliva”—yikuwaha nawa akuyilemesha.—Yish. 25:11.
4. Mpinji yamuchidinyi yitwatelela kubula kwakula malwihu ejima?
4 Komana Twatela Kwakula Lwihu Ludi Lwejima? Neyi himuneluki ñakwilu yalwihuku, bayi mutiya nsonyi yakuhosha nenu: “Hineluki ñakwiluku, ilaña nukuya nakusandujola kulonda nakafunti nakwakula lwihu lwenu.” Neyi mukudizoza nikumwekesha kukeña chikuletesha mwiniitala kuyileja nindi mukafunti cheñi. Neyi mwiluka nenu muntu wunakwihula lwihu hisantadi wunakukeña mpami, imbujolenu Yesu kuhitila mukubula kusweja kumwakula. (Luka 20:1-8) Munjila yoyimu, neyi muntu wunabuli mpwila yachalala yatachika maana akudibecha, lekenu kuhanjeka nindi mumesu awunda kulonda muzatishi mpinji yenu nakukeñakeña antu atelela.—Mat. 7:6.
5. Chakutalilahwinyi chemikiliyi Yesu hakwakula malwihu?
5 Yesu welukili nindi wateleli kushindamena hadi Yehova kulonda yazati mudimu ‘wakwikala chinsahu chansañu yalala’ wakeñekelaña kwakula malwihu awantu akeñeleña chikupu ñakwilu. (Yow. 18:37) Okukooleka kutukweti kwakwimbujola Yesu hakuhana ñakwilu kudi antu ejima “afuukwilawu dehi kumona wumi wahaya nyaka”!—Yil. 13:48.