Komana Munateli Kuhimpa?
1. Chineli yuma yinakuhimpika mukaayi, yumanyi yitwatela kuhimpa?
1 Hamukanda wa 1 Akorinda 7:31, Bayibolu yesekeja kaayi nebulu hadi akwakuhema yimwenu niyimwenu yahimpaña mpinji yejima. Chineli yuma mukaayi yinakuhimpika anetu nawa twatela kuhimpa njila jakushimwinamu nindandanda yetu mumpinji mumpinji. Komana munateli kuhimpa?
2. Muloñadi wutwatelela kuhimpa kulonda twendeleña hamu nakuloñesha?
2 Njila Jimwazatishaña Hakushimwina: Chipompelu chawakwaKristu chahimpaña mpinji yejima. Yesu chatemesheliyi atumbanji twindi hakusambila wayilejeli nindi bayi asenda yakudya hela mali muyikwama yawuku. (Mat. 10:9, 10) Hela chochu, chimwahitili mpinji wahimpili ayina nshimbi muloña welukili nindi atumbanji twindi akayikabishaña nawa akashimwinaña nikumaluña acheñi. (Luka 22:36) Hayaaka nkulakaji yinahituhu, kuloñesha kwaYehova kwazatisha njila jashiyashana jakushimwinamu jidi neyi makaadi, yikunzulemba ninyotoka yadiña namasipika kwesekeja nayuma yakeñekeleña hayina mpinji. Makonu mumaluña amavulu antu hiyavula kwikala hamatalaku, kubombela hakushimwina kwitala nikwitala atukonkomwenaña kushimwina hatooka niwunsahu wakukoolekela. Atukoleshaña cheñi kushimwina kwitala nikwitala nampinji yamelela neyi chakwila antu ekalaña kumudimu nampinji yamwaana. Chinakuhimpa ikalu daYehova damwiwulu, anenu nawa munakwendela hamu nadu?—Ezek. 1:20, 21.
3. Indi kuhimpa njila yakushimwinamu kukutukwasha ñahi kushimwina chiwahi mwiluña detu?
3 Chimwashimwinaña: Yumanyi yinakwakamenawu antu amwiluña denu chakatataka? Kukala kwamali? Chisaka chawu? Tahindi anakwakamena njita? Chachiwahi neyi twiluka kukala kunakumonawu antu niyuma yavula kumwekana mwiluña detu kulonda tuloñeshi chiwahi njila yakushimwinamu. (1 Kor. 9:20-23) Neyi enimatala ashimuna yuma yinakwakamenawu chikusweja kuwaha neyi tuhimpa nakuhanjeka hayuma yinakwakamenawu, chatela twiteji netu dimu nakutwalekahu kuyishimwina nsañu yitwaloñesha.
4. Muloñadi wutwatelela kuhimpa njila yakushimwinamu swayi-swayi?
4 “Yuma” yakukumisha yamukanu kaayi keña yimani, nawa yihuñu yasweja yikatachika. ‘Mpinji yinashaluku yinakehi.’ (1 Kor. 7:29) Chalema nankashi kuhimpa njila yakushimwinamu nawa twatela kwila mwenimu chakubula kulaba kulonda tuzati nankashi mumpinji yantesha yinashaluku.