Yibaaba Yatukwashaña muMudimu Wetu Wakushimwina
1. Yibaaba yakwila nawu “Kuhanjeka naMwiniitala” yikweti nkeñelwinyi yiyedi?
1 Mumpinji mumpinji muKaposhi Kakutalila mwekalaña chibaaba chakwila nawu “Kuhanjeka naMwiniitala.” Iyi yibaaba yikweti nkeñelu yiyedi, nkeñelu yatachi yidi yakulumbulula ntañishilu yamuBayibolu munjila yakuleta ikoku nikumwekesha njila yitwatela kuhanjeka chachiwahi hinyitu yansañu. (1 Pet. 3:15) Tunateli kuzatisha ñahi chiwahi iyi yibaaba?
2. Tunateli kuzatisha ñahi iyi yibaaba mumudimu wetu wakushimwina?
2 Yizatishenuña muMudimu Wakushimwina: Munateli kuhemba makopi amakwawu aKaposhi Kakutalila mudi iyi yibaaba. Neyi mwiniitala, muntu wukweti mpwila yakudiza hela muntu wunakudiza Bayibolu yehula lwihu hela yahosha hamutu wasonekawu dehi muniyi yibaaba, mwinkenu Kaposhi Kakutalila mudi ichi chibaaba nawa hanjekenu nindi. Neyi mudana magazini mudi ichi chibaaba hadaha munateli kumuloñolwela ha jw.org.
3. Tunateli kuhanjeka ñahi haniyi yibaaba namwiniitala?
3 Munateli kuzatisha ñahi iyi yibaaba hakuhanjeka namuntu? Akwakushimwina amakwawu amulejaña muntu kutaña nezu datiyakana mazu antuñi, mukwakushimwina wukutaña mazu aChinsahu. Kuhanjeka haniyi nsañu yasonekawu dehi kwakwashaña muntu kulonda yeluki yuma yitwakuhwelelamu chakadi kwakama.—Kuhit. 32:2.
4. Tunateli kuzatisha ñahi iyi yibaaba yasonekañawu mumpinji mumpinji hakudidizisha etu aweni?
4 Didizishenu Enu Aweni niAmakwawu: Chimukutañaña muniyi yibaaba, shinshikenu hansona, yakutalilahu, nichimwatela kuhanjeka namuntu. Ilukenu nsañu chiyinakuhosha. Kuhiñahu esekenu kuzatisha njila yoyimu mumudimu wenu wakushimwina. (Yish. 1:5; 9:9) Muhela wumu wahosheli nindi, “Neyi wunakutaña iyi yibaaba chidi neyi anakudizisha kudi payiniya ‘wakuluka yitembi,’ wahoshaña yuma yatelela hampinji yashikila.”
5. Tunateli kukwasha ñahi antu itwadizishaña Bayibolu kulonda ashimwineña?
5 Munateli cheñi kuzatisha yakutalilahu yamunsona hakukwasha muntu imwadizishaña Bayibolu kulonda yashimwineña. Tañilenu hamu nsañu, mulejenu yena yekala mukwakushimwina. Neyi mwila mwenimu, mukukwasha antu imwadizishaña Bayibolu kulonda eluki chiyatela kulumbululawu yuma yakuhwelelawu munjila yayiwahi. (Kol. 4:6) Eñañi, iyi yibaaba yidi hakachi kanjila jajivulu mwatukwashilañayi Yehova ‘kukalakala mudimu wetu nakuwumanisha chikupu.’—2 Tim. 4:5.