Wuseya Wunakukandama Mukaayi Kejima—Bayibolu Yahosha Nawudi?

Mukulumpi waWorld Bank Group muJune 2022 wasoñamishili nindi: “Yuma mukaayi yinataminiku cheñi. Ichi wuseya wunakandaminiku chikupu nawa yuma yinakwenda chovu-chovu.”

Mutayi waInternational Monetary Fund niwena washimuna nawu: “Wuseya wamanji niwayakuda wunakandami nankashi, chinakojeji chihandilu kukalilaku kudi antu amavulu ekala mumatuña mwabula mali.”

Bayibolu yatukwashaña kwiluka chinakukojeja tumoneña yuma yamuchidiwu, chitunateli kuumika naniku kukala niyuma chiyikawaha kumbidi.

Wuseya chiwunakandami “mumafuku akukuminina”

• Bayibolu yatena mpinji yitunakushakamamu nawu “mafuku akukuminina.”—2 Timotewu 3:1.

• Yesu wahosheli nindi “yuma yakutiyisha woma,” hela yakufwisha mutentu, yikamwekesha nawu tunakushakama muniyi mpinji. (Luka 21:11) Wuseya chiwunakukandaminaku chinakutiyisha woma. Antu anakwakamena neyi akatweshaña kwakamena yisaka yawu kumbidi.

• Mukanda waChimwekeshu washimwineñahu dehi kukandama kwawuseya muyinu mpinji. “Natiyili chuma chatiyakeneña neyi izu. . . . Dahosheli nawu: ‘Kwati yatidiku hela makwati asatu abali wukuyilanda nanfwetu yefuku damukuma.’”—Chimwekeshu 6:6, Easy-to-Read Version.

Hakwila mwilukiliku jikwawu ‘hamafuku akukuminina’ nihawuprofwetu wekala mumukanda waChimwekeshu, talenu vidiyo yaThe World Has Changed Since 1914 nawa tañenu chibaaba chinakwila nawu “Akwakwendela Hatuwalu Awana Hiyanyi?”

Yuma yikamanisha kukala kwejima iku

• “Akatuña matala awu nawa akashakamamu, nawa akadima matempa anyivinyu nawa akada nyikaabu yayu. Hiyakatuña mushakama muntu wacheñiku, nawa hiyakadima ayida kudi acheñiku.”—Isaya 65:21, 22.

• “Hamaseki hakekala mbutu jajivulu chikupu; jakavula nankashi hewulu damapidi.”—Masamu 72:16.

• “Muloña antu anakukabakana anakuyikabisha, muloña wakwaaba kwawatuzweñi, nakanyamuka nakukoñahu chuma,” dichinahoshiyi Yehova.—Masamu 12:5.a

Katataka Nzambi amanishi kukala kunakumonawu antu, bayi neyi mwituña dimuku, ilaña mukaayi kejima. Hakwila mwiluki, tañenu chibaaba chinakwila nawu “Is a Fair Economic System Possible?”

Ilaña nimakonu, Bayibolu yinateli kuyikwasha chakwila nawuseya wunakukandama. Munjilanyi? Mwekala kufumba kwakuwahi kwahosha hachakuzatisha mali chiwahi. (Yishimu 23:4, 5; Mukwakutañisha 7:12) Hakwila mwilukiliku jikwawu tañenu chibaaba chinakwila nawu, “Protect Your Livelihood” nichinakwila nawu “How to Live on Less.”