Apolitishani Nawu Amagedoni Keña Yinzi, Indi Bayibolu Yahoshahu Nawudi?

Hachimu nantetemena, haOctober 10, 2022, aRussia anatilili mabomu munyisumba yayivulu yamuUkraine muloña wakukeña kufuntisha katama hansañu yachawu cheneni chabuvukili namabomu mafuku ayedi ahitilihu chasokankesha ituña daCrimea naRussia. Dihanafumi amaPolitishani hiyakuhosha nawu Amagedoni keña yinzi.

• “Kanda tumoneñahu dehi Amagedoni kufuma mpinji yikwadiña [Kajiña Mpata wamuU.S. John F.] Kennedy ninyitenda nzumbu yaholokeleli muCuba. . . . Neluki nami kwosi wukweti wuswa [wakuzatisha] chiwahi manyukiliya wiponi chakadi kukojeja Amagedoniku.” Kajiña Mpata Joe Biden wamuU.S. October 6, 2022.

• Kajiña Mpata wamuUkraine Volodymyr Zelensky wakwili hamwihwiliwu yuma yikufumamu neyi azatisha manyukiliya wiponi nindi, “Neteji nami iyi hiAmagedoni, kaayi kejima kadi mukukala.” BBC News, October 8, 2022.

Komana kuzatisha manyukiliya wiponi makonu kunateli kuleta Amagedoni? Indi Bayibolu yahoshahu nawudi?

Komana manyukiliya wiponi akuleta Amagedoni?

Inehi. MuBayibolu izu ‘daAmagedoni’ adisonekamu hohu kamu haChimwekeshu 16:16. Iyi bayi neyi hinjita yanyunza nanyunzaku, ilaña hinjita yakayasawu “anyanta ahanu hamaseki hejima” kudi Nzambi. (Chimwekeshu 16:14) Nzambi wakufumishahu chiyuulu chawantu kuzatisha Amagedoni.—Danyeli 2:44.

Neyi munakukeña kwilukilahu nsañu yikwawu kutalisha hayuma yikela Amagedoni hamaseki, tañenu chibaaba chinakuhosha nawu Amagedoni Hichumanyi?

Komana Kaayi niAntu Ashakamahu Akayijilumuna naNjita yaAmagedoni?

Inehi. Hela chakwila ayuuli awantu akazatisha manyukiliya wiponi kumbidi, Nzambi haketeja iseki kudijilumunaku. Bayibolu yahosha nawu:

• “Iseki datwalekañahu haya nyaaka.”—Mukwakutañisha 1:4.

• “Aloña akaswana iseki, nawa akashakamahu haya nyaaka.”—Masamu 37:29.

Hela chochu, wuprofwetu wamuBayibolu niyuma yinakumwekana makonu yinakumwekesha hatooka nawu katataka yuma yakala keña yimwekeni iseki. (Matewu 24:3-7; 2 Timotewu 3:1-5)Ilukilenuhu nsañu jikwawu chahosha Bayibolu hachihandilu chakumbidi kuhitila mukudiza Bayibolu chawaana.