Komana Mwamweni Bola yaWorld Cup Yinateli Kunuñanesha Antu?—Indi Bayibolu Yahoshahu Nawudi?

Chinamwekani neyi antu akushika ku 5 biliyoni akutala bola yaFIFA World Cup yatachikili haNovember 20 nakushika haDecember 18, 2022. Antu amavulu atoñojokaña nawu yisela yamuchidiwu yekala yakumanishilamu hohu wudi wanyi, ilaña yanuñañeshaña antu.

• “Yisela yekala nañovu yakuhimpa kaayi. Yazañaleshaña. Nawa yikweti niñovu yakunuñañesha antu munjila yambukaku.”—Dichahosheli Nelson Mandela, wadiña kajiña mpata wakuSouth Africa.

• “Bola. . . yanuñañeshaña antu muloña yayileteshaña kutalila yuma yayiwahi yakumbidi, yaletaña muzañalu, nawa yaleteshaña antu kumona nawu adikeña chikupu muloña akeña yuma yoyimu.”—Dichahosheli Gianni Infantino, kajiña mpata waFIFA.a

Komana mwalala World Cup niyisela yikwawu yinateli kunuñañesha antu? Komana kwakekalahu mpinji yakashakamañawu antu mukuwunda nikunuñañana?

Komana bola yanuñañeshaña antu?

Bola yaWorld Cup yachinu chaaka yinaleteshi antu kuhosha yuma yayivulu. Iyi bola yinakojeji antu kutachika kuditadeka nikuhosha hansañu yinakundami kuwuswa wawantu, yitachi yawu, nichuma chinakukojeja antu amu kwikala atuzweñi ilaña amakwawu aheta.

Hela chochu, antu amavulu atiyaña kuwaha kutala yisela yahemañawu hakachi kamatuña yidi neyi World Cup muloña yayiletelaña muzañalu. Ilaña, hela chakwila antu adiluñishaña kutala iyi yisela, hiyinateli kuletesha antu kutwalekahu kwikala anuñañanaku. Yamwekeshaña yilwilu yashimwineñahu dehi Bayibolu nawu diyakekala “mumafuku akukuminina.”—2 Timotewu 3:1-5.

Chuma chakaleta kunuñañana mukaayi

Bayibolu yashimuna chuma chakaleta kunuñañana mukaayi. Yashimuna nawu antu heseki dejima akekala anuñañana muchiyuulu chanfulumendi yamwiwulu yatenañawu nawu “Wanta waNzambi.”—Luka 4:43; Matewu 6:10.

Mwanta waniwu Wanta, Yesu Kristu, wakaleta kuwunda mukaayi kejima. Bayibolu yahosha nawu:

• “Waloña wakashakama chiwahi, nawa kuwunda kwakawanina kwejima”—Isamu 72:7.

• “Wakapulwisha kazweñi wunakulomba wukwashu. . . Wakayipulwisha kumakabisha nikumadombu.”—Isamu 72:12, 14.

Nimakonu, yuma yadizishileñayi Yesu yinanuñañeshi mamiliyoni awantu mumatuña 239. Aleka kuhelañana. Neyi munakukeña kwilukilahu nsañu yayivulu, tañenu yibaaba yidi yaIngilishi yinakuhosha nawu “Breaking the Cycle of Hatred.”