Njita Yidi kuMiddle East—Bayibolu Yahoshahu Nawudi?

Antu anakutiya woma hakumona yikonkojola yidi hakachi kaUnited States, Israel niIran. Komana iku kukala kukaletesha njita yikeñili nimumatuña amakwawu? Komana jinfulumendi jikumanisha iku kukala nikuleta kuwunda?

Antu eluka wuprofwetu wamuBayibolu anateli kutachika kujinoka neyi chakwila iyi njita yidi kuMiddle East diyi ntachikilu yanjita yaAmagedoni yatenawu mumukanda waChimwekeshu.

Bayibolu yahoshahu nawudi?

Komana jinfulumendi jakamanisha njita yidi kuMiddle East?

Bayibolu yahosha nawu: “Bayi wukuhwelela ayilolu hela mwana kamuntu, wunateli kubula kuleta wamwinuku.”—Isamu 146:3.

Tuneluki wanyi neyi chakwila jinfulumendi jikatwesha kuleta kuwunda kuMiddle East hela nehi. Hela chochu, Bayibolu yashimuna hatooka nawu kwosi akulumpi jamapolitiki, nfulumendi yawantu, hela izanvu dawantu dinateli kumanisha njita nikuleta kuwundaku. Nzambi hohu diyi wunateli kumanisha “majita heseki dejima.”—Isamu 46:9.

• Neyi munakukeña kwilukilahu nsañu jikwawu, tañenu Kaposhi Kakutalila kadi namutu nawu “Chumanyi Chakamanisha Majita?”

Komana njita yidi kuMiddle East yinakushikija wuprofwetu?

Bayibolu yahosha nawu: “Mwakatiya majita ninsañu yamajita. . . . Muza wakanyamuka nakuzuña namuza wukwawu, wanta niwena wakanyamuka nakuzuña nawanta wukwawu.”—Matewu 24:6, 7.

Yikonkojola yidi kuMiddle East chayinu mpinji hiwunsahu wukwawu wunakumwekesha nawu tudi “[ku]kukuma kwanshakaminu yamakonu” nawa nawu tudi “mumafuku akukuminina.” (Matewu 24:3; 2 Timotewu 3:1) Majita itunakumona makonu anakumwekesha nawu Nzambi keña amanishi majita nikukala kukwawu kunakumonawu antu.

• Neyi munakukeña kwilukilahu nsañu jikwawu, tañenu chibaaba chinakwila nawu “Finshi Twingeshibilako Inshiku sha Kulekelesha, Nelyo ‘Inshita ya Mpela’?”

Komana Amagedoni yakatachikila kuMiddle East?

Bayibolu yahosha nawu: “Ayipompesheli hamu kwiluña datenañawu muchiHeberu nawu Amagedoni.”—Chimwekeshu 16:16.

Njita yaAmagedoni bayi neyi hinjita yakuzuña nanfulumendi jawantu yakatachikila kuMiddle Eastku. Hinjita yakekala hakachi kanfulumendi jawantu jejima naNzambi.

• Neyi munakukeña kwilukilahu nsañu jikwawu, tañenu chibaaba chinakwila nawu “Njita yaAmagedoni Hichumanyi?”

Chumanyi chinateli kutukwasha kuumika hampinji yitunakwakama?

Bayibolu yahosha nawu: “Bayi mwakama chuma hela chimuku, ilaña muyuma yejima, mukulomba nimukulomba kwakulembelela nimukusakilila, mulejenuña Nzambi yuma yejima yimunakukeña.”—AFwilipi 4:6.

Yehovaa Nzambi watulejaña nindi tulombeña kudi yena. Chineli Nzambi watwakamenaña, wukutiya kulomba kwetu nikutukwasha kuumika neyi kudi yuma yinakutwakamisha. (1 Petulu 5:7) Njila yimu mwelilañayi mwenimu hikuhitila mukutukwasha kwiluka chinaleteshi majita atwalekihu, chakamanawu nichakelayi hakwila akafumishihu kuyeña nikukabakana.—Chimwekeshu 21:3, 4.

• Neyi munakukeña kwilukilahu nsañu jikwawu kutalisha hachatukwashañayi Nzambi, tañenu chibaaba chinakwila nawu “MuBayibolu Dimwekala Mazu Akukundeja.”