MALWIHU EHULAÑAWU ATWANSI
Yumanyi yinatela kwiluka kutalisha hakutemesha mameseji?
:-) Kutemesha mameseji munjila yayiwahi hinjila yayiwahi yakuhanjekelamu nawantu.
:-( Kutemesha mameseji munjila yatama kunateli kumanisha wubwambu wenu nikutamisha ijina denu.
Chinu chibaaba chikuyikwasha kwiluka yuma yimwatela kwiluka hadi
Muchinu chibaaba mudi cheñi:
Antu imwatemeshelaña mameseji
Atwansi amavulu amonaña nawu kuhanjeka kuzatisha mameseji hinjila yalema. Kutemesha mameseji hinjila yakuhanjekelamu nawantu ejima adi mufoni yenu, chiña hohu neyi anvwali jenu ayikaanisha.
“Atata atukaanisha ami nimuhelami kuhosha nawamayala. Neyi tunakukeña kuhosha namuntu weyala, twatela kuzatisha landi foni yekala mukapeka mudi antu amavulu nawa ejima anakutiyaku.”—Lenore.
Chuma chimwatela kwiluka: Munateli kwikala mukukala neyi muhanaña naamba yenu yafoni kudi muntu wudi wejima.
“Neyi munamwiluki wanyi muntu imunakwinka naambala yenu, nateli kuyitemeshela mameseji hela nyevulu yabula kutelela.”—Scott.
“Neyi mwaditemeshelaña mameseji mpinji yejima namutu weyala hela wumumbanda, munateli kutachika kudikunda nindi nankashi.”—Steven.
Bayibolu yahosha nawu: “Wababala wamonaña wubanji hakuswama.” (Yishimu 22:3) Kwilukila chadimu kukala kunateli kufumamu, kunateli kuyikwasha kubula kudiñija mukukala.
Chuma chamwekeni: “Nadiña nebwambu dami weyala nawa twaditemesheleleña mameseji mpinji yejima. Natoñojokeleña nami tudi hohu amabwambu. Natoñojokeleña nami inakuluwañesha wanyi sampu chalejeliyi nindi natachiki kuntiya kuwaha. Chinatoñojokelihu, nelukili nami chiña nadikundili nindi wanyi, hela kumutemeshelaña mameseji mpinji yejima.”—Melinda.
Toñojokenu hachumichi: Wubwambu waMelinda naniwu iyala wukwikala ñahi chineli neluki dehi nindi wamutiyaña kuwaha?
Munateli kwila yuma munjila yambukaku! Yumanyi yambukaku yateleleli kwilayi Melinda kulonda yena nibwambu dindi atwalekihu kwikala amabwambu chakubula kwikala nankeñelu yakutachika kudiluka?
Nsañu yimwatemeshaña
Kutemesha mameseji kwapela nankashi, chatiyakanaña chiwahi kutambwila meseji nawa chekala chapela muntu kutiyila mwacheñi nsañu yimunatemeshi.
Chuma chimwatela kwiluka: Antu anateli kuyitiyila mwacheñi nsañu yimunakutemeshela mumeseji.
“Kwila mwiluka chinakutiyayi muntu kuhitila mumeseji hela neyi nazatishi tuyinjikijiluku. Antu anateli kutiyila mwacheñi nsañu yimunatemeshi.”—Briana.
“Neluki antu anatamishi majina awu, nawa ayiluka nawu ankenkama muloña wakutemeshela amayala nsañu yakukenkama mumameseji.”—Laura.
Bayibolu yahosha nawu: “Muntu waloña wasambilaña kutoñojoka mumuchima windi henohu kanda aakuli.” (Yishimu 15:28.) Chuma chitunakudizilaku? Tañenumu cheñi mumeseji yimunasoneki henohu kanda “Muyitemeshi”!
Mpinji yimwatemeshaña mameseji
Kusambila kutoñojoka hansañu yimunakukeña kutemesha chikuletesha antu kubula kuyitiyila mwacheñi oyi nsañu yimunayitemesheli.
Chuma chimwatela kwiluka: Neyi muneluki wanyi chakuzatisha chiwahi mazu hampinji yimunakutemesha meseji, akwenu akuyimonaña nawu mwekala nawinyi cheñi akuyitemuka.
“Chekala chapela kubula kwiluka njila yayiwahi yakutemeshelamu mameseji. Neyi inakuhanjeka namuntu hela tunashakami hamu tunakuda, wukuwana inakutemeshela muntu mukwawu mameseji.”—Allison.
“Muntu nateli kwikala mumaposu ahamukwakwa neyi nakutemesha mameseji iku nakwendesha.”—Anne.
Bayibolu yahosha nawu: “Yuma yejima yikweti mpinji, . . . Mpinji yakumwena nimpinji yakuhosha.” (Mukwakutañisha 3:1, 7) Dichichatela kwikala ninamameseji!
Chimwatela kutemesha mameseji
Antu imwatemeshelaña
;-) Ovwahilenuña nshimbi yashaku avwali jenu.—AKolosi 3:20.
;-) Bayi mwinkaña antu adi ejima naamba yenu yafoniku. Neyi mukaana munjila yayiwahi kulejaku antu adi ejima nsañu yenu yakujinda, kushilahu ninaamba yenu yafoni, dichuma chimwakelaña neyi munakuli.
;-) Bayi mutemeshelaña antu mameseji akukenkamaku. Muloña chimwasweja kudikunda namuntu munateli kufuma kukala.
“Anvwali jami akamenaña wanyi chinazatishaña foni yami, muloña ankuhwelela nawu natela kufukula chiwahi kutalisha kudi antu inenkaña naamba yami.”—Briana.
Nsañu yimwatemeshaña
;-) Henohu kanda musoneki meseji, dihulenu nenu, ‘Komana kutemesha mameseji diyi njila yayiwahi yakuhanjekelamu haniyi mpinji?’ Chikuwaha neyi mutemesha foni hela kuhanjeka nindi kanwa nakanwa.
;-) Bayi mutemesha nsañu hameseji yimukukañanya kuhosha neyi mudi nanowu muntuku. Sarah wudi nayaaka 23 wahosheli nindi: “Neyi tukukañanya kuhosha mukanwa oyi nsañu hitwatela kuyisoneka mumesejiku.”
“Neyi muntu ayitemeshela nyevulu yabula kutelela yilejenuku anvwali jenu. Kwila mwenimu kunateli kuyikiña nawa anvwali jenu akuyikuhwelela.”—Sirvan.
Mpinji yimwatela kutemesha meseji
;-) Ilukilenu chadimu mpinji yimukubulaña kuzatisha foni yenu. Olivia wahosheli nindi, “Nekalaña nafoni wanyi yami neyi inakuda hela inakudiza nawa nayijimaña neyi tunakupompa kulonda yibuleña kuluwañesha.”
;-) Toñojokelenuñaku akwenu. (AFwilipi 2:4) Bayi mutemeshaña mameseji iku munakuhanjika namuntu mukwawuku.
“Nalondelaña nshimbi yinashaku yakubula kutemeshela antu mameseji iku inakuhanjeka nawamabwambu jami, chiña hohu neyi chinakali. Nawa hinahanaña naamba yami kudi antu inabula kwilukishaku.”—Janelly.