Katumbwa
b Neyi mudi awamayala nawa munakwakama hadi muntu wamumbanda imweluka etañawu, munakukeña kumukwasha, chikuwaha neyi mukwikala nahakukumina nakumuleja nenu watela kulejaku ibwambu dindi wamumbanda akuhwelelayi kulonda amukwashi.
Mutiyililenu nakanañachima. (Yakoba 1:19) Mulejenu nenu mukumutiyilila chikuhoshañayi, ilaña bayi mumukakeja kuhoshaku. Mulejenu nenu munakuhweleli yuma yinakuhoshayi.—Yishimu 20:5.
Mutayi wumu wahosheli nawu: “Wahamukili hakwila ahoshi nanenu. [Antu etañawu] avula kusweka hela kukehesha nsañu, chatela ashimuni nsañu yejima kwesekeja nachichadiña. Chinateli kuyikalila kukuhwelela nenu muntu imweluka wekala nachilwilu chakwetana. Muntu wetanaña nateli kumwekesha yilwilu yacheñi neyi mudi hamu [kubadika] chekalañayi neyi wudi namuntu etañayi.”
Hoshenuña munjila yakukolesha. (1 ATesalonika 5:11) Hoshenuña nindi munjila yikumukwasha kutiya nindi walema. Mulejenu nenu mwamutoñojokañahu. Mwanukishenu yilwilu yayiwahi yikwetiyi. Nawa mukwashenu kulonda alombeña wukwashu.
Mukwashenuña. (Yishimu 17:17) Mukwashenuña muyuma yidi neyi kumutalilaku anyana hadi kapinji hela kuyitelekelaku yakuda. Mwihulenu neyi neluki chatela kwilayi neyi asweja kumweta munjila yinateli kuleta wubanji, hela neyi neluki kwatela kuyayi hakwila adikiñi.
Mukwashenu eluki nindi wudi nawuswa wakudifuukwila yomweni. (AÑalija 6:5) Mulejenu nsañu yinateli kumukwasha, nawa hoshenu hanjila jinateli kumukwasha. Ilaña bayi mumuleja chatela kwilayiku.