Tondolwelenu Mwidima, Twalekenuhu Kwikala muChejeji

1-2. (a) Pawulu wadiña mukukalanyi hayisonekeleliyi aEfwesesa mukanda, nawa chumanyi chaletesheli ayisonekeli iwu mukanda? (b) Malwihwinyi itukuhanjekahu?

HAMPINJI yamukasiliwu mukaleya kamwitala muRoma, kapostolu Pawulu wakeñeleña kukolesha akwawu akakwitiya. Hatwesheleña kudimona nawu mesu-namesuku, dichi wayisonekeleli nyikanda. Mukanda wumu haniyi nyikanda wayisonekeleli aEfwesesa mu 60 indi kwiji mu 61 C.E.​—Efwe. 1:1; 4:1.

² Yaaka kwakwihi na 10 yahitilihu henohu kanda amukasi, Pawulu washakamini muEfwesesa hadi mpinji yayilehi nakushimwina nikutañisha nsañu yayiwahi. (Yilw. 19:​1, 8-​10; 20:​20, 21) Wayikeñeli amanakwindi chikupu nawa wakeñeleña kuyikwasha kulonda atwalekihu kwikala ashinshika kudi Yehova. Hanu dinu, muloñadi wayisonekeleleliyi akaKristu awayishewa kutalisha hamwidima nichejeji? Nawa yumanyi yinateli kudizilaku akaKristu ejima kuniku kufumba? Tuhanjekenu hañakwilu yanawa malwihu.

KUFUMA MUMWIDIMA NAKWINZA MUCHEJEJI

3. Nhoshelwinyi yankinji yazatishiliyi Pawulu mumukanda windi wayitemesheleliyi aEfwesesa?

³ Pawulu wayisonekeleli akaKristu amuEfwesesa nindi: “Kunyima mwadiña mwidima, ilaña ichi mudi chejeji.” (Efwe. 5:8) Pawulu wazatishili nhoshelu yankinji yamwidima nachejeji hakulumbulula aEfwesesa chahimpiliwu kwambukaku nachadiñawu hatachi. Tutalenu chaletesheli Pawulu ahoshi nindi aEfwesesa kunyima ‘adiña mwidima.’

4. Munjilanyi aEfwesesa mwekalililiwu mumwidima muloña wakudifukula kwakutwamba?

⁴ Kwikala mumwidima muloña wakudifukula kwakutwamba. Henohu kanda adizi chalala nakwikala akaKristu, aEfwesesa asonekeleliyi Pawulu mukanda adiña muwuduñu wakudifukula kwakutwamba nikukuhwelela munsañu jakupanda. Mumusumba waEfwesesa dimwadiña tembeli yayili mpuhu yaAtemisi, yamweneña antu kushankulu nawu yidi hakachi kayuma 7 yakuhayamisha mukaayi. Antu adifukwilileña haniyi tembeli eñijili mutu chikupu mukudifukula kudi ankishi. Kutuña nikulandisha tumatembeli twanzambi wamumbanda Atemisi twakuzatisha mukudifukula kwakutwamba, kwahetesheleña nankashi achiji. (Yilw. 19:​23-​27) Kubombelahu, antu amavulu muEfwesesa adiña nakuhoña.​—Yilw. 19:19.

5. Munjilanyi aEfwesesa mwekalililiwu mumwidima muloña wayilwilu yatama?

⁵ Kwikala mumwidima muloña wayilwilu yatama. Mumusumba waEfwesesa mwenzeli yilwilu yawuzondu niyawukapwa nsonyi. Nhosheli yawuzondu avulileña kuyizatisha mumatala amaneni amumusumba mwakuhemena yisela nihayawija yakudifukula kwakutwamba. (Efwe. 5:3) Enimbu amavulu amuniwu musumba alekeli “kutiya nsonyi,” muchiGiriki iwu mukuku wamazu watalisha mukwila nawu “kuleka kutiya kukata.” (Efwe. 4:​17-​19) Henohu kanda eluki nshimbi jaYehova jahosha hayuma yaloña niyatama, yinleji yawaEfwesesa hiyayisompesheleña neyi akoña chuma chatamaku, nawa hiyakamineña chatiyileñayi Yehova muloña wayilwilu yawuku. Hadaha dihafumini Pawulu ayiteneña nindi adi “mumwidima muyitoñojoka nawa anadaambuli kuwumi waNzambi.”

6. Muloñadi Pawulu chayilejeleliyi aEfwesesa nindi ‘hayina mpinji adiña chejeji’?

⁶ Hela chochu, aEfwesesa amakwawu hiyatwalekelihu kwikala mumwidimaku. Pawulu wasonekeli nindi ‘hayina mpinji ekalili chejeji mudi Mwanta.’ (Efwe. 5:8) Atachikili kuhanda kwesekeja nachahosha Izu daYehova dadiña neyi chejeji chayilombweleña. (Mas. 119:105) Awa aEfwesesa ashiyili yaaku niyilwilu yawuzondu yadiñawu nayu mukudifukula kwakutwamba. Ekalili “[akakumwimbujola] Nzambi” nawa azatileña hakumina ñovu jawu kudifukula kudi Yehova nikumuzañalesha.​—Efwe. 5:1.

7. Yuma yitwelaña yadifwana ñahi nayuma yeliliwu akaKristu amuEfwesesa amavulu?

⁷ Munjila yoyimu, henohu kanda tudizi chalala, twadiña mumwidima muloña wakudifukula kwakutwamba nimuloña wayilwilu yatama. Etu amu twadiña nakwanuka mafuku akunooka anukañawu mukudifukula kwakutwamba nawa etu amakwawu twelileña yuma yawuzondu muchihandilu chetu. Ilaña chitwelukili nshimbi jaYehova jahosha hayuma yaloña niyabula kuloña, twahimpili. Twatachikili kuhanda kwesekeja nanshimbi jindi jaloña. Nawa chafumamu, tunakudiluñisha yuma yayivulu yayiwahi. (Isa. 48:17) Hela chochu, chayinu mpinji tunatwalekihu kumona kukala. Twatela kutondolwela mwidima wutwashiya kunyima nakutwalekahu kwenda “neyi anyana kachejeji.” Tunateli kwila ñahi mwenimu?

Mwevulu wunafwatuliwu kuhitila mukutambula lusesa kudi aPapyrology Collection, Graduate Library, University of Michigan, P.Mich.inv. 6238. Licensed under CC by 3.0

TONDOLWELENU MWIDIMA

8. Kwesekeja naAEfwesesa 5:​3-5, yumanyi yateleleli kutondolwelawu aEfwesesa?

⁸ Tañenu AEfwesesa 5:3-5. Hakwila atondolweli kwikala mumwidima muloña wayilwilu yawuzondu, akaKristu amuEfwesesa ateleleli kutwalekahu kukaana yaaku yamuneñesheleña Yehova. Iyi yilwilu hiyabombelelimu hohu wuvumbiku, ilana ninhoshelu yawuzondu. Pawulu wayanukishili aEfwesesa nindi ateleleli kutondolwela yuma yamuchidiwu hakwila nawu “[akaswani] Wanta waKristu niwaNzambi.”

9. Muloñadi wutwatelela kutondolwela kwila chuma chidi chejima chawuzondu?

⁹ Ninetu twatela kutwalekahu kulwisha nayuma yinateli kutuletesha “kukoña nyidimu yamukunkulwayi yamumwidima.” (Efwe. 5:​11) Kafwampi, chalala chidi chakwila nawu neyi muntu asweja kutala, kutiyilila hela kuhosha hayuma yamajilu, dikwila nawu yuma yawuzondu, chikwikala chaswayi muntu wamuchidiwu kukoña chuma chatama. (Kutach. 3:6; Yak. 1:​14, 15) Mwituña dimu, izanvu deneni dawamanakwetu datachikili kuditemeshela mameseji kuzatisha njila yakuhanjekelamu haintaneti. Amavulu hakachi kawu atachikili kuhanjeka hayuma yakuspiritu. Hela chochu, mukuhita kwampinji atachikili kuhanjeka hayuma yatama. Adiña hohu nakuhanjeka hayilwilu yawuvumbi. Nkumininaku, amavulu hakachi kawu etejeli nawu iji mpanji jawuzondu jayiletesheli kwila wuvumbi.

10. Satana wafwilaña ñahi kutudimba? (AEfwesesa 5:6)

¹⁰ Kaayi kaSatana kafwilaña kutudimba kulonda tukuhweleli netu yuma yatenañayi Yehova nindi yawuzondu nawa yamajilu, hiyatama hela hantiku. (2 Pet. 2:​19) Chumichi hichinateli kutuhayamishaku! Kafuta kamu kanazatishiyi Diyabolu hadi yaaka yayivulu kakukeña kuluwañesha antu kulonda akañanyi kwiluka chaambu chidi hakachi kayuma yaloña nayuma yatama. (Isa. 5:​20; 2 Kor. 4:4) Dichaleteshaña mumafwilimu amavulu, yuma yatalishañawu hamaTV, niyatudikañawu hamawebusayiti yitiyakesheña nsañu yaditaadikishaña nanshimbi jaYehova jaloña! Satana wafwilaña kutudimba kulonda tutoñojokeña netu yaaku niyilwilu yawuzondu yetejewa, yayiwahi nawa hiyinateli kutuletela kukalaku.​—Tañenu AEfwesesa 5:6.

11. Chuma chamumwekeneni muhela Angela chinakumwekesha ñahi chichalemena kuzatisha kufumba kwakuwahi kwekala haAEfwesesa 5:7? (Talenu cheñi mwevulu.)

¹¹ Satana wakeñaña nindi tudikundeña nawantu akutukañesha kwovwahila nshimbi jaYehova. Dichaletesheli Pawulu ayikonkomweni aEfwesesa nindi “bayi mudibomba nawuku,” dikwila nawu, kudibomba nawantu elaña yuma yatama kumesu aNzambi. (Efwe. 5:7) Hela chochu, twatela kwikala asoñama nankashi kubadika chadiñawu aEfwesesa akushankulu. Muloña makonu tunateli kudikunda nawantu mesu-namesu nikuhitila mukuzatisha njila yakuhanjekelamu haintaneti. Muhela Angela,a washakamaña kuAsia, wamweni wubanji wunateli kufuma mukuzatisha njila yakuhanjekelamu haintaneti. Wahosheli nindi: “Chovu-chovu, yitoñojoka yami yahimpili. Hashimbwili wanyi nalekeli kutiya kutama kwikala ‘nawamabwambu’ abulileña kulemesha yishina yamuBayibolu. Nkumininaku, natachikili kutoñojoka nami chidi hohu CHIWAHI kufwila yuma yamuneñesheleña Yehova.” Ilaña, akulumpi akweti kukeña amukwashili Angela kuhimpa. Wahosheli nindi: “Chayinu mpinji nashaña maana hayuma yakuspiritu bayi hanjila yakuhanjekelamu haintanetiku.”

12. Yumanyi yikutukwasha kutwalekahu kwovwahila nshimbi jaYehova jahosha hayuma yaloña niyabula kuloña?

¹² Twatela kutondolwela yitoñojoka yamukaayi yakwila nawu yilwilu yawuzondu yidi hohu chiwahi. Iyi yitoñojoka yakutwamba. (Efwe. 4:​19, 20) Tukwila chiwahi neyi tudihula etu aweni netu: ‘Komana nazataña nañovu kutondolwela kudikunda kwejima kwabula kutelela nawakwetu mutwazatilaña, mutwatañilaña, hela nawantu amakwawu abulaña kulemesha nshimbi jaYehova jaloña? Nahamukaña nakuhakwilaku nshimbi jaYehova hela chakwila antu amakwawu anlejaña nawu hinalemesha yuma yakuhwelelawuku?’ Neyi chinamwekeshiwu ha 2 Timotewu 2:​20-​22, twatela cheñi kwikala asoñama hampinji yitunakutonda antu akudikunda nawu mukachi kachipompelu chawakaKristu. Twanukeña netu antu amakwawu kwila atukwasha kutwalekahu kwikala ashinshika hampinji yitunakumukalakela Yehova nehi.

ENDENUÑA “NEYI ANYANA KACHEJEJI”

13. Mazu akwila nawu “endenuña neyi anyana kachejeji” atalisha mudihi? (AEfwesesa 5:​7-9)

¹³ Pawulu hayikolesheli hohu akaKristu amuEfwesesa kutwalekahu kutondolwela mwidimaku, ilaña wayilejeli cheñi nindi “[endeña] neyi anyana kachejeji.” (Tañenu AEfwesesa 5:​7-9.) Awa mazu atalisha mudihi? Atalisha mukwila nawu twatela kwikala nayilwilu yatelela akaKristu alala mpinji yejima. Njila yimu yinateli kutukwasha kwila mwenimu hikutañaña nikudiza nakanañachima Izu daNzambi ninyikanda yetu yashindamena haBayibolu. Sweje-e, chalema nankashi kusha muchima hayuma yelileñayi nichatañishileñayi Yesu Kristu, “chejeji chakaayi.”​—Yow. 8:​12; Yish. 6:​23.

14. Spiritu yajila yinateli kutukwasha ñahi?

¹⁴ Twakeñekaña cheñi wukwashu waspiritu yajila yaNzambi kulonda tutwalekeñahu kwikala “neyi anyana kachejeji.” Muloñadi? Muloña chakala nankashi kutwalekahu kwikala nayilwilu yayiwahi mukanu kaayi mudi yilwilu yawuzondu. (1 Tes. 4:​3-5, 7, 8) Spiritu yajila yinateli kutukwasha kukañesha yitoñojoka yamukaayi, kushilahu maana niyitoñojoka yawantu yaditaadikishaña nayitoñojoka yaNzambi. Spiritu yajila yinateli cheñi kutukwasha kwila yuma “yamwekeshaña kuwaha kwejima nikuloña.”​—Efwe. 5:9.

15. Yumanyi yitwatela kwila hakwila tutambwili spiritu yajila? (AEfwesesa 5:​19, 20)

¹⁵ Njila yimu mutunateli kutambwila spiritu yajila hikulomba netu twiikali nayu. Yesu wahosheli nindi Yehova wakayinka “antu amulombaña spiritu yajila.” (Luka 11:13) Nawa hampinji yitwamushimekaña Yehova hamu hakupompa kwawakaKristu, twatambwilaña cheñi spiritu yajila. (Tañenu AEfwesesa 5:​19, 20.) Yilwilu yayiwahi yitunateli kwikala nayu muloña waspiritu yajila yaNzambi, yikutukwasha kwikala nachihandilu chamutiyishaña Nzambi kuwaha.

16. Chumanyi chikutukwasha kufuukula chachiwahi? (AEfwesesa 5:​10, 17)

¹⁶ Neyi kudi yuma yalema yitunakukeña kufuukula kwila, twatela kwiluka “chidi nkeñelu yaYehova,” kuhiñahu dinu twila kwesekeja naniyi nkeñelu. (Tañenu AEfwesesa 5:​10, 17.) Neyi tuwanaña yishina yamuBayibolu yinakundami kuyuma yitunakukeña kwila, dikwila nawu tunakukeñakeña yitoñojoka yaNzambi yitulomboli muyuma yitunakukeña kwila. Dichi neyi tuzatisha yishina yindi, chikutukwasha kufuukula chachiwahi.

17. Yumanyi yabombela mukuzatisha chiwahi mpinji yetu? (AEfwesesa 5:​15, 16) (Talenu cheñi mwevulu.)

¹⁷ Pawulu wayifumbili cheñi akaKristu amuEfwesesa nindi azatisheña chiwahi mpinji yawu. (Tañenu AEfwesesa 5:​15, 16.) ‘Watama,’ chilumbu chetu Satana, wukukeña nindi atuleteshi tushi muchima kukufwila yuma yamukaayi kulonda tubuli kwikala nampinji yeneni yakumukalakela Nzambi. (1 Yow. 5:​19) MukaKristu wukutachika kusha maana hakwikala namaheta, kutaña shikola yakumujimba, indi kwiji kutwamijaku mudimu windi wakumujimba kubadika kumukalakela Yehova. Neyi chuma chamuchidiwu chimwekana, dikwila nawu iwu mukaKristu anamuluwañeshi kudi yitoñojoka yamukaayi. Hela chochu, iyi yuma yatama wanyi, ilaña bayi tuyitwamijaku muchihandilu chetuku. Hakwila twendeña “neyi anyana kachejeji,” twatela ‘kuzatishaña chiwahi mpinji yetu,’ dikwila nawu kusha muchima hayuma yalema chikupu.

18. Yumanyi yeliliyi manakwetu Donald hakwila azatisheña chiwahi mpinji yindi?

¹⁸ Wanenu njila jakumukalakelelamu Yehova chikupu. Ichi dichuma cheliliyi manakwetu Donald, washakamaña kuSouth Africa. Wahosheli nindi: “Nashinshikili hachadiña chihandilu chami nawa nalombeli chikupu kudi Yehova kulonda ankwashi kudikita mumudimu wakushimwina. Nalombeli nami niwani mudimu wukunkwashaña kwikala nampinji yeneni yakushimwina. Nawukwashu waYehova, nawanini mudimu wunakeñeleña. Ami nañodami twatachikili kuzatila hamu mumudimu wampinji yejima.”

19. Yumanyi yinateli kutukwasha kutwalekahu kwenda “neyi anyana kachejeji”?

¹⁹ Mukanda wayisonekeleliwu aEfwesesa kudi Pawulu watela wayikwashili kutwalekahu kwikala ashinshika kudi Yehova. Nawa iku kufumba kwonenewa kunateli kutukwasha ninetu. Neyi chitunamoni, kunateli kutukwasha kutonda chiwahi yisela niantu itwatela kudikunda nawu. Kukutusañumuna kudiza Bayibolu mpinji yejima kulonda chejeji chachalala chitulomboleña muyuma yejima yitukwilaña. Nawa iku kufumba kunakonkomweni hakulema kwaspiritu yajila yinateli kutukwasha kwikala nayilwilu yayiwahi. Kuzatisha yuma yasonekeliyi Pawulu kunateli kutukwasha kufuukula chachiwahi kwesekeja nayitoñojoka yaYehova. Neyi twilaña yumiyi, tukutondolwelaña mwidima wamukanu kaayi nakutwalekahu kwikala muchejeji!