7. (a) Hana wakanini nindidi, muloñadi, nawa chadiña ñahi chakala? (b) Chikaninu chaHana chadi kuletesha mwanindi Samweli kwiladi? (Talenu tumazu twaheshina.)

⁷ Hana niyena welili mwamukaniniyi Yehova. Wakanini hampinji yadiñayi mukukala kwakubula kuvwala anyana nihampinji yamuhosholeleñawu kudi muhadika nindi. (1 Sam. 1:4-7, 10, 16) Hana wamudilili Nzambi nakumukana nindi: “Eyi Yehova wamazaza, neyi wukuntoñahu ami kambuñeyi nehuñu dami idi, neyi wukuñanukahu, neyi wukubula kunvulamena ami kambuñeyi, wunyinka ami kambuñeyi mwana weyala, chalala nakamwinkayi Yehova akekali windi hohu mafuku indi ejima amba kahandayi, hosi muntu wakahitisha mpoku yachayi kumutu winduku.”a (1 Sam. 1:11) Kulomba kwaHana akwakwili nawa wavwalili mwana weyala wawedi. Watiyili muzañalu chikupu! Hela chochu, wajimbeliku wanyi chamukaniniyi Nzambi. Chavwaliliyi mwanindi weyala wawedi, wahosheli nindi: “Namulombeli wakulomba kudi Yehova.”—1 Sam. 1:20.