3. Yehova wakeñaña nindi amabwambu jindi eleñadi?

Yehova wakeña antu ejima, “ilaña Yena wadikunda chikupu namuntu woloka.” (Yishimu 3:32) Yehova wakeñaña amabwambu jindi eleña yuma yamonañayi nindi yayiwahi nawa atondolweleña yuma yamonañayi nindi yatama. Amakwawu amonaña nawu kwila alondela nshimbi jaYehova jahoshaña hakwila yuma yayiwahi nikutondolwela kwila yuma yatama nehi. Hela chochu, Yehova wukweti luwi. Watambwilaña antu ejima amukeña chikupu nawa azataña nañovu kulonda amutiyisheña kuwaha.—Isamu 147:11; Yilwilu 10:34, 35.

Wejima wetu twakeñaña kwikala nawamabwambu ashinshika. Yehova niyena wakeñaña amabwambu jindi kwikala ashinshika. Ilaña chaswayi wanyi kwikala ashinshika mukaayi mudi antu amavulu abula kushinshika. Yumanyi yayiwahi yafumaña mukwikala ashinshika muyuma yejima?

1. Muloñanyi waweni wutwatela kwikalila ashinshika?

Neyi twikala ashinshika nawakwetu, tukumwekesha netu twamukeña Yehova nawa twamulemesha. Toñojokenu hachumichi: Yehova weluka yuma yejima yitwatoñojokaña niyitwelaña. (AHeberu 4:13) Neyi twikala ashinshika, wamona nawa watiyaña kuwaha. Izu dindi dahosha nawu: “Yehova wahela muntu watwambaña, ilaña Yena wadikunda chikupu namuntu woloka.”—Yishimu 3:32.

2. Njilanyi jikwawu mutunateli kumwekeshela netu twashinshika muchihandilu chetu?

Yehova wakeñaña nindi “[tuhosheña] mwalala muntu namukwawu.” (Zekariya 8:16, 17) Chumichi chinatalishi mudihi? Neyi tunakuhosha nachisaka chetu, akwetu mutwazatilaña, amanakwetu niahela, hela nawakulumpi janfulumendi, hitwatwambaña hela kuyileja nsañu yakutwambaku. Antu ashinshika hiyeyaña hela kudiila akwawu mabula hamutuku. (Tañenu Yishimu 24:28 niAEfwesesa 4:28.) Nawa afwetaña nyisonku yejima yatela kufwetawu. (ARoma 13:5-7) Neyi tukwilaña mwenimu nimuyuma yikwawu, dikwila nawu “[tukwikala] ashinshika muyuma yejima.”—AHeberu 13:18.

3. Yumanyi yayiwahi yafumaña mukwikala ashinshika?

Neyi antu eluka nawu twekala ashinshika, akutukuhwelela. Twaletaña kuwunda muchipompelu nawa antu ejima atiyaña kwikala akiñewa. Twekalaña nachinleji chamuchima chitooka. Kashinshi ketu kanateli “[kuwahisha] ntañishilu yaNzambi, Chamwinu chetu,” nawa kakukokola antu abula kwiluka chalala kwinza muchalala.—Titusa 2:10.

SANDUJOLENU CHIKUPU

4. Kashinshi kamutiyishaña Yehova kuwaha

Tañenu Isamu 44:21 niMalaki 3:16, kuhiñahu hanjekenu hanawa malwihu:

• Muloñadi chichatamina kutoñojoka netu tunateli kusweka nsañu?

• Munatoñojoki nenu Yehova watiyaña ñahi neyi muhosha chalala, hela chakwila chinayikalili kwila mwenomu?

5. Ikalenuña ashinshika mpinji yejima

VIDIYO: Yumanyi Yaletaña Muzañalu?—Chinleji Chitooka (2:32)

Tañenu AHeberu 13:18, kuhiñahu hanjekenu hachitunateli kwikala ashinshika . . .

• muchisaka chetu.

• kumudimu hela kushikola.

• nimuyuma yikwawu.

6. Kashinshi katukwashaña

Hakusambila, munateli kumona neyi kwikala ashinshika kukuyiletela kukala. Ilaña mukuhita kwampinji, mukumona nenu dichuma chachiwahi chimwatela kwila. Tañenu Isamu 34:12-16, kuhiñahu hanjekenu hanilu lwihu:

• Yumanyi yayiwahi yafumaña mukwikala washinshika?

1. Eyala namumbanda ashinshika akoleshaña wulu wawu

2. Akanyidimu ashinshika ayikuhwelelaña kudi akulumpi janyidimu

3. Enimbu ashinshika ayikeñaña kudi akulumpi janfulumendi

YUMA YIMUNADIZI

Yehova wakeñaña amabwambu jindi kwikala ashinshika muyuma yejima yahoshañawu niyelañawu.

Kuhitulukamu

• Njilanyi jikwawu mutunateli kwikalila ashinshika?

• Chataminadi kutoñojoka netu tunateli kusweka nsañu?

• Muloñadi chimwatela kwikalila ashinshika mpinji yejima?

ILUKILENUHU NSAÑU YIKWAWU

Anvwali anateli kukwasha ñahi anyanawu kwikala ashinshika?

Hoshenuña Chalala (1:44)

Yumanyi yayiwahi yafumañamu neyi twila mutunakani?

Kushikija Mumunakani, Mwafumaña Nkisu (9:09)

Talenu neyi twatela kuhana nyisonku hela chakwila akuyizatisha munjila yayiwahi wanyi.

“Komana Mwatela Kufweta Nyisonku?” (Kaposhi Kakutalila, October 1, 2011)

Chumanyi chamukwashili muntu wabulili kwikala washinshika kuhimpa chihandilu chindi nakwikala washinshika?

“Nadizi Nawu Yehova Wukweti Luwi Nawa Wanakenaña” (Kaposhi Kakutalila, July 1, 2015)

2. Yehova watiyaña ñahi nawamabwambu imwatondaña?

Yehova watondaña chiwahi amabwambu jindi. “Yena wadikunda chikupu namuntu woloka.” (Yishimu 3:32) Yehova wukutiya ñahi neyi tutonda amabwambu abula kumukeña? Wukutiya kutama! (Tañenu Yakoba 4:4.) Ilaña neyi tutondolwela amabwambu atama nawa tuswina kwakwihi nayena niantu amukeña, Yehova wukutiya kuwaha nawa wukututonda kwikala amabwambu jindi.—Masamu 15:1-4.