Munakwanuka mpinji yimwadimbukili himwadiña kansi? Hadaha mwadikatishili kuchikasa hela mwadihobweli mwinuñu. Munakwanuka chayikundejeliwu kudi amama yenu? Hekwawu ayikoseli hachilonda nakuyikasahu kachibeli. Mwadilili, ilaña amama yenu chayidimbekeliwu namazu amawahi nikuyikumbata, mwatiyili chiwahi. Haniyi mpinji yimwachidiña kansi, ayikundejeleña nankashi.

Ilaña chihandilu chetu chahimpikaña hampinji yitunakukula. Kukala kwaswejelañaku nawa chakalaña kuwana wakutukundeja. Chawushona, kukala kwamonañawu akulumpi hiyanateli kukumanisha kuhitila mukukasahu chibeli hela kuyikumbata kudi amama jawuku. Talenu iyi yakutalilahu.

• Mwatiyahu dehi chichayeñaña neyi ayihaña mudimu? Julian wahosheli nindi chamuhañiliwu mudimu, wakañenyi nimwakwilila. Wadihwili nindi, ‘Indi chisaka chami nukuchihemba ñahi? Hanyima yakuzata nañovu hadi yaaka yayivulu, muloñadi kampani chikananhañili?’

• Hadaha munaneñi muloña wakuyiseña kudi mwinikwenu. Requel walumbulwili nindi, “Chihahitili tukweji 18 kufuma hanshiyiliyi nfumwami, naneñeli nankashi. Natiyili neyi kwiji muchima wami wunabaluki hayedi. Nakatili kumujimba nimuyitoñojoka. Chantiyishili woma.”

• Hekwawu munakuyekela nakankati kanakubula kumana. Mpinji yikwawu munateli kutiya neyi chatiyiliyi nkakulula Yoba, waabili nindi: “Wumi wami nakumini dakuwuhela, hinakeñi kuhanda haya nyakaku.” (Yoba 7:16) Hadaha mwatiyaña neyi chatiyiliyi Luis, iyala wudi muyaaka yamuma 80, wahosheli nindi, “Mpinji yikwawu natiyaña neyi chachiwahi hohu kudifwila.”

• Hela hadaha hikufwa kwataña yenu imwakeña kukuyileñela mukeñi kuyikundeja. Robert walumbulwili nindi, “Mwanami chafwiliyi mumaposu amundeki, nakaanini chiyanlejeliwu. Kuhiñahu natachikili kutiya kuyeña, kuyeña kudi neyi kwashimunawu muBayibolu nawu mpoku yakabali yakapwika muchima weyeyi aweni nzwa-a.”—Luka 2:35.

Robert, Luis, Raquel, niJulian ayikundejeli hela chakwila adiña mukukala kwamuchidiwu. Awanini Muntu wateleleli chikupu kuyikundeja—yowu Nzambi Wañovu Yejima. Wakundejaña ñahi? Komana ninenu wukuyikundeja nakukala kumukweti?

Kapostolu Pawulu wamulumbulwili Yehovaa nindi, “Nzambi wakukundeja kwejima, watukundejaña mulukadi lwetu lwejima.” (2 Akorinda 1:3, 4) Dihafuma Bayibolu kutukolesha nawu kwosi muntu anateli kukañanyayi Nzambi kukwasha nawa cheñi kwosi yihuñu yinateli kumukañesha Tata yetu wamwiwulu kutukundeja.

Hela chochu, twatela kwilahu chuma chimu hakwila nawu Nzambi yatukundeji. Ndotolu nateli kutukwasha ñahi neyi chakwila tunatiyañani nindi wanyi? Kaprofwetu Amosi wehwili nindi: “Antu ayedi endi hamu chakadi kutiyañana?” (Amosi 3:3) Bayibolu yatukonkomwenaña nawu: “Kundamenu kwakwihi naNzambi, niyena wukukundama kwakwihi nanenu.”—Yakoba 4:8.

Tunateli kukuhwelela ñahi netu Nzambi wukukundama kwakwihi nanetu? Chatachi, watulejaña kakavulu nindi wakeñaña kutukwasha. (Talenu chikasha.) Chamuchiyedi, tukweti wunsahu wawuvulu wawantu iyakundejahu dehi kudi Nzambi, awa antu adi kwoku nimakonu nawa adiñaku nikunyaaka.

Kufwana antu amavulu makonu akeñaña wukwashu kudi Nzambi, Mwanta Davidi niyena wamweni yihuñu yayivulu. Wamulembeleli Yehova nindi, ‘Tiya izu dami dinukukulembelela.’ Komana Nzambi wamwakwili? Eña. Davidi wabombelelihu nindi: “Anankwashuku; dichi muchima wami hiwukuluña nankashi.”—Masamu 28:2, 7.

MUDIMU WUKWETIYI YESU WAKUKUNDEJA EJIMA ANAKUDILA

Nzambi wafuukwilihu kumwinka Yesu mudimu wakukundeja. Hakachi kanyidimu yamwinkeliwu Yesu kudi Nzambi, wamwinkeli mudimu ‘wakukasakasa chachiwahi abaluka nyichima nikukundeja antu ejima anakudila.’ (Isaya 61:1, 2) Neyi chiyashimwineñahu dehi, Yesu wadiña nakwakamena antu ‘ejima adiña nakukabakana.’—Matewu 11:28-30.

Yesu wakundejeleña antu namazu amawahi, kuhitila mukuyakamena chiwahi nikuyuuka mpinji yikwawu. Ifuku dimu mukwambumba wamulembeleli Yesu nindi: “Neyi wuneteji, wunatweshi kuntookesha.” Chamutiyililiyi luwi, Yesu wamulejeli nindi:“ Neteji, tookaku.” (Maku 1:40, 41) Nawa iwu mukwambumba amuukili.

Makonu, Mwana kaNzambi hadi hanu hamaseki mwaka yatukundeji hamuntu-hamuntuku. Ilaña Tata yindi, Yehova, “Nzambi wakukundeja kwejima,” natwalekihu kukwasha adi mukukaankila. (2 Akorinda 1:3) Shinshikenu hanjila jiwana jazatishañayi Nzambi hakukundeja antu.

• Bayibolu. “Yuma yejima yasonekeluwu hashankulu, ayisonekeli kulonda kutuleja nachu maana, kulonda nakutatakena, nikukukundeja kwanyikanda yajila, tumwenuku kuchiñeja.”—Aroma 15:4.

• Spiritu Yajila yaNzambi. Hashimbwili wanyi kufuma hafwiliyi Yesu, chipompelu chejima chawakwaKristu chekalili mukuwunda. Muloñadi? ‘Chendeli nawoma waYehova nikuyikundeja kudi spiritu yajila.’ (Yililu 9:31) Spiritu yajila, ñovu yaNzambi, yikweti ñovu chikupu. Nzambi nateli kuyizatisha kukundeja nachu muntu wudi wejima wudi mukukala.

• Kulomba. Bayibolu yatukoleshaña nawu, “Bayi mwakama chumaku.” Ilaña yahoshaña nawu, “Mulejenu Nzambi yuma yejima yimunakeñi. Kuwunda kwaNzambi kwabadika maana ejima kwakahemba nyichima yenu niyitoñojoka yenu.”—Afwilipi 4:6, 7.

• Akwetu akwaKristu anateli kwikala amabwambu alala itwatela kushindamena mumpinji yitudi mukukala. Kapostolu Pawulu walumbulwili chadiña amabwambu jindi nindi “diwu amayala ankundejaña” mumpinji ‘yinnamweni kukala nilukadi.’—Akolosi 4:11; 1 Atesalonika 3:7.

Ilaña munateli kujinoka neyi chalala yumiyi yinateli kuzatika. Tutalenu kukala kwamweniwu antu itwashimuna hakutachika. Kufwana wena, mukwiluka nenu Nzambi wuchidi kushikija ichi chikaninu chakuhizumwisha chakwila nawu: “Mwakundejañawu muntu kudi mama yindi dimu nakayikundejami.”—Isaya 66:13.

NEYI MUDIMU WUNAMANI

Setha washimwini nindi, “Ami niñodami nyidimu yamanini hampinji yoyimu. Hadi yaaka yiyedi twahandilileña hohu muwukwashu wawantaña nitunyidimu twanyanya tutwazatileña. Chafuminimu, ñodami Priscilla, waneñeli nawa ninami nadimweni neyi nidi wamukunkulu.”

“Twomikili ñahi? Priscilla watwalekelihu kwanuka mazu aYesu ekala haMatewu 6:34. Wahosheli nindi bayi mwakama ifuku dakumadikiku, muloña ifuku dakumadiki dikudakama dadeni. Nawa kulomba kwindi kwakufuma hamuchima kwamukwashili kutwalekahu kuumika. Anami nawa Masamu 55:22 yakundejeli. Kufwana ñimbi yamasamu, nombilili chiteli chami hadi Yehova nawa wankwashili. Hela chakwila chayinu mpinji inakuzata, ilaña twapeleshaku chihandilu chetu kwesekeja nakufumba kwaYesu kwekala haMatewu 6:20-22. Sweje-e dinu, tunakundami kwakwihi naNzambi nikudikunda chikupu wumu namukwawu.”

Jonathan wetejeli nindi, “Nadakameneni kutalisha hachihandilu chetu chelili kabizinisi ketu kaleki kuzatika. Hamuloña wakukala kwamali, hadi yaaka 20 yejima yitwazatili nañovu kwosi yuma yafuminimu. Ami niñodami twatachikili kuditadikisha hansañu yamali. Twakañenyeña nikukongola yuma, muloña twatiyileña woma netu kampani yakongweshaña yuma yikwiteja wanyi.”

“Ilaña Izu daNzambi nispiritu yindi yatukwashili kufuukulahu chiwahi. Netejeleña kuzata mudimu wudi wejima nawa twalekeli kukisañana mali hayuma yabulileña kukeñeka. Hakwikala aYinsahu jaYehova, atwikwashileña nikudi akwetu akwakwitiya. Atukolesheleña nikutukwasha hampinji yatukalilileña yuma.”

NEYI MAWULU ANAMANI

Raquel washimwini nindi, “Chashikeneni nfumwami kunshiyayi, chankatili nawa natiyili kutama. Nawa naneñeli chikupu. Ilaña nakundamini kwakwihi naNzambi nawa wankundejeli. Chinalombeleña kudi Nzambi mpinji yejima, kuwunda kwindi kwakiñili muchima wami. Namweni neyi Nzambi wanuñili muchima wami wabalukili.”

“Nasakililaña Hezu dindi Bayibolu, muloña yankwashili kumanisha ndulu ninkunyi yinadiña nayu. Nazatishili mazu akapostolu Pawulu ekala haAroma 12:21 akwila nawu: ‘Kutama bayi kuyimika mushinduku; fwomonenu yatama nayayiwahi.’

“Ibwambu dami wumu inakeña wankwashili kulonda nitwalekihu. Wantañilili nsona yaMukwakutañisha 3:6 nawa wanlejeli mumesu awunda nindi kwekala ‘mpinji yakunata.’ Iku kufumba kwadiña kwakola, ilaña kwankwashili. Chayinu mpinji nidi nayikonkwanyi yayiha.”

Elizabeth wahosheli nindi, “Neyi mawulu anamani, mukukeña wukwashu. Nadiña nebwambu dami wankwashileña ifuku-nifuku. Wandilishileñaku, wankundejeleña nikummwekeshela kukeña chatela nitiyeña neyi anañuumbi. Neluka chikupu nami Yehova wamuzatishili kulonda yañuuki yilonda yami yamuyitoñojoka.”

NEYI TUNAKATI HELA TUNASHINAKAJI

Luis, ashimunawu kumatachikilu ayinu magazini, wukweti chikatu cheneni chakumuchima nawa hadi kapampa kayedi wakeñeli kufwa. Wekalaña kuokisijini hadi maora 16 hefuku-hefuku. Wahosheli nindi, “Nalombaña kudi Yehova chakadi kuleka. Hanyima yakulomba kudi Nzambi, natiyaña spiritu yindi yinakunkolesha. Kulomba kwankwashaña kutwalekahu muloña nakuhweleli mudi Nzambi nikwiluka nami wañakamenaña.”

Petra wamuyaaka yamuma 80 walumbulwili nindi, “Nakeñaña kwila yuma yayivulu, ilaña nakañanyaña. Chinnakumona ñovu yami yinakumana chinakunkalila. Inakutiya kuzeya nawa nahandilaña hohu hayitumbu. Kakavulu natoñojokaña neyi chalombeliyi Yesu kudi Tata yindi nindi neyi chatweshekeli yeteji makabi kumufuma. Ilaña Yehova wamukolesheli Yesu nawa ninami wankoleshaña. Kulomba diyi yitumbu yami yahefuku-hefuku. Natiyaña kuwaha hanyima yakuhanjeka naNzambi.”—Matewu 26:39.

Julian, wunakabakani kwakwihi nayaaka 30 nachikatu chazeyeshaña chikupu, niyena watiyaña chochimu. Wahosheli nindi: “Nalekeli kushakama muchitwamu chachiwahi nakutachika kwendela mukakinga kawayifwayi. Ilaña nindi namuzañalu muchihandilu chami muloña nadihana kukalakela akwetu. Kuhana kunateli kukeheshaku makabi nawa Yehova wahembaña mwakanañayi nindi wukutukolesha mumpinji yitunakaankili. Kufwana kapostolu Pawulu, nateli kuhosha chikupu nami: ‘Natweshi kwila yuma yejima mudi Kristu wankoleshaña.’”—Afwilipi 4:13.

NEYI TUNAFWISHI

Antonio washimwini nindi, “Chafwiliwu atata mumaposu ahamukwakwa, hinashikeneni kwitejaku. Chawahili wanyi, muloña adiña hohu kwawu nakudendela kunsa yamukwakwa. Ilaña kwosi chinateleli kwila. Hadi mafuku atanu adiña hohu hakafwilu sampu nichafwiliwu. Mpinji yikwawu, neyi amama adi hohu nadilileña wanyi, ilaña neyi nidi nkawami nadilileña chikupu. Natwalekelihu kudihula nami, ‘Muloñadi? Muloñadi?’”

“Haniyi mpinji yinadiña mukukala, natwalekelihu kumulomba Yehova kulonda yankwashi kuyuula yitoñojoka yami nikwikala nakuwunda. Natachikili kwikala mukuwunda chovu-chovu. Nanukili nami Bayibolu yalumbulula nawu ‘mpinji nakululakana’ yinateli kutululakena wejima wetu. Chineli Nzambi hatwambañaku, nakuhweleli chikupu nami nakayimona cheñi atata yami hampinji yakusañuka.”—Mukwakutaŋisha 9:11; Yowanu 11:25; Titusa 1:2.

Robert, ashimunawu muchibaaba chakusambila niyena wahosheli mwomumu. Wahosheli nindi: “Ami niñodami twekalili nakuwunda kwamuyitoñojoka kwashimunawu haFwilipu 4:6, 7. Twekalili naniku kuwunda kuhitila mukulomba kudi Yehova. Iku kuwunda kwabadika kwatukwashili kuyileja akamba nsañu kutalisha hakuchiñeja kwetu kwakusañuka. Hela chakwila ndeki yadiña mumaposu yajahili mwanetu, ilaña tuchidi kwanuka yuma yayiwahi yitwelileña hamu nindi. Twatwalekañahu kutoñojoka hayuma yayiwahi yitwelileña.

“Akwetu aYinsahu chatulejeliwu nawu atumweni haTV chitwalumbulwileña yuma yitwakuhwelela munjila yayiwahi, twayilejeli netu chakadi nikujina hikulomba kwenu kumwadiña nakutulombelaku. Nakuhweleli chikupu nami Yehova watukwashileña kuhitila mumameseji amavulu akukundeja iyatusonekeleleñawu.”

Neyi chinashimuniwu muniyi yakutalilahu, Nzambi wakundejaña antu anakumona makabi amavulu nikukala kwashiyashana. Ndochu enu? Hela chakwila mukumona kukala kwamuchidinyi, ilaña kukundeja kudi kwoku kunateli kuyikwasha mumpinji yakala.b Kwila mulomba wukwashu kudi Yehova nehi? Diyi “Nzambi wakukundeja kwejima.”—2 Akorinda 1:3.