Ntañishilu yaBayibolu hansañu yakusañuka yatukwashañaku kutiyishisha chalumbuluka “Shelu” ‘niHadesi.’ Izu daNzambi dakwantankeshaña Shelu niHadesi nakuna kufwa kwakekala nakusañuka.a (Yoba 14:13; Yililu 2:31; Chimwekeshu 20:13) Izu daNzambi damwekeshaña cheñi nawu antu adi muShelu hela Hadesi anabombelimu antu amuzatilileña Yehova hohuku, ilaña niantu abulileña kumuzatila. (Kutachika 37:35; Masamu 55:15) Hela chochu, Bayibolu yatañishaña nawu kwamba kekala “kusañuka kwawaloña nikwawabula kuloña.”​—Yililu 24:15.

WATOÑOJOKAÑAHU neyidi Hefuku daKusompesha? Antu amavulu atoñojokaña nawu mabiliyoni awantu hamuntu-hamuntu akayileta mumusululu kumesu etanda daNzambi. Kwenakuna, dikwakayisompeshelawu muntu hamuntu. Amakwawu akayinka paradisa yamwiwulu, amakwawu niwena akayihisha nakukabakana kwahaya nyaka. Hela chochu, Bayibolu yalumbululaña yuma yambukaku kutalisha kuniyi mpinji. Izu daNzambi dalumbululaña nawu hiyakekala mpinji yakutiyisha womaku, ilaña yakekala mpinji yakuchiñeja nikutuñulula.

HaChimwekeshu 20:11, 12, twatañañahu mazu akapostolu Yowanu akulumbulula Ifuku daKusompesha nawu: “Hinukumona itanda dawanta deneni ditooka, ninowu washakamahu; nimaseki nimawulu hiyakutemuka kumesu indi; hiyamweni kwakuyaku. Hinukumona afu, niamaneni nianyanya, hiyakwimena kumesu etanda dawanta; hiyakubakula nyikanda; hiyakubakula nimukanda wukwawu, wowu wawumi. Hiyakusompesha afu nansañu jayuma yelilañawu yasonekeluwu dehi munyikandoyu.” Indi iwu Nsompeshi anateniwu hanu hinyi?

Yehova Nzambi diyi Nsompeshi wabadika wamuchidi wamuntu. Hela chochu, mudimu waweni wakusompesha wawuhana. Kwesekeja naYililu 17:31, kapostolu Pawulu wahosheli nindi Nzambi “nashumu dehi ifuku damba kasompeshayi matuña mwaloña, neyala anafuukuliyi dehi.” Nsompeshi watondawu diyi Yesu Kristu wasañwiliwu. (Yowanu 5:22) Hanu dinu, mpinjinyi yikatachika Ifuku daKusompesha? Indi kuleha kwampinji kukekala ñahi?

Mukanda waChimwekeshu washimunaña nawu Ifuku daKusompesha dikatachika hanyima yanjita yaAmagedoni, neyi ituña daSatana dahamaseki anadikisañani dehi.a (Chimwekeshu 16:14, 16; 19:19–20:3) Hanyima yaAmagedoni, Satana niandemoni jindi akayikasila mwikela hadi yaaka ikombakaji dimu. Hayina mpinji, a 144,000 answana akwiwulu akekala ansompeshi nawa akayula ‘neyi anyanta hamu naKristu hadi ikombakaji danyaka.’ (Chimwekeshu 14:1-3; 20:1-4; Aroma 8:17) Ifuku daKusompesha hididi neyi chatemukaña yuma nakumana mumaora 24 wanyi. Dakamana muyaaka ikombakaji dimu.