455 B.C.E. dihashikijiliyi yaaka 20 yakuyula kwindi. Ichi dinu tuneluki dehi ntachikilu yawuprofwetu waDanyeli wahosha hadi Mesiya, dikwila nawu mu 455 B.C.E.

Danyeli hakumwekesha kuleha kwampinji yinakutwaminina kukwinza ‘kwaMesiya Kalamba’ nichiyakakuma. Wuprofwetu wahosha hadi “nyilungu yitanu nayiyedi, cheñi ninyilungu makumi atanu nadimu nanyilungu yiyedi”—Yejima hamu nyilungu 69. Iyi mpinji yayilehi ñahi? MaBayibolu amavulu ashimunaña nawu iyi hinyilungu yamafuku atanu nayediku, ilaña hinyilungu yayaaka. Dikwila nawu, mulungu wumu wunakwimenaku yaaka yitanu nayiyedi. Iyi yitoñojoka yanyilungu yayaaka, hela yaaka yitanu nayiyedi yamukuma ayilukili chikupu kudi aYudeya amumpinji yakunyima. Chakutalilahu, aYudeya adiña nakwanakana mwaka waSabata mumwaka wamuchitanu nachiyedi wudi wejima. (Kwidika 23:10, 11) Komana nyilungu 69 yawuprofwetu yinashiki kuchipimu cha 69 chayaaka 7 hamulungu wumu, hela yaaka 483 yejima hamu.

Ichi dinu chuma chitwatela kwila hikuchinda. Neyi tukuchinda kufuma mu 455 B.C.E., yaaka 483 yikututwala kumwaka wa 29 C.E. Iwu diwu mwaka waweni wamupapatishiliwu Yesu nawa wekaliliyi Mesiya!a (Luka 3:1, 2, 21, 22) Komana iku kushikijewa kwawuprofwetu wamuBayibolu hikwakuhayamishaku?

HAKWILA NAWU chitukwashiku kumwiluka Mesiya, Yehova Nzambi wayoneneni atuprofwetu amavulu amuBayibolu kushimuna wunsahu wakuvwalika, mudimu, nikufwa kwaniwu wakaniniwu haKupulwisha muchidi wamuntu. Wuprofwetu wejimiwu washikijeweli hadi Yesu Kristu. Iwu wuprofwetu woloka nawa wakunama chakuhayamisha. Hakwila nawu tuchilumbululi, tusambilenu kutala hawuprofwetu wantesha washimwineñahu dehi yuma yakundama kukuvwalika kwaMesiya niwansi windi.

Kaprofwetu Isaya washimwineñahu dehi nindi Mesiya wukafuma muchisaka chaMwanta Davidi. (Isaya 9:7) Mwamweni, Yesu wavwalikilili muchisaka chaDavidi.​—Matewu 1:1, 6-17.

Mika, kaprofwetu mukwawu waNzambi, washimwini nindi iwu mwana wamba kekala nyuli nawa nindi wakavwalikila ‘muBetelemi Efwarata.’ (Mika 5:2) Hampinji yavwalikiliyi Yesu, kwadiña nyikala yiyedi muIsarela yatumbiliwu nawu Betelemi. Mukala wumu awutuñilili kwakwihi naNazareta kukabeta kaluwunda ketuña, wukwawu niwena wadiña kwakwihi naYerusalema muYuda. Mukala waBetelemi wadiña kwakwihi naYerusalema awuteneneña hakusambila nawu Efwarata. Yesu wavwalikilili muwowuna mukala, neyi chochahosheli wuprofwetu!​—Matewu 2:1.

Wuprofwetu wukwawu waBayibolu washimwinañahu dehi nawu Mwana kaNzambi akamutambika ‘kufuma muEjipitu.’ Henohu wuchidi kansi, Yesu amutweli muEjipitu. Amufuntishili hanyima yakufwa kwaHerodi, ichi chashikijili wuprofwetu.​—Hoseya 11:1; Matewu 2:15.

Hachati yidi hefu 200, nsona yinatanjikiwu mwishina damutu wunakwila nawu “Wuprofwetu” yikweti nsañu yakunama kutalisha kudi Mesiya. Mwani esekejenu wuprofwetu iwu naniji nsona jidi mwishina damutu wunakwila nawu “Kushikijewa.” Kwila mwenimu kukuswejesha kukolesha chikuhwelelu chenu muchalala Chezu daNzambi.

Hampinji yiwukusandujolaña nyikanda iyi, watela kwanuka neyi awa mazu awuprofwetu ayisonekeli dehi jinkulakaji janyaka henohu Yesu kanda yovwaliki. Yesu wahosheli nindi: “Yuma yasonekeluwu munyikanda yajila yejima, yamunshimbi jaMosi, nimudi atuprofwetu, nimumasamu yantenenuwu, chiña yakalumbuluka hohu.” (Luka 24:44) Neyi chiwukumona muBayibolu yeyi, wuprofwetu wejima washikijeweli—muyikuma yejima!

ANTU akuhwelela muntañishilu yawaAnzambi asatu ahoshaña nawu Nzambi wekala mudi antu asatu​—Tata, niMwana, niSpiritu Yajila. Awa antu ejima asatu elukewa nawu wonsu wawu esekana hamu, muñovu yejima, nawa hiyakweti ntachikiluku. Kwesekeja nantañishilu yawaAnzambi asatu, Tata hiNzambi, Mwana