Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
JULY 1-7
YUMA YALEMA YAMWIZU DANZAMBI | AKOLOSI 1-4
“Vuulenu Wawukulu Nawa Vwalenu Wawuha”
(Akolosi 3:5-9) Dichi, jahenu yiidi yenu yamujimba yidi hanu hamaseki mwamwekenaña yilwilu yatama, yidi neyi wuvumbi, wuzondu, mpwila yakutiya wuvumbi yakubula kudiyuula, kufwila kwatama, nilwisu, dikwila nawu kupesha. 6 Muloña wayumiyi, kuzuwa kwaNzambi kunakwinza. 7 Ninenu dichimwadiña nakwila muchihandilu chenu chakunyima. 8 Ilaña ichi mwatela kuleka yuma yejimiyi: kuzuwa, kuhila, kutama, nawa nhoshelu yakasawuntu ninhoshelu yawuzondu bayi jifumaña mukanwa kenuku. 9 Bayi muditwambilaña wumu namukwawuku, Vuulenu wuntu wenu wawukulu niyilwilu yawu.
Tambulenu Spiritu yaNzambi, Bayi Yampata Yamunu Mwishinaku
Yililu yami yamwekeshaña spiritu yamuchidinyi? (Tañenu Akolosi 3:8-10, 13.) Spiritu yampata yamunu mwishina yatandishaña nyidimu yachisemwa. (Ñal. 5:19-21) Tunateli kwiluka spiritu yatulombolaña neyi tudi mukukala kweneni, kudi neyi mana kwetu mukwaKristu hela muhela yatudiwula, indi kwiji yatuhilisha, hela yatuvulumuna, bayi neyi hampinji yitunashakami kumatu kwamwenaku. Kubombelahu, mumataletu tunateli kumwekesha neyi tunakwiteja kutulombola kudi spiritu yajila hela spiritu yampata yamunu mwishina. Dichi twatela kudishinshika etu aweni. Dihulenu nenu, ‘Hatukweji tutanu nakamu tunahituhu, komana inakwimbujola chikupu yililu yaKristu tahindi nadiñiji cheñi muyaaku yatama munhoshelu nimuyililu?’
Spiritu yaNzambi yinateli kutukwasha ‘kuvuula wuntu wawukulu niyililu yawu’ nakuvwala ‘wuntu wawuha.’ Dikwatela kutukwasha kwikala nayililu yakukeña niluwi. Tukwikala namuchima wakudanakena wumu namukwawu, hela chakwila kudi kukala kunamwekani. Neyi tumona netu anatuvulumuni, hitukulendumokaña nakuhilashana ‘nandulu, nindombu, nikuzuwa, nimapumba, nikutukana, ninkunyi yejimaku.’ Ilaña, tukuzata nañovu kulonda ‘twikali namuchima wawushona.’—Efwes. 4:31, 32.
(Akolosi 3:10-14) nawa vwalenu wuntu wawuha, wunakwilishawu kwikala wawuha kuhitila mukwiluka kwalala kwesekeja namwaya chifwanisha chaNowu wawuleñeli, 11 mwabula kaGiriki hela kaYudeya, waalama hela wabula kwalama, ñiinza hela kaSikita, nduñu hela muntu wasubuka; ilaña Kristu diyuma yejima nawa wekala muyuma yejima. 12 Dichi, chineli mudi antu atondawu kudi Nzambi, ajila nawa akeñayi, vwalenu muchima wawushona, luwi, kudizoza, kwovwaha nikudiwunjika. 13 Ditiyililenuña wumu namukwawu nikudanakena wumu namukwawu chakufuma kumuchima hela chakwila kudi muntu wudi namuloña namukwawu. Neyi chayanakeneniyi Yehova chakufuma kumuchima, ninenu nawa mwatela kwila mwomumu. 14 Ilaña chabadika hayuma yejimiyi, vwalenu kukeña, muloña dikwanuñañeshaña chikupu antu mumpaanda yimu.
Komana Ayibalumuna?
Neyi tunakukeña netu Izu daNzambi ditubalumuni, twatela kuzata nañovu kubadika kutaña nikudiza hohu Bayibolu. Antu amavulu atañaña Bayibolu kakavulu nawa eluka yuma yahoshaña Bayibolu. Hadaha mwawanahu dehi antu amuchidiwu mumudimu wakushimwina. Amakwawu anatweshi nikushimuna nsañu yamuBayibolu kumutu hohu. Ilaña, ichi hichayikwashaña kuhimpa yitoñojoka yawu nichihandiluku. Muloñadi? Hakwila nawu Izu daNzambi dikwashi nikubalumuna muntu, watela kuditeja ditentami mumuchima windi. (Ñal. 6:6, tth.) Dichi, twatela kwikala nampinji yakutoñojoka hayuma yitwadizaña. Chikuwaha neyi tukudihula netu: ‘Komana neluki nami iyi hiyuma yalema chikupu kubadika hakwikala hohu ntañishilu yansakililu? Komana muchihandilu chami namoni wunsahu wunakumwekesha nawu ichi dichalala? Komana nazatishaña yuma yinadiza kubadika kutañishaña hohu amakwawu? Komana nakuhwelela nami yuma yinadizaña yafumaña kudi Yehova, neyi kwiji nakuhosha nanami? Neyi tutoñojokaña chikupu hamalwihu amuchidiwu, tukukundama chikupu kwakwihi naYehova. Neyi yuma yitwadizaña yitushika hamuchima, yikutusañumuna kuhimpa chihandilu chetu kulonda tumutiyishi Nzambi kuwaha.—Yish. 4:23; Luka 6:45.
Kutañaña Izu daNzambi mpinji yejima nikutoñojokahu chikupu kunateli kutukwasha kutwalekahu nakwila mwahosheliyi Pawulu nindi: ‘Vuulenu muntu wamukulu nimwelañayi; munavwali dehi muntu wamwiha, wayaña nakubalumuka wamwiha nakwiluka chalala.’ (Kol. 3:9, 10) Neyi twiluka chikupu yuma yatañishaña Bayibolu nikuzatisha yuma yitwadizaña, chikutusañumuna kuvwala muntu wamukwaKristu wamuha wunateli kutukiña kutukosi twaSatana.
Kukeña Yuma Yalema yakuSpiritu
(Akolosi 1:13, 14) Watwamwinini kuwuswa wamwidima nakututwala muwanta waMwanindi akeñayi, 14 kuhitila mudi yena atukuula nefutu danyiloña, dikwila nawu kutwanakena nshidi jetu.
it-2 169 ¶3-5
Wanta waNzambi
“Wanta waMwanindi Akeñayi.” Chimwahitili mafuku 10 kufuma hayiliyi Yesu mwiwulu haPentekosta 33 C.E., atumbanji twindi elukili nawu Yesu “amulemesheli kuchikasa chaNzambi chachidiilu” chelili Yesu yechili spiritu yajila hadi wena. (Yil 1:8, 9; 2:1-4, 29-33) Dichi “chitiyañenu chachiha” chatachikili kuzatika nawa ekalili “muza wajila” wawuha dikwila nawu Isarela akuspiritu.—Heb 12:22-24; 1Pe 2:9, 10; Ñal 6:16.
Kristu washakamini kuchikasa chaTata yindi chachidilu nawa wekalili Mutu wanichi chipompelu. (Efw 5:23; Heb 1:3; Fwi 2:9-11) Nsona jamwekeshaña nawu kufuma tuhu haPentekosta 33 C.E. kuya nikumbidi, Yesu watachikili kuyuula hadi atumbanji twindi. Chasonekeleleñayi akwaKristu akusambila muAkolosi, kapostolu Pawulu watalishili mukwila nindi Yesu Kristu wudi dehi naWanta: “[Nzambi] watwamwinini kuwuswa wamwidima nakututwala muwanta waMwanindi akeñayi.”—Kol 1:13; Esekejenu Yil 17:6, 7.
Kufuma tuhu haPentekosta 33 C.E. kuya nikumbidi Wanta waKristu watachikili kuyuula aIsarela akuspiritu, hela netu akwaKristu atondeliwu naspiritu yaNzambi kwikala anyana kaNzambi akuspiritu. (Ywn 3:3, 5, 6) Neyi awa akwaKristu awayishewa atambwila wuloku wawu wakuya mwiwulu, hiyekalaña cheñi antu akayuulañawu muWanta waKristu hanu hamasekiku, ilaña akekala anyanta hamu naKristu Mwiwulu.—Chi 5:9, 10.
(Akolosi 2:8) Babalenu, kwakenda kekala muntu wukuyitwala muwunkoli kwesekeja namaana awantu, nintañishilu yamukunkulwayi yamwaya tushidikilu twawantu, nimwaya yuma yawansi yamukaayi, ilaña bayi neyi kwesekeja naKristuku;
w08 8/15 28 ¶9
Yikuma Yamaneni Kufuma muNyikanda yaAŋalija, Aefwesesa, Afwilipi, niAkolose
2:8—Indi “yuma yampata yamunu mwishina yakuhemesha” yasoñamishiliyi Pawulu hiyumanyi? Iyi hiyuma yakuhemesha yamukaayi kaSatana, yuma yalema hela nshimbi, yalombolaña kaayi. (1 Yowanu 2:16) Haniyi yuma habombela maana awantu, kukeñesha maheta, ninsakililu yakutwamba yamukanu kaayi.
Kutaña Bayibolu
(Akolosi 1:1-20) Ami Pawulu, kapostolu kaKristu Yesu atondeliwu kwesekeja nankeñelu yaNzambi, nidi hamu namanakwetu Timotewu, 2 kudi enu akwakujila nikudi anakwetu ashinshika adikunda naKristu, enu mudi muKolosi: Luwi lwasweja nikuwunda jafumaña kudi Tata yetu Nzambi jiikali nanenu. 3 Mpinji yejima neyi tunakuyilombelaku enu, twamusakililaña Nzambi Tata yaMwanta wetu Yesu Kristu, 4 nanochu chitwatiyili chikuhwelelu chimukweti mudi Kristu Yesu nikukeña kumwayimwekeshelaña akwakujila 5 muloña wakuchiñeja kunayihembeliwu mwiwulu. Mwatiyili dehi kunyima iyi nsañu yakuchiñeja kuhitila mumazu achalala ansañu yayiwahi 6 yinashiki kudi enu. Neyi chochinakusoña nsañu yayiwahi nyikabu nikuyilaku hambidi mukaayi kejima, dichiyinakwila nimukachi kenu kutachika hefuku dimwatiyili nikwiluka chikupu luwi lwaNzambi lwasweja muchalala. 7 Chumichi dichimwadizili kudi Epafwarasa, mukwetu nduñu itwakeña, mukwakukalakala washinshika waKristu watwimenañaku. 8 Nawa watulejeli kukeña kumwamwekeshaña nawukwashu waspiritu yaNzambi. 9 Dichi, kufuma tuhu hefuku ditwatiyili kukeña nichikuhwelelu chenu, twaleka wanyi kuyilombelaku netu mwiluki chikupu kwiluka kwalala kwankeñelu yaNzambi namaana ejima nikutiyishisha yuma yakuspiritu, 10 kulonda mwendeña kwesekeja nanochu chakeñañayi Yehova nakumutiyisha kuwaha chikupu hampinji yimunakutwalekahu nakusoña nyikabu munyidimu yayiwahi yejima nimukusweja kwiluka kwalala kwaNzambi; 11 nawa koleshewenu nañovu jabadika kwesekeja nakulema kwindi kwasweja kulonda muumiki chikupu nakuwunda nimuzañalu, 12 hampinji yimunakumusakilila Tata wayiletesheli mwiikali ashikilamu kutambwila iseka dawuswana wawakwakujila adi muchejeji. 13 Watwamwinini kuwuswa wamwidima nakututwala muwanta waMwanindi akeñayi, 14 kuhitila mudi yena atukuula nefutu danyiloña, dikwila nawu kutwanakena nshidi jetu. 15 Diyi chifwanisha chaNzambi abulaña kumonawu, diyi wedi wayileñaleña yejima; 16 muloña kuhitila mudi yena dimwaleñeleliwu yuma yejima yamwiwulu niyahamaseki, yuma yamwekanaña niyuma yabulaña kumwekana, hela chakwila himatanda, himawanta antuumba, hijinfulumendi hela akwawuswa. Yuma yejima ayileñeli kuhitila mudi yena nawa amuleñeleli yena. 17 Cheñi nawa, yena wadiña kwoku henohu yuma yejima kanda yiikaliku, nawa yuma yikwawu yejima yekaliliku kuhitila mudi yena, 18 nawa diyi mutu wamujimba, dikwila nawu chipompelu. Diyi kutachika, wedi watachi kusañuka kufuma mudi afu, kulonda yekali watachi muyuma yejima; 19 muloña Nzambi watiyili kuwaha kuleñela yuma yejima mudi yena yiikali yawanina, 20 nawa mudi yena, Nzambi nakundamishi yuma yejima kudi yomwenindi hakuleta kuwunda kuhitila mumashi apwekesheliyi Kristu hamutondu wakuyandishila, chili hiyuma yahamaseki hela yuma yamumawulu.
JULY 8-14
YUMA YALEMA YAMWIZU DANZAMBI | 1 ATESALONIKA 1-5
“Dikoleshenuña Wumu naMukwawu niKudituña Wumu naMukwawu”
(1 Atesalonika 5:11-13) Dichi, dikoleshenuña wumu namukwawu nikudituña wumu namukwawu neyi chimunakwila. 12 Ichi dinu, tunakuyilembelela enu anakwetu netu, lemeshenuña antu anakudikita chikupu mukachi kenu nawa anakuyilombola mudi Mwanta nikuyifumba; 13 nikuyitoñojokelaku chikupu mukukeña muloña wanyidimu yawu. Ikalenuña mukuwunda wumu namukwawu.
‘Lemeshenu Akalakalaña Chikupu Mukachi Kenu’
Kulombola’ chipompelu kwabombelamu nyidimu yayivulu bayi kutañisha hohuku. Mazu adifwanaku ayizatisha niha 1 Timotewu 3:4. Pawulu wahosheli nindi nkoñi watela kwikala “muntu wayulaña chachiwahi mwitala dindi yomweni, wukweti anyanindi amwovwahilaña nakalemesha kalala.” Mazu akwila nawu ‘wayulaña chachiwahi hela walombolaña’ abombelamu kutañisha anyanindi nikulombola muchisaka ‘nikwikala nawanyana amwovwahilaña.’ Eñañi, aeluda alombolaña muchipompelu, nikukwasha antu ejima amwovwahileña Yehova.—1 Tim. 3:5.
‘Lemeshenu Akalakalaña Chikupu Mukachi Kenu’
Chumanyi chimwatela kwila neyi mutambwila chawana chinayitemesheluwu? Komana mukuchizatisha kulonda mumwekeshi kusakilila? Yehova wayinka ‘yamukunkulu mudi antu’ kuhitila mudi Yesu Kristu. Njila yimu yimwatela kumwekesha kusakilila haniyi yamukunkulu yayinkawu yidi yakutiyilila chikupu kumpanji jahanañawu aeluda nikufwila kuzatisha yikuma yashimunañawu. Munateli cheñi kumwekesha kusakilila kuhitila mukwakulahu chachiwahi hakupompa. Zatenuku mudimu walombolañawu aeluda, chidi neyi mudimu wakushimwina. Neyi kufumba kwayifumbiluwu kudi eluda kwayikwashili, komana kwila mumuleja nehi? Kubombelahu, komana kwila muhameka yisaka yawaeluda nehi? Ilukenu nenu, hakwila nawu eluda yakalakaleña chikupu muchipompelu, chisaka chindi chadihanaña kulonda mpinji yatela kwikalawu hamu yayizatishi kunyidimu yachipompelu.
(1 Atesalonika 5:14) Cheñi nawa enu anakwetu, tunakuyilembelela netu, yifumbenu chikupu antu abulaña kwenda mukuloña, kundejenu antu ananeñi, koleshenu azeya nawa ikalenu mukuwunda nawantu ejima.
“Kukeña . . . muNyidimu niMuchalala”
Koleshenu azeya. Tunateli kumwekesha kukeña kwalala neyi tulondela kufumba kwamuBayibolu kwakwila nawu, “koleshenu azeya nawa ikalenu mukuwunda nawantu ejima.” (1 Tesa. 5:14) Hela chakwila antu azeya ekalaña akola muchikuhwelelu mukuhita kwampinji, amakwawu akolaña swayi wanyi, akeñekaña kutwalekahu kuyikolesha. Tunateli kuyikolesha neyi tuyitañila Nsona yayiwahi, kuya nawu nakushimwina hela kwikala nampinji yakuyitiyilila. Kubombelahu, chatela tushikeneña dakutoñojoka netu manakwetu hela muhela “wakola” hela netu “wazeya,” twatela kwiluka netu wejima wetu kudi hitwakolela nihitwazeyela. Nikapostolu Pawulu welukili kuzezeya kwindi. (2 Kor. 12:9, 10) Dichi, wejima wetu twahetelañamu neyi atukolesha kudi akwetu akwaKristu.
Imbujolenu Kudizoza niLuwi lwaYesu
Mazu etu amwovu. Luwi lutwatiyilaña akwetu lwatuleñelaña ‘kukundeja antu akweti chineñi.’ (1 Tes. 5:14) Tunateli kuhoshadi hakwila tukoleshi antu amuchidawa? Tunateli kuyikolesha kuhitila mukuyileja netu twayakamenaña chikupu. Tunateli kuyihameka chakufuma hamuchima kulonda eluki nawu akweti wuswa niyililu yayiwahi. Tunateli kuyanukisha netu Yehova wayikundamishili kudi Mwanindi, dikwila nawu ekala alema kumesu indi. (Yow. 6:44) Tunateli kuyileja netu Yehova wakamenaña nankashi ambuñindi “abaluka nyichima” hela “akweti spiritu yachikeka puchi.” (Mas. 34:18) Mazu etu amwovu anateli kukwasha antu anakukeña kuyikundeja.—Yish. 16:24.
Kukeña Yuma Yalema yakuSpiritu
(1 Atesalonika 4:3-6) Muloña iyi diyi nkeñelu yaNzambi nindi, mwatela kwikala ajila nikuleka wuvumbi. 4 Muntu-himuntu hakachi kenu watela kwiluka chakuyuula mujimba windi yomweni mukujila nimukalemesha, 5 bayi nalwisu nimpwila yakutiya wuvumbi yakubula kudiyuula neyi chelañawu akwanyuza abula kumwiluka Nzambiku. 6 Kwosi muntu hela wumu watela kubadika hakukumina nikumukoña manakwindi chatama hayumiyiku, muloña Yehova diyi wukasompesha antu kutalisha hayumiyi, neyi chitwayilejeli enu kunyima nikuyisoñamisha chikupu.
it-1 863-864
Wuvumbi
Wuvumbi himuloña wumu wunateli kuhañilawu muntu muchipompelu chawakwaKristu. (1Ko 5:9-13; Heb 12:15, 16) Kapostolu walumbulwili nindi mukwaKristu wunakwila wuvumbi nakukatisha mujimba windi yomweni, kuzatisha yidi yalusemu munjila yabula kutelela. Wubwambu windi naNzambi waluwankanaña, waletaña majilu muchipompelu chaNzambi nawa nakudisha muwubanji wakutambula tububu twafwana twatambulañawu antu muwuvumbi. (1Ko 6:18, 19) Wukuleñela amanakwindi akwaKristu kuzeya (1Te 4:3-7) kuhitila (1) mukuleta majilu niyuma yawuzondu, ninsonyi, kuleta kasawuntu muchipompelu (Heb 12:15, 16), (2) mukubonda muntu wuneliyi nindi wuvumbi neyi himujiki wukekala wanyi nachinleji chitooka chakeñilayi muwulu, (3) Mukubonda chisaka chindi kwikala nejina datama, kushilahu (4) nikuneñesha anvwali, nfumwindi, hela kuneñesha muntu anakukeña kusumbulayi owu weliliyi nindi wuvumbi. Hadiwulaña muntu, wunateli kwanakena hela kubula kwanakena wuvumbiku, ilaña wadiwulaña Nzambi wakamubabesha kukola nshidi yindi.—1Te 4:8.
(1 Atesalonika 4:15-17) Muloña chumichi dichitwayilejaña kwesekeja namazu aYehova netu, etu amomi anakuhanda kushika nihampinji yakwikalahu kwaMwanta, hitwakatwaminañahu dehi kumbidi kubadika antu akaama mutulu twakufwaku; 16 muloña Mwanta yomweni wakafuma mwiwulu namutambi wañovu, nezu damukulumpi wawañelu ninampuña yaNzambi, nawa antu afwila mudi Kristu, diwu akasambila kusañuka. 17 Kuhiñahu dinu, etu amomi tuchidi nakuhanda, tukaya nawu hamu mumavu nakudibulakana naMwanta muluzwizu; twakekalaña hamu naMwanta mpinji yejima.
‘Kukuula Kwenu Kudi Kwakwihi’
Chumanyi chikamwekana hanyima yakwila Gogi waMagogi natachiki dehi kulukuka antu jaNzambi? Matewu niMaku asonekeli nsañu yoyimu nawu: ‘[Mwana kamuntu] wakatemesha añelu jindi, wakapompesha indi atondewa kumpepela jiwana, kufumisha kunsa yamaseki, ndo-o nikunsa yewulu.’ (Maku 13:27; Mat. 24:31) Iwu mudimu wakupompesha watalisha wanyi kukupompesha kwatachi kwawawayishewa; nawa watalisha wanyi kukusha chilamiku chamakumishilu chawawayishewa ashalahu. (Mat. 13:37, 38) Akayisha chilamiku henohu lukadi lwasweja kanda lutachiki. (Chim. 7:1-4) Dichi, iwu mudimu wakupompesha washimwiniyi Yesu himudimwinyi? Himpinji yakatambwilawu ashalahu a 144,000 wuloku wawu wamwiwulu. (1 Tesa. 4:15-17; Chim. 14:1) Chumichi chikamwekana hampinji yikwawu hanyima yakwila Gogi waMagogi nalukuki dehi. (Ezek. 38:11) Kufumahu, awa mazu aYesu akwila nawu, ‘Henohu aloña akatoñeka muWanta waTata yawu neyi itañwa,’ akashikijewa.—Mat. 13:43.
Komana chumichi chaya mukwila nawu awayishewa “akayisenda nakuya muluzwizu”? Antu amavulu amuKristendomu akuhwelela iyi ntañishilu, yakwila nawu akwaKristu akayisenda munyijimba yawuntu kufuma hamaseki. Kuhiñahu, akuhwelela nawu akamumona Yesu chakenzayi nakuyuula hamaseki. Hela chochu, Bayibolu yashimuna hatooka nawu “chinjikijilu chaMwana kamuntu” chikamwekana mwiwulu nawa nawu Yesu wakenza “hamavu amwiwulu.” (Mat. 24:30) Mazu ejima awa amwekeshaña yuma yakamonewaña. Kubombelahu, ‘mashi nimujimba hiwukutwesha kuswana Wanta waNzambuku.’ Dichi antu akaya mwiwulu atela kusambila ‘kuyibalumuna hohenohu, mukulabula kwadisu, hampuña yakukuminina.’ (Tañenu 1 Akorinda 15:50-53.) Hela chakwila hitwazatishaña mazu akwila nawu ‘kuyisenda nakuya muluzwizuku’ muloña akundama kuntañishilu yakutwamba, awayishewa ashinshika akayipompesha hamu neyi mukulabula kwadisu.
Kutaña Bayibolu
(1 Atesalonika 3:1-13) Dichi, chitwakañenyi kuumika, twatoñojokeli netu chachiwahi kushala kankawetu kuAtenisi; 2 nawa twatemesheli manakwetu Timotewu mukwakukalakala wansañu yayiwahi yaNzambi yahosha hadi Kristu, kulonda yayikoleshi nikuyikundeja muloña wachikuhwelelu chenu, 3 kulonda kubuli kwikala muntu hela wumu wukuluwankana nanilu lukadi. Muloña enu aweni mweluka nenu hitukutwesha kutondolwela ilu lukadiku. 4 Muloña hampinji yitwadiña nanenu, twayilejeleleña chadimu netu etu tukamona lukadi, neyi chimweluka, chumichi dichinamwekani. 5 Dichi, ami chinakañenyi kuumika, namutemesheli Timotewu kudi enu kulonda niiluki chidi chikuhwelelu chenu, muloña natoñojokeleña nami hadaha Mukwakweseka nayeseki dehi, nawa mudimu wetu wunekali dehi wamukunkulwayi. 6 Ilaña Timotewu dihanafuntiyi kudi etu kufuma kudi enu, nawa natuleji nsañu yayiwahi kutalisha hakashinshi nikukeña kwenu, nindi mwatwanukaña nankashi mpinji yejima nawa mwafwilaña chikupu kutumona neyi chitunakufwila ninetu kuyimona enu. 7 Diwu muloña waweni enu anakwetu, hela tuhu muyihuñu yetu yejima nimulukadi, twakundejewaña muloña wanenu nikashinshi kimwamwekeshaña. 8 Dichi etu twekalaña nañovu neyi enu mwimana akola mbe-e mudi Mwanta. 9 Hanu dinu tukutwesha ñahi kumusakilila Nzambi hadi enu kutalisha hamuzañalu wasweja wutunakutiya hadi enu kumesu aNzambi yetu? 10 Wufuku nimwaana twalombaña kulomba kwakulembelela chikupu netu tukadimoni nenu nikuyikwashaku yuma yimunabuli kulonda chikuhwelelu chenu chikakoli. 11 Ichi dinu Nzambi yetu yomweni nawa Tata niMwanta wetu Yesu, atulomboli munjila kulonda twakenzi kudi enu. 12 Kubombelahu, Mwanta yavulishi kukeña kwenu kwakudikeña wumu namukwawu nikwakukeña antu ejima, neyi chitwelaña etu nanenu, 13 kulonda yakoleshi nyichima yenu chikupu, mwiikali ajila akadi hakuyinkela muloña kumesu aNzambi Tata hampinji yakwikalahu kwaMwanta wetu Yesu hamu nawakwakujila indi ejima.
JULY 15-21
YUMA YALEMA YAMWIZU DANZAMBI | 2 ATESALONIKA 1-3
“Kusolola Muntu Wafumpaña Nshimbi”
(2 Atesalonika 2:6-8) Ichi dinu muneluki dehi chamukañeshaña muntu wafumpaña nshimbi, kulonda akamusololi mumpinji yindi yatelela. 7 Chalala, kutama kwaniwu muntu kwajindawu kunakuzatika, ilaña iku kutama kukatwalekahu kwikala kwakujinda sampu muntu wamukañeshaña anamufumishihu dehi. 8 Dichi, iwu muntu wafumpaña nshimbi akamusolola, owu akajilumunawu kudi Mwanta Yesu naspiritu yamukanwa kindi nikumufumishahu hampinji yakelukewa kwikalahu kwindi.
it-1 972-973
Kumwakama Nzambi
Kutama kukwawu kudi kwakudikaña ‘nanyidimu yajila’ yaYehova. “Hikutama kwaniwu muntu kwajindawu.” Iku kwadiña kutama kwawaKristu alala muloña mumafuku akapostolu Pawulu kwiluka “kutama kwaniwu muntu kwajindawu” kwadiña wanyi kwakwila nawu muntu wukushikena kukwiluka. Nihanyima yakwila iwu “muntu” nahimpi, yilwilu yindi yikutwalekahu kwikala yakujinda kudi antu amakwawu muloña kutama kwindi wukukwikoñelaña kumbadi nawa mwijina dakumwakama Nzambi. Hela chochu, chumichi munabombeli kuleka kumwakama Nzambi. Pawulu wahosheli nindi: “kutama kwaniwu muntu kwajindawu” kwadiña dehi nakuzatika mumafuku indi, muloña muchipompelu chawakwaKristu mwadiña antu atama chadi kuleñela antu kwikala akwakusekesha. Nkumininaku, iwu muntu watama akamufumishahu kudi Yesu Kristu hampinji yakwikalahu kwindi. Iwu mukwakusekesha ‘himuntu’ azatishañawu kudi Satana, wadinyamunaña yomweni “nikudituumbakesha chikupu kubadika ejima atenañawu nawu ‘nzambi’ hela chuma chakudifukulaku” (Gr., seʹba·sma). Dichi iwu mukwakumudimbulula Nzambi wudi neyi chozelu chazatishañayi Satana wukaleta kudimbana nawa kujilumuna ana ejima elaña yuma yelañayi. Nyidimu ‘yamuntu wakoñaña yuma yakuluwalala’ yakamwekana munjila yakwila nawu kutama kwindi kwakaswama muwunfwikiji wakumwakama Nzambi.—2Te 2:3-12; esekejenu Mat 7:15, 21-23.
(2 Atesalonika 2:9-12) Ilaña iwu muntu wafumpaña nshimbi wekalilaku nyidimu yaSatana wamwinkaña ñovu yakuzata nyidimu yañovu yejima niyinjikijilu yakutwamba niyihayamisha 10 niyuma yejima yakudimbana yabula kuloña yanowu anakuya nakunoña, kwikala nfwetu muloña hiyetejeli nikukeña chalala kulonda akayamwiniku. 11 Dichaletesheli Nzambi kwiteja yuma yakudimbana yiyihuñumuni kulonda eteji makudi, 12 kulonda wejima wawu ayisompeshi muloña hiyetejeli chalalaku, ilaña adiña nakuzañalela muyuma yabula kuloña.
it-2 245 ¶7
Kutwamba
Yehova Nzambi weteja “yuma yakudimbana” kuya kudi muntu wakeña makudi “kulonda yeteji makudi” chetala yeteji nsañu yayiwahi yaYesu Kristu. (2Te 2:9-12) Ichi chishina anachilumbululi chiwahi kwesekeja nayuma yamwekeni kunyima kutalisha hadi Mwanta wawaIsarela Ahabi. Kaprofwetu wakutwamba wamukanini Ahabi nindi wakashinda njita yikazuñayi naRamoti Gileyadi, iku kaprofwetu kaYehova Mikaya wadiña washimuna dehi nindi hiyakashindaku. Kwesekeja nachamweniyi Mikaya muchimwenu, Yehova wetejeli yileñaleña yakuspiritu kuya ‘nakwikala spiritu yakutwamba’ mutunwa twawatuprofwetu ejima aAhabi. Kulonda ichi chileñaleña chakuspiritu chikazatishi ñovu yindi hadi wena kulonda akabuli kuhosha mwalala, ilaña yuma yidi kunyichima yawu niyuma yakeñeleñayi Ahabi kutiya kudi wena. Hela chakwila amusoñamishili, Ahabi wetejeli kumudimba chakwila wajimbesheli niwumi windi.—1An 22:1-38; 2Ku 18.
Kukeña Yuma Yalema yakuSpiritu
(2 Atesalonika 1:7, 8) Ilaña enu munakumona lukadi, akayinookesha hamu nanetu hampinji yakamumwekeshawu Mwanta Yesu kufuma mwiwulu hamu nawañelu jindi añovu 8 mukesi kanakubidima, hampinji yakatendayi antu abula kumwiluka Nzambi niabulaña kwovwahila nsañu yayiwahi yahosha hadi Mwanta wetu Yesu.
it-1 834 ¶5
Kesi
Petulu wasonekeli nindi “mawulu nimaseki adiku hayinu mpinji, anayihembeli kesi.” Kwesekeja nanawa mazu ninyikanda yikwawu yajila, chumichi chinakumwekesha hatoka to-o nawu bayi neyi aka hikesi kitwelukaku ilaña hichuma chemenañaku kujilumuka kwahaya nyaaka. Neyi chabulili dibaji kujilumuna mawulu nimaseki itwamonaña mumafuku aNowa, ilaña ajilumunaku antu abulileña kumwakama Nzambi, dichi chichakekala nihampinji yakamumwekeshawu Yesu Kristu hamu nawañelu jindi añovu mukesi kanakubidima, akajilumuna haya nyaaka antu abulaña kumwakama Nzambi ninshakaminu yamakonu.—2Pe 3:5-7, 10-13; 2Te 1:6-10; esekejenu Isa 66:15, 16, 22, 24.
(2 Atesalonika 2:2) netu bayi muluwankana swayi-swayi muyitoñojoka yenu hela kuzaala namazu onenewa, hela namazu ahakanwa hela namukanda wunakumwekana neyi wunafumi kudi etu nawu ifuku daYehova dinenzi dehiku.
it-1 1206 ¶4
Konenewa
“Mazu Onenewa”—Dimu nadimu Wanyi. Izu dachiGiriki dapneuʹma (spiritu) apostolu amakwawu adisonekeli munjila yadimena. Chakutalilahu, ha 2 Atesalonika 2:2, kapostolu Pawulu wayikonkomweneni amanakwindi amu Atesalonika kubula kusweja kuzañalala hela kuluwankana “namazu onenewa, [hela, “spiritu”] hela namazu ahakanwa hela namukanda wunakumwekana neyi wunafumi kudi etu nawu ifuku daYehova dinenzi dehiku.” Chinamwekani hatooka nawu Pawulu wazatishili izu dakwila nawu pneuʹma (spiritu) kutalisha kunjila jakuhanjekelamu jidi neyi “mazu ahakanwa” hela “mukanda.” Muloña wachumichi mukanda waLange’s Commentary on the Holy Scriptures (ifu. 126) walumbulwili nawu Pawulu chasonekeliyi mazu akwila nawu “mazu onenewa” watalishili kumazu amwekeneña nawu onenewa, hela kuhosha nsañu yakutwamba yakumbidi hela mazu akufuma kudi atuprofwetu. (Wabalumunawu kudi a P. Schaff, mu 1976) Mukanda waVincent’s Word Studies in the New Testament wahosha nawu: “Kuhitila muspiritu. Kuhitila mumazu awuprofwetu ahosheleñawu muyipompelu yawakwaKristu, adiña nakulumbulula mwatalishili yimwenu yañovu.” (1957, Vol. IV, ifu. 63) Dichi, akwakubalumuna amakwawu azatishaña izu dapneuʹma muniyi nsañu nawa dadifwanaku “naspiritu,” mukulumbulula kukwawu adisoneka nawu “nsañu yaSpiritu” (AT), “kuhosha nsañu yakumbidi” (JB), “konenewa” (D’Ostervald; Segond [French]), “mazu onenawu” (NW).
Kutaña Bayibolu
(2 Atesalonika 1:1-12) Ami Pawulu, nidi hamu naSilivanusi niTimotewu, inakusonekela chipompelu chawaTesalonika adikunda naTata yetu Nzambi niMwanta Yesu Kristu: 2 Luwi lwasweja nikuwunda jafumaña kudi Nzambi Tata nikudi Mwanta Yesu Kristu jiikali nanenu. 3 Enu anakwetu, mpinji yejima tudi namudimu wakuyisakililaku kudi Nzambi. Chumichi chinateleli, muloña chikuhwelelu chenu chinakutohelaku nankashi nikukeña kwenu wejima wenu kwakudikeña wumu namukwawu kunakuswejelaku. 4 Dichi, twayihamekaña muyipompelu yaNzambi muloña wakuumika kwenu nikushinshika kwenu kumwamwekeshaña mumakabisha ejima imunakuhitamu nimakabi imunakumona. 5 Ichi hichinjikijilu chinakumwekesha nawu Nzambi wasompeshaña mwaloña, nawa chumichi chikayileñela enu kuyimona nawu mwatelela Wanta waNzambi wumunakukabakena. 6 Iwu wunsompeshi waNzambi, waloña, muloña yena nakuyifweta lukadi antu ayiletelaña enu lukadi. 7 Ilaña enu munakumona lukadi, akayinookesha hamu nanetu hampinji yakamumwekeshawu Mwanta Yesu kufuma mwiwulu hamu nawañelu jindi añovu 8 mukesi kanakubidima, hampinji yakatendayi antu abula kumwiluka Nzambi niabulaña kwovwahila nsañu yayiwahi yahosha hadi Mwanta wetu Yesu. 9 Antu wenawa akayisompeshela kukujilumuka kwahaya nyaaka nakuyifumisha kumesu aMwanta nikukulema kwañovu jindi, 10 hampinji yakenzayi kulonda akamulemeshi mukachi kawantu jindi ajila nikumuhayama hefuku denodu kudi antu ejima amukuhweleleli, muloña enu mwakuhweleleli wunsahu wutwayishimwinini. 11 Dichi, twayilombelañaku mpinji yejima netu, Nzambi yetu yayimoneña nindi mwatelela mutambi windi, nawa nañovu jindi, yatweshi kushikija chikupu yuma yejima yamutiyishaña kuwaha ninyidimu yejima yimwakalakalaña nachikuhwelelu. 12 Wakela mwenimu kulonda ijina daMwanta wetu Yesu akadilemesheli mudi enu, ninenu nawa akayilemesheli mudi yena kwesekeja naluwi lwaNzambi yetu nilwaMwanta Yesu Kristu.
JULY 22-28
YUMA YALEMA YAMWIZU DANZAMBI | 1 TIMOTEWU 1-3
“Fwilenuña Mudimu Wawuwahi”
(1 Timotewu 3:1) Awa mazu atelela kuyikuhwelela: Neyi iyala nakukeña kwikala kalama, dikwila nawu nakufwila mudimu wawuwahi.
Yilenuñaku Hambidi kuSpiritu
Tañenu 1 Timotewu 3:1. Mazu achiGiriki abalumunawu nawu ‘muntu nakeñi mudimu’ atalisha mukwila nawu muntu wunakufwila nankashi kuzata mudimu. Chazatishililiyi awa mazu, kapostolu Pawulu wakonkomweneni nindi, hakwila nawu muntu yayiliku hambidi kuspiritu watela kuzata nañovu. Fwikijenu manakwetu nakutoñojoka hanyidimu yikazatañayi muchipompelu kumbidi. Hadaha chayinu mpinji hinkoñi wakuzatila wanyi, ilaña neluki nindi watela kuzata nañovu kwikala nayilwilu yakuspiritu. Chatachi, wukuzata nañovu kulonda ekali nkoñi wakuzatila. Mukuhita kwampinji, nakufwila kushikahu kuspiritu kulonda yekali eluda. Muniyi yakutalilahu yejima, nakuzata nañovu kulonda yashikiji yuma yakeñekaña hakuzata nyidimu yamuchipompelu.
(1 Timotewu 3:13) Muloña amayala akalakalaña munjila yayiwahi, adituñilaña ijina dadiwahi nawa ekalaña akasunuka chikupu kuhosha hachikuhwelelu chawu mudi Kristu Yesu.
km 9/78 4 ¶7
Ana “Adituñilaña Ijina Dadiwahi”
Chidi chaswayi kwiluka, chahosheleliyi Pawulu hadi amayala amuchidiwu nindi: “adituñilaña ijina . . . dadiwahi.” Bayi neyi ichi chidi neyi chelañawu amakwawu akeñaña kwikala nayifulu yamaneni mumachechiku. Ilaña, akoñi akuzatila “akalakalaña munjila yayiwahi,” ayikana kutambwila nkisu yaYehova niyaYesu nawa ayilemeshaña nikuyikwasha kudi chipompelu chejima. Chakadi nikujina, akeñekaña “[kwikala] akasunuka kuhosha hachikuhwelelu chawu mudi Kristu Yesu.” Chineli ekala ashinshika munyidimu yawu, ayihamekaña nanyidimu yawu yayiwahi; akweti chikuhwelelu chakola nawa anateli kuchimwekesha chakadi kutiya woma hela kuchiina kuyiseha.
Kukeña Yuma Yalema yakuSpiritu
(1 Timotewu 1:4) hela kusha maana kumpanji jakutwamba nikukuchinda yisaka yawankakulula. Yuma yamuchidiwu yamukunkulwayi, yaleteshaña hohu antu afwikijeña yuma chatela yihaneña yuma yafumaña kudi Nzambi yakoleshaña chikuhwelelu.
it-1 914-915
Kuchinda Yisaka Yawankakulula
Chadiña chamukunkulwayi kudiza nikuhanjeka haniyi nsañu sweje-e hampinji yamusonekeleliwu Timotewu kudi Pawulu. Hichadiña chalema kuchinda nikuhemba majina ayisaka yawankakulula akushankuluku, muloña haniyi mpinji Nzambi wadiña nakuyimona aYudeya niaJentili adiña muchipompelu chawakwaKristu nindi adiña antu wowamu. (Ñal 3:28) Nawa yisaka adiña ayichinda dehi kufuma hadi nkakulula Davidi kushika nihadi Kristu. Cheñi, hashimbwili wanyi hasonekeliyi Pawulu kusoñamisha kwakwila nawu Yerusalema keña amujilumuni kushilahu ninsañu yawaYudeya yasonekeliwu. Nzambi hayamwininiku. Hela chochu, Pawulu wadakameneni nindi Timotewu nichipompelu hiyatela kunata mpinji yawu nakusandujola nikutadeka hansañu jawu aweni jadi kubula kukwasha chikuhwelelu chawakwaKristuku. Iwu wunsahu wakuchinda wamuBayibolu hiwunsahu wamwekeshaña nawu Kristu hiMesiya, diyi nsañu yalema yatela kwilukawu akwaKristu. Kuchinda kukwawu kwamuBayibolu kwamwekeshaña hatooka nawu nsañu yasonekeliwu yalala nawa yashimunaña choloka kutalisha kuyuma yamwekeni.
(1 Timotewu 1:17) Ichi dinu, kalemesha nikulema jiikali kudi Mwanta wahaya nyaaka, wabulaña kutoka, abulaña kumonawu, yowu Nzambi nkawindi hohu, haya nyaaka nanyaaka. Ameni.
cl 12 ¶15
“Talenu! Iwu Diyi Nzambi Yetu”
Yehova amutenaña cheñi nankumbu yakwila nawu “Mwanta wahaya nyaaka nanyaaka.” (1 Timotewu 1:17; Chimwekeshu 15:3) Chumichi chinatalishi mudihi? Chakala nankashi kutiyishisha muloña wayitoñojoka yetu yantesha, ilaña Yehova wahaya nyaaka, dikwila nawu wadiñaku nawa wamba kekalaku. Masamu 90:2 yahosha nawu: “Kufumisha kumashiita, oko-o, nakutwala kunyaka yahaya nyaka, yeyi Nzambi hohu.” Dichi, Yehova hakweti ntachikiluku wadiña dehi kwoku. Chatelela kumutena nawu “Wakunyaka nanyaka,” wadiña dehi kwoku henohu kanda kwikali chuma chidi chejima hamaseki hela mwiwulu! (Danyeli 7:9, 13, 22) Hinyi wunateli kumwihula hawuswa windi wakwikala Mwanta?
Kutaña Bayibolu
(1 Timotewu 2:1-15) Chatachi, inakuyikonkomwena nami, lombelenuñaku antu ejima, nakulomba kwakulembelela, nakulomba, nakudilombelaku wumu namukwawu, nikulomba kwakusakilila, 2 kubombelaku nianyanta niantu ejima akweti yifulu yalema, kulonda tushakameña kumatu kwamwena nimukuwunda nakumwakama Nzambi chikupu nikukoña yuma yejima neyena. 3 Chumichi chachiwahi nawa chetejewa kumesu aNzambi Chamwinu chetu, 4 wakeñaña nindi antu ejima ayamwini nawa nindi ekali nakwiluka kwalala kwakwiluka chalala. 5 Muloña kwekala Nzambi wumu hohu niihaku wumu hakachi kawantu naNzambi, yowu Kristu Yesu, muntu 6 wadihanini yomweni kwikala ifutu danyiloña dakukuula nachu antu ejima, dichi antu akahosha hachumichi mumpinji yachu yatelela. 7 Muloña waniwu wunsahu, antondeli kwikala mukwakushimwina nawa kapostolu. Inakuhosha chalala, inakutwamba wanyi. Antondeli kwikala ntañishi wakutañisha akwanyuza nsañu yachikuhwelelu nichalala. 8 Dichi, inakukeña nami kumaluña ejima, amayala alombeña nakwolola makasa awu ajila chakadi kuzuwa nintaadi. 9 Chochimu nawa, ambanda niwena adiwahisheña nayakuvwala yatelela, nakalemesha nikutoñojoka mwamaana, bayi kuyinda-yinda nyichidi yansuki nawuru, hela namperola hela nayakuvwala yasweja wuseyaku, 10 ilaña avwaleña yakuvwala yatelela ambanda aditenaña nawu amwakama Nzambi, dikwila nawu kuhitila mukuzata nyidimu yayiwahi. 11 Mumbanda yadizi muwumweneni nakwovwahila chikupu. 12 Hinneteji mumbanda kutañisha hela kwikala nawuswa hadi iyalaku, ilaña watela kumwena. 13 Muloña Adama diyi asambililiwu kuleña, kuhiñahu dinu hiyakuleña Eva. 14 Cheñi nawa, Adama hiyamudimbiliku, ilaña mumbanda diyi adimbiliwu chikupu, nawa wavulumwini. 15 Hela chochu, mumbanda wakakiñewa kuhitila mukuvwala anyana chakala hohu yatwalekahu muchikuhwelelu nimukukeña nimukujila nimukutoñojoka mwamaana.
JULY 29–AUGUST 4
YUMA YALEMA YAMWIZU DANZAMBI | 1 TIMOTEWU 4-6
“Kumwakama Nzambi naMaheta”
(1 Timotewu 6:6-8) Kuhosha hohu chalala, mukumwakama Nzambi nimukuzañalala nayuma yitukweti mwekala iheta deneni chikupu. 7 Muloña hitwaletahu chuma hela chimu mukaayiku, nawa hitunateli kufumamu nachuma hela chimuku. 8 Dichi, chineli tukweti yakuda niyakuvwala, tukuzañalalaña nayumiyi.
w03 6/1 9 ¶1-2
Kudiza Chakushakama naYuma Yitukweti
Chuma chasweja kulema chamuletesheleña Pawulu kwikala namuzañalu, hikuzañalala nayuma yadiñayi nayu. Indi kuzañalala nayuma yiwukweti kwatalisha mudihi? Muwihi, hikumona yuma yiwukweti neyi yinashikili. Kutalisha kuniyi nsañu, Pawulu wamulejeli Timotewu mukwawu mwazatilileñawu mumudimu wakushimwina nindi: “Kuhosha hohu chalala, mukumwakama Nzambi nimukuzañalala nayuma yitukweti mwekala iheta deneni chikupu. Muloña hitwaletahu chuma hela chimu mukaayiku, nawa hitunateli kufumamu nachuma hela chimuku. Dichi, chineli tukweti yakuda niyakuvwala, tukuzañalalaña nayumiyi.”—1 Timotewu 6:6-8.
Ilukenu nenu Pawulu washimwini nindi kuzañalala nayuma yiwukweti kwendelaña hamu nakumwakama Nzambi. Welukili nindi muzañalu walala wafumaña mukumwakama Nzambi, dikwila nawu kutwamijaku yuma yakuspiritu kubadika maheta. “Yakuda niyakuvwala” yakeñekeleña hakwila nawu yatwalekihu kumwakama Nzambi kushika nikunsa. Chuma chamukwashili Pawulu kuzañalala nayuma yadiñayi nayu, hikumushindamena Yehova hela chakwila yuma yakalili.
(1 Timotewu 6:9) Ilaña, antu afwilaña kuheta, adiñijaña mukweseka, mumuhetu, muyuma yayivulu yawusupi nimukufwila kwaletaña wubanji nawa kwatwalaña antu kukujilumuka nikukukisika.
g 6/07 6 ¶2
Kufwila Kuheta—Chikunateli Kuyiluwañesha
Bayi neyi antu hiyafwaña muloña wakufwila mahetaku. Hela chochu, mpinji yinateli kuhita hampinji yinakufwilawu maheta. Cheñi, anateli kuhanda yaaka yantesha muloña wakwakama, kukeña mali amavulu chaleteshaña kwikala nawoma, kukama hampinji yayilehi, kukata mutu, hela kwila yilonda, yikatu yinateli kuletesha muntu kufwa. Mpinji yikwikala yamana dehi hela chakwila wukushikena kwila nindi yahimpi yuma yinateliyi kutwamijaku. Mwinikwindi wukuleka kumukuhwelela, anyanindi akuluwankana muyitoñojoka nawa nateli kukata. Hadaha nateli kuzatila hayuma yikwawu, ilaña chiña yazata nañovu. Mwamweni, antu amuchidiwu “anadipwiki awenawu nayihuñu yayivulu nzwa-a nikwishinadi.”—1 Timotewu 6:10.
(1 Timotewu 6:10) Muloña kusweja kukeña mali diwu muji wayuma yejima yatama, nawa antu amu, muloña wakusweja kukeña mali anayisenwishi dehi nakufuma kuchikuhwelelu nawa anadipwiki awenawu nayihuñu yayivulu nzwa-a nikwishinadi.
g 11/08 6 ¶4-6
Yuma 6 Yinateli Kutukwasha
Neyi chitwamona muchibaaba chatachi, antu afwilaña maheta muloña akeñaña kwikala namuzañalu, ilaña, afwilaña muzañalu wabulaku. Kubombela hakudiletela chineñi, adivulishilañaku cheñi yihuñu. Chakutalilahu, hampinji yafwilañawu maheta, adambulaña nayisaka niamabwambu jawu. Amakwawu akañanyaña kukaama muloña wanyidimu, kwakama hela yitoñojoka. Bayibolu yaHebrew Names Version yahosha haMukwakutañisha 5:12 nawu: “Tulu twakamaña muntu wakalakalaña nyidimu yamakasa twatowala, hela nadyi yantesha hela nadyi yayivulu; ilaña kwikuta kwekutaña mukwakuheta kwamulekeshaña kukama tulu.”
Bayi neyi mali atama hohuku, ilaña adimbanaña cheñi. Yesu Kristu wahosheli ‘hañovu yakudimbana kwamaheta.’ (Maku 4:19) Munjila yikwawu, maheta amwekanaña neyi aletaña muzañalu, ilaña dimu wanyi. Antu aswejelañaku kuyifwila chikupu. The New English Bible yahosha haMukwakutañisha 5:10 nawu: “Muntu wakeña mali helaña nindi anawaniniku.”
Muwihi, muntu wakeñesha mali wadiletelaña hohu kukala, chineñi chasweja niwubanji. (Yishimu 28:20) Ilaña chuma chaletaña muzañalu hikuhana, kwanakena, kwikala nayilwilu yayiwahi, kukeña nikwikala muntu wawuspiritu.
Kukeña Yuma Yalema yakuSpiritu
(1 Timotewu 4:2) nawa akatiyilila kuwunfwikiji wawantu ahoshaña makudi, akweti chinleji chamuchima chooma neyi kwiji anachochi nachikuñu chitata.
Chinleji Chamuchima Chachiwahi naNzambi
Kapostolu Petulu wasonekeli nindi: “Ikalenu nachinleji chamuchima chachiwahi.” (1 Petulu 3:16) Chawushona, antu amavulu atwalekañahu kudiwula yishina yamuBayibolu, nkumininaku chinleji chawu chalekaña kuyisoñamisha. Pawulu wahosheli nindi chinleji chamuchidiwu “chooma neyi kwiji anachochi nachikuñu chitata.” (1 Timotewu 4:2) Kanda mudocheñahu dehi chikupu? Neyi mwadocheli, dikwila nawu ikowa denu dashala nachibata chachinchika. Neyi muntu yatwalekahu kwila yuma yatama, chinleji chindi chikwikala “chooma,” nawa mukuhita kwampinji chikuleka kuzatika.
(1 Timotewu 4:13) Twalekakuhu nakutaña nezu datiyakana kudi antu amavulu, kukonkomwena nikutañisha ndo-o nichinakenza.
it-2 714 ¶1-2
Kudi Antu Amavulu
Muchipompelu ChawakwaKristu. Mumafuku awapostolu antu antesha hohu diwu adiña nanyivuñilu yaBayibolu, nakuyitaña kudi antu amavulu. Kapostolu Pawulu washimwini nindi nyikanda yindi ayitañi kumesu awantu amavulu, hakupompa kwawakwaKristu nawa nindi ayitemeshi cheñi kuyipompelu yikwawu niwena akayitañi. (Kol 4:16; 1Te 5:27) Pawulu wamulejeli Timotewu “[kutaña] nezu datiyakana kudi antu amavulu, kukonkomwena nikutañisha.”—1Ti 4:13.
Neyi munakutaña kudi antu amavulu mwatela kutaña chiwahi. (Hab 2:2) Chineli kutaña kudi antu amavulu hinjila yakudizishilamu antu, wunakutaña watela kutaña chiwahi nakwiluka yuma yinakutañayi, chasonekeleliyi nsoneki, nikwikala wasoñama hakutaña kuchiina kutumba yitoñojoka yatama mudi antiyilili. Kwesekeja naChimwekeshu 1:3, Adi namuzañalu yowu antu atañaña nezu dahewulu, ninowu atiyaña mazu aniwu wuprofwetu ninowu alondelaña yuma yiyasonekamu.
Kutaña Bayibolu
(1 Timotewu 4:1-16) Hela chochu, mazu onenawu ahosha hatooka nawu, kumafuku akumbidi, antu amu akaleka kukuhwelela nakusha maana kumazu onenawu akuluwañesha nikuntañishilu yawandemoni, 2 nawa akatiyilila kuwunfwikiji wawantu ahoshaña makudi, akweti chinleji chamuchima chooma neyi kwiji anachochi nachikuñu chitata. 3 Akaanishaña antu kudisumbula nikuleja antu kuleka kuda yakuda yaleñeliyi Nzambi nindi ayideña nakusakilila kudi antu akuhwelela nawa eluka chalala chikupu. 4 Muloña yuma yejima yaleñayi Nzambi yayiwahi, nawa kwosi chuma hela chimu chatela kukaanawu neyi anakuchitambwila nakusakililaku, 5 muloña achijilika kuhitila mwizu daNzambi nikulomba. 6 Neyi wukuyifumbaña anakwetu nanawa mazu, wakekala mukwakukalakala wamuwahi waKristu Yesu, anadiishiwu namazu achikuhwelelu niantañishilu yayiwahi yiwunalondeli chikupu. 7 Ilaña wukaaneña mpanji jakutwamba, jamukunkulwayi jidi neyi jashimunañawu atushinakaji awambanda. Hela chochu, ikalaku nachikonkwanyi chakudidizisha eyi aweni chakumwakama Nzambi. 8 Muloña kukolesha mujimba kwaheteshaña hakapinji kantesha, ilaña kumwakama Nzambi kwaheteshaña muyuma yejima, muloña mwadibombela chikaninu chawumi wamakonu niwumi wunakwinza. 9 Awa mazu atelela kuyikuhwelela nawa atelela kuyitambwila chikupu. 10 Ichi dichuma chinakutukojeja kudikita chikupu nikudishaku etu aweni, muloña tunakuhweleli mudi Nzambi wamumi, wekala Chamwinu chawantu ejima, sweje-e dinu chawantu ashinshika. 11 Twalekakuhu nakuyinka iji nshimbi nikuyitañisha. 12 Bayi witeja muntu hela wumu yadiwuli wukwenzi weyiku. Ilaña, ikalaku wakutalilahu munhoshelu, muyilwilu, mukukeña, muchikuhwelelu nimukudihemba kudi antu ashinshika. 13 Twalekakuhu nakutaña nezu datiyakana kudi antu amavulu, kukonkomwena nikutañisha ndo-o nichinakenza. 14 Bayi wudiwula chawaana chiwukweti chakwinkeliwu kuhitila muwuprofwetu hampinji yakunañikili izanvu dawakulumpi makasa awuku. 15 Wutoñojokeña chikupu hayumiyi; wudinkimu muyumiyi, kulonda kupama kweyi akumoneña hatooka kudi antu ejima. 16 Dihembeña eyi aweni nikusha muchima kuntañishilu yeyi. Kolelaku chikupu kuyumiyi, muloña mukwila mwenimu, wakadaamwina eyi aweni ninowu akutiyililaña.