Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
AUGUST 5-11
YUMA YALEMA YAMWIZU DANZAMBI | 2 TIMOTEWU 1-4
“Nzambi Hatwinkeli Spiritu yaWomaku”
(2 Timotewu 1:7) Muloña Nzambi hatwinkeli spiritu yawomaku, ilaña watwinkeli yañovu niyakukeña niyakutoñojoka mwamaana.
Atwansi—Mwekeshenu Wuya Hambidi Wenu
Nkumininaku Pawulu wamukwashili Timotewu, kuhitila mukumwanukisha nindi: ‘Nzambi hatwinkeli spiritu yawomaku, chiña yañovu nakukeña nikuwundisha mumesu.’ (2 Tim. 1:7) “Kuwundisha mumesu” kwalumbuluka kutoñojoka mwamuwahi. Kwabombelamu kuumika kukala kwejima kumunakumona hela chakwila yuma hiyidi neyi chimunakukeñaku. Atwansi amakwawu amwekeshaña spiritu yawoma hakufwila kutondolwela kutoñojoka yuma yakala kuhitila mukukaama hela kutalaña TV chikupu, kunwa yitumbu yashetana hela kusweja kunwa walwa, kuwanika kuyidika mpinji yejima hela kudiñija muyililu yawuvumbi. AkwaKristu ayibabesha, ‘kuleka kusekesha Nzambi, nikufwila yatama yampata yamunu mwishina, tushakami nyaka yinu nakuwundisha mumesu, nikuloña nikwakama Nzambi.’—Titusa 2:12.
(2 Timotewu 1:8) Dichi, eyi bayi wutiya nsonyi kushimwina nsañu yaMwanta wetu hela hadi ami akasawu mukaleya kukoola yenaku, ilaña eyi kuminaku dakukabakana kukoola nsañu yayiwahi kuhitila mukushindamena hañovu jaNzambi.
w03 3/1 9 ¶7
‘Kadikwatishaña, Wakomikaña Chacheni!’
Pawulu hamusonekeleliyi Timotewu wahosheli nindi: “Nzambi hatwinkeli spiritu yawomaku, ilaña watwinkeli yañovu . . . Dichi, eyi bayi wutiya nsonyi kushimwina nsañu yaMwanta [wetuku].” (2 Timotewu 1:7, 8; Maku 8:38) Neyi tutaña awa mazu twatela kudihula netu: ‘Komana natiyaña nsonyi nayuma yinakuhwelela tahindi nekala wahamuka? Neyi nidi kumudimu kunazatilaña (hela kushikola), komana nalejaña akwetu nami nidi Chinsahu chaYehova tahindi nadiswekaña? Komana natiyaña nsonyi kwikala wambukaku nawakwetu tahindi natiyaña kuwaha muloña wakwikala ibwambu daYehova?’ Neyi mwatiyaña nsonyi yakushimwina nsañu yayiwahi hela kwikala ambukaku nawakwenu, anukenuña kufumba kwamulejeliwu Yoshuwa kudi Yehova nindi: “Kadikwatishaña, wakomikaña chacheni.” Twatela kwanukaña netu yitoñojoka yawakwetu kumudimu hela kushikola yamukunkulwayi, ilaña chuma chalema chochatulejañayi Yehova niYesu Kristu.—Añalija 1:10.
Kukeña Yuma Yalema yakuSpiritu
(2 Timotewu 2:3, 4) Chineli wudi ishidika wamuwahi waKristu Yesu, kuminaku dakukabakana kukoola nsañu yayiwahi. 4 Kwosi muntu wunakuzata mudimu wawushidika wadiñijaña mumudimu wakulanda nakulandululaku, kulonda amutiyi kuwaha kudi muntu wamwiñijili wushidika.
Kukeñakeña Maheta Alala
Timotewu wadiña nachikuhwelelu. Hanyima yakumutena Timotewu nindi “ishidika wamuwahi waKristu Yesu,” Pawulu wamulejeli nindi: “Kwosi muntu wunakuzata mudimu wawushidika wadiñijaña mumudimu wakulanda nakulandululaku, kulonda amutiyi kuwaha kudi muntu wamwiñijili wushidika.” (2 Tim. 2:3, 4) Atumbanji twaYesu makonu, kushilahu niambuña aNzambi kubadika ha 1,000,000 anakukalakala mumudimu wampinji yejima, azatishaña kufumba kwaPawulu kwakudikita chikupu. Hakwila nawu abuli kudiñija munsañu yakulanda nakulandulula yidi mukaayi, anukaña chishina chakwila nawu: “Mukwakusondama hinduñu yamukwakusondamisha.” (Yish. 22:7) Satana watiyaña kuwaha neyi tuzatishaña mpinji niñovu yetu yejima kukalakela maheta amukaayi kindi. Kufuukula kukwawu kunateli kutwiñija muwuduñu. Kusonkela matala amaneni, kuya kumashikola amaneni hankongoli, kufwetela nyotoka yasweja wuseya, nikupanga chidika chasweja wuseya kunateli kumuleñela muntu kwikala mukukala kwamali. Twamwekeshaña maana neyi tupeleshaku chihandilu nikukeheshaku kudiñija munyikudi nijakulanda nakulandulula, kwikala akasunuka hakumukalakela Nzambi chatela tushi maana hakufwila maheta.—1 Tim. 6:10.
(2 Timotewu 2:23) Kubombelahu, wukaaneña kutaadeka kwawusupi nawa kwamukunkulwayi, nanochu chiweluka neyi mwafumaña ndombu.
Antu jaYehova ‘Afumaña Kuyuma Yaheña’
Makonu, antu jaYehova hiyavula kuwana akwakusekesha mukachi kachipompeluku. Hela chochu, neyi tuwana ntañishilu yabula kwikala muBayibolu kudi kwejima, twatela kuyikaana. Hiwusupi neyi tutachika kutadeka nawakwakusekesha chili mesu namesu, kwakula nsañu yahaIntaneti hela njila yidi yejima yakuhanjekelamu. Hela chakwila tunakufwila kumukwasha muntu, kwesekeja nansañu yamuNsona yitunahanjekuhu, chikwikala chaluwa neyi tuhanjeka nindi. Ilaña, chineli tudi antu jaYehova, twatondolwelaña chikupu akwakusekesha.
Kutaña Bayibolu
(2 Timotewu 1:1-18) Ami Pawulu, kapostolu kaKristu Yesu atondeliwu nankeñelu yaNzambi kwesekeja namwaya chikaninu chawumi kuhitila mudi Kristu Yesu, 2 kudi Timotewu, mwana wakeñewa: Luwi lwasweja niwushona nikuwunda jafumaña kudi Nzambi Tata nikudi Kristu Yesu Mwanta wetu jiikali naneyi. 3 Namusakilili Nzambi innakuzatila mudimu wajila nachinleji chamuchima chitooka neyi chamuzatililiwu ankakulula jami, chakubula kuleka kukwanuka eyi mukulomba kwami kwakulembelela wufuku nimwaana. 4 Chinaanukaña madilu eyi, nafwilaña kukumona kulonda nisweji kuzañalala. 5 Muloña naanukaña chikuhwelelu cheyi chakadi wunfwikiji chasambilili kwikala mudi nkaaka yeyi Lowisi nimudi mama yeyi Yunisi, nawa nakuhweleli nami nineyi dichikuhwelelu chiwukweti. 6 Muloña wachumichi, inakukwanukishaku nami chawaana chaNzambi chidi mudi eyi chiwatambwilili hampinji yinakunañikili makasami, wuchisañumuni neyi kesi. 7 Muloña Nzambi hatwinkeli spiritu yawomaku, ilaña watwinkeli yañovu niyakukeña niyakutoñojoka mwamaana. 8 Dichi, eyi bayi wutiya nsonyi kushimwina nsañu yaMwanta wetu hela hadi ami akasawu mukaleya kukoola yenaku, ilaña eyi kuminaku dakukabakana kukoola nsañu yayiwahi kuhitila mukushindamena hañovu jaNzambi. 9 Watwamwinini nikututambika namutambi wajila, bayi neyi muloña wanyidimu yetuku, ilaña muloña wankeñelu yindi niluwi lwindi lwasweja. Watutiyilili ilu luwi lwasweja kushankulu mudi Kristu Yesu, 10 ilaña ichi ilu luwi lwasweja analumwekeshi hatooka kuhitila mukusoloka kwaChamwinu chetu Kristu Yesu, wafumishilihu kufwa nikutusolwela hatooka chakwikala nawumi wabulaña kutoka kuhitila munsañu yayiwahi, 11 yantondeleliwu ami kwikala mukwakushimwina, kapostolu nawa ntañishi. 12 Ichi dichuma chikwawu chinakuletesha nikabakaneña nayumiyi, ilaña hinnakutiya nsonyiku. Muloña ami neluka Owu wunetiya nawa nakuhweleli nami yena nakuhemba chuma chinnamwinki kushika nikwifuku odu. 13 Londelaña mwaya mazu amawahi iwatiyili kudi ami nachikuhwelelu nikukeña jenzaña muloña wakudikunda naKristu Yesu. 14 Spiritu yajila yashakama mudi etu yikukwashi kuhemba ichi chuma chachiwahi. 15 Eyi weluka chumichi neyi, antu ejima akukabeta kaAsiya anafumi kudi ami, kubombelaku niaFwigelu naHemoni. 16 Mwanta yatiyili luwi amwitala daOnesifwolu, muloña kakavulu diyi wankolesheleña nawa hatiyili nsonyi muloña wakukasewa kwami mumaleñiku. 17 Ilaña hampinji yadiñayi muRoma, wankeñakeñeli chikupu nawa wanwanini. 18 Mwanta Yehova yakamutiyili luwi lwindi mwifuku odu. Nawa eyi weluka chiwahi nyidimu yejima yazatiliyi muEfwesesa.
AUGUST 12-18
YUMA YALEMA YAMWIZU DANZAMBI | TITUSA 1–FWILEMONI
“Kutonda Akulumpi”
(Titusa 1:5-9) Nakushiyili muKereta kulonda wololi yuma yaheñeli nikutonda akulumpi mumusumba-nimusumba neyi chinakulejeli nami: 6 mukulumpi hatela kwikala nahakumwinkela muloñaku, watela kwikala iyala wasumbula mumbanda wumu hohu, wukweti anyana etiya akadi kutiyakana mpuhu yakwikala nachihandilu chakadi kudiyuula nawa abulaña kudikaña. 7 Muloña chineli hiñamba yaNzambi, kalama watela kwikala wakadi hakumwinkela muloña, bayi welaña yuma kwesekeja nachinakeñi muchima windiku, bayi wahilaña swayiku, bayi mukwakushetaku, bayi mukwamadombuku, bayi wukweti lwisu lwakukeña kuheta munjila yawupwapokiku, 8 ilaña watela kwikala nachisambu, wakeña yuma yayiwahi, watoñojokaña mwamaana, waloña, washinshika, wadiyuulaña, 9 wakwatisha kumazu alala hampinji yinakuzatishayi wuswa windi wakutañisha, kulonda yatweshi kukolesha antu chikupu nantañishilu yayiwahi nikuzuwila antu adimbululaña iyi ntañishilu.
Malwihu Kufuma Kudi Antañi
Hela chakwila Nyikanda yajila hiyashimuna nsañu yejima kutalisha hachatondeleñawu antu kunyakaku, tukweti wunsahu wantesha wunakumwekesha chatondeleñawu. Bayibolu yatuleja nawu chafuntileñawu aPawulu naBaranaba kumukala wawu halwendu lwatachi lwawumishonali, ‘Chanayitondeluwu akulumpi mwahita yipompelu yejima nakulomba nakuleka kudya, hiyakuyikunjika kudi Mwanta akuhweleleluwu.’ (Yil. 14:23) Chimwahitili yaaka, Pawulu wamusonekeleli mukwawu Titusa muyendeleleñawu nindi: ‘Diyi nsañu nakushiyilili muKereta, kulonda wuloñeshi yuma yasheli, wukunjiki akulumpi kumudimu wakutala akwawu munyikala yejima, neyi chinakulejeli.’ (Tit. 1:5) Chamwekana neyi Timotewu wendeli chikupu nakapostolu Pawulu niyena amwinkeli mudimu wowumu. (1 Tim. 5:22) Chakadi nikujina, ankoñi endaña diwu adiña namudimu wakutonda bayi neyi apostolu niakulumpi amuYerusalemaku.
Chineli tuneluki dehi iyi nsañu yamuBayibolu, Izanvu Dalombolaña dawaYinsahu jaYehova dinahimpi njila yakutondelamu aeluda niankoñi akuzatila. Kufuma haSeptember 1, 2014, amanakwetu anakuyitonda muniyi njila: Ankoñi añinza ejima akuhitulukaña nakanañachima munsañu yakuhameka amanakwetu amuñinza yawu. Hampinji yikwendelañawu yipompelu, akufwilaña kwiluka anakwetu anahamekuwu nikuzata nawu mumudimu wakushimwina neyi chinatwesheki. Hanyima yakuhanjeka nezanvu dawaeluda hadi amana kwetu anahamekuwu, ankoñi añinza akwikalaña namudimu wakutonda aeluda niankoñi akuzatila amuyipompelu yamuñinza yawu. Muniyi njila, iyi ntanjikilu yesekanaku nantanjikilu yazatishileñawu muyaaka nkulakaji yakusambila.
Anyi azataña nyidimu yashiyashana hakutonda? Neyi dikalu, ‘nduñu wamaana nikashinshi’ diyi wukweti mudimu weneni wakudyisha akwetala. (Mat. 24:45-47) Chumichi chabombelamu kusandujola Nyikanda Yajila nawukwashu waspiritu yajila hakwila ahani nshimbi yayiwahi yashindamena haBayibolu yakwashaña yipompelu yamukaayi kejima. Nduñu washinshika watondaña cheñi ankoñi añinza ejima nimamembala aKomiti yaMutayi. Kasanji kamutayi nikena kakwashaña hakwila iyi nshimbi ayizatishi. Mazanvu awaeluda niwena akweti mudimu wakuhituluka chikupu muyuma yamuNsona yakeñekaña hakwila amana kwetu ashikuhu hakuyihameka kulonda ayitondi muchipompelu chaNzambi. Ankoñi añinza niwena akweti mudimu weneni chikupu wakushinshika nakanañachima nikulomba wukwashu waNzambi kutalisha hansañu yawana kwetu anahamekuwu kudi aeluda, kuhiñahu hakutonda anashikuhu.
Kukeña Yuma Yalema yakuSpiritu
(Titusa 1:12) Muntu wumu mukachi kawu, yowu kaprofwetu wawu, wahosheli nindi: “AkwaKereta hiyakwakutwamba mpinji yejima, hiyanyama azuwa amwisaña nawa hiyankopi afwa hakuda.”
w89 5/15 31 ¶5
Malwihu Kufuma Kudi Antañi
Bayi neyi wadiña nakwiteja nsañu yidi yejima yahosheleñawu hachaambu chekowa hela kasawuntu kayihosheleñawu akwaKeretaku. Twatela kwiluka netu, Pawulu welukili chikupu nindi muKereta mwadiña akwaKristu atiyileñayi Nzambi kuwaha nawa awayishiliyi naspiritu Yindi yajila. (Yilwilu 2:5, 11, 33) Kwadiña akwaKristu amavulu adihana adi kutuña yipompelu “mumusumba nimusumba.” Hela chochu, ana akwaKristu hiyadiña antu awaninaku, twatela kwiluka netu hiyadiña akwakutwamba hela afwa hakudaku, muloña neyi dichadiñawu Yehova hadi kutwalekahu kuyitiya kuwahaku. (Afwilipi 3:18, 19; Chimwekeshu 21:8) Neyi chochidi nimakonu, muKereta nimwena mwadiña antu adiña nanyichima yashinshika, aneñeleña nayilwilu yatama yayinyeñumukili nawa adiña nakwiteja nsañu yayiwahi.—Ezekeli 9:4; esekejenu Yilwilu 13:48.
(Fwilemoni 15, 16) Hekwawu ichi dichuma chaletesheli yafumi kudi eyi hakapinji kantesha kulonda wakamwiteji cheñi kushakama nindi haya nyaaka, 16 hakekala cheñi nduñuku, ilaña wakabadika hadi nduñu, himanakwetu wakeñewa, inakeña nankashi, sweje-e dinu eyi wamukeña chikupu muloña mwadikunda kumujimba nimudi Mwanta.
Yikuma Yamaneni Kufuma muNyikanda yaTitusa, Fwilemoni, niAheberu
15, 16—Muloñadi Pawulu chabuliliyi kumuleja Fwilemoni kumulubula Onesimusa? Pawulu wakeñeleña kukolela kumudimu windi ‘wakushimunaña wanta waNzambi, nakutena nsañu yaMwanta Yesu Kristu.’ Dichi, wafukwiluhu kubula kudiñija munsañu jawantu, yidi neyi yawuduñu.—Yilwilu 28:31.
Kutaña Bayibolu
(Titusa 3:1-15) Twalekakuhu nakuyanukisha ovwahileña jinfulumendi niakwawuswa, nawa ekaleña adiloñeshela chadimu kuzata nyidimu yayiwahi yejima, 2 abuleña kuhosha muntu hela wumu kasawuntu, bayi abobolaña nawakwawuku, ilaña ekaleña ovwaha nakumwekesha kudizoza kwejima kudi antu ejima. 3 Muloña ninetu mpinji yimu twadiña akadi maana, akwakudikaña, atusenwishileña, anduñu akufwila kweñi-nakweñi niayuma yakuzañalesha, twakoñeleña yuma yatama nikwikala nalwisu, twadiña akwakukoña yuma yawuzondu niakwakudihela wumu namukwawu. 4 Hela chochu, luwi lwaNzambi, Chamwinu chetu nikukeña kwakeñayi antu chijasolokeli 5 (bayi nanyidimu yayiwahi yitwakoñeliku, ilaña naluwi lwindi), watwamwinini kuhitila mukutuwelesha kwatuleteli kuwumi nikutwilisha kwikala amaha naspiritu yajila. 6 Watuhuñunwinini chikupu iyi spiritu kuhitila mudi Yesu Kristu Chamwinu chetu, 7 kulonda neyi anatuteni dehi nawu twaloña kuhitila muluwi lwasweja lwayenowu, twiikali answana kwesekeja namwaya kuchiñeja kwawumi wahaya nyaaka. 8 Awa mazu atelela kuyikuhwelela nawa inakukeña eyi wutwalekihu nakukonkomwena haniyi nsañu, kulonda antu anamwitiyi Nzambi ashi nyichima hakutwalekahu kukalakala nyidimu yayiwahi. Yumiyi yayiwahi nawa yaheteshaña antu. 9 Ilaña tondolwelaña kutaadeka kwawusupi, kuchinda yisaka yawankakulula, yikonkojola nikuzuñila Nshimbi, muloña yumiyi yamukunkulwayi nawa kwosi chuma chafumañamuku. 10 Kutalisha hadi muntu wataandishaña ntañishilu yakutwamba, neyi wunamufumbi kapampa kamuchiyedi, ilaña yena kutiya nehi, lekaku kudikunda nindi, 11 nanochu chiwuneluki neyi muntu wamuchidiwu nasenuki dehi munjila, nakuvulumuna nawa nadifwishi dehi yomweni namuloña. 12 Chinakatemesha Atemasi hela Tikikusa kudi eyi, wakazati nañovu jeyi jejima kulonda wakenzi kudi ami kuNikopoli, muloña kweniku diku kwinnafuukuli kushakama mutukweji twamashika. 13 Zataku hanakumini ñovu jeyi jejima wukwashi Zenasi weluka Nshimbi chikupu niApolosi kulonda akabuli kukaankila chuma chidi chejima halwendu lwawu. 14 Antu jetu niwena adizi kutwalekahu kukalakala nyidimu yayiwahi kulonda atweshi kukwashana neyi kunamwekani kukaankila kunakukeñeka kuzatilahu swayi-swayi, kuchiina akenda kekala antu abulaña kusoña nyikabu. 15 Antu ejima adi hamu nanami anakwimushi. Ñimushiliku akwetu atukeña nawa adi muchikuhwelelu. Luwi lwasweja lwiikali nanenu ejima.
AUGUST 19-25
YUMA YALEMA YAMWIZU DANZAMBI | AHEBERU 1-3
“Keñenu Kuloña Nawa Helenu Kuluwalala”
(Aheberu 1:8) Ilaña hadi Mwanindi wahosha nindi: “Nzambi diyi itanda deyi haya nyaaka nanyaaka, nawa nkuunyi yaWanta weyi, hinkuunyi yawuñanji.
Muhamekenu Kristu, Mwanta Walema!
Yehova wamuswanyikili Mwanindi hamu neyi Mwanta wawuMesiya mwiwulu mu 1914. ‘Lukanu lwakuloña dilu lukanu lwawanta windi,’ dichi chiyuulu chindi chekala chaloña mpinji yejima. Wukweti wuswa wakuyuula chineli ‘Nzambi diyi itanda dindi.’ Dikwila nawu, Yehova diyi chikuku chawanta windi. Kubombelahu, itanda daYesu “dahaya nyaka nanyaka.” Komana himwatiyaña kuwahaku, hakumukalakela Yehova chineli mukweti Mwanta wamuchidiwu wañovu waswanyikawu kudi Nzambi?
(Aheberu 1:9) Wakeñeli kuloña nawa waheleli kuluwalala. Ichi dichaletesheli Nzambi, Nzambi yeyi chakuwayishililiyi namanji akuzañalesha kubadika akwenu.”
Muhamekenu Kristu, Mwanta Walema!
Tañenu Masamu 45:6, 7. Hamuloña wakwila Yesu wakeñeli kuloña chikupu nawa waheleli yuma yatama yadi kumusawula Tata yindi, Yehova wamuwayishili yekali Mwanta waWanta wawuMesiya. Yesu amuwayishili “manji akuzañalala” chakubadika ‘akwawu,’ dikwila nawu anyanta amuYuda amuchisaka chaDavidi. Munjilanyi? Muloña Yesu amuwayishili kudi Yehova yomweni. Kubombelahu, Yehova wamuwayishili kulonda yekali Mwanta nawa Kapristu Muneni. (Mas. 2:2; Heb. 5:5, 6) Cheñi nawa, Yesu hiyamuwayishili namanjuku, amuwayishili naspiritu yajila, nawa wanta windi hiwekala wahamasekuku, ilaña wekala wamwiwulu.
Kukeña Yuma Yalema yakuSpiritu
(Aheberu 1:3) Yena diyi wamwekeshaña kulema kwaNzambi nawa diyi wamufwana chikupu mwekalilayi, diyi wahembaña yuma yejima nezu dañovu jindi. Nawa chamanishiliyi kututookesha kunshidi jetu, washakamini kuchikasa chachidiilu chanowu waWukeleñi mwiwulu.
it-1 1185 ¶1
Mwevulu
Komana Yesu wadimwekesheleña neyi chekalayi Tata yindi munjila yoyimu?
Mwana kaNzambi wawedi, wenjili nakwikala Yesu, diyi chinfwana chaTata yindi. (2Ko 4:4) Iwu Mwana diyi alejeliwu kudi Nzambi nindi, “Twilenu muntu wudi neyi chitwekaletu,” iku kudifwana kwaMwana naTata yindi Nleñi, kwenjili hampinji yamuleñeliwu Mwana. (Kut 1:26; Ywn 1:1-3; Kol 1:15, 16) Hadiñayi hamaseki neyi muntu wawanina wamwekesheli yilwilu yaTata yindi nichekalayi, kwesekeja nahakumina antu, chakwila wahosheli nindi: “Muntu wejima wunamoni ami, dikwila nawu namoni niTata.” (Ywn 14:9; 5:17, 19, 30, 36; 8:28, 38, 42) Iku kudifwana, kwaswejeleliku hampinji yamusañwiliwu Yesu namujimba wakuspiritu nawa nichamwinkeliwu ‘wuswa wejima . . . wamwiwulu niwahamaseki’ kudi Tata yindi, Yehova Nzambi. (1Pe 3:18; Mat 28:18) Chineli Nzambi wamutumbakesheli Yesu nakumwinka “chifulu chahewulu,” Mwana kaNzambi wamwekesheli kulema kwaTata kubadika nihampinji yafuminiyi mwiwulu nakwinza hamaseki. (Fwi 2:9; Heb 2:9) Chayinu mpinji “diyi wamufwana chikupu [Nzambi] mwekalilayi.”—Heb 1:2-4.
(Aheberu 1:10-12) Nawa nindi: “Eyi Mwanta, kukutachika waalili chikuku cheseki, nawa iwulu himudimu wamakasa eyi. 11 Iseki niiwulu jakanoña, ilaña eyi wakatwalekahu; iseki niiwulu jakakisika neyi chakisikaña chakuvwala, 12 nawa eyi wakajivuña neyi kahuma, neyi chakuvwala, nawa jakahimpika. Ilaña eyi wahimpikaña wanyi, niyaaka yeyi hiyamba kakumaku.”
it-1 1063 ¶7
Iwulu
Mazu ekala haMasamu 102:25, 26 akundama kudi Yehova Nzambi, ilaña kapostolu Pawulu wazatishili awa mazu hadi Yesu Kristu. Muloña wakwila Mwana kaNzambi wumu hohu amuzatishili neyi Ntwamina waNzambi mukuleña yuma yejima. Pawulu nambuli chashakamayi Mwana nayileñaleña, yakwila Nzambi, neyi nakeñi nateli kunona ‘kahuma kanavuñiwu’ nakukisha hambadi.—Heb 1:1, 2, 8, 10-12; esekejenu 1Pe 2:3.
Kutaña Bayibolu
(Aheberu 1:1-14) Kushankulu, Nzambi wahosheleña nawankakulula jetu kuhitila mudi atuprofwetu hampinji yamboka-mboka nimunjila jashiyashana. 2 Ilaña munanu mafuku wahoshaña nanetu kuhitila mudi Mwanindi, atondeliyi kwikala nswana wayuma yejima nawa mudi yena, dimu mwaleñeleliyi yuma yamwiwulu niyahamaseki. 3 Yena diyi wamwekeshaña kulema kwaNzambi nawa diyi wamufwana chikupu mwekalilayi, diyi wahembaña yuma yejima nezu dañovu jindi. Nawa chamanishiliyi kututookesha kunshidi jetu, washakamini kuchikasa chachidiilu chanowu waWukeleñi mwiwulu. 4 Dichi yena nekali walema kubadika añelu nanochu chinaswaniyi ijina dadiwahi chikupu dabadika ijina dawu. 5 Chakutalilahu, kañelwinyi alejeliwu kudi Nzambi nawu: “Eyi wudi mwanami; dalelu ami nekali tata yeyi”? Nawa cheñi nawu: “Nakekala tata yindi nawa yena wakekala mwanami”? 6 Ilaña yena chakatemeshayi cheñi Mwanindi Wawedi hamaseki, wakahosha nindi: “Añelu jaNzambi ejima adifukuli kudi yena.” 7 Wahosha cheñi hadi añelu nindi: “Welishaña añelu jindi kwikala aspiritu añovu, nawa akwakumukalakela wayilishaña kwikala muzuzu wakesi.” 8 Ilaña hadi Mwanindi wahosha nindi: “Nzambi diyi itanda deyi haya nyaaka nanyaaka, nawa nkuunyi yaWanta weyi, hinkuunyi yawuñanji. 9 Wakeñeli kuloña nawa waheleli kuluwalala. Ichi dichaletesheli Nzambi, Nzambi yeyi chakuwayishililiyi namanji akuzañalesha kubadika akwenu.” 10 Nawa nindi: “Eyi Mwanta, kukutachika waalili chikuku cheseki, nawa iwulu himudimu wamakasa eyi. 11 Iseki niiwulu jakanoña, ilaña eyi wakatwalekahu; iseki niiwulu jakakisika neyi chakisikaña chakuvwala, 12 nawa eyi wakajivuña neyi kahuma, neyi chakuvwala, nawa jakahimpika. Ilaña eyi wahimpikaña wanyi, niyaaka yeyi hiyamba kakumaku.” 13 Indi kañelwinyi alejawu dehi kudi Nzambi nindi: “Shakamaku kuchikasa chami chachidiilu sampu nabalumuni ayilumbu jeyi kwikala chitwamu hakudata nyendu yeyi”? 14 Komana añelu ejima hiyekala aspiritu añovu akalakalaña mudimu wajilaku? Komana hidiwu alejawu kukwasha antu akamwinawuku?
AUGUST 26–SEPTEMBER 1
YUMA YALEMA YAMWIZU DANZAMBI | AHEBERU 4-6
“Zatenu naÑovu Jenu Jejima Mwiñili muKunooka kwaNzambi”
(Aheberu 4:1) Hela chochu, chineli chikaninu chakwiñila mukunooka kwindi chichidi kutwalekahu, twikalenu ababala kuchiina wumu hakachi kenu wakenda kakañanya kuwanisha yuma yakeñekaña hakwiñila muniku kunooka.
(Aheberu 4:4) Muloña hansona yimu, nashimunihu ifuku damu 7 nindi: “Nzambi wanookeli kunyidimu yindi yejima hefuku damu 7,”
Indi Kunooka Kwanzambi Kwatalisha Mudihi?
Kudi yikuma yiyedi yatuleñelaña kwiluka netu ifuku damuchitanu nachiyedi datwalekeluhu nimuyaaka nkulakaji yakusambila C.E. Chatachi, shinshikenu hamazu ahosheliyi kudi akwakudimbulula amuhosholeli hamuloña wakuuka hefuku daSabata, kuuka akumweneña nawu himudimu. Mwanta wayilejeli nindi: “Tata yami wuchidi kukalakala nihanu, ninami nawa nidi nakukalakala.” (Yow. 5:16, 17) Watalishili mudihi? Watalishili mukwila nindi: ‘Ami niTata yami twazataña mudimu wowumu. Tata yami wazataña haSabata yindi hadi yaaka yayivulu, nawa wuchidi kuzata, ninami natela kuzata haSabata.’ Mazu ahosheliyi Yesu anakumwekesha nawu ifuku damuchitanu nachiyedi dachidiña kutwalekahu, dikwila nawu ifuku daNzambi dakunooka mumpinji yaYesu.
Pawulu washimwini cheñi chikuma chikwawu. Hakushimuna mazu ekala haKutachika 2:2 ahoshaña hakunooka kwaNzambi, Pawulu amoneneni hakusoneka mazu akwila nawu: “Etu tunakuhweleli tweñilaña mukunookoku.” (Heb. 4:3, 4, 6, 9) Ichi chinakumwekesha nawu nimumafuku aPawulu ifuku damuchitanu nachiyedi dachidiña nakutwalekahu. Indi ifuku damuchitanu nachiyedi dakamana mpinjinyi?
Hakwakula ilu lwihu, twatela kwiluka chatondeleliyi Nzambi idi ifuku damuchitanu nachiyedi. Nsona yaKutachika 2:3 yadilumbulula nawu: “Nzambi wakiswilili ifuku damuchitanu nachiyedi nkisu, yodijilika nikudijilika.” Yehova wajilikili idi ifuku muloña waditondeli nindi hiifuku damanishiliyi kufuukula kwindi kwakuleña iseki. Nzambi wakeñeli nindi antu ovwahila ashakami heseki nakudihemba chiwahi niyuma yejima yekala heseki. (Kutach. 1:28) Hamuloña wakukeña kushikija iku kufuukula dichaleñela Yehova Nzambi niYesu Kristu, “Mwanta wasabata,” ‘kutwalekahu kukalakala nihanu.’ (Mat. 12:8) Ifuku daNzambi dakunooka dikatwalekahu kushika nihakumana kwayaaka ikombakaji daKuyuula kwaKristu.
(Aheberu 4:6) Dichi, chineli antu amu kanda eñili muniku kunooka, nawa antu asambilili kushimwinawu nsañu yayiwahi akañenyi kwiñila mukunooka muloña wakudikaña,
Indi Kunooka KwaNzambi Kwatalisha Mudihi?
Nzambi washimwini chikupu kufuukula kwindi kudi Adama naEvu, ilaña akañenyi kulondela mwayilejeliyi. Kufuma hadikañiluwu Adama naEvu, yihita yawantu niwena adikañaña. Antu jaNzambi niwena, chidi neyi aIsarela adikañili naNzambi mapampa kakavulu. Pawulu wasoñamishili akwaKristu akusambila nindi antu amakwawu akakañanya kwovwahila neyi chakañenyiwu aIsarela. Wasonekeli nindi: “Dichi tushenu muchima hakwiñila mukunookoku, hakenda kamwekana muntu wukudimbuka nakulondeja mwajikwiluwu wena.” (Heb. 4:11) Mazu ahosheliyi Pawulu amwekeshaña nawu antu abulaña kwovwahila hiyanateli kwiñila mukunooka kwaNzambuku. Chumichi chinatalishi mudihi? Komana chinatalishi mukwila nawu neyi tubula kulondela mwaya kufuukula kwaNzambi hitukwiñila mukunooka kwaNzambuku? Eñañi, kwiluka ñakwilu yanilu lwihu kwalema nankashi kudetu, nawa tukuhanjekahu chikupu. Tusambilenu kushinshika hachakutalilahu chatama chemikiluwu aIsarela nichuma chaleñeleli abuli kwiñila mukunooka kwaNzambi.
(Aheberu 4:9-11) Dichi sabata yakunooka kwawantu jaNzambi yichidi kwoku. 10 Muloña muntu wuneñili mukunooka kwaNzambi, nanooki nawa nikunyidimu yindi neyi chanookeliyi Nzambi kunyidimu yindi. 11 Dichi, tuzatenu nañovu jetu jejima twiñili mukunooka kweniku, kulonda kubuli kwikala muntu hela wumu wukwikala nayilwilu yakudikaña neyi chadikañiliwu wena.
Indi Kunooka KwaNzambi Kwatalisha Mudihi?
Kwosi watela kukolela hakukuhwelela nindi akwaKristu atela kulondelaña Nshimbi yamwinkeluwu Mosi hakwila tukapuluki. Mazu onenawu asonekeleliyi Pawulu Aefwesesa atiyakana chikupu akwila nawu: “Muloña anayihandishi naluwi kwokukukuhwelela; hiyenu awenuku, hichamukunkulu chambala chaNzambi; hichakunyidimuku, kulonda kubuli muntu wukudisamba.” (Efwes. 2:8, 9) Hanu makonu, akwaKristu anateli kwiñila ñahi mukunooka kwaNzambi? Anukenu nenu Yehova watondeli ifuku damanishiliyi kuleña iseki niantu ovwahila nindi dikali ifuku dakunooka. Tunateli kwiñila mukunooka kwaYehova neyi tumwovwahila yena nikuloñesha kwindi.
Ilaña, neyi tubulaña kwovwahila nduñu wamaana nikashinshi hela twovwahilaña hohu yuma yitunamoni netu yalema, dikwila nawu tunakudiwula kufuukula kwaYehova. Ichi chinateli kutamisha wubwambu wetu naYehova. Muchibaaba chikulondelahu tukuhanjeka hayuma yatuleñelaña kumwekesha netu twovwahila. Yuma yitwafuukulaña yamwekeshaña neyi chakwila tuneñili mukunooka kwaNzambi.
Kukeña Yuma Yalema yakuSpiritu
(Aheberu 4:12) Muloña mazu aNzambi amomi nawa akweti ñovu chikupu, atwa kubadika mpoku yakabali yikweti wumwemu kuyedi nawa apwikaña nakwaambula wumi naspiritu, manuñi nawoñu wamumafwaha, nawa anateli kwiluka yitoñojoka niyuma yafwilaña muchima.
Malwihu Kufuma Kudi Antañi
“Mazu aNzambi” ashimunawu haAheberu 4:12 nawu “amomi, akweti ñovu” atalisha mudi?
Mazu amakwawu adi mukapetulu kenaka amwekeshaña nawu Pawulu watalishili kunsañu hela kunkeñelu yaNzambi yekala muBayibolu.
Mukanda waa Heberu 4:12 awuzatishaña munyikanda yetu kumwekesha nawu Bayibolu yikweti ñovu yakuhimpa yihandilu yawantu, nawa chikuwaha neyi tukuyizatishaña. Hela chochu, chikutukwasha nankashi neyi tukumonaña nsañu yekala haaHeberu 4:12 munjila jashiyashana. Pawulu walejeleña aHeberu akwaKristu kuzatila hamu nankeñelu yaNzambi. Nkeñelu yaNzambi ayisonekeli munsona jajila. Pawulu wazatishili chakutalilahu chawaIsarela akuuliliwu kufuma muEjipitu. Adiña nakutalila kwiñila mwituña dachikaninu ‘daswejeli nimayeli niwuchi,’ mwateleleli kunokawu chiwahi.—Kwid. 3:8; Kuhit. 12:9, 10.
Iyi yadiña nkeñelu yaNzambi. Ilaña, chimwahitili mafuku, aIsarela akolesheli nyichima yawu nawa hiyadiña nachikuhweleluku, dichi amavulu akañenyi kwiñila muniku kunooka. (Kuch. 14:30; Yosh. 14:6-10) Hela chochu, Pawulu wabombelelihu nindi kwachidiña cheñi “chikaninu chakwiñila mukunooka [kwaNzambi].” (Heb. 3:16-19; 4:1) Chakadi nikujina, ichi “chikaninu” chekala munkeñelu yaNzambi. Neyi cheliliwu aHeberu akwaKristu tunateli kutaña haniyi nkeñelu nikuzatila nayu hamu. Hakwila nawu twiluki netu ichi chikaninu chashindamena haNyikanda Yajila, Pawulu wazatishili mazu ekala haKutachika 2:2 ni haMasamu 95:11.
Mwamweni, twatela kukuhwelela chikupu netu ‘chikaninu chakwiñila mukunooka kwaNzambi chichidi kutwalekahu.’ Twatela kukuhwelela netu chikaninu chamuBayibolu chakwiñila mukunooka kwaNzambi chikashikijewa, nawa tunatachiki dehi kwiñilamu. Hituneli mwenimu kuhitila mukuhemba Nshimbi jaMosi hela kututiya kuwaha kudi Yehova kuhitila munyidimu yikwawuku. Ilaña, tunatwalekihu namuzañalu kuzatila hamu nankeñelu yaNzambi yamwekeshayi dehi nawa tunakuhweleli chikupu. Kubombelahu, neyi chitunashimuni dehi, makombakaji awantu kunyeñumuka kaayi kejima, anatachiki kudiza Bayibolu nikwiluka nkeñelu yaNzambi. Hakachi kawu, amavulu anatachiki kuhimpa yihandilu yawu, anekali nachikuhwelelu nikwikala akwaKristu apapatishewa. Njila yiyanakuhimpilamu chihandilu chawu yinakumwekesha nawu “mazu aNzambi amomi, akweti ñovu.” Neyi chochiyayishimunawu muBayibolu, nkeñelu yaNzambi yahimpa dehi chihandilu chetu nawa yikutwalekahu kwikala nañovu hadi etu mukuhanda kwetu kwejima.
(Aheberu 6:17, 18) Munjila yoyimu, Nzambi chafuukwiliyi kusolola hatooka nkeñelu yindi yabulaña kuhimpika kudi answana akaswana yuma yakanayi, wasanyikili hakwila yamwekeshi nindi nahoshi mwalala, 18 kulonda kuhitila muyuma yiyedi yabulaña kuhimpika oyu yamwekeshaña nawu Nzambi hanateli kutwambaku, etu tunatemukili dehi mwakuswama, tukoleshewi chikupu kulonda tukakeli kukuchiñeja kudi kumbidi.
it-1 1139 ¶2
Kuchiñeja
Iku kuchiñeja nikubula kutoka kwawantu adi “mumutambi wakuya mwiwulu” (Heb 3:1) kwashindamenewa nawa atela kukuhwelela chikupu. Chumichi achikwatankesha nayuma yiyedi yamwekeshaña nawu Yehova kwila yatwamba nehi, muniyi yuma yiyedi mudi chikaninu chindi, kusanyika kwindi nikuchiñeja kudi naKristu wudi mwiwulu wabulaña kufwa. Hela chochu, iku kuchiñeja akwishimuna nawu “[hichikuñu] chakwimika nachu wumi wetu, kwalala nawa kwakola mbe-e kweñilaña mukachi kehina, [chumichi chidi neyi cheñilileñayi kapristu muneni Mwamweni Mwajila Hefuku Dakubuta Nyiloña], mwatwiñililayi dehi Yesu, mukwakututwaminina, owu wunekali kapristu muneni wahaya nyaaka nanyaaka wudi neyi Melekizedeki.”—Heb 6:17-20.
Kutaña Bayibolu
(Aheberu 5:1-14) Muntu wejima atondañawu kulonda yakalakali neyi kapristu muneni, wakalakelaña antu muyuma yakundama kukudifukula kwawu kudi Nzambi, kulonda yalambuleña yawaana ninyilambu yakujima nachu nshidi jawu. 2 Watiyilaña wushona antu ayambashanaña nialuwañeshaña, chineli niyena wakabakanaña nakuzeyazeya kwindi, 3 nawa muloña wachumichi, watela kulambula nyilambu yakujima nachu nshidi jindi neyi chelañayi nanshidi jawantu acheñi. 4 Muntu hanateli kudilisha yomweni kwikala kapristu muneniku, ilaña Nzambi diyi hohu wunateli kumutonda neyi chamutondeliyi Aroni. 5 Kristu niyena hadilemesheli yomweni kuhitila mukwikala kapristu muneniku, ilaña amulemesheli kudi Owu wamulejeli nindi: “Eyi wudi mwanami; dalelu ami nekali tata yeyi.” 6 Nawa wahosha cheñi hansona yikwawu nindi, “Eyi wudi kapristu wudi neyi Melekizedeki nawa wakekala kapristu haya nyaaka nanyaaka.” 7 Hampinji yadiñayi hamaseki, Kristu walombeleña kulomba kwakulembelela nikwakulomba yuma yakeñeleñayi iku nakudila chikupu nimadilu kudi Owu watwesheli kumwamwina kukufwa, nawa amutiyili muloña wakumutiya woma Nzambi. 8 Hela chakwila wadiña mwana, wadizili kwovwahila kuyuma yakabakeniyi. 9 Chelili anamwilishi dehi kwikala wawanina, wekalili mukwakuhana wamwinu wahaya nyaaka kudi antu ejima amwovwahilaña, 10 muloña amutonda kudi Nzambi kwikala kapristu muneni wudi neyi Melekizedeki. 11 Tukweti yuma yayivulu yitwatela kuhosha hadi yena, ilaña chakala kuyilumbulula, muloña enu munekali antu abulaña kutiyisha. 12 Muloña enu hela chakwila hayinu mpinji mwadi kwikala antañishi, ilaña munakukeñeka cheñi muntu wakuyitañisha kulonda mwiluki yuma yakutachikilahu yansañu yajila yaNzambi, nawa munafunti cheñi kunyima nakukeña mayeli bayi yakuda yakolaku. 13 Muloña muntu wejima watwalekañahu kunwa mayeli heluka mwaya mazu akuloñaku, muloña wuchidi mwana wanyanya. 14 Ilaña yakuda yakola yawantu apama dehi, afumba ñovu jawu jakutoñojoka chiwahi jakwaambula yuma yayiwahi nayatama.