Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
DECEMBER 2-8
YUMA YALEMA YAMWIZU DANZAMBI | CHIMWEKESHU 7-9
“Izaza Deneni Dakadi Kutwesha Kuchinda Anadikiswili Kudi Yehova”
(Chimwekeshu 7:9) Hanyima yayumiyi, chinelili nami nitali, namweni izaza deneni dakwila kwosi muntu niwumu wadi kutwesha kudichinda, dawantu afumini kunyuza yejima, kunyichidi yejima, kudi antu ejima nikumadimi ejima, anemani kumbidi yetanda nikumesu aMwana kaMukoku iku anavwali nyinkukumba yitooka; nawa anakwati nyitayi yanyikoma kumakasa awu.
it-1 997 ¶1
Izaza Deneni
Chumichi chikuletesha kudihula netu: Neyi “izaza deneni” hiyantu akapuluka nawa akashakama hanu hamaseki, hanu dinu ayitenenadi nawu ‘anemani’ kumbidi yetanda daNzambi nikumesu aMwana kaMukoku’? (Chi 7:9) Izu dakwila nawu ‘kwimana,’ mpinji yikwawu muBayibolu adizatisha hakumwekesha nawu muntu hela izanvu dawantu anemani adi nejina dadiwahi hela wuselewa kudowu muntu kunemaniwu. (Ms 1:5; 5:5; Yis 22:29, AT; Luk 1:19) Kafwampi, mukapetulu 6 kaChimwekeshu, “anyanta ahamaseki, ayilolu, akulumpi jamashidika, akwamaheta, akwañovu, anduñu ejima niantu ejima asubuka” ayilumbulula nawu anakuswama “kumesu aNowu washakama hetanda nikukuzuwa kwaMwana kaMukoku, muloña ifuku deneni dakuzuwa kwawu dinashiki dehi, nawa hinyi wukutwesha kupuluka kunidi ifuku?” (Chi 6:15-17; esekejenu Luk 21:36.) Chinamwekani neyi “izaza deneni” adituña kudi antu abulili kufwa hakuzuwa kwaNzambi nawa ‘apulukili’ muloña adiña nejina dadiwahi naNzambi niMwana kaMukoku.
(Chimwekeshu 7:14) Dichi hohenohu namwakwili nami: “Mwanta wami, yeyi wuneluki.” Kuhiñahu yena wanlejeli nindi: “Awa diwu anafumi mulukadi lwasweja, nawa anakosi nyinkukumba yawu nakuyitookesha mumashi aMwana kaMukoku.
it-2 1127 ¶4
Lukadi
Hahitili yaaka kwakwihi na 30 hanyima yakujilumuka kwaYerusalema, kapostolu Yowanu amulejeli kutalisha hezaza deneni dafuma kunyuza yejima, kumadimi ejima niantu ejima nawu: “Awa diwu anafumi mulukadi lwasweja.” (Chi 7:13, 14) Chineli izaza deneni ‘dinafumi mulukadi lwasweja,’ chinakumwekesha nawu dapulukili. Nawa dichashimuna nimazu ekala haYilwilu 7:9, 10 nawu: “Nzambi wadiña [naYosefu], wamupulwishili kufuma muyihuñu yindi yejima.” Chamupulwishiliwu Yosefu kuyihuñu bayi neyi chamukwashili hohu kuumika yihuñu yejimaku ilaña wapulukili kuyuma yejima yamweneñayi.
(Chimwekeshu 7:15-17) Ichi dichayiletesha ekali kumbidi yetanda daNzambi, nawa anakumukalakela mudimu wajila mwaana niwufuku mutembeli yindi; Owu washakama hetanda wakalemena itenti dindi hadi wena. 16 Hiyamba katiya nzala hela mpwila cheñiku, nawa itena hela nkanza hijikayochaku, 17 muloña Mwana kaMukoku wudi mukachi ketanda, wakayibiñaña nikuyilombola kutuseloki twamenji awumi. Nawa Nzambi wakakombola madilu ejima kumesu awu.”
it-1 996-997
Izaza Deneni
Chinjikijilu Chakuyilukilaku. Chinjikijilu chakwilukilaku “izaza deneni” chekala mukapetulu 7 kaChimwekeshu nihajinsona jikwawu. HaChimwekeshu 7:15-17 hashimuna nawu Nzambi ‘nakulema itenti dindi hadi wena,’ hakwila yayilomboli “kutuseloki twamenji awumi” nawa Nzambi nakukombola “madilu ejima kumesu awu.” HaChimwekeshu 21:2-4 hekala mazu adifwanaku nawu: “Itenti daNzambi didi hamu nawantu,” ‘nakukombola madilu ejima kumesu awu’,nawa ‘kufwa kunamani.’ Ichi chimwenu hichakundama kudi antu ekala mwiwulu, munakusuluka ‘Yerusalema Yayihaku,’ ilaña chakundama kudi antu ashakamaña hamaseki.
Kukeña Yuma Yalema yakuSpiritu
(Chimwekeshu 7:1) Hanyima yayumiyi, namweni añelu awana anemani kumawombu awana eseki iku anakwatishi chikupu mpepela jiwana jeseki, kulonda kubuli kwikala mpepela yikukunkila hamaseki hela hakaluñalwiji hela kumutondu wudi wejima.
re 115 ¶4
Kusweka Isarela waNzambi
Chakadi nikujina, awa añelu awana amenañaku mazanvu awana awañelu, azatishayi Yehova, akwata wunsopeshi windi sampu mpinji yindi yinashiki. Chikela awa añelu akajumbiku iji mpepela jakuzuwa kwaNzambi jikakunka kukabeta kambwela, kaluwunda, kumusela, nikumujika hampinji yimu nawa lukadi lwakasweja. Yakadifwana nampepela jiwana jazatishiliyi Yehova hakuyikatisha nakuyinoñesha to-o aElami akushankulu, ilaña yena yikasweja kutoha. (Yeremiya 49:36-38) Jikekala mpempela jasweja jikakisañana yuma kubadika ‘chinjimbi’ chazatishiliyi Yehova hakujilumuna muza waAmoni. (Amo 1:13-15) Kwosi nfulumendi yaSatana yidi hanu hamaseki yikatwesha kwimana hefuku dakuzuwa kwaYehovaku, hampinji yikajilikayi chiyuulu chindi haya nyaaka.—Masamu 83:15, 18; Isaya 29:5, 6.
(Chimwekeshu 9:11) Tuboola twenitu tukweti mwanta watu, diyi kañelu wekela. MuchiHeberu ijina dindi diyi Abadoni, ilaña muchiGiriki wukweti ijina dakwila nawu Apoliyoni.
it-1 12
Abadoni
Abadoni, kañelu wekela—hinyi?
HaChimwekeshu 9:11, “kañelu wekela” amutena nawu “Abadoni.” Izu daAbadoni, muchiGiriki Apoliyoni datalisha mukwila nawu “Mukwakujilumuna.” Muma 1800 kwadiña kusandujola kwamwekesheleña nawu iwu wuprofwetu wakundamini aEmperor Vespasian, Muhammad, kushilahu niNapoleon, nawa iwu kañelu amwesekejeli ‘naSatana.’ Hela chochu, haChimwekeshu 20:1-3 twatañaña nawu kañelu wunakwati “nsapi yakwikela” himukwakumwimenaku Nzambi kufuma mwiwulu, nawa chatela yekali ‘Satana,’ ilaña iwu kañelu namukasi Satana mumaleñi nawa namunatili mwikela. Interpreter’s Bible yahosha haniyi nsona ya Chimwekeshu 9:11, nawu: “Abadoni, hikañelu kaSatana wanyi, ilaña hikañelu kaNzambi, nakuzata mudimu windi wakujilumuna wamwinkawu kudi Nzambi.”
Munsona jachiHeberu neyi chitunahanjeki, izu dakwila nawu ʼavad·dohnʹ adishimuna hatooka nawu desekana nezu dashelu hela kufwa. HaChimwekeshu 1:18 hekala mazu ahosheliyi Yesu nindi: “Ichi inakuhanda haya nyaaka nanyaaka nawa nikweti nsapi jakufwa niJejamu.” Ñovu yindi yikwetiyi kutalisha kwikela ayishimuna haLuka 8:31. Nawu wukweti ñovu yakukisañana, niñovu yakumujilumuna Satana, twelukaña mwenimu neyi tutaña Aheberu 2:14, yahosha nawu Yesu wekalili namashi ninyisunyi “kulonda kuhitila mukufwa kwindi yatweshi kufumishahu wakojejaña kufwa, dikwila nawu Diyabolu.” HaChimwekeshu 19:11-16 amumwekesha nawu mwalala amutonda kudi Nzambi kwikala Mukwakujilumuna.—talenu APOLIYONI.
Kutaña Bayibolu
(Chimwekeshu 7:1-12) Hanyima yayumiyi, namweni añelu awana anemani kumawombu awana eseki iku anakwatishi chikupu mpepela jiwana jeseki, kulonda kubuli kwikala mpepela yikukunkila hamaseki hela hakaluñalwiji hela kumutondu wudi wejima. 2 Nawa namweni kañelu mukwawu nakukanduka kufuma kumusela iku wukweti chilamiku chaNzambi wamumi; wabidikili nezu datiyakana kudi owu añelu awana enkeliwu wuswa wakujilumuna iseki nikaluñalwiji, 3 nindi: “Bayi mukisañana iseki hela kaluñalwiji hela nyitonduku, sampu tunalamiki dehi anduñu jaNzambi yetu hamahama awu.” 4 Nawa natiyili kuvula kwawantu alamikiliwu, adiña 144,000, alamikiliwu kufuma kunyichidi yejima yawanyana kaIsarela: 5 Kumuchidi waYuda, alamikiliku antu 12,000; kumuchidi waRubeni, antu 12,000; kumuchidi waGadi, antu 12,000; 6 kumuchidi waAsheri, antu 12,000; kumuchidi waNafwatali, antu 12,000; kumuchidi waManasi, antu 12,000; 7 kumuchidi waSimeyona, antu 12,000; kumuchidi waLevi, antu 12,000; kumuchidi waIsakari, antu 12,000; 8 kumuchidi waZebuluni, antu 12,000; kumuchidi waYosefu, antu 12,000; kumuchidi waBenjamini, alamikiliku antu 12,000. 9 Hanyima yayumiyi, chinelili nami nitali, namweni izaza deneni dakwila kwosi muntu niwumu wadi kutwesha kudichinda, dawantu afumini kunyuza yejima, kunyichidi yejima, kudi antu ejima nikumadimi ejima, anemani kumbidi yetanda nikumesu aMwana kaMukoku iku anavwali nyinkukumba yitooka; nawa anakwati nyitayi yanyikoma kumakasa awu. 10 Dichi atwalekelihu nakubidika nezu datiyakana nawu: “Wamwinu wetu wafuma kudi Nzambi yetu washakama hetanda nikudi Mwana kaMukoku.” 11 Añelu ejima emeni iku ananyeñumuki itanda niakulumpi niyileñaleña yayumi yiwana, nawa adibukili chamesu hamaseki kumbidi yetanda nakudifukula kudi Nzambi, 12 nakuhosha nawu: “Ameni! Kudi Nzambi yetu kwiikali kuhameka, kulema, maana, kusakilila, kalemesha, ñovu niwuswa haya nyaaka nanyaaka. Ameni.”
DECEMBER 9-15
YUMA YALEMA YAMWIZU DANZAMBI | CHIMWEKESHU 10-12
“Ayinsahu Ayedi Anayijahi Nkumininaku Anayisañuli”
(Chimwekeshu 11:3) Nakelisha ayinsahu jami ayedi kulonda akaprofweti hadi mafuku 1,260 iku anavwali yisasa.”
Malwihu Kufuma Kudi Antañi
Indi ayinsahu ayedi atenawu mu Chimwekeshu kapetulu 11 hiyanyi?
Mukanda waChimwekeshu 11:3 watena ayinsahu ayedi akaprofweta hadi mafuku 1,260. Iyi nsañu yashimuna cheñi nawu kanyama “wakayimika mushindu, wakayijaha.” Ilaña hanyima ‘yamafuku asatu nachibalu,’ awa ayinsahu ayedi akayisañula nawa chumichi chikahayamisha antu akamonaña.—Chim. 11:7, 11.
Indi awa ayinsahu ayedi hiyanyi? Nsañu yashimunawu muniwu mukanda yatukwashaña kuyiluka. Chatachi, atuleja nawu ‘emenañaku nyiolive yiyedi nimanoñu ayedi.’ (Chim. 11:4) Chumichi chatwanukishaña manoñu ninyiolive yiyedi yashimunawu muwuprofwetu waZekariya. Iyi nyiolive yadiña nakwimenaku Nguvulu Zerubabeli niKapristu Muneni Yoshuwa, antu “ayedi awayishawu,” ‘emeni kwakwihi naMwanta weseki dejima.’ (Zek. 4:1-3, 14) Chamuchiyedi, ayinsahu ayedi ayishimuna nawu akoñeleña yinjikijilu yadifwana nayakoñeluwu aMosi naElija.—Esekejenu Chimwekeshu 11:5, 6 na Kuchinda 16:1-7, 28-35 ni 1 Anyanta 17:1; 18:41-45.
Indi nsañu yekala muniyi nyikanda yiyedi yadifwanina hamu hadihi? Nsona yejima yinashimuni hadi awayishewa aNzambi alombweleña hampinji yakala yayesekeluwu. Hakushikijewa kwamukanda waChimwekeshu kapetulu 11, amana kwetu awayishewa adiña nakulombola hampinji yatachikili Wanta waNzambi kuyuula mwiwulu mu 1914 adiña nakushimwina ‘muyikeleyi’ hayaaka yisatu nachibalu.
Hanyima yakushimwina iku saña avwala yikeleyi, awa awayishewa ayijahili muchifwikija hampinji yayinatililuwu mukaleya hakapinji kantesha, mafuku asatu nachibalu achifwikija. Ayilumbu jawantu jaNzambi amweneña nawu mudimu wawu wunajiyi nawa atiyili kuwaha chikupu.—Chim. 11:8-10.
Hela chochu, neyi chashimwinuwu muwuprofwetu, chimwahitili mafuku asatu nachibalu awa ayinsahu ayedi ayisañwili. Bayi neyi awa awayishewa ayifumishili hohu mukaleyaku, ilaña ana atwalekeluhu kwikala ashinshika ayinkeli mudimu walema kudi Nzambi kuhitila mudi Mwanta wawu, Yesu Kristu. Mu 1919 adiña hakachi kawantu atondeluwu kukalakala neyi ‘nduñu wamaana nikashinshi’ kulonda akameneña yuma yakuspiritu yawantu jaNzambi munanu mafuku akukuminina.—Mat. 24:45-47; Chim. 11:11, 12.
Kafwampi mukanda waChimwekeshu 11:1, 2 wesekeja iyi yuma nampinji yapiminuwu tembeli yakuspiritu. Mukanda waMalaki kapetulu 3 washimuna nsañu yoyimu yakutala tembeli yakuspiritu nawa halondeleli mpinji yakutookesha. (Mal. 3:1-4) Hahitili mpinji yishika hadi hakwila mudimu wakutala nikutookesha wuzatewi? Iwu mudimu watwalekeluhu kufuma mu 1914 nakushika nikumatachikilu a 1919. Iyi mpinji yinabombelumu mafuku 1,260 (tukweji 42) nimafuku asatu nachibalu achifwikija ashimunawu muChimwekeshu kapetulu 11.
Tukweti muzañalu muloña Yehova waloñesheli mudimu wakuspiritu wakutookesha antu adimena akuzata nyidimu yayiwahi. (Tit. 2:14) Kubombelahu, twasakililaña hachakutalilahu chatwimikilawu kudi ana awayishewa ashinshika adiña nakulombola hampinji yakweseka nawa azatili neyi ayinsahu ayedi achifwikija.
(Chimwekeshu 11:7) Chakamanishawu kushimuna wunsahu wawu, kanyama wamwisaña chisumi wafumini mwikela, wakalwa nawu njita nakuyimika mushindu nikuyijaha.
(Chimwekeshu 11:11) Hanyima yamafuku asatu nachikunku, spiritu yawumi yafumini kudi Nzambi yeñilili mudi wena, kuhiñahu emeni nawa antu ayimweni, atiyili woma chikupu.
Kukeña Yuma Yalema yakuSpiritu
(Chimwekeshu 10:9, 10) Dichi nayili kudi kañelu nawa namulejeli kunyinka muvuñilu wanyanya. Kuhiñahu yena wanlejeli nindi: “Tambulaku wuwiidi nawa wukululisha mwivumu deyi, ilaña mukanwa keyi wukutowala neyi wuchi.” 10 Natambwili muvuñilu wanyanya muchikasa chanowu kañelu nawa nawudiili, dichi mukanwa kami mwatoweli neyi wuchi, ilaña chinawudiili, mwivumu dami mwalulili.
it-2 880-881
Muvuñilu Wakuvuña
Chadizatishawu Muchifwikija. MuBayibolu izu dakwila nawu “muvuñilu” adizatisha mapampa amavulu muchifwikija. Ezekeli niZekariya wejima wawu amweni muvuñilu wakusoneka kwejima kuyedi. Chineli kakavulu asonekeleña hohu mbadi yimu, kusoneka mbadi jejima jiyedi kwamwekesheleña nawu wunsompeshi wunasonekiwu haniyi nyivuñilu walema. (Eze 2:9–3:3; Zek 5:1-4) Muchimwenu chekala muChimwekeshu, owu washakamini hetanda wakwatili nyivuñilu yidi nayilamiku 7 muchikasa chindi chachidilu, kulonda abuli kuyimona sampu Mwana kaMukoku waNzambi nayivuñululi. (Chi 5:1, 12; 6:1, 12-14) Kuhiñahu Yowanu yomweni amwinkeli muvuñilu muchimwenu nawu yawiidi. Yowanu wawutiyili kutolawala ilaña mwivulu dindi mwalulili. Chineli wadiña wakuvuñulula, nsañu yadiñamu wateleleli kuyiluka. Kudi Yowanu wadiña “watowala” muloña welukili nsañu yadiñamu ilaña wadiña nayuma yalula yadi kuprofwetayi, neyi chamulejeliwu nawu yaprofweti. (Chi 10:1-11) Ezekeli niyena wamweni chimwenu chadifwanaku, amwinkeli muvuñilu mwasonekawu “ninyikeña nikuneña niyayo!”—Eze 2:10.
(Chimwekeshu 12:1-5) Kuhiñahu namweni chinjikijilu cheneni mwiwulu: Namweni mumbanda wavwalili itena, mwishina danyendu yindi mwadiña kakweji, nawa kumutu windi kwadiña chibaaba chadiña natutumbwa 12, 2 nawa wadiña nevumu. Chelili wadiña kwakwihi nakuvwala, wadilileña muloña wakukabakana nanyisoñu yakuvwala. 3 Namweni cheñi chinjikijilu chikwawu mwiwulu. Chinelili nami nitali, namweni chanzañombi muneni wuchinana neyi kesi, wadiña nanyitu 7 ninseñu 10 nawa hanyitu yindi hadiña yibañula 7; 4 nawa mukila windi wakokeli chibalu chamuchisatu chatutumbwa twamwiwulu nakutunatila hamaseki. Nawa chanzañombi watwalekelihu nakwimana kumesu amumbanda wadiña kwakwihi nakuvwala, kulonda neyi owu mumbanda navwali dehi, chanzañombi yamudiili mwana. 5 Mumbanda yenowu wavweli mwana weyala wakabiñaña akwanyuza yejima nambwechi yachikuñu. Nawa mwanindi amuhukwili nakumutwala kudi Nzambi nikwitanda dindi.
it-2 187 ¶7-9
Nyisoñu yaKuvwala
Muchimwenu chakapostolu Yowanu chekala mu Chimwekeshu wamweni mumbanda mwiwulu “wadilileña muloña wakukabakana nanyisoñu yakuvwala.” Wavweli “mwana weyala wakabiñaña akwanyuza yejima nambwechi yachikuñu.” Hela chakwila chanzañombi wakeñeleña kuda iwu mwana, ilaña mwana “amuhukwili nakumutwala kudi Nzambi nikwitanda dindi.” (Chi 12:1, 2, 4-6) Chamuhukwiliwu mwana kudi Nzambi chamwekeshaña nawu Nzambi wamwitejeli nindi himwanindi, neyi chadiña chisemwa chakushankulu chakuhana mwana wunavwaliki kudi tata yindi kulonda yamwiteji. (Talenu KUSEMUKA.) Chamwekeshaña cheñi nawu iwu “mumbanda” ‘hiñoda’ Nzambi, “Yerusalema wamwiwulu,” “mama” yaKristu niamanakwindi akuspiritu.—Ñal 4:26; Heb 2:11, 12, 17.
“Mumbanda” waNzambi wamwiwulu, wadiña wawanina, nawa wavwalili chakadi kutiya nyisoñu. Hela chochu nyisoñu yakuvwala yamwekeshaña nawu “mumbanda” watiyili muchifwikija nindi hakuvwala; nawa wakuhweleleli nindi hakuvwala.—Chi 12:2.
Indi iwu “mwana weyala” wakekalanyi? Mudimu windi wakubiña “akwanyuza yejima nambwechi yachikuñu.” HaMasamu 2:6-9 amushimwineñahu dehi nawu Mwanta waWanta wawuMesiya waNzambi. Ilaña hahitili mpinji yayilehi kufuma hasemukiliyi Kristu hanu heseki, hafwiliyi kushika nimpinji yamusañwiliwu nahamweni Yowanu chimwenu. Hela chochu ichi chimwenu chatalishili kukuvwalika kwaWanta Wawumesiya wudi mumakasa aMwana kaNzambi, Yesu Kristu, owu welili chinamusañuli, “washakamini kuchikasa chaNzambi chachidiilu, kufuma hayina mpinji, yena nakuhembelela sampu ayilumbu jindi anayibalumuni kwikala chitwamu hakudata nyendu yindi.”—Heb 10:12, 13; Ms 110:1; Chi 12:10.
Kutaña Bayibolu
(Chimwekeshu 10:1-11) Kuhiñahu namweni kañelu mukwawu wañovu wadiña nakufuma mwiwulu iku navwali ivu nawa kumutu windi kwadiña kansuluñunda, kumesu indi kwadiña neyi itena nawa nyendu yindi yadiña neyi yishimi yakesi, 2 nawa wakwatili muvuñilu wanyanya muchikasa chindi wadiña wakuvuñulula dehi. Wadatili mwendu windi wachidiilu hakaluñalwiji ilaña wachimunswa hamaseki, 3 nawa wabidikili nezu datiyakana neyi chabulumaña mutupa. Chabidikiliyi, mazu akudidima 7 ahosheli. 4 Kudidima 7 chikwahosheli, nadiña kwakwihi nakusoneka yuma yikwahosheli, ilaña natiyili izu dafumini mwiwulu nakunleja nadu: “Lamikaku yuma yahosha kudidima 7 nawa bayi wuyisonekaku.” 5 Kañelu inamweni nadati mwendu wumu hakaluñalwiji wukwawu hamaseki, wolweli chikasa chindi chachidiilu mwiwulu, 6 nawa wasanyikili mwijina daNowu washakamaña haya nyaaka nanyaaka, waleñeli iwulu niyuma yekalamu, waleñeli iseki niyuma yekalahu nawa waleñeli kaluñalwiji niyuma yekalamu, nindi: “Hikwakekala kushintajala cheñiku. 7 Ilaña mumafuku akela kañelu wamu 7 wudi kwakwihi nakwimba mpuña yindi, yuma yajila yakujinda yashimwiniyi Nzambi kudi anduñu jindi atuprofwetu kwikala nsañu yayiwahi, yikashikijewa chikupu.” 8 Nawa natiyili izu dafumini mwiwulu danlejeli cheñi nadu: “Yaña wutambuli muvuñilu wakuvuñulula dehi wudi muchikasa chakañelu wunadati mwendu wumu hakaluñalwiji wukwawu hamaseki.” 9 Dichi nayili kudi kañelu nawa namulejeli kunyinka muvuñilu wanyanya. Kuhiñahu yena wanlejeli nindi: “Tambulaku wuwiidi nawa wukululisha mwivumu deyi, ilaña mukanwa keyi wukutowala neyi wuchi.” 10 Natambwili muvuñilu wanyanya muchikasa chanowu kañelu nawa nawudiili, dichi mukanwa kami mwatoweli neyi wuchi, ilaña chinawudiili, mwivumu dami mwalulili. 11 Nawa anlejeli nawu: “Watela kuprofweta cheñi kutalisha hadi antu, akwanyuza, akwamadimi nihadi anyanta amavulu.”
DECEMBER 16-22
YUMA YALEMA YAMWIZU DANZAMBI | CHIMWEKESHU 13-16
“Bayi Muyichiina Anyama Amwisaña Ayisumiku”
(Chimwekeshu 13:1, 2) Nawa yena wemeni hawusekulula wakukaluñalwiji. Kuhiñahu namweni kanyama wamwisaña chisumi wakandukileña mukaluñalwiji, wadiña nanseñu 10 ninyitu 7, nawa kunseñu jindi kwadiña yibañula 10, ilaña hanyitu yindi hadiña majina akasawuntu. 2 Dichi owu kanyama wamwisaña chisumi inamweni wamwekeneña neyi chisumpa, ilaña nyendu yindi yadiña neyi yabera nawa kanwa kindi kadiña neyi kamutupa. Nawa chanzañombi wamwinkeli owu kanyama ñovu jindi, itanda dindi niwuswa windi wabadika.
Yehova Diyi ‘Mukwakumwekesha Yuma Yakujinda’
Kukumana kwayaaka nkulakaji yatachi C.E., Yesu wasañwiluwu wamumwekesheleli kapostolu Yowanu yimwenu yayivulu yakuhayamisha. (Chim. 1:1) Muchimwenu chimu, Yowanu wamweni Diyabolu, wadiña muchifwikija chachanzañombi, nemani kuchikumu chakaluñalwiji. (Tañenu Chimwekeshu 13:1, 2.) Yowanu wamweni cheñi kanyama hakufwampuka mukaluñalwiji nawa amwinkeli ñovu jabadika kudi Diyabolu. Kuhiñahu, kañelu wamulejeli Yowanu nindi nyitu yitanu nayiyedi yakanyama wuchinana, dikwila nawu chifwikija chakanyama washimunawu haChimwekeshu 13:1, yinakwimenaku ‘anyanta atanu nayedi,’ hela netu nfulumendi. (Chim. 13:14, 15; 17:3, 9, 10) Hampinji yasonekeleñayi Yowanu, anyanta atanu adiña ayishinda dehi, wanta wumu wadiña nakuyuula, wukwawu ‘wadiña kanda wutachiki.’ Indi awa mawanta hela matuña asweja ñovu mukaayi adiña matuñanyi? Tusambilenu kutala haniyi nyitu yakanyama yashimunawu muChimwekeshu. Tukudiza cheñi nsañu yasonekeliyi Danyeli chiyashimwini mazu amakwawu alumbulula yuma yakundama kunawa mawanta amavulu, kumpinji yakunyima henohu kanda atachiki kuyuula.
(Chimwekeshu 13:11) Kuhiñahu namweni kanyama mukwawu wamwisaña chisumi wafumineña hamaseki, nawa wadiña nanseñu jiyedi neyi jamwana kamukoku, ilaña watachikili kuhosha neyi chanzañombi.
(Chimwekeshu 13:15) Nawa amwitejeli kwonena muuya muchifwikija chanowu kanyama wamwisaña chisumi, kulonda chifwikija chakanyama wamwisaña chisumi, chihosheña nikujahisha antu ejima akaanaña kudifukula kudi chifwikija chanowu kanyama wamwisaña chisumi.
re 194 ¶26
Kudikaña Nawanyama Ayedi Amwisaña Ayisumi
Hinyi yeniwu? Wanta Wañovu Mukaayi waAnglo-America, diyi mutu wamu 7 wakanyama wamwisaña chisumi watachi ilaña wadimena! Chamwabwiliwu iwu kanyama nkawindi muchimwenu chatukwashaña kwiluka chazatañayi nkawindi mukaayi. Iwu kanyama wanseñu jiyedi wachifwikija amutuña kudi matuña ayedi adimena, ilaña azatilaña hamu. Nseñu jindi jiyedi jidi “neyi jamwana kamukoku” jamumwekeshaña neyi wazuwa wanyi, nawa nfulumendi yindi yamwekana neyi yayiwahi kulonda kaayi kejima kamwovwahileña. Ilaña wahoshaña “neyi chanzañombi” munjila yakwila wakanjikijaña nikutiyisha woma hela kuleta madombu neyi matuña abula kwovwahila wunyuuli windi. Hakwashaña antu kwovwahila Wanta waNzambi wudi mumakasa aMwana kaMukokuku, ilaña wakeñaña ovwahileña Satana, chanzañombi muneni. Naleteshi matuña kwikala nachaambu nikudihela nawa anakudifukula kudi kanyama wamwisaña chisumi watachi.
re 195 ¶30-31
Kudikaña Nawanyama Ayedi Amwisaña Ayisumi
Nsañu yakunyima yamwekeshaña nawu ichi chifwikija himutayi waleteliwu nawa awukwashileña kudi Britain niUnited States nawa awuteneneña nawu mutayi waLeague of Nations. Nkuminaku, mu Chimwekeshu kapetulu 17, awumwekesha nachinjikijilu chacheñi, chakanyama wamwisaña chisumi wuchinana nge-e, wamumi wekaliliku hampinji yankawindi. Mujimba windi ‘wahoshaña,’ munjila yakwila wadivwimbaña nindi yena hohu diyi wunateli kuletela antu kuwunda nikukiñewa. Ilaña chumichi chinaleteshi matuña kudihosha kasawuntu nikutadeka kuhitila mudi yena. Watiyishaña woma hela kuyandisha antu akaanaña kwonvwahila chiyuulu chindi. Mutayi waLeague of Nations wahañili matuña ejima akaanini kumwovwahila. Hakutachika kwalukadi lwasweja, “nseñu” jañovu janiwu chifwikija wakanyama wamwisaña chisumi jakashikija wuprofwetu.—Chimwekeshu 7:14; 17:8, 16.
Kutachika haNjita Yaakayi yaMuchiyedi, chifwikija chaniwu kanyama wamwisaña chisumi—wunakwimenaku United Nations organization—wajahili antu. Chakutalilahu, mu 1950 mutayi waUN watachikili kuzuñisha North Korea naSouth Korea njita. Mutayi waUN, hamu naSouth Korea, ajahili antu akuNorth Korea nikuChina akushika ku 1,420,000. Cheñi nawa, kufuma mu 1960 nakushika mu 1964, mashidika awaUnited Nations adiña muCongo (Kinshasa). Hela chochu, anyuuli amukaayi, kushilahu tuhu nimukulumpi wawakatolika Paul VI niJohn Paul II, anatwalekihu kuhoshana nawu ichi chifwikija dichuma chakukumishaku chikaleta kuwunda. Ahosheli nawu, neyi antu akaana kukalakela ichi chifwikija, akekala mukukala. Akojejaña antu ejima akaanaña kudifuukula nikukalakela ichi chifwija kuyija muchifwikija.—Kuhituluka 5:8, 9.
(Chimwekeshu 13:16, 17) Washinjilaña antu ejima, alema niabula kulema, aheta niatuzweñi, asubuka nianduñu, nindi awa antu ayishi chinjikijilu hamakasa awu achidiilu hela hamahama awu, 17 nawa nindi kubuli kwikala muntu hela wumu wukulanda hela kulandisha, chiña hohu muntu wukweti chinjikijilu, ijina dakanyama wamwisaña chisumi hela wukweti naambala yejina daniwu kanyama.
w09 2/15 4 ¶2
Yikuma Yamaneni Kufuma muMukanda wa Chimwekeshu—II
13:16, 17. Hichidi namuloña nakukala kutunateli kumona hakukalakala nyidimu yahefuku hefuku, yidi neyi “kulanda hela kulandisha,” bayi tumwiteja kanyama yatukakeji kutuyula muwumi wetuku. Kumwiteja ‘kanyama kutufunda mufunda muchikasa hela hehama detu’ hohamu nakumwiteja kanyama yeniwu kuyula yilwilu yetu hela yitoñojoka yetu.
Kukeña Yuma Yalema yakuSpiritu
(Chimwekeshu 16:13, 14) Namweni mazu onenawu asatu amwekeneña neyi yuula anakufuma mukanwa kachanzañombi nimukanwa kakanyama wamwisaña chisumi nimukanwa kakaprofwetu wakutwamba. 14 Kafwampi, awa mazu, himazu onenawu kudi andemoni nawa akoñaña yihayamisha, ayaña kudi anyanta ahanu hamaseki hejima nakuyipompeshela hamu kunjita yefuku deneni daNzambi Wañovu Jejima.
w09 2/15 4 ¶5
Yikuma Yamaneni Kufuma muMukanda waChimwekeshu—II
16:13-16. ‘Mazu awandemoni azonda’ anakwimenaku nsañu yamakudi yawandemoni yakwila nawu anyanta ankanu aheseki hiyayiluwañesha hamuloña wakusukula yeña yitanu nayiyedi yandombu yaNzambiku, ilaña ayileñelaña kudikaña naYehova.—Matewu 24:42, 44.
(Chimwekeshu 16:21) Kuhiñahu, nvula yamalola yeneni yenjili kufuma mwiwulu nakunokela antu, ilola dimu dalemeni neyi ntalenta yimu, dichi antu amusawili Nzambi muloña wachipupu chanvula yamalola yayinokeleli, muloña chipupu chenochu chatoheli chikupu.
‘Kukuula Kwenu Kudi Kwakwihi’
Iyi hiyakela mpinji yakushimwina ‘nsañu yayiwahi yaWantaku.’ Mpinji yakushimwina yikekala yahita dehi. Mpinji ‘yakukumisha’ yakashika. (Mat. 24:14) Chakadi nikujina, antu jaNzambi akashimwina nsañu yawunsompeshi chakadi woma. Nsañu yeniyi mukabombela nikubidika kwakwila nawu kaayi kaSatana katama keña kamani. Bayibolu yesekeja iyi nsañu nanvula yamalola nawu: ‘Ninvula yamalola amaneni, ilola dimu desekana nantalenta yimu, hiyikufuma mwiwulu hiyikunoka hadi antu. Antu hiyakumutuka Nzambi nachipupu chanvula yamalola, muloña chipupu ochu chabadika nankashi kutoha.’—Chim. 16:21.
Kutaña Bayibolu
(Chimwekeshu 16:1-16) Kuhiñahu, natiyili izu datiyakana dafumini mwiluña dajila dalejeli añelu 7 nadu: “Yenu muhuñunwini hamaseki kuzuwa kwaNzambi kudi muyeña yakunama 7.” 2 Kañelu watachi wayili nawa wahuñunwinini hamaseki yuma yadiña mucheña chindi chakunama. Kuhiñahu, maboñola asweja enjili hadi antu adiña nachinjikijilu chakanyama wamwisaña chisumi nawa adifukwileña kudi chifwikija chindi. 3 Kañelu wamuchiyedi wahuñunwinini mukaluñalwiji yuma yadiña mucheña chindi chakunama. Kuhiñahu, kaluñalwiji kabalumukili nakwikala mashi neyi mashi amuntu wafwa, nawa yileñaleña yejima yayumi yamukaluñalwiji yafwili. 4 Kañelu wamuchisatu wahuñunwinini mutuloña nimutuseloki twamenji yuma yadiña mucheña chindi chakunama. Kuhiñahu, jejima jabalumukili mashi. 5 Natiyili kañelu wadiña nawuswa hamenji nakuhosha nindi: “Eyi wudiku nawa wadiñaku, Eyi washinshika, waloña nanochu chiwunasompi muniyi njila, 6 muloña apwekesheli mashi awakwakujila niawatuprofwetu, nawa wunayinki mashi kulonda anwi; chumichi chinayiteleli wena.” 7 Nawa natiyili izu dafumini mukameña nadu: “Eñañi, Yehova Nzambi, Wañovu Jejima, kusompesha kweyi kwalala nawa kwaloña.” 8 Kañelu wamuchiwana wahuñunwinini hetena yuma yadiña mucheña chindi chakunama, nawa itena adinkeli ñovu yakwocha antu nakesi. 9 Dichi iyena dasweja dayocheli antu, ilaña asawili ijina daNzambi wukweti wuswa haniyi yipupu, nawa antu wenawa hiyabalumukili munyichima yawu nakumulemeshaku. 10 Kañelu wamuchitanu wahuñunwinini hetanda dakanyama wamwisaña chisumi yuma yadiña mucheña chindi chakunama. Kuhiñahu, wanta windi weyilili bwi-i, nawa antu atachikili kutafunya madimi awu muloña wakutiya kukata, 11 ilaña amusawili Nzambi wamwiwulu muloña wakukata kwatiyileñawu nimaboñola awu, nawa hiyabalumukili munyichima yawu nakuleka nyidimu yawuku. 12 Kañelu wamu 6 wahuñunwinini hakaloña weneni Yufurati yuma yadiña mucheña chindi chakunama, kuhiñahu, menji amuniwu kaloña ominimu chawu-u kulonda aloñesheli chadimu njila yawanyanta akafumina kwaselelaña itena. 13 Namweni mazu onenawu asatu amwekeneña neyi yuula anakufuma mukanwa kachanzañombi nimukanwa kakanyama wamwisaña chisumi nimukanwa kakaprofwetu wakutwamba. 14 Kafwampi, awa mazu, himazu onenawu kudi andemoni nawa akoñaña yihayamisha, ayaña kudi anyanta ahanu hamaseki hejima nakuyipompeshela hamu kunjita yefuku deneni daNzambi Wañovu Jejima. 15 “Tiyenu! Inakwinza neyi chenzañayi ikombi. Wudi namuzañalu yowu muntu watonaña nikuhemba yakuvwala yindi yahewulu kuchiina wakenda nzekesi kulonda antu amoni nsonyi yindi.” 16 Nawa ayipompesheli hamu kwiluña datenañawu muchiHeberu nawu Amagedoni.
DECEMBER 23-29
YUMA YALEMA YAMWIZU DANZAMBI | CHIMWEKESHU 17-19
“Njita yaNzambi Yikamanisha Njita Jejima”
(Chimwekeshu 19:11) Namweni mwiwulu munenzunuki, nawa chinelili nami nitali, namweni kawalu katooka. Owu washakaminihu amutenaña nawu Washinshika nawa Walala, wasompeshaña nikulwa njita mukuloña.
(Chimwekeshu 19:14-16) Cheñi nawa, mazaza awakwanjita amwiwulu amulondeleleña hatuwalu tutooka, nawa avwalili mahina amawahi, atooka nawa akadi majilu. 15 Mukanwa kindi mwedikili mpoku yakabali yayilehi yatwa yakutapa nachu akwanyuza, nawa wakayibiñaña nambwechi yachikuñu. Kubombelahu, wadatolaña muwukamwinu wavinyu wandulu yakuzuwa kwaNzambi Wañovu Jejima. 16 Hewulu dachakuvwala chindi, hekata dindi, hadiña ijina dasonekawu nawu, Mwanta wawanyanta nawa Nkaaka yawankaaka.
Amagedoni Njita yaNzambi Yakamanisha Majita Ejima
Neyi antu atama akutwalekahu nakuyula, antu aloña hiyakashakama mukuwunda hela mukumwenaku. (Yishimu 29:2; Mukwakutañisha 8:9) Chakadi nikujina, hitukutwesha kumanisha maseleka niyuma yatama yinakwilawu antuku. Dichi kuwunda kwahaya nyaaka niwuñaji watela kwinza hohu chiña neyi antu atama anayifumishuhu. Solomoni wasonekeli nindi: “Muntu watama yowu akakuulawu nachu mukwakuloña.”—Yishimu 21:18.
Hamuloña wakwila Nzambi diyi Nsompeshi, tunateli kukuhwelela netu antu atama akayisompesha mukuloña chikupu. Abarahama wenhwili nindi: “Mukwakusompesha iseki dejima abuli kwila mwaloña?” Abarahama welukili nindi mpinji yejima Yehova welaña mwamuwahi. (Kutachika 18:25) Cheñi, Bayibolu yinatukani nawu Yehova hakeñaña kujilumuna antu atamaku; welaña mwenimu neyi chinakali hohu.—Ezekeli 18:32; 2 Petulu 3:9.
it-1 1146 ¶1
Kawalu
Muchimwenu chakapostolu Yowanu chachifwikija, Yesu Kristu analemeshiwu amumwekesha wudi hakawalu katooka nawa anakumulondela kudi izaza dawañelu, wejima wawu adi hatuwalu tutooka. Ichi chimwenu achimwekesheli kudi Yowanu hakulumbulula Kristu chikamwimenaku Nzambi yindi nawa Tata yindi, Yehova kuhitila mukulwa njita nawayilumbu njindi ejima mukuloña nawa nawuñanji. (Chi 19:11, 14) Henohu kanda, Kristu wakemika mushindu nawa hakalondela yihuñu, iyi yuma yejima ayimenaku kudi atuwalu ashiyashana niakakwendelahu.—Chi 6:2-8.
(Chimwekeshu 19:19, 20) Nawa namweni yenowu kanyama wamwisaña chisumi nianyanta ahamaseki nimashidika awu anadipompeshi hamu kulonda alwi njita nanowu washakamini hakawalu niamashidika indi. 20 Dichi owu kanyama wamwisaña chisumi amukwatili hamu nanowu kaprofwetu wakutwamba wakoñeleña yinjikijilu kumesu indi yaluwañesheliyi nachu antu etejeli kuyisha chinjikijilu chakanyama wamwisaña chisumi ninowu adifukwileña kudi chifwikija chindi. Henohu achidi amomi, wejima wawu ayuumbilili mwijiya dakesi kabutukaña namulañi wakesi kamalola abutukaña kesi.
re 286 ¶24
Mwanta Wanjita Nemiki Mushindu haAmagedoni
Kanyama wamwisaña chisumi wanyitu 7, nseñu 10 wafumini mukaluñalwiji, wemenañaku nfulumendi jaSatana, wakajimañana hamu nakaprofwetu wakutwamba, mwanta wañovu wamukaayi wamu 7. (Chimwekeshu 13:1, 11-13; 16:13) Henohu achidi “amomi,” hela achidi kuluwañesha antu jaNzambi heseki, wejima wawu ayuumbilili “mwijiya dakesi.” Komana idi hijiya dakesi aka kitweluka? Ihehi, muloña nikanyama wamwisaña nikaprofwetu wakutwamba ejima achifwikija hohu. Ilaña hichinjikijilu chakukumishaku chakujilumuna chikupu, chakwila kwosi kwikalaku cheñi. Kufumahu, kufwa niijamu niDiyabolu yomweni akayinatila mukesi. (Chimwekeshu 20:10, 14 ) Bayi neyi hikesi kakubabeshelamu antu atama haya nyaakaku muloña yitoñojoka yamuchidiwu Yehova wayihela.—Yeremiya 19:5; 32:35; 1 Yowanu 4:8, 16.
(Chimwekeshu 19:21) Ilaña ejima ashalilihu ayijahili nampoku yakabali yayilehi oyu yedikili kufuma mukanwa kanowu washakamini hakawalu. Nawa atuda ejima ekutili nanyijimba yawu.
re 286 ¶25
Mwanta Wanjita Nemiki Mushindu haAmagedoni
Ejima abulili kumwekana neyi adikunda najinfulumendi ilaña adibombeli natumazanvu twanyanya twawantu amukaayi katama niwena akayijilumuna ‘nampoku yakabali yayilehi yanowu washakamini hakawalu.’ Yesu wakahosha nindi atelela kufwa. Chineli wena ashimuna kuyumbila mwijiya dakesi wanyi, tukukuhwelela netu akasañuka? Kwosi hashimunawu nawu ejima akajilumunawu kudi nsompeshi waYehova hanoyu mpinji akayisañula. Neyi chahosheli Yesu yomweni nindi, ejima abula kwikala “anyikoku” ayaña “mukesi kahaya nyaaka kanaloñesheliwu Diyabolu niañelu jindi,” dikwila nawu, “akayijilumuna haya nyaaka.” (Matewu 25:33, 41, 46) Chikaletesha ifuku “dawunsompeshi nawa dakujilumuna antu abulaña kumwakama Nzambi” kushika.—2 Petulu 3:7; Nahumi 1:2, 7-9; Malaki 4:1.
Kukeña Yuma Yalema yakuSpiritu
(Chimwekeshu 17:8) Kanyama wamwisaña chisumi iwamona wadiñaku, ilaña wudiku wanyi, hela chochu, katataka yafumi mwikela nawa akumujilumuna. Nawa antu ashakama hamaseki abula kusonekawu majina awu mumuvuñilu wawumi kufuma haaliliwu chikuku chakaayi, akahayama chakamumonawu yenowu kanyama wamwisaña chisumi wadiñaku, ilaña wudiku wanyi, hela chochu, wakekalaku cheñi nawa.
re 247-248 ¶5-6
Kusolola Kajindilu
“Kanyama wamwisaña chisumi . . . wadiñaku.” Eña, mutayi waLeague of Nations diwadiña iwu kanyama kufuma haJanuary 10, 1920, kushilahu tuhu nimatuña 63 adimbombeleleñamu hampinji yamboka-mboka. Ilaña mukuhita kwampinji, Japan, Germany, niItaly afuminimu nawa chiyuulu chateneneñawu nawu Soviet Union achifumishilimu. MuSeptember 1939 Nlomboli wawukatu wakuGermany watachikishili Njita Yaakayi yaMuchiyedi. Chineli akañenyi kuleta kuwunda mukaayi, mutayi waLeague of Nations watachikili kuzeya. Mu 1942 wamanini ñovu. Yehova wayilejeli antu jindi chashikijeweli iwu wuprofwetu hayoyina mpinji yakala. Hakupompa kwaÑinza, manakwetu N. H. Knorr wahosheli kutalisha haniwu wuprofwetu nindi, “kanyama wamwisaña chisumi . . . wudiku wanyi.” Wehwili nindi, komana iwu kanyama wukutwalekahu kushakama mwikela?” Wazatishili nsona yaChimwekeshu 17:8, wakwili nindi: Nyuza yakadibomba nakwimana cheñi.” Chumichi chashikijeweli hakwila wuprofwetu wamwizu daYehova wikali wajila.
Kufuma Mwikela
Kanyama wamwisaña chisumi wuchinana nge-e wafumini mwikela. HaJune 26, 1945, muSan Francisco, U.S.A., mwadiña ipumba deneni, matuña 50 atondeli mutayi waUnited Nations. Iwu mutayi awutondeli nawu “wuleti kuwunda nikukiñewa mukaayi kejima.” Mutayi waLeague of Nations wadifwanini chikupu nawaUN. Mukanda waThe World Book Encyclopedia wahosheli nawu: “Mutayi waUN wadifwanaku nawaLeague of Nations, watuñiliwu hanyima yaNjita Yakaayi Yatachi . . . Matuña amavulu atachikili UN diwu atachikili cheñi niLeague of Nations. Nyitayi yejima yiyedi ayituñili nawu yileti kuwunda hakachi kamatuña. MaKometi ekala muUN adifwana nankashi nadiña muLeague of Nations.” Mutayi waUN diyi kanyama wamwisaña chisumi wuchinana nge-e. Mwekala matuña 190 anabadika matuña 63 adiña mumutayi waLeague of Nations nawa wunazati nyidimu yayivulu kubadika mutayi watachikili.
(Chimwekeshu 17:16, 17) Nawa nseñu 10 nikanyama wamwisaña chisumi jiwamona, jikamuhela chivumbi, jikamukisañana, jikamuvuula, jakada nyisunyi yindi nawa jakamwocha wejima chikupu nakesi. 17 Muloña Nzambi nachishi munyichima yawu kulonda akoñi mwaya nkeñelu yindi, eñañi, kulonda ekali nayitoñojoka yoyimu yakuhana wanta wawu kudi yenowu kanyama wamwisaña chisumi sampu mazu aNzambi anashikijewi dehi.
Yehova Wamwekeshaña “Yuma Yikukeña Kumwekana”
Hela chochu, nsakililu yakutwamba hiyakashikena dakujiyaku. Iwu chivumbi wakatwalekahu kwikala nañovu nikuleja anyanta kulonda eleña yuma yakeñayi sampu Nzambi nashi munyichima yawanyuuli kwila mwafuukulayi. (Tañenu Chimwekeshu 17:16, 17.) Katataka Yehova yasañumuni nyitayi yajipolitiki yamwituña daSatana, yinakwimenawu kudi United Nations, kulonda yilukuki nsakililu yakutwamba. Yakakisañana ejima amukwashaña nimaheta indi. Yaaka yinahituhu, antu atoñojokeleña nawu akatwelekahu kulemesha nsakililu nikwikala nañovu. Makonu, chivumbi nakukeña kuholoka hanyima yakanyama wuchinana. Hela chochu, bayi neyi wakaselumukaña chovu-chovu hachifulu chinduku. Ilaña wakashikena dakwalumuka chakukasumwisha.—Chim. 18:7, 8, 15-19.
Kutaña Bayibolu
(Chimwekeshu 17:1-11) Kañelu wumu wahadi añelu 7 adiña nayeña yakunama 7, wenjili nakunleja nindi: “Inzaku kunu, nukukuleja wunsompeshi wakamusompeshawu mumbanda chivumbi muneni washakama hamenji amavulu, 2 owu anyanta ahamaseki elili nindi wuvumbi, nawa antu ashakama hamaseki wayikojejeli kusheta navinyu yindi yemenañaku yilwilu yindi yawuvumbi.” 3 Nawa wantwalili mwisaña nañovu yaspiritu. Kuhiñahu, namweni mumbanda nashakami hakanyama wamwisaña chisumi wuchinana nge-e wenzeli namajina akasawuntu nawa wadiña nanyitu 7 ninseñu 10. 4 Yenowu mumbanda wavwalili chakuvwala chawusombu nichichinana nge-e, wadiwahishili nayuma yawuru niyamalola alema wuseya niyamperola, nawa muchikasa chindi wakwatili kaapu kawuru mwenzeli yuma yawuzondu niyuma yamajilu yawuvumbi windi. 5 Hehama danowu mumbanda asonekelihu ijina dakujinda nawu: “Babiloni Muneni, mama yawayivumbi nimama yayuma yawuzondu yahamaseki.” 6 Nawa namweni nami yenowu mumbanda washeteli namashi awakwakujila ninamashi awayinsahu jaYesu. Chinamumweni, nahayamini chikupu. 7 Dichi kañelu wañihwili nindi: “Muloñadi chiwunahayamini? Nukukuleja nsañu yakujinda yanowu mumbanda niyakanyama wamwisaña chisumi wunamweleki wudi nanyitu 7 ninseñu 10: 8 Kanyama wamwisaña chisumi iwamona wadiñaku, ilaña wudiku wanyi, hela chochu, katataka yafumi mwikela nawa akumujilumuna. Nawa antu ashakama hamaseki abula kusonekawu majina awu mumuvuñilu wawumi kufuma haaliliwu chikuku chakaayi, akahayama chakamumonawu yenowu kanyama wamwisaña chisumi wadiñaku, ilaña wudiku wanyi, hela chochu, wakekalaku cheñi nawa. 9 “Yitoñojoka yamaana yakeñekaña hakwila nawu muntu yatiyishi mwatalisha chumichi: Nyitu 7, yinakwimenaku mpidi 7 hashakama yenowu mumbanda. 10 Nawa kudi anyanta 7: Atanu anadimbuki dehi, wumu wudi kwoku, nawa mukwawu kanda yashiki; ilaña neyi nashiki dehi, wakashakama hohu kapinji kantesha. 11 Nawa kanyama wamwisaña chisumi wadiñaku, ilaña wudiku wanyi, diyi mwanta wamu 8, hela chochu, wafuma mudi anyanta 7, nawa nkumininaku akamujilumuna.
DECEMBER 30–JANUARY 5
YUMA YALEMA YAMWIZU DANZAMBI | CHIMWEKESHU 20-22
“Talaña! Inakwilisha Yuma Yejima Yiikali Yayiha”
(Chimwekeshu 21:1) Nawa namweni iwulu dadiha niiseki dadiha; muloña iwulu dadikulu niiseki dadikulu jinahiti dehi, nawa kaluñalwiji hikadiku cheñiku.
re 301 ¶2
Iwulu Dadiha Niiseki Dadiha
Henohu Yowanu kanda yasemuki, Yehova wamulejeli Isaya nindi: “Muloña tiyenu, hinukuleña mawulu amaha, nimaseki amaha, yuma yakusambila hiyakayanuka nawaku, hiyakenza nikumuchimaku.” (Isaya 65:17; 66:22) Iwu wuprofwetu washikijeweli katachi hampinji funtiliwu aYudeya ashinshika muYerusalema mu 537 B.C.E. hanyima yakushakama yaaka 70 muwunkoli. Chafuntiliwu, ekalili muza wakadi majilu, ‘iseki dadiha’ nawa munfulumendi yayiha, dikwila nawu ‘iwulu dadiha.’ Kapostolu Petulu wahosheli haniwu wuprofwetu nindi: “Ilaña kudi mawulu amaha niiseki dadiha jitwatalilaña kwesekeja nachikaninu chindi, nawa mwenimu dimu mwakekalaña kuloña.” (2 Petulu 3:13) Ichi Yowanu namwekeshi nindi iwu wuprofwetu wunakushikijewa hefuku daMwanta. “Iwulu dadiha niiseki dadiha,” nshakaminu yamakonu yidi mumakasa aSatana ninfulumendi jayu jayuulañawu kudi Satana niandemoni jindi, jikahita. “Kaluñalwiji” kayihuñu, dikwila nawu antu adikañaña akayijilumuna. Hakahiña “iwulu dadiha niiseki dadiha,” antu amaha hamaseki akayuulañawu kudi iyi nfulumendi yayiha, Wanta waNzambi.—Esekejenu Chimwekeshu 20:11.
(Chimwekeshu 21:3, 4) Hohenohu natiyili izu datiyakana dafumini mwitanda nadu: “Tiyaña! Itenti daNzambi didi hamu nawantu, nawa yena wakashakama nawu, niwena akekala antu jindi. Nawa Nzambi yomweni wakekala nawu. 4 Wakakombola madilu ejima kumesu awu, kufwa hikwakekalaku cheñiku, nawa hikwakekala cheñi kudishona, kudila hela kukataku. Yuma yakusambila yinahiti dehi.”
“Talaña! Inakwilisha Yuma Yejima Yiikali Yayiha”
“[Nzambi] wakakombola madilu ejima kumesu awu.” (Chimwekeshu 21:4) Madilu amuchidinyi akakombwelayi? Bayi neyi madilu amuzañalu hela akiñaña mesu etuku. Ichi chikaninu chaNzambi chatalisha kumadilu itwadilaña muloña wayihuñu nimakabi. Nzambi hamba kayikombwela madilu hohuku; ilaña wakafumishahu yuma yatama yejima yaleteshaña antu adileña, yihuñu nimakabi.
“Kufwa hikwakekalaku cheñiku.” (Chimwekeshu 21:4) Kwosi chuma chikwawu chaleteshaña antu kudila neyi kufwaku. Yehova wakayisubula antu ejima amwovwahila kukufwa. Munjilanyi? Kuhitila mukufumishahu chuma chacheni chaleta kufwa: nshidi yitwaswana kudi Adama. (Aroma 5:12) Yehova wakelisha antu amwovwahilaña kwikala awanina kushindamena hefutu danyiloña daYesu. Nkumininaku chilumbu wakukumishaku, kufwa, “akamujilumuna.” (1 Akorinda 15:26) Antu ashinshika akashakama neyi chakeñeleña Nzambi nindi ashakameña, akola kumujimba haya nyaaka.
“Hikwakekala . . . kukataku.” (Chimwekeshu 21:4) Kukata kwamuchidinyi kwakamana? Kukata kwejima kwamuyitoñojoka, nikwakumujimba, kwafumaña munshidi nikubula kuwanina nawa kwatamishaña chihandilu chawantu amavulu kukamana.
(Chimwekeshu 21:5) Nawa Owu washakamini hetanda wahosheli nindi: “Talaña! Inakwilisha yuma yejima yiikali yayiha.” Cheñi wahosheli nindi: “Sonekaku, muloña awa mazu atelela kuyikuhwelela nawa alala.”
w03 8/1 12¶14
Yehova, Nzambi yaChalala
Twatela kulemesha yuma yatulejaña Yehova Mwizu dindi. Yena diyi momwekalilayi, nawa welaña chuma chejima chinakeñiyi. Kwosi chuma chikutukañesha kumukuhwelela Nzambi. Twakuhwelelaña neyi Yehova yahosha nindi “[wakatenda] antu abula kumwiluka Nzambi niabulaña kwovwahila nsañu yayiwahi yahosha hadi Mwanta wetu Yesu.” (2 Atesalonika 1:8) Cheñi twamukuhwelelaña Yehova neyi yahosha nindi wakeña antu afwilaña kuloña, wakayinka antu amukuhwelela wumi wahaya nyaaka, nawa nindi wakafumishahu kukata, kudila nikufwa. Yehova wamwekesha nindi ichi chikanini chindi chakukumishaku chalala kuhitila mukumuleja kapostolu Yowanu nindi: “Sonekaku, muloña awa mazu atelela kuyikuhwelela nawa alala.”—Chimwekeshu 21:4, 5; Yishimu 15:9; Yowanu 3:36.
Kukeña Yuma Yalema yakuSpiritu
(Chimwekeshu 20:5) (Afu ejima ashalilihu hiyekalili amomi cheñiku, sampu nichamanini yaaka 1,000.) Iku diku kusañuka kwatachi.
it-2 249 ¶2
Wumi
Mulushimbi lwamwinkeliwu Adama, Nzambi watalishili mukwila nindi neyi Adama yovwahila wadi kufwa wanyi. (Kut 2:17) Dichi kudi antu ovwahila, neyi chilumbu chawantu wakukumisha, dikwila nawu kufwa, anamujilumuni dehi, hiyakekala nanshidi yaletaña kufwaku. Akashakamaña haya nayaaka chakadi kufwa. (1Ko 15:26) Dichi kufwa akakwijilumuna kumakumishilu achiyuulu chaKristu chashimunawu mumukanda waChimwekeshu nawu chikayuula yaaka 1,000. Hamwekesha nawu owu akekala anyana niatupristu hamu naKristu “ekalili amomi cheñi nawa ayuulili neyi anyanta hamu naKristu hadi yaaka 1,000.” “Afu ejima ashalilihu” hiyakekala amomiku “sampu nichamanini yaaka 1,000” atela diwu adiña amwomi kumakumishilu ayaaka 1,000, ilaña henohu Satana kanda amufumishi mwikela nakweseka chikupu antu kakukumishaku. Hakumana kwayaaka 1,000, antu akekala awanina, nakwikala neyi chadiñawu aAdama naEva henohu kanda akoñi nshidi. Dihu dinu hakekalawu nawumi wawanina. Antu akwomika neyi Satana anamukasununiku mwikela hadi kapinji kantesha akashakamaña haya nyaaka.—Chi 20:4-10.
(Chimwekeshu 20:14, 15) Kufwa niIjamu ajuumbilili mwijiya dakesi. Idi ijiya dakesi demenañaku kufwa kwamuchiyedi. 15 Kubombelahu, muntu wejima wabulili kusonekawu mumukanda wawumi, amuumbilili mwijiya dakesi.
it-2 189-190
Ijiya Dakesi
Awa mazu ekala hohu mumukanda waChimwekeshu nawa mwalala hichifwija. Bayibolu yalumbulula mwatalisha ichi chifwikija hakuhosha nawu: “Chumichi chinakwimenaku kufwa kwamuchiyedi,” ijiya dakesi.”—Chi 20:14; 21:8.
Kutoha kwejiya dakesi kachifwikija akulumbulula hansona jikwawu jahosha hansañu yoyimu mumukanda waChimwekeshu. Kufwa akakunatila munidi ijiya dakesi. (Chi 19:20; 20:14) Kufwa kwila akwocha mukesi kitweluka nehi. Dimuloña waweni, Diyabolu, chileñaleña wakuspiritu wabulaña kumwekana, amunatila mwijiya dakesi. Chineli hichileñaleña wakuspiritu, kwila amwocha mukesi kitweluka nehi.—Chi 20:10; esekejenu Kwi 3:2 ni Ans 13:20.
Chineli ijiya dakesi demenañaku “kufwa kwamuchiyedi” nawa chineli nsona ya Chimwekeshu 20:14 yahosha nawu “kufwa niIjamu” akajinatila munidi ijiya dakesi, chamwekeshaña nawu ijiya hidemenañaku kufwa kwaswanini antu kudi Adama (Rom 5:12), hela Ijamuku (Shelu). Datela kutalisha kukufwa kwachifwikija, kwakubula kusañuka, kwosi hamwekesheña nawu idi “Ijiya” dikedisha antu adimu, neyi chekala kufwa kwaleteliyi Adama niIjamuku (Shelu). (Chi 20:13) Dichi, owu akabula kusonekawu “mumukanda wawumi,” akwakudikaña nachiyuulu chaNzambi abulaña kubalumuka mumuchima, akayinatila mwijiya dakesi, chaya mukwila nawu kujilumuka kwahaya nyaaka, hela kufwa kwamuchiyedi.—Chi 20:15.
Kutaña Bayibolu
(Chimwekeshu 20:1-15) Nawa namweni kañelu nakufuma mwiwulu iku nakwati nsapi yakwikela niileñi deneni muchikasa chindi. 2 Dichi wakwatili owu chanzañombi, yowu kapela wakushankulu, diyi Diyabolu nawa Satana, nakumukasa hadi yaaka 1,000. 3 Nawa wamuumbilili mwikela, wamwenzeleliku nikulamikaku chilamiku hewulu kulonda yabuli kutwesha kuluwañesha cheñi akwanyuza kushika nimpinji yakakuma yaaka 1,000. Hanyima yachumochu, atela kumukasununaku hakapinji kantesha. 4 Namweni matanda, nawa owu ashakaminihu ayinkeli wuswa wakusompesha. Namweni mawumi anowu ajahiliwu kukoola wunsahu washimwiniwu hansañu yaYesu nikukoola kuhosha hansañu yaNzambi, ninowu abulili kudifukula kudi kanyama wamwisaña chisumi hela kudi chifwikija chindi nawa abulili kwiteja kuyisha chinjikijilu hamahama awu nihamakasa awu. Wenowu ekalili amomi cheñi nawa ayuulili neyi anyanta hamu naKristu hadi yaaka 1,000. 5 (Afu ejima ashalilihu hiyekalili amomi cheñiku, sampu nichamanini yaaka 1,000.) Iku diku kusañuka kwatachi. 6 Wudi namuzañalu nikujila yowu muntu wakekala muchibalu chakusañuka kwatachi; kufwa kwamuchiyedi hikudi nawuswa hadi wenawaku, ilaña akekala atupristu aNzambi niaKristu, nawa akayuula neyi anyanta hamu nayena hadi yaaka 1,000. 7 Chakamana hohu yaaka 1,000, Satana akamukasununa kufuma mukaleya, 8 nawa wakaya nakuluwañesha akwanyuza adi kumawombu awana eseki, atenañawu nawu Gogi niMagogi, nakuyipompesha hamu kunjita. Kuvula kwawu kudi neyi kuvula kwawusekulula wakukaluñalwiji. 9 Nawa apalañeneni kwejima kwakumina iseki nikukuchika chilombu chawakwakujila nimusumba wakeñewa. Ilaña kesi kafumini mwiwulu nakuyijilumuna. 10 Nawa Diyabolu wayiluwañesheleña, amuumbilili mwijiya dakesi nimumulañi wakesi kamalola abutukaña kesi, omu mwadiña kanyama wamwisaña chisumi nikaprofwetu wakutwamba; nawa akayikabishaña mwaana niwufuku haya nyaaka nanyaaka. 11 Namweni itanda deneni ditooka niNowu washakaminihu. Iseki niiwulu jatemukili kumesu indi nawa hijawanikilihu cheñiku. 12 Namweni afu alema niabula kulema anemani kwitanda, nawa kwadiña nyivuñilu yakuvuñulula dehi. Ilaña muvuñilu wukwawu awuvuñulwili; wenowu wadiña muvuñilu wawumi. Dichi afu ayisompesheli kushindamena hayuma yasonekeliwu munyivuñilu kwesekeja nanyidimu yawu. 13 Kaluñalwiji kalubwili afu adiñamu, kufwa niIjamu nijena jalubwili afu adiñamu, nawa ayisompesheli hamuntu-hamuntu kwesekeja nanyidimu yawu. 14 Kufwa niIjamu ajuumbilili mwijiya dakesi. Idi ijiya dakesi demenañaku kufwa kwamuchiyedi. 15 Kubombelahu, muntu wejima wabulili kusonekawu mumukanda wawumi, amuumbilili mwijiya dakesi.