munjila jamboka-mboka nawa twatela kuwilondela chikupu. Hampinji yadiña muza wawaIsarela nachikuhwelelu, Mwanta Davidi wahosheli nindi: “Ankakulula jetu akukuhweleleleyi; akuhweleleli, eyi wayipulwishili. Abileleli kudeyi, apulukili; akukuhweleleli, hiyatiyili nsonyuku.” (Masamu 22:3-5) Neyi tukuhwelela chikupu nakulondela wunlomboli waYehova, ninetu ‘hitwakatiya nsonyuku.’ Kuchiñeja kwetu hikwakekala kwamukunkulwayuku. Neyi ‘tukukunjika njila jetu kudi Yehova,’ chatela tushindameni hamaanetu, niyinu mpinji tunateli kutambwila nkisu jajivulu. (Masamu 37:5) Neyi tutwalekahu kumwovwahila Yehova nakashinshi, iyi nkisu yikatwalekahu. Mwanta Davidi wasonekeli nindi: “Yehova wakeña wuñaji, hashiyaña antu indi ajilaku, wayihembaña nyaka yejima, . . . Akwakuloña akaswana ituña, akashakamamu haya nyaka.”—Masamu 37:28, 29.

Munateli Kulumbulula?

• Muloñadi wutwakuhwelela wunlomboli waYehova?

• Neyi tukaana wunlomboli waYehova chikumwekeshadi?

• Muyumanyi munateli kumwekeshelayi mukwaKristu kudizoza?

• Indi Yehova watulombolaña ñahi makonu?

Atwansi Anukenu Nleñi Yenu Yoyinu Mpinji

“Anukaña nawa Nleñi yeyi mumafuku awukwenzi weyi.” —MUKWAKUTAŊISHA. 12:1.

1. Indi Yehova wamwekesha ñahi nindi wayikuhwelela atwansi adifukulaña kudi yena?

YEHOVA wamonaña atwansi akwaKristu nindi alema neyi chamonañayi mamata awuumi. Dimu, washimwineñahu dehi nindi mwifuku damwanindi “dañovu” atwansi awamayala niawambanda ‘akadilambula namuchima wawu wejima’ mumudimu waKristu. (Masamu 110:3) Iwu wuprofwetu wunakushikijewa mumafuku etu, chineli antu amavulu anakudikaña naNzambi, anadiñiji mukufwila yuma yinakukeñawu nikukeña mali nikubula kwovwahila. Ilaña, Yehova welukili nindi atwansi adifukulaña kudi yena akekala ambukaku. Yehova wayikuhwelela chikupu enu amana kwetu niahela awatwansi.

2. Yumanyi yabombela mukumwanuka Yehova?

² Nzambi wazañalalaña chikupu hakumona atwansi anakumwanuka hamu neyi Nleñi yawu. (Mukwakutaŋisha 12:1) Mwalala, kumwanuka Yehova kwabombelamu yuma yayivulu kubadika kutoñojoka hohu hadi yena. Chatalisha mukwila yuma yamuzañaleshaña, nikwiteja nshimbi jindi kulonda kutwilombola muchihandilu chetu chejima. Cheñi chatalisha mukukuhwelela Yehova, nikwiluka netu watwakamenaña chikupu. (Masamu 37:3; Isaya 48:17, 18) Komana mwatoñojokaña nenu Nleñi yenu wayakamenaña?

“Mukuhweleli Yehova naMuchima Weyi Wejima”

3, 4. Indi Yesu wamwekesheli ñahi kukuhwelela mudi Yehova, nawa muloñadi chichalemena kukuhwelela mudi Yehova makonu?

³ Yesu Kristu diyi wemikili chakutalilahu chachiwahi chikupu, chakumukuhwelela Nzambi. Walondeleleña mazu asonekawu haYishimu 3:5, 6: akwila nawu “Mukuhweleli