Musumba waUri wadiña kwakwihi naBabeli, nawa antu amuniwu musumba adifukwileña kudi anzambi amavulu chatela adifukuleña kudi Yehova. Ilaña muUri mwadiña iyala wumu wadifukwileña hohu kudi Yehova. Ijina dindi Abarahama.

Yehova wamulejeli Abarahama nindi: ‘Shiyaku mukala weyi niantaña jeyi wuyi mwituña dinukukuleja.’ Kuhiñahu Nzambi wamushiikili nindi: ‘Wakekala muza weneni nawa nakelila antu amavulu yuma yayiwahi mwahita iseki dejima muloña waneyi.’

Abarahama welukili wanyi kwamutemesheleñawu kudi Yehova, ilaña wamukuhweleleli Yehova. Dichi Abarahama, ñodindi Sara, tata yindi Tera nimwihwindi Loti, aloñejekeli yuma yawu nawa ovwahilili nakutachika kuya lwendu lwawu lwalulehi.

Abarahama wadiña nayaaka 75 hashikiliyi yena nichisaka chindi mwituña dakeñeleñayi Yehova nindi adimoni. Aditeneneña nawu ituña daKenani. Kwenoku Nzambi wahosheli naAbarahama nakumushiika ichi chikaninu nindi: ‘Idi ituña dejima diwunakumona, nakayinkadu anyaneyi.’ Ilaña aAbarahama naSara adiña akula dehi nawa hiyadiña nawanyanaku. Hanu dinu chumanyi chadi kwilayi Yehova hakwila chuma chayishiikiliyi chikamwekani?

Haniyi mpinji Abarahama naSara adiña ashakama dehi muwulu hadi yaaka yayivulu. Ashili mukala wawu wawuwahi muUri nakuya nakutachika kushakama mwitenti. Ilaña Sara hadiña nakutoobaku, muloña wamukuhweleleli Yehova.

Sara wakeñesheleña mwana nankashi chakwila wamwilili Abarahama nindi: ‘Neyi ñamba yami Haga ekala namwana wukwikala hohu neyi mwanami.’ Chimwahitili mpinji, Haga wavweli mwana weyala. Ijina dindi wadiña Ishimayeli.

Chimwahitili yaaka yayivulu, hadiñayi Abarahama nayaaka 99 nawa Sara hadiñayi nayaaka 89 atambwilili añenji asatu. Abarahama wayilejeli nindi ashakami mwishina damutondu kulonda ayinkihu yakuda. Wunayiluki awa añenji enjili? Adiña añelu! Amulejeli Abarahama nawu: ‘Chaaka chinakwinza hayoyinu mpinji eyi niñodeyi Sara mwakekala namwana weyala.’ Sara wadiña mwitenti nakutiyilila. Sara waseheli nakuhosha mumuchima nindi: ‘Komana mwamweni nateli kwikala namwana iku nakula dehi chikupu?’

Chaaka chalondelelihu Sara wavweli mwana weyala neyi chashiikiliyi kañelu kaYehova. Abarahama wamutuumbili nindi Isaka, daya mukwila nawu “Tusehu.”

Isaka chashikijiliyi yaaka yitanu, Sara wamweni Ishimayeli nakumukabisha Isaka. Sara wakeñeleña kumukiña mwanindi, dichi wayili kudi Abarahama nakumuleja nindi amuhañi Haga niIshimayeli. Hakusambila, Abarahama hakeñeleña kuyihañaku. Ilaña Yehova wamulejeli Abarahama nindi: ‘Mutiyilili Sara. Nukumuhembaña Ishimayeli. Ilaña yikaninu yami yakashikijewela mudi Isaka.’