Mwituña daUzi, mwadiña iyala wadifukwileña kudi Yehova. Ijina dindi Yoba. Wadiña namaheta amavulu nichisaka cheneni. Wadiña naluwi nawa wakwashileña atuzweñi, ambanda afwishili anfumu jawu nianyana abulili anvwali jawu. Chineli Yoba welileña yuma yayiwahi, komana hadi kumonahu kukala wanyi?

Yoba welukili wanyi, ilaña Satana Diyabolu wadiña nakumutala. Yehova wamulejeli Satana nindi: ‘Wunamumoni kambuñami Yoba? Kwosi muntu hela wumu wudi neyi yena hamasekiku. Wantiyililaña nawa welaña yuma yaloña.’ Satana wamwakwili nindi: ‘Mwamweni Yoba wakwovwahilaña. Wamukiñaña nikumukiswila. Wamwinka mpata niyimuna. Mutambuli yuma yejima, nawa wukuleka kudifukula kudi eyi.’ Yehova wahosheli nindi: ‘Wunateli kumweseka Yoba. Ilaña bayi wumujahaku.’ Muloñadi Yehova chamwitejeleliyi Satana nindi amweseki Yoba? Muloña wamukuhweleleli Yoba nindi wukuhemba kashinshi kindi.

Satana watachikili kumweseka Yoba nakukala kwakuvulu. Wasambilili kutemesha aSabeyani kulonda eyi añombi niayimbuulu jaYoba. Kuhiñahu kesi kajiyishili nyikoku yaYoba yejima. Izanvu dikwawu dawantu ateneneñawu nawu aKalideya, deyili angameli jindi. Ambuñindi ahembeleña yimuna ayijahili. Kufumahu, wamweni kukala kwasweja. Anyana kaYoba ejima afwili helili itala mwadiilileñawu chidika diyihumukili. Yoba waneñeli nankashi, ilaña halekeli kudifukula kudi Yehovaku.

Satana wakeñeleña nindi Yoba akabakani nankashi, dichi wamuleteleli yilonda hamujimba wejima. Yoba watiyileña kukata chikupu. Welukili wanyi chale tesheleña iku kukala kwejima kumumwekeneña. Hela chochu, Yoba watwalekelihu kudifukula kudi Yehova. Nzambi wamweni chomikileñayi Yoba iku kukala kwejima, nawa wamutiyileña kuwaha chikupu.

Kuhiñahu Satana watemesheli amayala asatu kulonda amweseki Yoba. Amulejeli nawu: ‘Hadaha wunakoñi nshidi nawa wunakukeña kuyisweka. Nzambi diyi wunakukubabesha.’ Yoba waakwili nindi: ‘Ami hinnakoñihu muloña wudi wejimaku.’ Ilaña watachikili kutoñojoka nindi Yehova diyi waleteli iku kukala kwejima, nawa wahosheli nindi Nzambi wamwilileña chatama.

Kansi weyala Elihu wamweneni nakutiyilila chahanjekeleñawu. Kuhiñahu wahosheli nindi: ‘Yuma yimunahoshi wejima wenu yakutwamba. Yehova himuneni nankashi. Hanateli kwila chuma chidi chejima chatamaku. Wamonaña yuma yejima nawa wakwashaña antu anakumona kukala.’

Kuhiñahu Yehova wahosheli naYoba nindi: ‘Wadiña kudihi hinatuñili iwulu niiseki? Muloñadi chiwunahosheli neyi natama? Wahosha, ilaña wuneluki wanyi chinaleteshi iyi yuma yimwekani.’ Yoba wetejeli chiluwa chindi nawa wahosheli nindi: ‘Naluwañesha. Nakutiyileña hohu namatu ami, ilaña ichi nakwiluki dehi. Kwosi chuma chiwunateli kukañanyaku. Añanakeniku nachinahosha.’

Chamanishiliwu kumweseka, Yehova wamukolesheli Yoba nawa wamwinkeli yuma yayivulu kubadika yadiñayi nayu hakusambila. Yoba washakamini yaaka yayivulu nawa wadiña namuzañalu. Yehova wamukiswilili chamwovwahilililiyi hela chakwila yuma yamukalilili. Komana wunateli kwikala neyi Yoba nakutwalekahu kudifukula kudi Yehova, hela chakwila yuma yinakali?

MuEjipitu, chisaka chaYakoba achilukili nawu hiyaIsarela. Chelili aYakoba naYosefu anafwi dehi, Fwaru wacheñi watachikili kuyuula. Watiyili woma nindi aIsarela atachikili kwikala nañovu kubadika aEjipitu. Dichi Fwaru wayilishili aIsarela kwikala anduñu. Wayikanjikijileña kufwatula matafwali nikuyizatisha nyidimu yakola nankashi mumaha. Ilaña aEjipitu chayikanjikijileñawu aIsarela kuzata nyidimu yakola, aIsarela dihavulileñawu nankashi. Chineli Fwaru hakeñeli nindi aIsarela avuleñaku, wahanini lushimbi nindi anyana awamayala ejima akuvwalikaña kudi aIsarela ayijaheña. AIsarela akameneni chikupu!

KaIsarela wamumbanda wejina daYokebedi wavweli mwana weyala walubanji. Hakwila amukiñi, wamushili mubasiketi nawa wamuswekeli mumateti kuKaloña Nile. Ilaña Miriyamu, muhela aniwu mwana, wemeneni hahalehi kulonda amoni chuma chikumwekana.

Mwana kaFwaru wamumbanda wenjili nakuwela kukaloña nawa wamweni iyi basiketi. Chajikwiliyi mukachi wawaninimu mwana nakudila nawa wamutiyilili wushona. Miriyamu wamwihwili nindi: ‘Niyi nakatambiki mumbanda kulonda akuleleleñaku iwu mwana?’ Mwana kaFwaru chetejeliyi, Miriyamu wayili nakuleta mama yindi Yokebedi. Mwana kaFwaru wamulejeli nindi: ‘Sendaku iwu mwana wakanleleliyi, nawa nakakufweta.’

Chakuliliyi iwu mwana, Yokebedi wamutwalili kudi mwana kaFwaru, yena wamutuumbili nindi Mosi nawa wamuhembeli neyi mwanindi wakudivwela. Mosi amukulishili neyi mwana kamwanta nawa amwinkeleña yuma yejima yakeñeleñayi. Ilaña Mosi hamuvulameneni Yehovaku. Welukili nindi wadiña kaIsarela, bayi mwini Ejipituku. Nawa watondelihu kumukalakela Yehova.

Chashikijiliyi yaaka 40, Mosi wafuukwilihu kukwasha akwawu aIsarela. Chamweniyi mwini Ejipitu nakweta nduñu kaIsarela, Mosi wamweteli nawa wafwili. Waswekeli mujimba waniwu muntu muwusekulula. Fwaru chelukiliyi, wakeñeleña kumujaha Mosi. Ilaña Mosi watemukilili mwituña daMidiyani. Yehova wamuhembeleña chiwahi.