Yehova wamwilili Mosi nindi: ‘Kandamaku hanu hampidi. Nukusoneka nshimbi jami hamalola awubasa nawa nukukwinkawu.’ Mosi wakandamini hampidi nawa washakaminihu mafuku 40, mwaana niwufuku. Hadiñayi hampidi, Yehova wasonekeli Nshimbi 10 hamalola awubasa ayedi nawa wamwinkeliwu Mosi.

Chimwahitili mpinji, aIsarela atoñojokeli nawu Mosi nayishiyi. Amwilili Aroni nawu: ‘Tunakukeña muntu wukutulombolaña. Tutuñili nzambi!’ Aroni wayilili nindi: ‘Nyinkenu wuru yenu.’ Wasuñunwini oyu wuru nawa wabazilimu chifwikija chamwana kañombi. Antu atachikili kuhosha nawu: ‘Iwu mwana kañombi diyi Nzambi yetu watufumishili mwituña daEjipitu!’ Atachikili kudifukula kudi mwana kañombi wakutuña nawuru, nawa ekalili nachawija. Komana chuma cheliliwu chadiña chatama? Eña, muloña antu ashiikili nawu akudifukulaña hohu kudi Yehova. Ilaña haniyi mpinji atachikili kufumpa ichi chikaninu.

Yehova wamweni chuma chadiña nakumwekana, dichi wamulejeli Mosi nindi: ‘Sulukaku wuyi kudi antu. Anakudikaña nanami nawa anakudifukula kudi nzambi wakutwamba.’ Mosi wasulukili hampidi iku nasendi malola awubasa ayedi.

Chashikiliyi kwakwihi nachilombu, Mosi watiyili antu anakwimba. Kuhiñahu wamweni antu anakuhañana nikunoñamina mwana kañombi. Wahilili nankashi. Wanatili malola awubasa ayedi heseki nawa abalokeli. Hohenohu wakisañeni ichi chifwikija. Kuhiñahu wamwihwili Aroni nindi: ‘Awa antu akukanjikija ñahi hakwila wili chuma chatama ñana?’ Aroni wamwakwili nindi: ‘Bayi wuzuwaku. Wayiluka chekalawu awa antu. Akeñaña nzambi, dichi nanatila wuru yawu mukesi nawa mwafuma iwu mwana kañombi!’ Aroni hateleleli kwila chuma chamuchidiwuku. Mosi wakandamini cheñi hampidi nawa walembeli kudi Yehova nindi ayanakeni awa antu.

Yehova wayanakeneni antu afwilileña kumwovwahila. Wunamoni chichawahilili aIsarela kulondela wunlomboli waMosi?

Hampinji yadiñayi Mosi haMpidi yaSinayi, Yehova wamulejeli nindi atuñi itenti dadimena, dakatenañawu nawu tabanaka, mwakadifukwilañawu aIsarela kudi Yena. Iyi tabanaka akayisendaña kwejima kwakayañawu.

Yehova wamulejeli nindi: ‘Lejaku antu ahani yuma yikwetiwu yakukwasha kutuña nachu tabanaka.’ AIsarela ahanini wuru, siliva, wuneñu, malola alema wuseya niyingelingeli. Ahanini niwanda, mahina, yitembi yawanyama, kushilahu niyuma yikwawu yayivulu. Ahanini yuma yayivulu nankashi chakwila Mosi wayilejeli nindi: ‘Yinashikili. Bayi muletelahu yuma yikwawuku!’

Amayala amavulu niambanda elukili nyidimu akwashili mudimu wakutuña tabanaka. Yehova wayinkeli maana akuzata iwu mudimu. Amakwawu ashintileña wanda, kupikula mahina hela kuchiminahu tuyuma. Amakwawu abalwileña malola, kutuña yuma yawuru hela yanyitondu.

Antu atuñili tabanaka neyi mwomwayilejeleliyi Yehova. Atuñili ihina dakujika nachu dadiwahi dakwaambula nachu tabanaka hayedi, Mwajila naMwajila Chikupu. Mwajila Chikupu dimwadiña chimbañu chachitiyañenu, chatuñiliwu nanyitondu yanyizenzi ninawuru. Mwajila mwadiña chakutentekahu manoñu chawuru, mesa nikameña kakwochelahu insensi. Mulubanza mwadiña beseni yawuneñu nikameña keneni. Chimbañu chachitiyañenu chayanukishileña aIsarela chikaninu chawu chakumwovwahila Yehova. Wachiluka chitiyañenu? Hichikaninu chadimena.

Yehova watondeli Aroni nianyanindi awamayala kulonda azateña nyidimu yawupristu hatabanaka. Akameneneña tabanaka nikulambwilamu nyilambu kudi Yehova. Chiña Aroni hohu, kapristu muneni, diyi etejeliwu kwiñila Mwajila Chikupu. Weñilileñamu kamu hachaaka nakulambula mulambu wanshidi jindi, jachisaka chindi nijamuza wejima waIsarela.

AIsarela amanishili kutuña tabanaka chimwahitili chaaka chimu kufuma hedikiliwu muEjipitu. Ichi dinu ekalili neluña dakudifukwilamu kudi Yehova.

Yehova wenzesheli tabanaka nakulema kwindi nawa washili ivu hewulu databanaka. Neyi chakwila ivu didi hewulu databanaka, aIsarela hiyanyamukileña nakuyaku. Ilaña neyi ivu difumahu, elukileña nawu mpinji yakunyamuka yinashiki. Tabanaka ayikasunwineña hakuyisenda nawa hiyakulondela munakuya ivu.