AIsarela afumini kuMpidi yaSinayi, ahitili muchinkalampata chaParani nakushika kwiluña dateneneñawu nawu Kadeshi. Kwenoku Yehova wamulejeli Mosi nindi: ‘Temeshaku amayala 12, kumuchidi-himuchidi wusendiku iyala wumu-wumu kulonda ayi nakwendesha Kenani, ituña dinakayinka aIsarela.’ Dichi Mosi watondeli amayala 12 nawa wayilejeli nindi: ‘Yenu kuKenani mwakamoni neyi odu ituña dikweti wushi. Mwakamoni antu neyi akola hela azeya nawa neyi ashakamaña mumatenti indi kwiji munyisumba.’ Awa akakwendesha ituña 12, mwabombeleli aYoshuwa naKalebu, anyamukili nakuya kuKenani.

Chimwahitili mafuku 40, awa akakwendesha ituña afuntili, enjili nayikuyu, mapomegiranati ninyivinyu. Enjili nakuhosha nawu: ‘Hiituña dadiwahi, ilaña antu ashakamamu akola nawa nyisumba yidimu yikweti mpwembu jajilehi.’ Kuhiñahu Kalebu wahosheli nindi: ‘Tunateli kuyishinda. Tuyenu chochichi! Wuneluki cheletesheli Kalebu ahoshi muniyi njila? Muloña yena niYoshuwa amukuhweleleli Yehova. Ilaña awa akakwendesha ituña amakwawu 10 akaanini nawu: ‘Inehi! Antu adimu amaneni, ataluka! Chitwadesekejeli nawu, etu twamwekeni neyi ampasu.’

AIsarela atiyili woma. Atachikili kutooba nakudileja mulwawu nawu: ‘Tutondenu nlomboli wacheñi kulonda tufunti kuEjipitu. Muloñadi chitukuyila kunidi iluña kulonda akatujahi?’ AYoshuwa naKalebu ahosheli nawu: ‘Bayi mudikaña naYehovaku, nawa bayi mutiya womaku. Yehova wukutukiña.’ Ilaña aIsarela atiyilili wanyi. Akeñeleña nikuyijaha aYoshuwa naKalebu!

Chumanyi cheliliyi Yehova? Wamulejeli Mosi nindi: ‘Yuma yejimiyi yinnayilili aIsarela ilaña achidi kudikaña nanami. Akashakama yaaka 40 mwisaña nawa dimwakafwilawu. Anyanawu, kushilahu aYoshuwa naKalebu diwu hohu akashakama mwituña dinayikanini kuyinka.’

Chimwahitili mpinji, hadiñawu aIsarela mwisaña, Kora, Datani, Abirami, kushilahu niantu amakwawu 250 adikañili naMosi. Amwilili nawu: ‘Tunazeyi nakukutiyilila! Muloñadi chiwukwikalila nlomboli yetu nawa Aroni wukwikaliladi kapristu muneni? Yehova wudi mukachi ketu wejima wetu, bayi neyi wudi hohu naneyi niAroniku.’ Yehova watiyili kutama. Wamweni nindi anadikañi nayena!

Mosi wamulejeli Kora niantu amuhakwilileñaku nindi: ‘Kumadiki mwakenzi kutabanaka nawa mwakasendi jakusendelahu kesi mwakashihu insensi. Yehova wakatuleja wunatondiyi.’

Ifuku dalondelelihu, Kora niamayala 250 ayili nakudibulakana naMosi kutabanaka. Kwenakuna ocheli insensi neyi kwiji hiyatupristu. Yehova wayilejeli aMosi naAroni nindi: ‘Dambulenu nakufuma kudi Kora niantu jindi.’

Hela chakwila Kora wayili nakudibulakana naMosi kutabanaka, Datani, Abirami niyisaka yawu akaanini kuyaku. Yehova wayilejeli aIsarela kufuma kumatenti aKora, Datani niAbirami. Hohenohu aIsarela afuminiku. Datani, Abirami niyisaka yawu ameni kwakwihi namatenti awu. Hohenohu iseki dabalukili hakachi nawa dayiminyini! Kutabanaka kesi kafumini mwiwulu nawa kamwocheli Kora niantu jindi 250.

Kuhiñahu Yehova wamulejeli Mosi nindi: ‘Tambulaku mukombu kudi nlomboli wachisaka-hichisaka nawa wusonekihu ijina dindi. Ilaña hamukombu wakumuchidi waLevi wusonekihu ijina daAroni. Wujitenteki mutabanaka, nawa mukombu wamuntu inukutonda wukusapuka nkenu.’

Ifuku dalondelelihu, Mosi wedishili nyikombu yejima hanji nakuyileta kumesu awalomboli. Mukombu waAroni wakenukili nkenu nawa kwadiña maamondi aha. Chumichi chamwekesheli nawu Yehova wamutondeli Aroni kwikala kapristu muneni.