AIsarela akakwendesha ituña chayiliwu mumusumba waYeriku, ashakamini kwitala damumbanda wejina daRahaba. Mwanta wakuYeriku chelukiliyi, watemesheli amashidika kwitala daRahaba. Awa akakwendesha ituña ayedi wayiswekeli hewulu detala nawa wayilejeli amashidika nindi ayi kukabadi kacheñi. Wayilejeli akakwendesha ituña nindi: ‘Nukuyikwasha muloña neluki nami Yehova wudi kukabadi kenu nawa mukushinda idi ituña. Mwani sanyikenu kudi ami nenu mwakapulwisha chisaka chami.’

Akakwendesha ituña amulejeli Rahaba nawu: ‘Kwosi niwumu wakakatishawu mwitala deyi.’ Amulejeli cheñi nawu: ‘Wakakasi mwonji wuchinana muwindu, nawa chisaka cheyi chakapuluka.’

Rahaba wayisulwishilili awa akakwendesha ituña hawindu namwonji. Ayili kumapidi nawa aswamini kwenoku hadi mafuku asatu henohu kanda afunti kudi Yoshuwa. Kuhiñahu aIsarela azambukili Kaloña Yodani nawa adiloñesheli kulonda atambuli ituña. Yeriku diwadiña musumba watachi washindiliwu. Yehova wayilejeli kunyeñumuka musumba kamu hefuku hadi mafuku 6. Hefuku damu 7, anyeñumukili musumba mapampa 7. Kuhiñahu atupristu avumishili mpuña jawu nawa amashidika abidikili namazu atiyakana. Mbañu jamusumba jahumokeli! Ilaña itala daRahaba, dadiña hampwembu dahumukili wanyi. Rahaba nichisaka chindi apulukili muloña wamukuhweleleli Yehova.

Yuma yamwekeni muYeriku yataandili nikunyuza yikwawu muKenani. Anyanta jawu adibombeli hamu kulonda enzi nakuzuña nawaIsarela. Ilaña aGibeyoni akwatili kafuta kambukaku. Ayili kudi Yoshuwa iku anavwali yakuvwala yataboka nakumuleja nawu: ‘Tunafumi kwituña dakwakulehi. Tunatiyi mpuhu hadi Yehova niyuma yejima yayilililiyi muEjipitu nimuMowabi. Sanyikaku neyi mwakatulukuka wanyi nawa etu twakekala ambuñenu.’

Yoshuwa wayikuhweleleli nawa wetejeli nindi hakayilukukaku. Chimwahitili mafuku asatu welukili nindi hiyafumini kwiluña dakwakulehiku. Afumini mwituña daKenani. Yoshuwa wayihwili aGibeyoni nindi: ‘Muloñadi chimwatudimbilili?’ Aakwili nawu: ‘Twatiyili woma! Tuneluki netu Yehova Nzambi yenu nakuyizuñilaku. Mwani bayi mutujahaku.’ Yoshuwa welili mwakaniniyi nawa hayijahiliku.

Hashimbwili wanyi, anyanta awaKenani atanu hamu nawamashidika awu ayichiinishili aGibeyoni. Yoshuwa hamu nawamashidika indi ahitañeni wufuku wejima kulonda ayamwini. Atachikili kuzuña ifuku dalondelelihu nantetemena. Eni Kenani atachikili kutemokela kutubadi twashiyashana. Kwejima kwatemukilileñawu, Yehova wanokesheleña nvula yeneni yamalola hadi wena. Kuhiñahu, Yoshuwa wamulombeli Yehova nindi emiki itena kuka-a. Muloñadi chamulombeleliyi Yehova kwila chumichi henohu itena kanda diimaneñahu dehi kuka-a? Muloña Yoshuwa wamukuhweleleli Yehova. Mwaana wejima itena hidahuminiku, sampu niaIsarela chashindiliwu anyanta awaKenani hamu nawamashidika awu.