Hanyima yakulombola antu jaYehova hadi yaaka yayivulu, Yoshuwa wafwili hashikijiliyi yaaka 110. Hachidiñayi wamumi, aIsarela adifukwileña kudi Yehova. Ilaña chafwiliyi, aIsarela atachikili kudifukula kudi ankishi neyi chelileñawu aKenani. Chineli aIsarela alekeli kumulondela Yehova, wetejeli Yabini mwanta wawaKenani kulonda ayikabishi. Antu alembeli kudi Yehova nawu ayikwashi. Dichi Yehova wayinkeli nlomboli wamuha, Baraki. Wadi kukwasha antu kulonda afunti kudi Yehova.

Debora kaprofwetu wamumbanda wamutambikili Baraki. Wakeñeleña kumuleja nsañu yafumini kudi Yehova nindi: ‘Sendaku amayala 10,000, wuyi nakudibulakana namashidika aYabini kukaloña Kishoni. Kwenoku wakamushinda Sisera mukulumpi wamashidika aYabini.’ Baraki wamulejeli Debora nindi: ‘Nukuya neyi wukuya hamu nanami.’ Debora wahosheli nindi: ‘Nukuya hamu naneyi. Ilaña ilukaku neyi yeyi wukumujaha Sisera wanyi. Yehova nashimuni nindi wamumbanda diyi wukumujaha.’

Debora wayili hamu naBaraki niamashidika indi kuMpidi yaTabori kulonda azuñi njita. Sisera chatiyiliyi iyi nsañu, wapompesheli makalu indi anjita nimazanvu amashidika muchinekineki. Debora wamulejeli Baraki nindi: ‘Dalelu didu ifuku dikukukwashayi Yehova kushinda.’ Baraki niantu jindi 10,000 afumini hampidi nakuya nakudibulakana namashidika aSisera añovu.

Yehova wakojejeli kaloña Kishoni kwinzala. Makalu aSisera akañenyi kwenda mumalowa. Sisera washiyili ikalu dindi nakutachika kutemuka. Baraki namashidika indi ashindili mashidika aSisera, ilaña Sisera watemukili! Watemukili nakuya nakuswama mwitenti damumbanda wejina daYayeli. Yayeli wamwinkeli Sisera mayeli nindi anwi, kufumahu wamubutili mwemba. Iwu mushidika wazeyeli wakaamini mutulu. Kuhiñahu Yayeli wamwebeli nawa wamupopeli mpopu yakwitenti kumutu. Wafwili.

Baraki wenjili nakumukeñakeña Sisera. Yayeli wedikili mwitenti dindi nakumuleja nindi: ‘Iñilaku. Nukukuleja kudi iyala iwunakukeña.’ Baraki cheñililiyi wawanini Sisera wudi heseki nafwi. ABaraki naDebora amushimekeli Yehova mukamina chayikwashiliyi aIsarela kushinda ayilumbu jawu. Hadi yaaka 40 yalondelelihu, aIsarela ashakamineña mukuwunda.

Hikwadiña nzala yasweja muIsarela, kaIsarela wejina daNawomi wayili kwituña daMowabi hamu nanfumwindi nianyanawu awamayala ayedi. Chimwahitili mpinji, nfumwa Nawomi wafwili. Anyanindi asumbwili aLuti naOripa, ambanda akuMowabi. Chawushona, mukuhita kwampinji anyana kaNawomi afwili.

Nawomi chatiyiliyi nindi nzala yasweja yinamani muIsarela, wafuukwilihu kufunta kumukala wawu. ALuti naOripa ayili hamu nindi, ilaña hayileñawu Nawomi wayilili nindi: ‘Mwadiña ambanda amawahi kudi anyanami nawa atuwuku amawahi kudi ami. Inakukeña wejima wenu mwakasumbuki cheñi. Funtenu kumukala wenu kuMowabi.’ Awa ambanda amwilili nawu: ‘Twakukeña! Tukuya hamu naneyi.’ Nawomi watwalekelihu kuyila nindi afunti. Nkumininaku, Oripa wafuntili ilaña Luti wafuntili wanyi. Nawomi wamulejeli nindi: ‘Oripa nafunti kudi antu jindi nikudi anzambi jindi. Funtaku hamu nindi, muyi kumatala awa mama jenu.’ Ilaña Luti wahosheli nindi: ‘Nukukushiya wanyi. Antu jeyi akekala antu jami nawa Nzambi yeyi wakekala Nzambi yami.’ Wunakutoñojoka neyi Nawomi watiyili ñahi chahosheliyi Luti awa mazu?

ALuti naNawomi ashikili muIsarela hampinji yakutachika kumuna bali. Ifuku dimu, Luti wayili nakunonojola bali mwiha deyala wejina daBowazi, owu wadiña mwana kaRahaba. Watiyili nawu Luti wadiña mwini Mowabi wabulili kumushiya Nawomi. Wayilejeli akakumukalakela nindi ashiyeñamu bali yantesha mwiha, kulonda Luti anonojoleña.

Hanodu ifuku namelela, Nawomi wamwihwili Luti nindi: ‘Dalelu waya nakuzatila mwiha danyi?’ Luti wamwakwili nindi: ‘Mwiha deyala wejina daBowazi.’ Nawomi wamulejeli nindi: ‘Bowazi hintaña yanfumwami. Twalekakuhu kuzata mwiha dindi nawakwenu ayañadima. Kwosi chuma chatama chikukumwekena.’

Luti watwalekelihu kuzata mwiha daBowazi kushika nichamanini mpinji yakumuna. Bowazi wamumweneña Luti nindi wadiña mumbanda wadikita nawa wamuwahi muchima. Munana mafuku, neyi iyala afwa chakubula kuvwalahu anyana awamayala, ntaña yindi wasumbwileña owu mumbanda wunashali. Dichi Bowazi wamusumbwili Luti. Avweli mwana wejina daObedi, wekalili nkaaka yaMwanta Davidi. Amabwambu jaNawomi azañaleli. Ahosheli nawu: ‘Hakusambila Yehova wakwinkeli Luti, mumbanda wamuwahi kudi eyi, ichi nakwinki nimwijikulu weyala. Yehova ashimekewi.’