AIsarela alekeli cheñi kudifukula kudi Yehova nawa atachikili kudifukula kudi anzambi akutwamba. Eni Amoni chalukukiliwu aIsarela nakuzuña nawu, awa anzambi akutwamba hiyayikwashili aIsarelaku. AIsarela akabakeni hadi yaaka yayivulu. Nkumininaku, amulejeli Yehova nawu: ‘Tunakuvulumuni. Mwani twamwini kudi ayilumbu jetu.’ AIsarela akisañeni ankishi jawu nawa atachikili cheñi kudifukula kudi Yehova. Yehova hakeñeleña nindi aIsarela atwalekihu nakukabakanaku.

Mushidika wejina daYefwata amutondeli kulonda alomboli antu akuya nakuzuña njita nawaAmoni. Wamulejeli Yehova nindi: ‘Neyi wukutukwasha kushinda iyi njita, nakukani nami chinakafunta kwitala dami, nakakwinka muntu wejima wakasambila kwidika mwitala dami nakunkinkilila.’ Yehova watiyili kulomba kwaYefwata nawa wamukwashili kushinda njita.

Chafuntiliyi kwitala, muntu watachi kwinza nakumukinkilila wadiña mwanindi wamumbanda, mwanindi wumu hohu. Wadiña nakuhañana nikwimba ñoma yanyanya. Chumanyi cheliliyi Yefwata? Wanukili mwashiikiliyi nawa wahosheli nindi: ‘Yo-o mama mwanami wamumbanda! Wunambaluli muchima. Namukanini Yehova. Hakwila niili munakanini, natela kukutemesha wuyi nakukalakela hatabanaka muShilo.’ Ilaña mwanindi wamulejeli nindi: ‘Tata, neyi wamukanini Yehova, watela kwila muwakanini. Inakulombaku hohu nami wuñiteji niyi kumapidi hadi tukweji tuyedi hamu nawamabwambu jami awambanda. Kufumahu dinu nakayeña.’ Mwana kaYefwata wakalakeli chiwahi hatabanaka mafuku akuhanda kwindi kwejima. Chaaka-nichaaka amabwambu jindi ayileña kuShilo nakumutala.

Kapristu Muneni Eli wadiña nawanyana ayedi awamayala azatileña mudimu wawupristu hatabanaka. Majina awu adiña aHofini naFinihasi. Hiyovwahilileña nshimbi jaYehovaku, nawa akabishileña antu chikupu. Neyi aIsarela analeti nyilambu yakumulambula Yehova, aHofini naFinihasi asendeleña mbiji yayiwahi nankashi kulonda yiikali yawu. Eli amulejeleña yuma yelileña anyanindi ilaña kwosi chuma chelileñayi. Komana Yehova wetejeli yumiyi kutwalekahu?

Hela chakwila Samweli wadiña kansi nankashi hadi aHofini naFinihasi, hembujolileña yilwilu yawuku. Yehova wamutiyileña Samweli kuwaha. Ifuku dimu nawufuku iku Samweli nakaami, watiyili izu dinakumutambika. Wahindukili, wayili lufuchi kudi Eli nawa wamwilili nindi: ‘Yami onu!’ Ilaña Eli wamulejeli nindi: ‘Nakutambiki wanyi. Funtaku wakakaami.’ Samweli wafuntili cheñi nakukaama. Ilaña amutambikili cheñi. Samweli chatiyiliyi anamutambiki kamuchisatu, Eli wenjili nakwiluka nindi Yehova diyi wamutambikileña Samweli. Wamulejeli Samweli nindi neyi wukutiya anakutambiki cheñi, waakuli neyi: ‘Eyi Yehova, hoshaña. Ami kambuñeyi inakutiyilila.’

Samweli wafuntili cheñi nakukaama. Kuhiñahu watiyili anakumutambika nawu: ‘Samweli! Samweli!’ Yena waakwili nindi: ‘Hoshaña, muloña ami kambuñeyi inakutiyilila.’ Yehova wamulejeli nindi: ‘Wumuleji Eli neyi inakumubabesha hamu nichisaka chindi. Neluki nindi anyanindi anakukoña yuma yatama mutabanaka yami, ilaña kwosi chinakwilayi.’ Hefuku dalondelelihu nantetemena, Samweli wenzunwini yiisu yakutabanaka neyi chelileñayi mpinji yejima. Watiyili woma kumuleja Kapristu Muneni yuma yahosheliyi Yehova. Ilaña Eli wamutambikili nakumwihula nindi: ‘Eyi mwanami, nsañwinyi yakulejayi Yehova? Nleji nsañu yejima yakulejayi.’ Dichi Samweli wamulejeli Eli nsañu yejima.

Hampinji yakulileñayi Samweli, Yehova watwalekelihu kwikala nindi. Mwahita ituña dejima, aIsarela ejima elukili nawu Yehova wamutondeli Samweli kwikala kaprofwetu ninsompeshi.