Yehova wamulejeli Samweli nindi: ‘Yaku kwitala daYesi. Mwanindi wumu diyi wukwikala mwanta wamuchiyedi waIsarela.’ Dichi Samweli wayili kwitala daYesi. Chamweniyi mwana kaYesi wamukulumpi, watoñojokeli nindi: ‘Iwu mukwenzi watela diyi.’ Ilaña Yehova wamulejeli nindi diyi wanyi. Yehova wahosheli nindi: ‘Namonaña yuma yidi mumuchima wamuntu, bayi chamwekanañayi hanji hohuku.’

Yesi waleteli anyanindi amakwawu awamayala 6 kudi Samweli. Ilaña Samweli wahosheli nindi: ‘Yehova hanatondihu hela wumu hadi awa ejimaku. Wukwetihu anyana awamayala amakwawu?’ Yesi wahosheli nindi: ‘Kunashali mwanami wumu wakabinda, Davidi. Nayi nakudiisha nyikoku yami.’ Davidi chenjiliyi, Yehova wamulejeli Samweli nindi: “Diyeniwu!” Samweli wamuhuñunwinini manji hamutu nakumuwayisha kulonda akekali mwanta waIsarela.

Chimwahitili mpinji, aIsarela azuñileña njita nawaFilisitinu, owu adiña namushidika wataluka wejina daGoliyati wadiña nakuyizuñilaku. Ifuku niifuku, Goliyati wayisupishileña aIsarela. Wabidikileña nindi: ‘Temeshenu iyala wukuzuña nanami. Neyi wukushinda, etu tukwikala anduñu jenu. Ilaña neyi ami nishinda, enu mukwikala anduñu jetu.’

Davidi wayili kuchilombu chawamashidika awaIsarela nakuyitwalila amanakwindi adiña amashidika yakuda. Watiyili chahosheleñayi Goliyati nawa Davidi wahosheli nindi: ‘Nukuya nakuzuña nindi!’ Mwanta Sawulu wahosheli nindi: ‘Ilaña eyi wudi hohu kansi.’ Davidi wamwakwili nindi: ‘Yehova wukunkwasha.’

Sawulu wakeñeleña nindi Davidi avwali yakuvwala yindi yanjita, ilaña Davidi wahosheli nindi: ‘Hinukutwesha kuzuñila muniyi yumaku.’ Wasendeli mwonji windi wakwasa nachu nawa wayili kukaloña. Wasakwili malola asenena atanu nakuyisha mufuuba. Kuhiñahu Davidi wayili lufuchi kudi Goliyati. Iwu muntu wataluka wabidikili nindi: ‘Eyi kansi, inzaku kunu. Nukukuhana akudii kudi atuda amuluzwizu nikudi anyama amwisaña.’ Davidi watiyili woma wanyi. Niyena wabidikili nindi: ‘Eyi wunenzi nampoku yakabali niiyoña, ilaña ami nenjili mwijina daYehova. Wunakuzuña nanetu wanyi; wunakuzuña naNzambi. Antu ejima hanu akwiluka nawu Yehova wukweti ñovu kubadika mpoku yakabali hela iyoña. Wejima wenu wukuyihana mumakasa etu.’

Davidi washili ilola mumwonji windi wakwasa nachu nawa wawuzuyili nañovu. Nawukwashu waYehova, ilola dayili nakwiñila mwihama daGoliyati. Iwu iyala wataluka wadimbukili hamaseki nawa wafwili. Kuhiñahu aFilisitinu atemukili kulonda apulwishi mawumi awu. Komana wamukuhwelela Yehova neyi chamukuhweleleliyi Davidi?

Davidi chamujahiliyi Goliyati, Mwanta Sawulu wamutondeli kwikala mukulumpi wamashidika indi. Davidi washindili njita jajivulu nawa wayili mpuhu chikupu. Neyi nafumi kunjita, ambanda enjileña iku anakuhañana nikwimba nawu: ‘Sawulu natapi makombakaji nawa Davidi natapi makumi amakombakaji!’ Sawulu watachikili kumutiyila Davidi ichima nawa wakeñeleña kumujaha.

Davidi wembileña chiwahi kadada. Ifuku dimu iku nakumwimbila Sawulu kadada, mwanta wanatili iyoña dindi nindi amwasi. Davidi waleyeli nawa iyoña dashikeneni mumbañu. Kufuma hayoyenoyu mpinji, Sawulu wesekeli kapampa kakavulu nindi amujahi Davidi. Nkumininaku, Davidi watemukili nawa wayili nakuswama muchinkalampata.

Sawulu wasendeli amashidika 3,000 nawa wayili nakumukeñakeña Davidi nindi amujahi. Weñilili mwomwiyeñu mwaswaminiyi Davidi niantu jindi. Amayala adiña naDavidi amwilili nawu: ‘Ayinu diyi mpinji yeyi yakumujaha Sawulu.’ Davidi wayili wumweneni kudi Sawulu nawa waketwili kadihina kuchakuvwala chamwanta. Sawulu welukili wanyi. Hanyima yachumichi, Davidi watiyili kutama nankashi nachabuliliyi kumwekesha kalemesha kudi mwanta wawayishewa waYehova. Hayitejeli antu jindi kumulukuka Sawuluku. Nawa wamubidikili Sawulu nindi, wadi kumujaha Sawulu hadiñayi nakukooleka kwakumujaha. Komana Sawulu wahimpili yitoñojoka yindi yakukeña kumujaha Davidi?

Inehi. Watwalekelihu kumukeñakeña Davidi nindi amujahi. Ifuku dimu nawufuku, Davidi nimwihwindi Abishayi eñilili muchilombu chaSawulu mukuswamujoka. Nhembi yaSawulu, Abineri, niyena wadiña mutulu. Abishayi wahosheli nindi: ‘Ayinu diyi mpinji yetu! Lekaku nimujahi.’ Davidi wamwakwili nindi: ‘Yehova diyi wakamubabesha Sawulu. Tukuminenu hohu dakusenda iyoña dindi ninsaba yindi yamenji tuyeña.’

Davidi wakandamini hampidi yadiña kwakwihi yatalañeni nachilombu chaSawulu. Wabidikili nindi: ‘Abineri, muloñadi chiwabulila kumukiña mwanta weyi? Nsaba niiyoña daSawulu jidi kudihi?’ Sawulu wenjili nakwiluka nindi hiizu daDavidi, nawa wahosheli nindi: ‘Wadi kunjaha ilaña hiwunanjahiku. Neluki nami yeyi wakekala mwanta wamuchiyedi waIsarela.’ Sawulu wafuntili kuchipañu chindi. Bayi neyi antu ejima amuchisaka chaSawulu amuheleli Davidiku.