Yonatani mwana kaMwanta Sawulu wamukulumpi, wadiña mushidika wahamuka. Davidi wahosheli nindi Yonatani wadiña watemuka kubadika mbuulu nawa wakola kubadika mutupa. Ifuku dimu Yonatani wamweni amashidika 20 awaFilisitinu adi hakapidi. Wamulejeli mukakumusendela yitwa yanjita nindi: ‘Tukuyilukuka hohu chiña neyi Yehova natwinki chinjikijilu. Neyi aFilisitinu akutuleja nawu kandukenu mwinzi kunu, dihitukuyilukuka.’ AFilisitinu abidikili nawu: ‘Kandukenu tuzuñi!’ Dichi awa amayala ayedi akandamini hakapidi nawa ayishindili amashidika.

Chineli yena diyi wadiña mwana kaSawulu wamukulumpi, Yonatani diyi wateleleli kumusinsa tata yindi hawanta. Ilaña Yonatani welukili nindi Yehova wamutondeli Davidi kwikala mwanta wamuchiyedi waIsarela, hela chochu, hamutiyilili ichimaku. AYonatani naDavidi ekalili amabwambu chikupu. Adishiikili nawu akudikiñaña nikudikwasha. Yonatani wamwinkeli Davidi chakuvwala chindi, mpoku yakabali, wuta wamukunji nimushipi, chuma chamwekesheleña nawu hiyamabwambu.

Davidi chamutemukileñayi Sawulu, Yonatani wayili kudi Davidi nakumuleja nindi: ‘Kolaku nawa hamukaku. Yehova nakutondi kulonda wakekali mwanta. Nitata yami neluki chumochu.’ Wunakukeña kwikala nebwambu wamuwahi wudi neyi Yonatani?

Kakavulu, Yonatani washileña wumi windi muwubanji kulonda amukwashi ibwambu dindi. Welukili nindi Mwanta Sawulu nakukeña kumujaha Davidi, dichi wamulejeli tata yindi nindi: ‘Wukuvulumuna neyi wumujaha Davidi, muloña kwosi chuma chatama chinakoñiyi.’ Sawulu wamuhililili Yonatani. Chimwahitili yaaka, aSawulu naYonatani afwilili hamu kunjita.

Chelili Yonatani nafwi dehi, Davidi wamukeñakeñeli mwana kaYonatani Mefibosheti. Davidi chamuwaniniyi Mefibosheti, wamulejeli nindi: ‘Chineli tata yeyi wadiña ibwambu dami chikupu, nukukuhembaña mafuku ejima akuhanda kweyi. Wukushakamaña muchipañu chami nawa wukudaña kumesa yami.’ Davidi hamuvulameneni ibwambu dindi Yonataniku.

Sawulu chafwiliyi, Davidi wekalili mwanta. Wadiña nayaaka 30 hekaliliyi mwanta. Hanyima yakwila nashakami dehi hawanta hadi yaaka yayivulu, ifuku dimu nawufuku hadiñayi hewulu detala dindi, wamweni mumbanda walubanji. Davidi wenjili nakwiluka nindi ona mumbanda ijina dindi Batisheba nawa ñoda mushidika wejina daUriya. Davidi wamutambikili Batisheba kuchipañu chindi. Davidi wakaamini nindi nawa Batisheba wemitili. Davidi wakeñeleña kusweka yuma yeliliyi. Wamulejeli mukulumpi windi wamashidika kumusha Uriya kumbidi yanjita, kufumahu wena afuntili kunyima yindi. Chelili Uriya anamujahi dehi kunjita, Davidi wasumbwili Batisheba.

Ilaña Yehova wamweni yuma yatama yejima yamwekeni. Chumanyi cheliliyi? Yehova wamutemesheli kaprofwetu Natani kuya kudi Davidi. Natani wahosheli nindi: ‘Kwadiña iyala samaheta wadiña nanyikoku yayivulu niiyala kazweñi wadiña hohu namukoku wumu wanyanya wakeñeliyi nankashi. Iwu samaheta wanoneli mwana kamukoku waniwu kazweñi wumu hohu wadiñayi nindi.’ Davidi wazuwili nakuhosha nindi: ‘Owu iyala samaheta watela kufwa!’ Kufumahu Natani wamulejeli Davidi nindi: ‘Owu iyala samaheta yeyi!’ Davidi watiyili kutama nankashi nawa wamulejeli Natani nindi: ‘Namuvulumuni Yehova.’ Iyi nshidi yaleteli kukala kwakuvulu hadi Davidi nichisaka chindi. Yehova wamubabesheli ilaña wamwitejeli kutwalekahu kuhanda muloña wadiña washinshika nawa wovwahila.

Davidi wakeñeleña kumutuñila Yehova tembeli, ilaña Yehova wamutondeli Solomoni mwana kaDavidi kulonda atuñi tembeli. Davidi watachikili kumuloñeshela Solomoni yuma yakuzatisha hakutuña nawa wahosheli nindi: ‘Tembeli yaYehova yatela kwikala yeneni. Solomoni wuchidi kansi, ilaña nukumukwasha kuhitila mukumuloñeshela yuma chadimu.’ Davidi wahanini mali amavulu kulonda akwashi iwu mudimu wakutuña. Waleteli antu elukisha nyidimu. Wapompesheli wuru nisiliva nawa walejeli antu kuleta nyitondu yanyisida kufuma kuTira nikuSidoni. Chadiñayi kwakwihi nakufwa, Davidi wamwinkeli Solomoni pulani yakutuñilamu tembeli. Wahosheli nindi: ‘Yehova wanlejeli nindi nikusonekeli iyi yuma. Yehova wukukukwashaña. Bayi wutiya womaku. Kolaku nawa kazati mudimu.’