Solomoni chekaliliyi mwanta waIsarela, Yehova wamwihwili nindi: ‘Chumanyi chiwukukeña neyi nukwinki?’ Solomoni wahosheli nindi: ‘Nichidi hohu kansi, nawa neluki wanyi yuma yinnakwila. Mwani nyinki maana kulonda nitwesha kuhemba chiwahi antu jeyi.’ Yehova wahosheli nindi: ‘Chineli wunalombi maana, nukukwilisha wiikali namaana kubadika antu ejima hamaseki. Nukukwinka cheñi nimaheta amavulu. Nawa neyi wukuñovwahilaña, nakakwilisha wakahandi yaaka yayivulu.’

Solomoni watachikili kutuña tembeli. Wazatishili wuru yasweja kuwaha, siliva, nyitondu nimalola. Amayala niambanda amavulu nankashi elukili nyidimu, azatili mudimu wakutuña tembeli. Chimwahitili yaaka 7, ayimanishili nawa mpinji yakuyihana kudi Yehova yashikili. Mwadiña kameña, nawa hakameña hadiña nyilambu. Solomoni wafukamini kumbidi yakameña nakulomba nindi: ‘Eyi Yehova, iyi tembeli yinakukeheli nawa yayiwahi wanyi yakwila eyi wushakamimu, ilaña itejaku kudifukula kwetu nawa tiyililaku kukulomba kwetu.’ Yehova watiyili ñahi haniyi tembeli nikulomba kwaSolomoni? Solomoni chamanishiliyi hohu kulomba, kesi kafumini mwiwulu nawa kwocheli nyilambu yadiña hakameña. Yehova wayitejeli iyi tembeli. AIsarela chamweniwu chumichi, azañaleli.

Mwanta Solomoni amwilukili nawu wukweti maana muIsarela mwejima nikumaluña akwakulehi. Antu enjileña kudi Solomoni kulonda ayikwashi nakukala kwadiñawu naku. Nimwanta wamumbanda wakuSheba wenjili kulonda amweseki Solomoni namalwihu akala. Chatiyiliyi chamwakwiliwu kudi Solomoni, wahosheli nindi: ‘Hinakuhweleleli nsañu yanlejeliwu antu kutalisha hadi eyiku, ilaña ichi namoni nami wukweti maana chikupu kubadika nichahosheliwu. Nzambi yeyi, Yehova, nakukiswili.’ Haniyi mpinji, muza waIsarela washakamineña chiwahi nawa antu adiña namuzañalu. Hela chochu, yuma yadiña kwakwihi nakuhimpa.

Solomoni chadifukwileñayi kudi Yehova, muIsarela mwadiña kuwunda. Ilaña wasumbwili ambanda amavulu akumatuña acheñi, nawa awa ambanda adifukwileña kudi ankishi. Solomoni wahimpileña chovu-chovu, nawa niyena watachikili kudifukula kudi ankishi. Yehova wahilili. Wamulejeli Solomoni nindi: ‘Isarela akamuhukula muchisaka cheyi nawa akamwaambula hayedi. Nakahana chibalu cheneni kudi kambuñeyi wumu, nawa chisaka cheyi chakayuulaña hohu chibalu chanyanya.’

Yehova wazatishili njila yikwawu kulonda amwekeshi chuma chakeñeleñayi kwila. Kambuña aSolomoni wumu, Yerobowami, wayileña munjila hamubulakeniyi kaprofwetu Ahiya. Ahiya watabwili munkukumba windi muyibeli 12 nawa wamulejeli Yerobowami nindi: ‘Yehova wukutambula wanta waIsarela muchisaka chaSolomoni nakuwaambula hayedi. Tambulaku yibeli 10, muloña wukwikala mwanta wanyichidi 10.’ Mwanta Solomoni watiyili iyi nsañu nawa wakeñeleña kumujaha Yerobowami! Dichi Yerobowami watemukilili kuEjipitu. Mukuhita kwampinji, Solomoni wafwili nawa mwanindi Rehobowami wekalili mwanta. Kuhiñahu, Yerobowami wamweni nindi iyi diyi mpinji yayiwahi yakufunta kuIsarela.

Akulumpi amuIsarela amulejeli Rehobowami nawu: ‘Neyi wukuyihembaña chiwahi awa antu, akwikalaña ashinshika kudi eyi.’ Ilaña amabwambu jaRehobowami anyikwenzi amulejeli nawu: ‘Watela kuyikabisha antu! Wuyizatisheña chikupu!’ Watiyilili mwamulejeli amabwambu jindi. Wayikabishileña antu chikupu nawa adikañili nindi. Amwilishili Yerobowami kwikala mwanta wanyichidi 10, watachikili kutenawu nawu wanta waIsarela. Nyichidi yashalilihu yiyedi atachikili kuyitena nawu wanta waYuda, nawa yatwalekelihu kwikala yashinshika kudi Rehobowami. Haniyi mpinji, nyichidi 12 yaIsarela ayaambwili.

Yerobowami hakeñeleña antu jindi kuya nakudifukula muYerusalemaku, yadiña muwanta waRehobowami. Wuneluki chaletesheli? Wachiinineña nindi antu akumushiya nakutachika kukalakela Rehobowami. Dichi wabazili anyana kañombi awuru ayedi nawa walejeli antu nindi: ‘Yerusalema yidi kwakulehi nankashi. Munateli kudifukwila kunu.’ Antu atachikili kudifukula kudi anyana kañombi awuru nawa amuvulameneni cheñi Yehova.